1 ـ ايدىڭ 21 ـ كۇنى تۇستەن كەيىن مەملەكەت ٴتوراعاسى شي جينپيڭ بەيجيڭ حالىق سارايىندا رەسەي زۇڭتۇڭى پۋتينمەن بەينە ەكراندا ديدارلاستى.

□ سۋرەتتى شينحۋا اگەنتتىگىنىڭ ٴتىلشىسى راۋ ايمين تۇسىرگەن

شينحۋا اگەنتتىگىنىڭ 1 ـ ايدىڭ 21 ـ كۇنى بەيجيڭنەن بەرگەن حابارى (ٴتىلشى دۇڭ شۋە). 1 ـ ايدىڭ 21 ـ كۇنى تۇستەن كەيىن مەملەكەت ٴتوراعاسى شي جينپيڭ بەيجيڭ حالىق سارايىندا رەسەي زۇڭتۇڭى پۋتينمەن بەينە ەكراندا ديدارلاستى.

ەكى ەلدىڭ مەملەكەت باسشىلارى جاڭا جىل بايلانىسىمەن ٴبىر ـ ٴبىرىن قۇتتىقتادى. شي جينپيڭ مىنالاردى اتاپ كورسەتتى: بىرنەشە كۇننەن كەيىن جۇڭگونىڭ كوكتەم مەرەكەسى كەلەدى، كونە جىلدى اتتاندىرىپ، جاڭا جىلدى قارسى الاتىن ساتتە زۇڭتۇڭ مىرزامەن بەينە ەكراندا ديدارلاسقانىما ايرىقشا قۋانىشتىمىن، جاڭا جىلدا جۇڭگو _ رەسەي قارىم ـ قاتىناسىنىڭ گۇلدەنىپ دامۋىن تىلەيمىن. پۋتين مىنالاردى ٴبىلدىردى: جاڭا جىل كىرىسىمەن ٴتوراعا شي جينپيڭمەن بەينە ەكراندا پىكىر اۋىستىرعانىما ايرىقشا قۋانىشتىمىن، ٴتوراعا شي جينپيڭنىڭ جانە جۇڭگو حالقىنىڭ كوكتەم مەرەكەسىنىڭ كوڭىلدى ٴوتۋىن، بارلىق ىستەرىنىڭ ٴساتتى بولۋىن تىلەيمىن!

شي جينپيڭ مىنالاردى اتاپ كورسەتتى: 2024 ـ جىلى ٴبىز 3 رەت ديدارلاسىپ، كوپتەگەن ماڭىزدى ورتاق تانىمعا كەلدىك. ەكى ەل ديپلوماتيالىق قارىم ـ قاتىناس ورناتقاندىعىنىڭ 75 جىلدىعىن سالتاناتپەن قۇتتىقتادى، ماڭگىلىك تاتۋ كورشى، دوس بولۋدى، جالپى بەتتىك ستراتەگيالىق ىستەستىكتى، ٴوزارا پايدا جەتكىزىپ سەلبەسىپ تەڭ يگىلىككە كەنەلۋدى رۋحاني وزەك ەتكەن جۇڭگو _ رەسەي قارىم ـ قاتىناسىندا ۇزدىكسىز جاڭا ومىرشەڭ كۇش قاۋلادى. جۇڭگو _ رەسەي مادەنيەت جىلى تارتىمدى ٴوتتى، ناقتى ىستەر سەلبەستىگى ورنىقتىلىق بارىسىندا ىلگەرىلەدى، ەكى جاقتى ساۋدا سوماسى ارتۋ ارىنىن ساقتادى، بىرلەسكەن مەملەكەتتەر ۇيىمى، شاڭحاي سەلبەستىك ۇيىمى، بريكس ەلدەرى قاتارلى كوپ جاقتى تۇعىرلاردا ٴجيى ىستەستىك جاساپ، الەمدىك باسقارۋ جۇيەسى رەفورماسى مەن قۇرىلىسىنا اناعۇرلىم كوپ وڭ ەنەرگيا ۇستەدى.

شي جينپيڭ مىنالاردى باسا دارىپتەدى: جاڭا جىلدا زۇڭتۇڭ مىرزامەن بىرگە جۇڭگو _ رەسەي قارىم ـ قاتىناسىنىڭ بيىكتە تۇرىپ الىسقا كوز جىبەرۋىنە ۇزدىكسىز جەتەكشىلىك ەتۋدى، جۇڭگو _ رەسەي قارىم ـ قاتىناسىنىڭ ورنىقتىلىعى مەن تاباندىلىعى ارقىلى سىرتقى ورتانىڭ ايقىنسىزدىعىنا توتەپ بەرۋدى، ەكى ەلدىڭ دامۋىن، گۇلدەنۋىن بىرگە جەبەۋدى، حالىقارالىق ادىلدىك پەن ادىلەتتىلىكتى قورعاۋدى قالايمىن. ەكى جاق ستراتەگيالىق سەلبەستىكتى ۇزدىكسىز تەرەڭدەتىپ، ٴبىرىن ـ ٴبىرى تاباندىلىقپەن قولداپ، ەكى ەلدىڭ ورىندى مۇددەسىن قورعاۋى كەرەك. ەكى جاقتى قارىم ـ قاتىناستى بەكەمدەپ، كەڭەيتىپ، ناقتى ىستەر سەلبەستىگىنىڭ تەرەڭدەي دامۋىن ىلگەرىلەتۋى كەرەك. بيىل _ جۇڭگو حالقىنىڭ جاپون شاپقىنشىلارىنا قارسى سوعىسىنىڭ، سوۆەت وداعى ۇلى وتان قورعاۋ سوعىسىنىڭ جانە دۇنيە جۇزىلىك فاشيزمگە قارسى سوعىس جەڭىسىنىڭ 80 جىلدىعى ٴارى بىرلەسكەن مەملەكەتتەر ۇيىمى قۇرىلعاندىعىنىڭ 80 جىلدىعى. جۇڭگو _ رەسەي ەكى ەل وسىنى وراي ەتىپ، بىرلەسكەن مەملەكەتتەر ۇيىمىن وزەك ەتكەن حالىقارالىق جۇيەنى جانە دۇنيە جۇزىلىك 2 ـ سوعىس جەڭىسىنىڭ جەتىستىكتەرىن بىرگە باتىل قورعاپ، ٴار ەلدىڭ بىرلەسكەن مەملەكەتتەر ۇيىمى ۋستاۆىنىڭ باس ماقساتى مەن پرينسيبىنە بويسۇنۋىن ىلگەرىلەتىپ، جاپپاي مويىندالعان حالىقارالىق قارىم ـ قاتىناستىڭ نەگىزگى ولشەمىنە تاباندى بولىپ، ناعىز كوپ جاقتىلىقتى امالياتتا ايگىلەۋى كەرەك. شاڭحاي سەلبەستىك ۇيىمىنىڭ كەزەكتى ٴتوراعا ەلى رەتىندە، جۇڭگو رەسەي جاقپەن جانە باسقا مۇشە ەلدەرمەن بىرگە شاڭحاي سەلبەستىك ۇيىمىنىڭ اناعۇرلىم جوعارى ساپالى دامۋ، اناعۇرلىم جاۋاپكەرشىلىك ارقالاپ ىسكەرلىك كورسەتۋ جاڭا كەزەڭىنە ٴوتۋىن ىلگەرىلەتۋدى قالايدى. جۇڭگو مەن رەسەي ”ۇلكەن بريكس سەلبەستىگىن“ بىرگە ىلگەرىلەتىپ، جەر شارىنىڭ وڭتۇستىگىنىڭ ىنتىماقتاسۋىنىڭ، ٴوزىن الۋەتتەندىرۋىنىڭ جاڭا تاراۋىن دا جازۋى كەرەك.

پۋتين مىنالاردى ٴبىلدىردى: رەسەي مەن جۇڭگو باستان ـ اياق ٴوزارا سەنىم ارتىپ، ٴبىرىن ـ ٴبىرى قولداپ، تەڭ تۇرعىدا ٴوزارا مامىلە جاساپ كەلەدى، ەكى جاقتى سەلبەستىك ەكى ەل حالقىنىڭ مۇددەسىنە ۇيلەسەدى، حالىقارالىق جاعدايداعى وزگەرىستىڭ ىقپالىنا ەشقاشان ۇشىرامايدى. ەكى ەلدىڭ ەكونوميكا ـ ساۋدا، ەنەرگيا سەلبەستىگىنىڭ تاماشا ارىندى ساقتاعاندىعىن، ٴوزارا ساياحاتتايتىن ساياحاتشىلاردىڭ ۇزدىكسىز كوبەيگەندىگىن، ەكى جاقتىڭ كوپ جاقتى ورىنداردا تىعىز بايلانىس جاساۋدى، سەلبەسۋدى ساقتاعاندىعىن كورىپ قاتتى قۋاندىم. رەسەي جاق تايۋاننىڭ جۇڭگو تەرريتورياسىنىڭ ايرىلماس ٴبىر بولىگى ەكەندىگىن باتىل قولدايدى، ٴارقانداي فورماداعى ”تايۋاندى دەربەستەندىرۋگە“ باتىل قارسى تۇرادى. 80 جىلدىڭ الدىندا، رەسەي مەن جۇڭگو ەكى ەل ىستىق قانىمەن جانە ومىرلەرىمەن شاپقىنشىلارعا قارسى تۇرىپ، مەملەكەتتىڭ يەلىك ۇقىعى مەن ۇلتتىڭ ار ـ نامىسىن باتىل قورعادى. بيىل ٴبىز دۇنيە جۇزىلىك فاشيزمگە قارسى سوعىس جەڭىسىنىڭ 80 جىلدىعىن بىرگە سالتاناتپەن قۇتتىقتاپ، دۇنيە جۇزىلىك 2 ـ سوعىستىڭ جەتىستىكتەرىن قورعاۋىمىز كەرەك. رەسەي جاق جۇڭگو جاقپەن كوپ جاقتى ىستەردەگى سەلبەستىكتى كۇشەيتىپ، دۇنيە ٴجۇزىنىڭ بەيبىتشىلىگى، دامۋى ٴۇشىن بەلسەندى رول اتقارۋدى قالايدى.

ەكى ەلدىڭ مەملەكەت باسشىلارى بىرگە كوڭىل ٴبولىپ وتىرعان حالىقارالىق، وڭىرلىك ماسەلەلەر جونىندە دە ىشكەرىلەي پىكىر اۋىستىردى، جاڭا جىلدا ۇزدىكىسز ستراتەگيالىق بايلانىستى ساقتاۋعا قوسىلدى.

ۋاڭ ي قيمىلعا قاتىناستى.