汉文 ىلە اقپارات تورابىنا حوش كەلدىڭىزدەر!
شي جينپيڭ ۆەنگريا زۇڭليـى وربانمەن كەزدەستى
2024-07-10 11:05:18     كورىلىم:رەت كەلۋ قاينارى:تيانشان تورى  جاۋاپتى رەداكتور:جارقىن تۇسەن ۇلى

 7 ـ ايدىڭ 8 ـ كۇنى تۇستەن بۇرىن مەملەكەت ٴتوراعاسى شي جينپيڭ بەيجيڭ دياۋيۇيتاي مەملەكەتتىك قوناق ۇيىندە ۆەنگريا زۇڭليى وربانمەن كەزدەستى.      شينحۋا اگەنتتىگىنىڭ ءتىلشىسى لي شۋەرىن تۇسىرگەن

شينحۋا اگەنتتىگىنىڭ 7 ـ ايدىڭ 8 ـ كۇنى بەيجيڭنەن بەرگەن حابارى (ٴتىلشى جىڭ ميڭدا). 7 ـ ايدىڭ 8 ـ كۇنى تۇستەن بۇرىن مەملەكەت ٴتوراعاسى شي جينپيڭ بەيجيڭ دياۋيۇيتاي مەملەكەتتىك قوناق ۇيىندە ۆەنگريا زۇڭليى وربانمەن كەزدەستى.

شي جينپيڭ بىلاي دەپ اتاپ كورسەتتى: 2 ايدىڭ الدىندا، مەن ۆەنگريادا ٴساتتى مەملەكەتتىك ساپاردا بولدىم، ٴبىز جۇڭگو _ ۆەنگريا قارىم ـ قاتىناسىن جاڭا داۋىردەگى بارلىق جاعدايدا بىردەي جالپى بەتتىك ستراتەگيالىق سەرىكتەستىك قارىم ـ قاتىناس دەڭگەيىنە كوتەرۋدى جاريالاپ، بيىل ەكى ەلدىڭ ديپلوماتيالىق قارىم ـ قاتىناس ورناتقاندىعىنىڭ 75 جىلدىعىنا جاڭا تاريحي ٴمان ۇستەدىك، سونداي ـ اق جۇڭگو _ ۆەنگريا قارىم ـ قاتىناسىنىڭ جوعارى دەڭگەيدە دامۋىنا پارمەندى قوزعاۋشى كۇش قوستىق. كەلەسى اپتادا جۇڭگو كوممۋنيستىك پارتياسى 20 ـ كەزەكتى ورتالىق كوميتەتىنىڭ ٴۇشىنشى جالپى ٴماجىلىسى بەيجيڭدە اشىلادى، جۇڭگو رەفورمانى اناعۇرلىم جاپپاي تەرەڭدەتىپ، جوعارى ساپالى دامۋدى جانە جوعارى دەڭگەيدە سىرتقا ەسىك اشۋدى ىلگەرىلەتەدى. بۇل جۇڭگو _ ۆەنگريا سەلبەستىگىنە جاڭا وراي ازىرلەيدى، جاڭا قوزعالىس كۇشىن ۇستەيدى. ەكى جاق جوعارى جىكتەگىلەردىڭ بارىس ـ كەلىسىن ساقتاپ، ساياسي ٴوزارا سەنىمدىلىكتى تەرەڭدەتىپ، ستراتەگيالىق بايلانىستى، ىستەستىكتى جيىلەتىپ، مىزعىماي ۇزدىكسىز ٴوزارا قولداۋ كورسەتىپ، ٴار سالاداعى ناقتى ىستەر سەلبەستىگىن كۇشەيتىپ، ”ٴبىر بەلدەۋ، ٴبىر جولدى“ جوعارى ساپامەن بىرگە قۇرىپ، جۇڭگو مەن ۆەنگريانىڭ جاڭا داۋىردەگى بارلىق جاعدايدا بىردەي جالپى بەتتىك ستراتەگيالىق سەرىكتەستىك قارىم ـ قاتىناسىنىڭ مازمۇنىن ۇزدىكسىز بايىتىپ، حالىققا اناعۇرلىم ويداعىداي باقىت جاراتۋى كەرەك.

شي جينپيڭ ۆەنگريانىڭ ەۆروپا وداعىنىڭ كەزەكتى ٴتوراعا ەلى بولىپ تاعايىندالعانىن قۇتتىقتادى. شي جينپيڭ بىلاي دەپ باسا دارىپتەدى: جۇڭگو مەن ەۆروپا اراسىندا وڭىرلىك ساياسي قايشىلىق جوق، ٴتۇبىرلى مۇددە قاقتىعىسى جوق. جۇڭگو _ ەۆروپا قارىم ـ قاتىناسى ستراتەگيالىق مانگە جانە دۇنيە جۇزىلىك ىقپالعا يە، ورنىقتى، اقاۋسىز دامۋدى ساقتاپ، الەمدىك سايىستارعا بىرگە توتەپ بەرۋ كەرەك. كەلەر جىلى جۇڭگو مەن ەۆروپا وداعىنىڭ ديپلوماتيالىق قارىم ـ قاتىناس ورناتقاندىعىنىڭ 50 جىلدىعى، ەكى جاق سەرىكتەستىك دۇرىس ورنىنا جانە سەلبەستىك نەگىزگى اعىم جالپى ارناسىنا تاباندى بولىپ، قوس باعىتتا ەسىك اشۋدى ۇزدىكسىز ىلگەرىلەتىپ، حالىقارالىق ىستەستىكتى كۇشەيتىپ، دۇنيە ٴجۇزىنىڭ بەيبىتشىلىگىن، ورنىقتىلىعىن جانە دامۋىن، گۇلدەنۋىن جەبەۋگە ۇلەس قوسۋى كەرەك. ۆەنگريا جاقتىڭ ەۆروپا وداعىنىڭ كەزەكتى ٴتوراعا ەلى رەتىندە، جۇڭگو _ ەۆروپا قارىم ـ قاتىناسىنىڭ اقاۋسىز، ورنىقتى دامۋىن ىلگەرىلەتۋدە، ٴتيىمدى ىقپالداستىقتى جۇزەگە اسىرۋدا بەلسەندى رول اتقارۋىن ٴۇمىت ەتەمىن.

وربان مىنالاردى ٴبىلدىردى: 2 ايدىڭ الدىندا، ٴتوراعا شي جينپيڭ ۆەنگريادا تاريحي سيپات الاتىن تابىستى ساپاردا بولدى. 2 ايدان بەرى ەكى جاق وسى رەتكى ساپاردىڭ ماڭىزدى جەتىستىكتەرىن مۇقيات تياناقتاندىرىپ، دوستىق پەن ٴوزارا سەنىمدىلىكتى اناعۇرلىم بەكەمدەپ، ۆەنگريا _ جۇڭگو قارىم ـ قاتىناسىنىڭ بولاشاق دامۋىنا بەرىك نەگىز قالادى. قازىرگى اۋمالى ـ توكپەلى حالىقارالىق جاعداي الدىندا، جۇڭگو بەيبىتشىلىكتى قىزۋ ٴسۇيىپ قانا قويماي، ونىڭ ۇستىنە جەلىلەس سىندارلى ماڭىزدى باستامالاردى العا قويىپ، جۇڭگونىڭ دۇنيە ٴجۇزى بەيبىتشىلىگىن جەبەيتىن ماڭىزدى ورنىقتى كۇش ەكەندىگىن ٴىس جۇزىندىك ارەكەتى ارقىلى دالەلدەدى. ۆەنگريا جاق جۇڭگو جاقتىڭ رولى مەن ىقپالىن ايرىقشا القايدى جانە وعان ٴمان بەرەدى، جۇڭگو جاقپەن ستراتەگيالىق بايلانىستى، ىستەستىكتى جيىلەتۋدى قالايدى. ۆەنگريا جاق جۇڭگومەن سەلبەستىكتى كۇشەيتۋدى دارىپتەيدى، ”شاعىن شەڭبەرلەرمەن“ شۇعىلدانۋعا جانە شەپ قۇرىپ قارسىلاسۋعا قارسى تۇرادى، ەۆروپا وداعىنىڭ كەزەكتى ٴتوراعا ەلى مىندەتىن وتەۋدى وراي ەتىپ، ەۆروپا _ جۇڭگو قاتىناسىنىڭ اقاۋسىز دامۋىن بەلسەنە ىلگەرىلەتۋدى قالايدى.

ەكى جاق ۋكراينا داعدارىسى جونىندە ىشكەرىلەي پىكىر اۋىستىردى. وربان جۋىردا ۋكرايناعا جانە رەسەيگە ساپارلاي بارعانداعى قاتىستى جاعدايلارىنان حابارلاندىردى. شي جينپيڭ ورباننىڭ ۋكراينا داعدارىسىن ساياسي جولمەن شەشۋدى ىلگەرىلەتۋ جولىندا جاساعان قۇلشىنىستارىن القاپ، جۇڭگو جاقتىڭ قاتىستى كوزقاراستارىن، قۋاتتامالارىن بايىمدادى.

شي جينپيڭ بىلاي دەپ باسا دارىپتەدى: سوعىستى ەرتەرەك توقتاتىپ، ساياسي جولمەن شەشۋ جولىن قاراستىرۋ ٴار جاقتىڭ مۇددەسىنە ۇيلەسەدى. قازىرگى باستى ٴتۇيىن ”سوعىس مايدانىن سىرتقا كەڭەيتپەۋ، سوعىس ٴورتىن ۇدەتپەۋ، ٴار جاق ٴبىر ـ ٴبىرىنىڭ قيتىعىنا تيمەۋ“ سىندى 3 پرينسيپكە بويسۇنىپ، جاعدايدىڭ باسەڭدەۋىن تەز ارادا ىلگەرىلەتۋ بولىپ تابىلادى. حالىقارالىق قوعام ەكى جاقتىڭ تىكەلەي تىلدەسۋدى، كەلىسسوزدى قالپىنا كەلتىرۋىنە شارت ـ جاعداي ازىرلەپ، دەم بەرۋى كەرەك. بارلىق ٴىرى ەل تۇگەلدەي تەرىس ەنەرگيانى ەمەس، وڭ ەنەرگيانى ساۋلەلەندىرگەندە عانا، وسى قاقتىعىستىڭ ەرتەرەك توقتاۋىنان ٴۇمىت ۇشقىنى بايقالادى. جۇڭگو جاق باستان ـ اياق ٴوز تاسىلىمەن تاتۋلاسۋعا بەلسەنە ٴناسيحاتتاپ، كەلىسسوزدى جەبەپ، داعدارىستى بەيبىت جولمەن شەشۋگە ٴتيىمدى بارلىق قۇلشىنىستارعا دەم بەرىپ جانە ونى قولداپ كەلەدى. جۇڭگو مەن ۆەنگريانىڭ نەگىزگى قۋاتتاماسى مەن قۇلشىنۋ بەتالىسى بىردەي. جۇڭگو جاق ۆەنگريا جاقپەن، سونداي ـ اق قاتىستى جاقتارمەن بايلانىستى ۇزدىكسىز ساقتاۋدى قالايدى.

ۋاڭ ي كەزدەسۋگە قاتىناستى.