تىلشىلەرىمىز جاڭ دانحۇي، اكبار قۇربان، جي سۇنلي حابارلايدى. «بالام، مەنىڭ ەڭ سوڭعى ٴبىر ارمانىم بار، مەنىڭ اتىمنان پارتيا ۇيىمىنا 10 مىڭ يۋان پارتيا جارناسىن تاپسىرىڭدار، پارتيا مۇشەسىنىڭ وتەۋگە ٴتيىستى بورىشىن وتەسەم دەيمىن». بۇل 98 جاستاعى سىبە كاريا تاۋ يۇڭجىنىڭ بالالارىنا بەرگەن اقتىق تاپسىرماسى ەدى.

12 - ايدىڭ 23 - كۇنى تاۋ يۇڭجىنىڭ ۇلى تاۋ ياۋجۇڭ ىلە گازەتى مەكەمەسىنە كەلىپ، قايتىس بولعان اكەسى اتىنان پارتيا ۇيىمىنا 10 مىڭ يۋان «ەرەكشە پارتيا جارناسىن» تاپسىردى.

بيىل 1 - ايدىڭ 10 - كۇنى تاۋ يۇڭجى باقىتقا قارسى اۋرۋدان قايتىس بولادى. 65 جىلدىق پارتيا ستاجى بار تاۋ يۇڭجى قايتىس بولاردان بۇرىن بالاسىنا ەڭ سوڭعى ارمانىن ورىنداۋىنا كومەكتەسۋدى قايتا - قايتا تاپسىرىپ، جايشىلىقتا ۇنەمشىلدىكپەن تۇرمىس كەشىرۋ بارىسىندا جيناعان قاراجاتىنان 10 مىڭ يۋاندى پارتيا جارناسى رەتىندە پارتيا ۇيىمىنا تاپسىرۋدى اماناتتاپ، پارتيا ۇيىمىنىڭ باۋلىپ، تاربيەلەگەنىنە العىس بىلدىرەدى.

تاۋ يۇڭجى 1923 - جىلى چاپچال سىبە اۆتونوميالى اۋدانىندا دۇنيەگە كەلگەن، 1946 - جىلى قىزمەتكە قاتىناسقان، چاپچال اۋدانىندا حاتشىلىق قىزمەت وتەگەن، 1951 - جىلى ىلە گازەتى مەكەمەسىنە اۋىسىپ كەلىپ قىزمەت ىستەگەن. 1956 - جىلى 11 - ايدا پارتياعا مۇشە بولىپ، ىلگەرىندى - كەيىندى ٴتىلشى، قوجالىق باسقارۋ ىستەرىمەن اينالىسىپ، 1983 - جىلى 6 - ايدا دەمالىسقا شىققان. قىزمەت بارىسىندا تاۋ يۇڭجى بار ىنتا - پەيىلىمەن جاپاعا شىداپ، جەكە باسىنىڭ پايدا - زيانىمەن ەسەپتەسپەي، ۇلگى بولۋعا تالپىنىپ، پارتيالىلىق پرينسيپكە قاتاڭ بويسۇنعان.

«اكەم ۇنەمى پارتيانىڭ ساياساتى جاقسى بولعاندىقتان تۇرمىسىمىز دا جاقساردى، پارتيا بولماسا، قازىرگى جاقسى تۇرمىسىمىز دا بولماق ەمەس، پارتياعا العىس ايتۋىمىز كەرەك دەيتىن. اكەم دەمالىسقا شىققاننان كەيىن دە اقپارات قىزمەتىنە كوڭىل ٴبولدى، ول ٴار كۇنى گازەتحاناعا بارىپ ٴبىر نۇسقا گازەت الىپ مۇقيات وقىپ تۇردى، بوران - شاشىن بولسا دا، ادەتىنەن جاڭىلمادى، ونداعان جىل ساياسي ۇيرەنۋدى تاباندى جالعاستىردى. ول ۇنەمى بىزگە جۇمىستى تىڭعىلىقتى، مۇقيات ىستەۋدى، بەلسەنە العا باسۋدى، پارتيا ۇيىمىمەن جاقىن ٴوتۋدى ۇيرەتىپ وتىردى» دەدى تاۋ ياۋجۇڭ.

تالاي جىلدان بەرى تاۋ يۇڭجى اتا مەكەنىنىڭ قۇرىلىسىنا باستان - اياق كوڭىل ٴبولىپ، اتا مەكەنىنىڭ دامۋىنا ۇلەس قوسۋدى ارمانداپ كەلگەن. 2013 - جىلى چاپچال اۋدانىنىڭ سىبە بايىرعى قالاشىعىن قايتا قۇرۋ تۋرالى حاباردى ەستىگەننەن كەيىن تاۋ يۇڭجى 20 مىڭ يۋان جىلۋ اتادى. تاۋ ياۋجۇڭ ەسكە الىپ بىلاي دەدى: «سىبە بايىرعى قالاشىعى نىسانىندا جۇمىس باستالعاننان كەيىن اكەم بالاشا ٴماز بولدى، ۋاقىت شىعا قالسا بايىرعى قالاشىقتىڭ قۇرىلىس جاعدايىن كورىپ تۇردى. اكەم ۇنەمى ٴار ادام وزىندىك كۇش شىعارسا، مەكەنىمىز ٴتىپتى دە كوركەم بولادى دەيتىن».

«زەينەتكە شىققانىنا 30 نەشە جىل بولعان قاراپايىم ساقا پارتيا مۇشەسى اقتىق دەمىنە دەيىن پارتيا ۇيىمىنا پارتيا جارناسىن تاپسىرۋدى ەستەن شىعارمادى، قاريا قاراپايىم ٴىس - ارەكەتى ارقىلى ٴبىر كوممۋنيستىڭ پارتياعا ادالدىعى مەن سەنىمگە دەگەن تاباندىلىعىن ايگىلەدى» دەدى ىلە گازەتى مەكەمەسى دەمالىسقا، زەينەتكە شىققان كادرلار پارتيا ياچەيكاسىنىڭ شۋجيى جين جيچىڭ. ول تاعى بىلاي دەدى: «تاۋ يۇڭجى دەمالىسقا شىققاننان كەيىن دە ٴوزىنىڭ پارتيا مۇشەسى ەكەنىن قاشان دا ەستە بەرىك ساقتاپ، قارتتىق كۇشىن ۇزدىكسىز ساۋلەلەندىرىپ، اقپارات قىزمەتىمەن تىلەكتەس بولىپ، مەكەمەنىڭ دامۋىنا بەلسەنە اقىل - كەڭەس بەرىپ، ٴىس جۇزىندىك ارەكەتى ارقىلى ٴبىر كوممۋنيستىڭ اۋەلگى ماقساتى مەن بورىشىن ايگىلەدى».