قازىر ىلە وبلىستىق قامداۋ - ساتۋ كووپەراتيۆىنىڭ شينجياڭ سىرتىنداعى بازارلارعا جونەلتكەن ونىمدەرىنىڭ قۇنى 30 ميلليون يۋاننان استى

تىلشىلەرىمىز دۋ لەي، حان شاشا حابارلايدى. 8 - ايدىڭ 8 - كۇنى ىلە وبلىستىق قامداۋ - ساتۋ كووپەراتيۆى جياڭسۋدىڭ ىلەگە كومەك بەرۋ الدىڭعى شەپ قولباسشىلىق شتابىنىڭ قولداۋىندا، ىلەنىڭ قۇنى ٴبىر ميلليون 500 مىڭ يۋاندىق 4500 دەن استام ساپالى اۋىل شارۋاشىلىق قوسىمشا ونىمدەرى جياڭسۋ بازارىنا ٴساتتى جەتكىزىلدى.

وسى رەتكى ”ىلە ونىمدەرىنىڭ شينجياڭنان شىعارىلىپ جياڭسۋعا جەتكىزىلۋى“ جياڭسۋداعى تۇتىنۋشىلارعا تازا ”ىلە ٴدامىن“ الا كەلۋمەن بىرگە، ىلەدەگى ەگىنشى - مالشىلار ٴۇشىن كىرىسىن ارتتىرۋدىڭ جاڭا جولىن اشىپ، اۋىل - قىستاقتى گۇلدەندىرۋگە قۋاتتى جاڭا قوزعاۋشى كۇش ۇستەدى.

جۇك تيەۋ ورنىندا مۋمينرىنجيا، يمەيشياڭ، مياۋگۋيۋان، جۇڭماۋ استىق - ماي سەرىكتەستىگى، شينتيان كۇرىش كاسىبى، يفان بيو عىلىم - تەحنولوگياسى، گوشياۋجياڭ سياقتى ىلەدەگى ايگىلى ماركالى كۇرىش، ٴسۇت ونىمدەرى، كەپتىرىلگەن سيىر ەتى، قىشى مايى، ماقسارى مايى، بال، كەپتىرىلگەن جەمىس سياقتى ەرەكشە اۋىل شارۋاشىلىق ونىمدەرى سالىنعان جاشىكتەر جۇك اۆتوموبيلىنە تيەلدى.

بيىل جىل باسىنان بەرى، ىلە وبلىستىق قامداۋ - ساتۋ كووپەراتيۆى اۋىل شارۋاشىلىق ونىمدەرى اينالىمىنىڭ نەگىزگى ارنالىق رولىن تولىق ساۋلەلەندىرىپ، بازار سۇرانىسىمەن بەلسەنە ۇشتاستىرىپ، جەلىدە جانە جەلىدەن تىس ساتۋ سىندى كوپ نەگىزدى ۇلگى ارقىلى ىلەنىڭ ساپالى اۋىل شارۋاشىلىق قوسىمشا ونىمدەرىنىڭ ساتىلۋ ارناسىن بەلسەنە كەڭەيتىپ، اۋىل شارۋاشىلىق كاسىپ سالاسىنىڭ دامۋى مەن ەگىنشى - مالشىلاردىڭ كىرىسىن ارتتىرۋعا دەم بەردى. سونىمەن بىرگە، قامداۋ - ساتۋ جۇيەسىنىڭ ۇيىمدىق جانە توراپ باسىمدىعى سىندى ەرەكشەلىگىن ساۋلەلەندىرىپ، جەرگىلىكتى ساپالى اۋىل شارۋاشىلىق قوسىمشا ونىمدەرى بايلىعىن ىشكەرىلەي اشىپ، 100 دەن استام ساپالى قامداۋ تىزبەگى جۇيەسىن قۇردى.

قازىرگە دەيىن ىلە وبلىستىق قامداۋ - ساتۋ كووپەراتيۆى شينجياڭ سىرتىنداعى بازارلارعا 21 اۆتوكولىك (رەت) اۋىل شارۋاشىلىق قوسىمشا ونىمدەرىن جونەلتكەن، مۇنىڭ جالپى سوماسى 30 ميلليون يۋاننان اسىپ، ”ىلە ٴدامىنىڭ“ شينجياڭنان شىعىپ، بۇكىل ەلگە بەت الۋىنا جوعارى ٴونىمدى، ىركىلىسسىز قامداۋ - ساتۋ ارناسىن ازىرلەپ، ىلەنىڭ ساپالى اۋىل شارۋاشىلىق قوسىمشا ونىمدەرىنىڭ بۇكىل ەلدەگى سان مىڭداعان وتباسىنا جەتۋىنە ٴساتتى دەم بەردى.

بۇدان بىلاي ىلە وبلىستىق قامداۋ - ساتۋ كووپەراتيۆى ونىمدەرمەن قامداۋ تىزبەگىن ۇزدىكسىز ساپالىلاندىرىپ، ٴونىمنىڭ ساپاسى مەن قىزمەت وتەۋ دەڭگەيىن جوعارىلاتىپ، شينجياڭنىڭ سىرتىنداعى بازاردى ۇزدىكسىز كەڭەيتىپ، ىلەنىڭ ٴتىپتى دە كوپ ساپالى اۋىل شارۋاشىلىق قوسىمشا ونىمدەرىنىڭ بۇكىل ەلگە بەت الۋىنا مۇمكىندىك جاساپ، ەگىنشى - مالشىلاردىڭ كىرىسىن ارتتىرىپ، اۋقاتتانۋىنا جانە اۋىل - قىستاقتى گۇلدەندىرۋگە ٴتىپتى دە كوپ كۇش قوسادى.