2 ـ ايدىڭ 5 ـ كۇنى تۇستەن بۇرىن مەملەكەت ٴتوراعاسى شي جينپيڭ بەيجيڭ حالىق سارايىندا جۇڭگوعا مەملەكەتتىك ساپارمەن كەلگەن قىرعىزستان زۇڭتۇڭى جاپاروۆپەن كەڭەس وتكىزدى. سۋرەتتە: شي جينپيڭ مەن حانىمى پىڭ لييۋان جاپاروۆ جانە حانىمى جاپاروۆامەن بىرگە سۋرەتكە تۇسۋدە.

□ سۋرەتتى شينحۋا اگەنتتىگىنىڭ ٴتىلشىسى ديڭ لين تۇسىرگەن

شينحۋا اگەنتتىگىنىڭ 2 ـ ايدىڭ 5 ـ كۇنى بەيجيڭنەن بەرگەن حابارى (تىلشىلەر دۇڭ شۋە، شاۋ يبو). 2 ـ ايدىڭ 5 ـ كۇنى تۇستەن بۇرىن مەملەكەت ٴتوراعاسى شي جينپيڭ بەيجيڭ حالىق سارايىندا جۇڭگوعا مەملەكەتتىك ساپارمەن كەلگەن قىرعىزستان زۇڭتۇڭى جاپاروۆپەن كەڭەس وتكىزدى.

شي جينپيڭ بىلاي دەپ اتاپ كورسەتتى: جۇڭگو مەن قىرعىزستان _ تاۋ ـ وزەنى تۇتاسقان، حالىق تىلەگى توعىسقان جاقسى كورشى، ابزال دوس، تاماشا سەرىكتەر. تاياۋ جىلداردان بەرى جۇڭگو _ قىرعىزستان قارىم ـ قاتىناسى قارىشتاپ دامۋدى جۇزەگە اسىرىپ، جاڭا داۋىردەگى جالپى بەتتىك ستراتەگيالىق سەرىكتەستىك تىڭ بيىگىنە كوتەرىلدى. ەكى جاقتىڭ ساياسي ٴوزارا سەنىمدىلىگى ٴۇرتىس بەكەمدەلىپ، ٴار سالاداعى سەلبەستىگىندە شات حابارلار تولاسسىز تارالىپ، جۇڭگو _ قىرعىزستان تاعدىرلاس ورتاق تۇلعاسىن قۇرۋدىڭ قوعامدىق جانە حالىق رايى نەگىزى كۇن سايىن نىعايا ٴتۇستى. جۇڭگو جاق قىرعىزستان جاقتىڭ ٴوز ەلىنىڭ مەملەكەت جاعدايىنا ۇيلەسەتىن دامۋ جولىمەن ٴجۇرۋىن قولدايدى، قىرعىزستان جاقپەن دامۋ ستراتەگياسىن ٴتۇيىلىستىرۋدى تەرەڭدەتىپ، ەل باسقارۋ تاجىريبەسى جونىندەگى اۋىس ـ كۇيىستى كەڭەيتىپ، جان ـ جاقتى ٴوزارا پايدا جەتكىزۋ سەلبەستىگىن ىلگەرىلەتىپ، ەكى ەلدىڭ ورتاق مۇددەسىن قول ۇستاسا قورعاپ، جۇڭگو _ قىرعىزستان تاعدىرلاس ورتاق تۇلعاسى قۇرىلىسىنىڭ اناعۇرلىم ويداعىداي تياناقتانۋىن، ناقتىلانۋىن ىلگەرىلەتۋدى قالايدى.

شي جينپيڭ بىلاي دەپ باسا دارىپتەدى: ەكى جاق وي جەلىسىن ۇزدىكسىز كەڭەيتىپ، ”ٴبىر بەلدەۋ، ٴبىر جولدى“ جوعارى ساپالى قۇرۋدى نەگىزگى جەلى ەتىپ، ٴوزارا پايدا جەتكىزۋ سەلبەستىگىنىڭ ۇزدىكسىز تەرەڭدەۋىن ىلگەرىلەتۋى كەرەك. جۇڭگو جاق ەكونوميكا ـ ساۋدا، قارجى قوسۋ سەلبەستىگىن ٴۇرتىس كەڭەيتىپ، قىرعىزستاننىڭ اناعۇرلىم كوپ ساپالى تاۋارلارىن يمپورت ەتۋدى قالايدى، جۇڭگو قارجىلاندىرعان اناعۇرلىم كوپ كاسىپورىنداردىڭ قىرعىزستانعا بارىپ قارجى قوسىپ، شارۋاشىلىعىن كوركەيتۋىن قولدايدى، قىرعىزستان جاقتىڭ جۇڭگولىق قارجى قوسۋشىلاردىڭ زاڭدى ۇقىق ـ مۇددەسىن شىنايى قامتاماسىز ەتۋىن ٴۇمىت ەتەدى. ۇلاستىرۋ، تۇتاستىرۋ دەڭگەيىن جاپپاي جوعارىلاتىپ، جۇڭگو _ قىرعىزستان _ وزبەكستان تەمىر جولىن جوعارى ولشەممەن، جوعارى ساپامەن ويداعىداي سالىپ، قازىرگى بار شەكارا وتكەلدەرىن وسىزامانداندىرىپ جاڭالاۋدى تەڭ قادامدا ىلگەرىلەتىپ، اناعۇرلىم كوپ جولاۋشى، زات تاسىمالى ۇشاعىن ىسكە قوسىپ، ەكى ەل حالقىنىڭ بارىس ـ كەلىسى مەن زات اينالىمىنا اناعۇرلىم كوپ قولايلىلىق جاراتۋ كەرەك. شەكارا اتتاعان ەلەكتروندى ساۋدا، ۇلكەن ساندى مالىمەت، جاساندى زەردە سياقتى جاڭاشا وندىرگىش كۇشتەر سەلبەستىگىن كەڭەيتىپ، جاڭا ارتۋ ٴتۇيىنىن قالىپتاستىرۋ كەرەك. ەكى جاق جۇڭگو مادەنيەت ورتالىعى، لۋبان شەبەرحاناسى، كۇڭزى شۋەيۋانى سياقتى قۇرىلىمداردى ويداعىداي باسقارىپ، جەرگىلىكتى ورىندار اۋىس ـ كۇيىسىن كۇشەيتىپ، جۇڭگو _ قىرعىزستان دوستىعىنا ات سالىساتىن اناعۇرلىم كوپ كۇشتەردى جەتىلدىرۋى كەرەك. جۇڭگو جاق قىرعىزستان جاقپەن تىعىز ىستەستىك جاساسىپ، جۇڭگو _ ورتا ازيا مەحانيزمى سەلبەستىك دەڭگەيىن جوعارىلاتىپ، شاڭحاي سەلبەستىك ۇيىمىن ناقتىلاندىرىپ، كۇشەيتىپ، بىرلەسكەن مەملەكەتتەر ۇيىمىن وزەك ەتكەن حالىقارالىق جۇيەنى قورعاپ، الەمدىك دامۋ باستاماسىن، الەمدىك حاۋىپسىزدىك باستاماسىن، الەمدىك وركەنيەت باستاماسىن امالياتتا ايگىلەپ، ادامزاتتىڭ تاعدىرلاس ورتاق تۇلعاسىن قول ۇستاسا قۇرۋدى قالايدى.

جاپاروۆ مىنالاردى ٴبىلدىردى: جاڭا جىل باستالىسىمەن جۇڭگودا ساپاردا بولعانىما وتە قۋانىشتىمىن، ٴتوراعا شي جينپيڭگە جانە جۇڭگو حالقىنا كوكتەم مەرەكەسى بايلانىسىمەن ەڭ ىزگى تىلەك ايتامىن، جۇڭگونىڭ 9 ـ كەزەكتى ازيا قىسقى سپورت جارىسىن تابىستى وتكىزۋىن تىلەيمىن. ٴتوراعا شي جينپيڭنىڭ باسشىلىعىندا، جۇڭگو قوس 100 جىلدىق كۇرەس نىساناسىن جۇزەگە اسىرۋ جورىعىندا شۇعىلالى ناتيجەگە قول جەتكىزىپ، دامۋ جەتىستىگىن ٴار ەلمەن بىرگە ٴبولىسىپ، وسىزاماندانۋعا قادام تاستاۋمەن بىرگە، جۇڭحۋانىڭ تاڭداۋلى ٴداستۇرلى مادەنيەتىن اسقاقتاتىپ، دۇنيە جۇزىنە ونەگە ورناتتى، قىرعىزستان جاق جۇڭگونىڭ تابىستى تاجىريبەلەرىنەن ۇيرەنۋدى قالايدى. قىرعىزستان مەن جۇڭگونىڭ دوستىق بارىس ـ كەلىسى ارىدان باستاۋ العان. ەكى ەلدىڭ قارىم ـ قاتىناسى تاياۋ جىلداردا تىڭ دەڭگەيگە كوتەرىلدى، جۇڭگو _ قىرعىزستان جاقتىڭ سەنىمدى دوسى جانە سەرىگى، تاراۋلار، جەرگىلىكتى ورىندار تىعىز سەلبەستىك ورىستەتتى ٴارى سۇبەلى جەتىستىككە قول جەتكىزدى. قىرعىزستان جاق تايۋانعا، شينجياڭعا ساياتىن، شياڭگاڭعا ساياتىن، ت. ب ماسەلەلەردە جۇڭگو جاقتى ۇزدىكسىز باتىل قولدايدى. قىرعىزستان جاق جۇڭگو جاقپەن قىرعىزستان _ جۇڭگو تاعدىرلاس ورتاق تۇلعاسى قۇرىلىسىن ىلگەرىلەتۋدە اناعۇرلىم كوپ جەتىستىككە قول جەتكىزىپ، ”ٴبىر بەلدەۋ، ٴبىر جولدى“ جوعارى ساپالى بىرگە قۇرىپ، جۇڭگو _ قىرعىزستان _ وزبەكستان تەمىر جولى سىندى وسى ”قۇرىش جىبەك جولىن“ ويداعىداي سالىپ، كاسىپ سالاسى، قارجى قوسۋ، ساۋدا، قاتىناس، ەلەكتروندى ساۋدا، وقۋ ـ اعارتۋ سياقتى سالالاردا سەلبەستىكتى ىلگەرىلەتۋدى قالايدى. حالىقارالىق، وڭىرلىك جاعدايدىڭ كۇردەلى وزگەرىسى الدىندا قىرعىزستان جاق جۇڭگو جاقپەن تىعىز سەلبەسىپ، شاڭحاي سەلبەستىك ۇيىمىنىڭ جانە جۇڭگو _ ورتا ازيا مەحانيزمىنىڭ ٴتىپتى دە زور دامۋعا قول جەتكىزۋىن ىلگەرىلەتىپ، ٴۇش ۇلكەن الەمدىك باستامانى بەلسەنە تياناقتاندىرىپ، ٴوڭىردىڭ جانە دۇنيە ٴجۇزىنىڭ بەيبىتشىلىگىن، ورنىقتىلىعىن بىرگە قورعاۋدى قالايدى.

كەڭەستەن كەيىن ەكى ەلدىڭ مەملەكەت باسشىلارى «جۇڭحۋا حالىق رەسپۋبليكاسى مەن قىرعىزستان رەسپۋبليكاسىنىڭ جاڭا داۋىردەگى جالپى بەتتىك ستراتەگيالىق سەرىكتەستىك قارىم ـ قاتىناستى تەرەڭدەتۋ جونىندەگى بىرلەسكەن مالىمدەمەسىنە» بىرگە قول قويدى، ”ٴبىر بەلدەۋ، ٴبىر جولدى“ بىرگە قۇرۋ سەلبەستىك جوباسى، سونداي ـ اق ديپلوماتيا، ەكونوميكا ـ ساۋدا، اۋىل شارۋاشىلىعى سياقتى سالالارداعى ٴبىر قىدىرۋ سەلبەستىك حۇجاتىنا قول قويىلۋىنا كۋا بولدى.

كەڭەستەن ىلگەرى شي جينپيڭ مەن حانىمى پىڭ لييۋان حالىق سارايىنىڭ سولتۇستىك زالىندا جاپاروۆ جانە حانىمى جاپاروۆانى قارسى الۋ سالتىن وتكىزدى.

تيان ـ انمىن الاڭىندا 21 رەت قۇرمەت ساليۋتى اتىلىپ، قۇرمەت قاراۋىلى قاتار تۇزەپ قۇرمەت ٴبىلدىردى. ەكى ەلدىڭ مەملەكەت باسشىلارى كوزدەن كەشىرۋ مىنبەسىنە شىقتى، اسكەري وركەستر جۇڭگو مەن قىرعىزستان ەكى ەلدىڭ مەملەكەت ٴانىن ورىندادى. جاپاروۆ شي جينپيڭنىڭ سەرىك بولۋىندا جۇڭگو حالىق ازاتتىق ارمياسىنىڭ قۇرمەت قاراۋىلىن كوزدەن كەشىردى ٴارى سالتانات قاتارىن تاماشالادى.

سول كۇنى تۇستە شي جينپيڭ مەن پىڭ لييۋان حالىق سارايىنىڭ جينسى زالىندا جاپاروۆ پەن ونىڭ حانىمىن قارسى الۋ قوناعاسىن وتكىزدى.

ۋاڭ ي جوعارىداعى قيمىلدارعا قاتىناستى.