”ىلە وبلىسىنىڭ الەۋمەتتىك جۇمىستانۋعا قىزمەت وتەۋدى مەكتەپ اۋلاسىنا جەتكىزۋ“ ارناۋلى قىزمەتكە قابىلداۋ جينالىسى قۇلجا قالاسىندا وتكىزىلدى

2047 ادام جۇمىستانۋ نيەتىنە كەلىستى

ٴوز تىلشىمىز حان شاشا، پراكتيكانت ما رۇي، دۇڭ تيڭ، ەرىكتى ٴتىلشى چي يۇي - ۋي حابارلايدى. جوعارى مەكتەپ بىتىرگەن ۇزدىك وقۋشىلاردى جۇمىستانۋعا كەڭ كولەمدە باۋراپ، ىلە وبلىسىنىڭ ەكونوميكاسىنىڭ جوعارى ساپالى دامۋىن جەبەۋ ٴۇشىن، 3 - ايدىڭ 15 - كۇنى وبلىستىق ادام كۇشى بايلىعى جانە قوعامدىق قامتاماسىزداندىرۋ مەكەمەسى باس بولىپ وتكىزگەن ”ىلە وبلىسىنىڭ الەۋمەتتىك جۇمىستانۋعا قىزمەت وتەۋدى مەكتەپ اۋلاسىنا جەتكىزۋ“ ارناۋلى قىزمەتكە قابىلداۋ جينالىسى ىلە كاسىپتىك - تەحنيكالىق شۋەيۋانىندا باستالدى.

وسى جولعى قيمىلعا ىلە چۋاننيڭ بيو - تەحنيكا جارنا شەكتى سەرىكتەستىگى، ىلە اۋىل شارۋاشىلىعىنا قارجى قوسۋ شەكتى سەرىكتەستىگى، شينجياڭ ورتا بولەك حىشىڭ كرەمني كاسىبى شەكتى سەرىكتەستىگى سياقتى ادام ىستەتۋشى 125 ورىن ۇسىنىسپەن قاتىناسىپ، بيو - تەحنيكا، ازىق - تۇلىك مانەرلەۋ، ەلەكتروندىق ماتەريال جاساۋ سياقتى سالالاردى قامتىعان 3581 جۇمىس ورنى ازىرلەنىپ، جوعارى، ورتا تەحنيكۋم بىتىرگەن 6 مىڭنان استام وقۋشى ناق مايداندا قىزمەتكە قابىلداۋعا قاتىناستى، مۇنىڭ ىشىندە 2047 ادام جۇمىستانۋ نيەتىنە كەلدى.

”بۇگىنگى قىزمەتكە قابىلداۋ جينالىسىنا قاتىناسقان وقۋشىلاردىڭ ىشىندە ىلە كاسىپتىك - تەحنيكالىق شۋەيۋانىنىڭ 33 ورتا، جوعارى تەحنيكۋم كاسىبىنەن بيىل مەكتەپ بىتىرەتىن وقۋشىلاردان تىس، تاعى شينجياڭنىڭ ٴىشى - سىرتىنداعى باسقا جوعارى، ورتا تەحنيكۋم مەكتەپتەردىڭ بيىل مەكتەپ بىتىرەتىن وقۋشىلارى قاتىناستى. قازىر دارىندىلارعا دەگەن سۇرانىس نەگىزىنەن حيميا ونەركاسىبى جانە ٴدارى جاساۋ، جاڭاشا ماتەريالدار سياقتى سالالارعا شوعىرلانعان، ٴبىر ٴبولىم كاسىپورىن شۋەيۋان مەن مەكتەپ - كاسىپورىن سەلبەسۋ نيەتىنە كەلىپ، كاسىپورىنداردىڭ تەحنيكالىق دارىندىلاردى ىستەتۋ قيىن بولۋ ماسەلەسىن قاينارىنان باسەڭدەتتى“. قيمىلدىڭ باستالۋ سالتىندا، ىلە كاسىپتىك - تەحنيكالىق شۋەيۋانى پارتكومىنىڭ ورىنباسار شۋجيى، مەكتەپ باستىعى چىن تاۋ بىلاي دەدى: ”ٴبىرقىدىرۋ قىزمەتكە قابىلداۋ قيمىلى ارقىلى جوعارى مەكتەپ بىتىرگەن وقۋشىلار مەن ادام ىستەتۋشى ورىنداردىڭ قىزمەت ىزدەۋ، قىزمەتكەر قابىلداۋىن ٴتۇيىلىستىرۋ تۇعىرىن قالىپتاستىرىپ، مەكتەپ بىتىرگەن اناعۇرلىم كوپ وقۋشىنى ىلەدە قالىپ جۇمىس ىستەپ، شارۋاشىلىق قۇرۋعا جەتەكتەدىك“.

”مەنىڭ ماماندىعىم ٴسىز قابىلدايتىن جۇمىس ورنىنا ۇيلەسەدى“. ”ٴسىز تىكە تاراتىلىمدى جۇرگىزىپ كوردىڭىز بە؟ ادەتتە زات ساتىپ كوردىڭىز بە؟“ ”مەن تىكە تاراتىلىمدا ٴونىم تانىستىرعانمىن“. قىزمەتكە قابىلداۋ جينالىسى جاڭادان باستالعاندا، شينجياڭ يۇنجيڭ حۋانيۇي مادەنيەت - ساياحاتتى دامىتۋ شەكتى سەرىكتەستىگىنىڭ قىزمەتكەر قابىلداۋ ورنى كەڭەس سۇراعان وقۋشىلارعا لىق تولدى.

”ٴبىز ۇقساماعان 8 كاسىپتىك قىزمەت ورنىن الا كەلدىك. ايلىق ورتاشا ەڭبەكاقىسى 5000 يۋان. قازىر قىزمەت ورنىنىڭ ادرەسى، ەڭبەكاقى مامىلەسى جانە تاماق، جاتىن ورىن سياقتىلار جونىندە كەڭەس سۇرايتىندار ەڭ كوپ“ دەدى شينجياڭ يۇنجيڭ حۋانيۇي مادەنيەت - ساياحاتتى دامىتۋ شەكتى سەرىكتەستىگىنىڭ ەلەكتروندى ساۋدا تيجاراتىنىڭ باس باقىلاۋشىسى چىن شيڭبو.

”ۇكىمەت پەن مەكتەپ ۇيىمداستىرعان جۇمىستاندىرۋ تەكشەسىنە ەرەكشە العىس ايتامىن، مەكتەپتە تۇرىپ - اق جۇمىستانۋعا قاتىستى كوپتەگەن ينفورماتسيالاردى بىلۋىمە مۇمكىندىك جاسالدى. لايىقتى قىزمەت ورنى كەزىكسە دەرەۋ بەتپە - بەت ەمتيحانعا قاتىناسۋىما بولادى. وتە قولايلى بولدى“ دەدى وقۋ ٴبىتىرۋ الدىندا تۇرعان قالبىنۇر ابىليميت قۋانا. 

وسى رەتكى جۇمىسقا قابىلداۋ قيمىلى يىنتەرنەت جەلىسىندە جانە جەلىدەن تىس ٴبىر ۋاقىتتا جۇرگىزىلىپ، ٴتۇيىندى، وزىق 15 كاسىپورىن ينتەرنەتتە تىكە تاراتۋ ارقىلى جۇمىسقا قابىلداۋ قيمىلىن ورىستەتىپ، شينجياڭداعى جوعارى مەكتەپتەرگە ٴبىر ۋاقىتتا جۇمىسكەر قابىلداۋ ورىندارىن تانىستىردى.

جوعارى مەكتەپ بىتىرگەن وقۋشىلارعا تيىمدىلىك جاساۋ ساياساتىن جالپىلاستىرۋ تەبىنىن ارتتىرۋ، ٴتۇرلى دارىندىلارعا ساياتىن ساياساتتى ٴبىلۋ دارەجەسىن جوعارىلاتۋ ٴۇشىن، قيمىل مايدانىندا وبلىستىق ادام كۇشى بايلىعى جانە قوعامدىق قامتاماسىزداندىرۋ مەكەمەسىنىڭ 4 - پارتيا ياچەيكاسى ىلە كاسىپتىك - تەحنيكالىق شۋەيۋانىنىڭ پارتيا ياچەيكاسىمەن بىرلەسىپ ياچەيكانى بىرلەسىپ قۇرۋ، قيمىلعا بىرلەسىپ دايىندالۋ، قىزمەتتى بىرگە ۇستىنە الۋ سياقتى قيمىلداردى ورىستەتىپ، كاسىپورىنداردىڭ جۇمىسشى قابىلداۋىنداعى ”قىزمەت وتەۋشى“، قىزمەت ورنىن ورنىقتىرۋ ساياساتىن ”ۇگىتتەۋشى“، ۇقىقتى دالمە - ٴدال قورعاۋداعى ”زاڭدىق قورعاۋشى“ بولىپ، كاسىپورىندار مەن وقۋشىلاردىڭ قامداۋ - قاجەتسىنۋىن ۇشتاستىرۋدا جان - جاقتى قىزمەت وتەدى.

 كەلەسى ساتىدا ىلە وبلىسىنىڭ ٴار دارەجەلى الەۋمەتتىك كاسىپتەنۋگە قىزمەت وتەۋ قۇرىلىمدارى جاستاردى، اسىرەسە، جوعارى مەكتەپ بىتىرگەن وقۋشىلاردى جۇمىستاندىرۋ قىزمەتىن اناعۇرلىم كورنەكتى ورىنعا قويىپ، مەكتەپ بىتىرەتىن وقۋشىلاردىڭ مەكتەپ بىتىرۋدەن بۇرىنعى قىزمەت ىزدەۋىنىڭ شەشۋشى مەزگىلىن مىقتى يگەرىپ، 3 - ايدان 6 - ايعا دەيىن ىلە پەداگوگيكا داشۋەسى، شينجياڭ قولدانىلمالى كاسىپتىك - تەحنيكالىق شۋەيۋانى سياقتى جوعارى، ورتا تەحنيكۋم مەكتەپتەر دە جۇمىسقا قابىلداۋ جينالىسىن جالعاستى وتكىزىپ، كوپ جاقتىڭ بىرىككەن كۇشىن ۇيىستىرىپ، جۇمىستاندىرۋ جونىندەگى ۇگىت ـ لەكسيا، ساياساتتىق تۇسىنىك جاساۋ، جۇمىسقا قابىلداۋعا قىزمەت وتەۋ، جۇمىستاندىرۋعا جەتەكشىلىك ەتۋ، كاسىپ اشۋعا قىزمەت وتەۋ، جۇمىسقا تاربيەلەۋ، قيىنشىلىعى بارلارعا كومەكتەسۋ ـ سۇيەمەلدەۋ، ۇقىق ـ مۇددەنى قامتاماسىز ەتۋ سياقتى الەۋمەتتىك جۇمىستاندىرۋعا قىزمەت وتەۋدى مەكتەپ اۋلاسىنا ەنگىزىپ، جوعارى مەكتەپ بىتىرگەن وقۋشىلاردىڭ تولىق جۇمىستانۋىنا دەم بەرەدى.