سۋرەتتە: مارافون جارىسىنان كورىنىس. سۋرەتتى ساي جىنيۇي تۇسىرگەن
تىلشىلەرىمىز جاڭ جينفىڭ، ەرىكتى تىلشىلەر گاۋ حۇڭيە، ساي جىنيۇي، ما يۇي حابارلايدى. 5 - ايدىڭ 18 - كۇنى تۇستەن بۇرىن ”جياڭسۋ - ىلە سۇيىسپەنشىلىگى. نانجيڭ مەن قۇلجا ساپارلاس“ اتىنداعى 2025 - جىلعى ىلە وزەنى مارافون جارىسى جانە ”كورىكتى شينجياڭدى ارالاپ شىعۋ“ اتىنداعى قۇلجا بەكەتى قيمىلى ىلە وزەنى بويىندا وتكىزىلدى.
وسى رەتكى ىلە وزەنى مارافون جارىسىنىڭ نەگىزگى لەنياسى ىلە وزەنى، التىشۋار كوشەسى، ىلە بايىرعى قالاسى قازانشى ۇلتتىق سالت ـ سانا ساياحات رايونى سياقتى جەرگىلىكتى ايگىلى كورىنىس رايوندارىن، كورىنىس تۇيىندەرىن تۇتاستىرىپ، ”جىلجىمالى كورىنىس كاريدورىن“ قالىپتاستىردى، جارىسقا قاتىناسۋشىلار سپورتتىڭ شاتتىعىنا شومىپ، وزگەشە تابيعات جانە گۋمانيتارلىق كورىنىستەن ٴلاززاتتاندى.
جارتىلاي ارالىقتى مارافون جارىسى بويىنشا ەرلەر گرۋپپاسىنىڭ اعا جۇلدەگەرى دوسبول قابىلجان بىلاي دەدى: ”وسىنداعى جارىستا اعا جۇلدەگەر بولىپ، قاباعات قۋاندىم. جول بويى كورەرمەندەر بىزگە مەدەت بەردى ٴارى بىزگە سۋسىن جەتكىزىپ بەردى. كوپشىلىكتىڭ ىلەگە ساياحاتتاي كەلۋىن قارسى الامىز“.
جارىسقا قاتىناسۋشىلار تاماشا اۋا رايىندا سپورتتىڭ قىزىعىنا باتىپ، جۇگىرە ٴجۇرىپ ىلە وزەنى جاعاسىنداعى جاراتىلىستىق كورىنىستەردى تولىق تاماشالاپ، كوپ نەگىزدى مادەنيەتتىڭ توعىسۋىنىڭ قۇدىرەتىن سەزىنە ٴتۇستى.
سىچۋاننان كەلگەن جارتىلاي ارالىقتى مارافون جارىسىنا قاتىناسۋشى ۋاڭ ياڭلۋ بىلاي دەدى: ”بۇگىن ەرەكشە ريزامىن، جاعدايىم ەرەكشە جاقسى. سپورت مەنىڭ كوڭىل كۇيىمدى ونان ارى جادىراتتى“.
وسى رەتكى جارىستى قۇلجا قالالىق حالىق ۇكىمەتى ۇيىمداستىرىپ، قۇلجا قالالىق مادەنيەت، دەنە تاربيە، راديو - تەلەۆيزيا جانە ساياحات مەكەمەسى ۇستىنە الدى، جياڭسۋدىڭ ىلەگە كومەك بەرۋ قولباسشىلىق شتابى نانجيڭ قىزمەت گرۋپپاسى قولداپ - قۋاتتادى. جارىس ەل ٴىشى - سىرتىنان 15 مىڭعا جۋىق ادامدى باۋرادى، مۇنىڭ ىشىندە جاسى ەڭ ۇلكەنى 83 جاستا، ەڭ كىشكەنەسى 5 جاستا.
2023 - جىلى ىلە وزەنى مارافون جارىسى وتكىزىلگەننەن بەرى، بۇل جارىس 30 مىڭنان استام ادامدى قاتىناسۋعا باۋرادى. مۇندا بيىلعى ىلە وزەنى مارافون جارىسىنا قاتىناسۋشىلارعا ونەر ساحناسىن ازىرلەپ بەرۋ ماقسات ەتىلۋمەن بىرگە، ونان دا ماڭىزدىسى، ”جۇگىرۋ + ساياحات + ٴدامدى تاعام“ سىندى جاڭالىق اشۋ ۇلگىسى ارقىلى قاتىناسۋشىلارعا تەرەڭ اسەر قالدىردى.