شۇي چين، چىن شياۋجياڭ، ەركىن تۇنياز، حى جۇڭيوۋ، جاڭ انشۇن، جاڭ جۋ قيمىلعا قاتىناستى

7 ـ ايدىڭ 10 ـ كۇنىنەن 12 ـ كۇنىنە دەيىن حيلۇڭجياڭ ولكەسىنىڭ پارتيا، ۇكىمەت ۋاكىلدەر ۇيىرمەسى شينجياڭعا كەلىپ، شينجياڭعا باعىتتامالى كومەكتەسۋ قىزمەتىن تەكسەردى، ٴتۇيىلىستىردى. سۋرەتتە: 7 ـ ايدىڭ 10 ـ كۇنى حيلۇڭجياڭ ولكەسى . شينجياڭ ۇيعۇر اۆتونوميالى رايونى جانە شينجياڭ ٴوندىرىس ـ قۇرىلىس بيڭتۋانىنىڭ قىزمەت اۋىس ـ كۇيىسى اڭگىمە ٴماجىلىسى ۇرىمجىدە وتكىزىلدى.

□سۋرەتتى انار بۇلت \ شينجياڭ گازەتىنىڭ ٴتىلشىسى سۇي جىجيان تۇسىرگەن

انار بۇلت \ شينجياڭ گازەتىنىڭ ٴتىلشىسى ۋاڭ شيڭرۇي 7 ـ ايدىڭ 12 ـ كۇنى ۇرىمجىدەن حابارلايدى. 7 ـ ايدىڭ 10 ـ كۇنىنەن 12 ـ كۇنىنە دەيىن حيلۇڭجياڭ ولكەسىنىڭ پارتيا، ۇكىمەت ۋاكىلدەر ۇيىرمەسى شينجياڭعا كەلىپ، شينجياڭعا باعىتتامالى كومەكتەسۋ قىزمەتىن تەكسەرىپ، ٴتۇيىلىستىرىپ، ەكى جەردىڭ اۋىس ـ كۇيىسىن، سەلبەستىگىن تەرەڭدەتتى. ەكى جاق قىزمەت اۋىس ـ كۇيىس اڭگىمە ٴماجىلىسىن وتكىزىپ، باس شۋجي شي جينپيڭنىڭ جانە پارتيا ورتالىق كوميتەتىنىڭ جاڭا داۋىردە شينجياڭعا باعىتتامالى كومەكتەسۋ قىزمەتىن تەرەڭدەتۋ جونىندەگى شەشىمدەرى مەن ورنالاستىرۋلارىن ىشكەرىلەي ۇيرەنىپ، دايەكتىلەندىرىپ، 10 ـ رەتكى مەملەكەتتىك شينجياڭعا باعىتتامالى كومەكتەسۋ قىزمەتى ٴماجىلىسىنىڭ تالابىن تياناقتاندىرىپ، شينجياڭعا باعىتتامالى كومەكتەسۋدىڭ جالپىلىق ونىمدىلىگىن جوعارىلاتۋدى بىرگە اقىلداسىپ، ەكى ولكە، اۆتونوميالى رايوننىڭ ناقتى سەلبەستىگىنىڭ تىڭ ساتىعا كوتەرىلۋىن ىلگەرىلەتتى. حيلۇڭجياڭ ولكەلىك پارتكومنىڭ شۋجيى، ولكەلىك حالىق قۇرىلتايى تۇراقتى كوميتەتىنىڭ مەڭگەرۋشىسى شۇي چين، اۆتونوميالى رايوندىق پارتكومنىڭ شۋجيى، بيڭتۋان پارتكومىنىڭ ٴبىرىنشى شۋجيى چىن شياۋجياڭ، اۆتونوميالى رايوندىق پارتكومنىڭ ورىنباسار شۋجيى، اۆتونوميالى رايوننىڭ ٴتوراعاسى ەركىن تۇنياز، اۆتونوميالى رايوندىق پارتكومنىڭ ورىنباسار شۋجيى، بيڭتۋاننىڭ جىڭۋيى حى جۇڭيوۋ، حيلۇڭجياڭ ولكەلىك پارتكومنىڭ ورىنباسار شۋجيى، ولكەلىك حالىق قۇرىلتايى تۇراقتى كوميتەتىنىڭ ورىنباسار مەڭگەرۋشىسى جاڭ انشۇن، اۆتونوميالى رايوندىق پارتكومنىڭ ورىنباسار شۋجيى، ٴۇرىمجى قالالىق پارتكومنىڭ شۋجيى جاڭ جۋ قاتىستى قيمىلدارعا قاتىناستى.

7 ـ ايدىڭ 10 ـ كۇنى حيلۇڭجياڭ ولكەسى . شينجياڭ ۇيعۇر اۆتونوميالى رايونى جانە شينجياڭ ٴوندىرىس ـ قۇرىلىس بيڭتۋانىنىڭ قىزمەت اۋىس ـ كۇيىس اڭگىمە ٴماجىلىسى ۇرىمجىدە وتكىزىلدى. چىن شياۋجياڭ اۆتونوميالى رايوندىق پارتكوم، ۇكىمەت جانە بيڭتۋان اتىنان حيلۇڭجياڭ ولكەسىنىڭ پارتيا، ۇكىمەت ۋاكىلدەر ۇيىرمەسىنىڭ كەلگەندىگىن قارسى الدى، ۇزاق ۋاقىتتان بەرگى قالتقىسىز كومەگىنە العىس ايتتى. ول بىلاي دەدى: حيلۇڭجياڭ باس شۋجي شي جينپيڭنىڭ جانە پارتيا ورتالىق كوميتەتىنىڭ شينجياڭعا باعىتتامالى كومەكتەسۋ قىزمەتى جونىندەگى ورنالاستىرۋلارىن، تالاپتارىن ىشكەرىلەي دايەكتىلەندىرىپ، كومەك قابىلداعان جەردىڭ قۇرىلىسىن، دامۋىن جانە حالىق تۇرمىسىن جاقسارتۋىن بار كۇشپەن قولداپ، شينجياڭعا كومەككە كەلگەن توپ ـ توپ كادر كوپتىڭ قامى ٴۇشىن وتباسىن قيىپ، بار ىنتا ـ پەيىلدەرىمەن شينجياڭعا كومەكتەسۋ ىستەرىنە ات سالىسىپ، مەملەكەت سۇيىسپەنشىلىگى مەن جاۋاپكەرشىلىك ارقالاۋىن ايگىلەپ، شينجياڭداعى ٴار ۇلت بۇقاراسىنا سوتسياليستىك ٴتۇزىمنىڭ وزگەشە باسىمدىعى مەن وتان ۇلى شاڭىراعىنىڭ مەيىرىن تەرەڭ سەزىندىردى. سوڭعى جىلدارى حيلۇڭجياڭ مەملەكەتتىڭ ”بەس ۇلكەن حاۋىپسىزدىگىن“ قورعاۋ ماڭىزدى بورىشىن باتىل ارقالاپ، جوعارى ساپالى گۇلدەنۋدى، دامۋدى ىلگەرىلەتۋدە تىڭ ناتيجەگە قول جەتكىزدى، ٴبىز مۇنى شىن جۇرەكتەن قۇتتىقتايمىز. شينجياڭ 10 ـ رەتكى مەملەكەتتىك شينجياڭعا باعىتتامالى كومەكتەسۋ قىزمەتى ٴماجىلىسىنىڭ رۋحىن دايەكتىلەندىرىپ، تياناقتاندىرىپ، حيلۇڭجياڭمەن بىرگە كومەكتەسكەن، كومەك قابىلداعان ەكى جاقتىڭ بەلسەندىلىگىن ساۋلەلەندىرىپ، شينجياڭعا باعىتتامالى كومەكتەسۋدىڭ جالپىلىق ونىمدىلىگىن جوعارىلاتىپ، ەكى جەردىڭ دامۋ ستراتەگياسىن ٴتۇيىلىستىرۋدى تەرەڭدەتىپ، كاسىپ سالاسىنىڭ دامۋى، سىرتقا ەسىك اشۋ، قار ـ مۇز ساياحاتى سياقتى سالالارداعى سەلبەستىكتى كۇشەيتىپ، جوعارى ساپالى دامۋدى قول ۇستاسا ىلگەرىلەتىپ، جۇڭگو ۇلگىسىندەگى وسىزامانداندىرۋ قۇرىلىسىنا كۇش قوسادى.

شۇي چين ولكەلىك پارتكوم، ولكەلىك ۇكىمەت اتىنان شينجياڭنىڭ ۇزاق ۋاقىتتان بەرى حيلۇڭجياڭدى زور كۇشپەن قولداعاندىعىنا جانە حيلۇڭجياڭ كومەككە جىبەرگەن كادرلارعا، دارىندىلارعا كوڭىل ٴبولىپ، قامقورلىق جاساعاندىعىنا العىس ايتتى، شينجياڭنىڭ ەكونوميكالىق، قوعامدىق دامۋدا قول جەتكىزگەن تابىستارىن قۇتتىقتادى. ول بىلاي دەدى: باس شۋجي شي جينپيڭنىڭ جانە پارتيا ورتالىق كوميتەتىنىڭ پارمەندى باسشىلىعىندا، شينجياڭ تاپسىرمانى ەستە بەرىك ساقتاپ، ىنتىماقتاسا ەكپىندەي ىلگەرىلەپ، ”بەس ۇلكەن ستراتەگيالىق ورىندى“ مۇقيات تياناقتاندىرىپ، جۇڭگو ۇلگىسىندەگى وسىزامانداندىرۋدىڭ شينجياڭ امالياتىن تىڭعىلىقتى ىلگەرىلەتتى، تيانشان الابىندا گۇلدەنىپ ـ كوركەيگەن قۋانارلىق جاعداي جارىققا شىقتى. حيلۇڭجياڭ باس شۋجي شي جينپيڭنىڭ ماڭىزدى ٴسوزىنىڭ، ماڭىزدى نۇسقاۋىنىڭ رۋحىن جانە پارتيا ورتالىق كوميتەتىنىڭ شەشىمدەرىن، ورنالاستىرۋلارىن جاپپاي دايەكتىلەندىرىپ، 10 ـ رەتكى مەملەكەتتىك شينجياڭعا باعىتتامالى كومەكتەسۋ قىزمەتى ٴماجىلىسىنىڭ رۋحىن مۇقيات تياناقتاندىرىپ، باعىتتامالى كومەكتەسۋ كەلەلى ساياسي جاۋاپكەرشىلىگىن باتىل ارقالاپ، جۇڭحۋا ۇلتى ورتاق تۇلعا تانىمىن بەكەمدەپ، شينجياڭعا باعىتتامالى كومەكتەسۋ قىزمەت مەحانيزمىن اناعۇرلىم كەمەلدەندىرىپ، كاسىپ سالاسى جاعىنان شينجياڭعا كومەكتەسۋدى، حالىق تۇرمىسى جاعىنان شينجياڭعا كومەكتەسۋدى، وقۋ ـ اعارتۋ جاعىنان شينجياڭعا كومەكتەسۋدى، دارىندىلار جاعىنان شينجياڭعا كومەكتەسۋدى جانە شينجياڭدى مادەنيەتپەن نارلەندىرۋدى ىشكەرىلەي اتقارىپ، عىلىم ـ تەحنولوگيادا جاڭالىق اشۋ، وسى زامانعى اۋىل شارۋاشىلىعى، وقۋ ـ اعارتۋ، ەمدەۋ، ەرەكشە مادەنيەت ـ ساياحات، سىرتقا ەسىك اشۋ سياقتى سالالارداعى تەرەڭ سەلبەستىكتى قول ۇستاسا ىلگەرىلەتىپ، ”15 ـ بەسجىلدىق“ شينجياڭعا كومەكتەسۋ جوباسىن عىلمي جاساپ، ەكى جەردىڭ جوعارى ساپالى دامۋىنىڭ جاڭا جاعدايىن بىرگە اشۋى كەرەك.

اڭگىمە ماجىلىسىندە ەكى جاقتىڭ قاتىستى باسشىلارى اۆتونوميالى رايون مەن بيڭتۋاننىڭ ەكونوميكالىق، قوعامدىق دامۋى جانە حيلۇڭجياڭمەن اۋىس ـ كۇيىس، سەلبەستىك جاساۋ جاعدايى، حيلۇڭجياڭنىڭ ەكونوميكالىق، قوعامدىق دامۋى جانە باعىتتامالى كومەكتەسۋ قىزمەتىنىڭ جاعدايى جونىندە جەكە ـ جەكە مالىمەت بەردى ٴارى جىلۋ اتاۋ سالتىن وتكىزدى.

شينجياڭداعى كەزىندە ۋاكىلدەر ۇيىرمەسى ۇرىمجىدە بوشىران زەردەلى اۋىل شارۋاشىلىعى ماشينالارى شەكتى سەرىكتەستىگىندە تەكسەرۋدە بولدى؛ التاي ايماعىنىڭ وسى زامانعى اۋىل شارۋاشىلىق، عىلىم ـ تەحنولوگيا، وقۋ ـ اعارتۋ جانە ينفورماتسيالاندىرۋدان ۇلگى كورسەتۋ باقشا رايونىنا، بيڭتۋان 10 ـ شى بەيتۇن ەكونوميكالىق، تەحنولوگيالىق اشۋ رايونىنا جانە 188 ـ تۋانعا بارىپ، باقشا رايونىنىڭ دارەجەسىن جوعارىلاتۋ، جاڭالاۋ، كاسىپ سالاسى جاعىنان شينجياڭعا كومەكتەسۋ جانە سەلبەسۋ جاعدايىن تەكسەردى؛ التاي ايماقتىق حالىق شيپاحاناسىنا، بەيتۇن كاسىپتىك تەحنولوگيالىق مەكتەبىنىڭ جاڭا مەكتەپ رايونىنا بارىپ، ەمدەۋ جاعىندا شينجياڭعا كومەكتەسۋ جانە مەكتەپ قۇرىلىسىنىڭ اياق الىسىن تەكسەردى؛ التاي ايماقتىق مۇراجايدا جەرگىلىكتى ورىننىڭ تاريحي مادەنيەتىن ۇعىستى ٴارى التاي ايماقتىق ازىق ـ تۇلىك، ٴدارى ـ دارمەك تەكسەرۋ ورنىنا كەلىپ، ازىق ـ تۇلىك تەكسەرۋ قۇرىلىمدارىنىڭ جۇپ قۇراپ بىرگە قۇرۋ ونىمدىلىگىنە تەكسەرۋ ـ زەرتتەۋ جۇرگىزدى. التايدا ۋاكىلدەر ۇيىرمەسى شينجياڭعا كومەككە كەلگەن كادرلارعا، دارىندىلارعا امانداسا باردى ٴارى اڭگىمە ٴماجىلىسىن اشتى.

حيلۇڭجياڭ ولكەسىنىڭ باسشىلارىنان چىن شاۋبو، اۆتونوميالى رايون مەن بيڭتۋاننىڭ باسشىلارىنان چىن ۋيجۇن، ٴيۇسۇپجان مامەت، قادەن كابەن، شۋە بين قاتىستى قيمىلدارعا قاتىناستى.