جەرگىلىكتى ۋاقىت 5 - ايدىڭ 7 - كۇنى كەشتە مەملەكەت ءتوراعاسى شي جينپيڭ رەسەي زۇڭتۇڭى پۋتيننىڭ ۇسىنىسىمەن رەسەيدە مەملەكەتتىك ساپاردا بولۋ ءارى سوۆەت وداعىنىڭ ۇلى وتان قورعاۋ سوعىسى جەڭىسىنىڭ 80 جىلدىعىن ەسكە ءتۇسىرۋ سالتىنا قاتىناسۋ ءۇشىن ارناۋلى ۇشاقپەن ماسكەۋگە جەتتى. رەسەي جاق اۋەجايدا سالتاناتتى قارسى الۋ سالتىن وتكىزدى. سۋرەتتە: شي جينپيڭ قۇرمەت قاراۋىلى اترەتىن كوزدەن كەشىرۋدە.
□ سۋرەتتى شينحۋا اگەنتتىگىنىڭ ءتىلشىسى شيە حۋانچى تۇسىرگەن
شينحۋا اگەنتتىگىنىڭ 5 ـ ايدىڭ 7 ـ كۇنى ماسكەۋدەن بەرگەن حابارى (تىلشىلەر ياڭ يجۇن، جياڭ يوۋلين). جەرگىلىكتى ۋاقىت 5 ـ ايدىڭ 7 ـ كۇنى كەشتە مەملەكەت ٴتوراعاسى شي جينپيڭ رەسەي زۇڭتۇڭى پۋتيننىڭ ۇسىنىسىمەن رەسەيدە مەملەكەتتىك ساپاردا بولۋ ٴارى سوۆەت وداعىنىڭ ۇلى وتان قورعاۋ سوعىسى جەڭىسىنىڭ 80 جىلدىعىن ەسكە ٴتۇسىرۋ سالتىنا قاتىناسۋ ٴۇشىن ارناۋلى ۇشاقپەن ماسكەۋگە جەتتى.
شي جينپيڭ وتىرعان ارناۋلى ۇشاق رەسەي اۋە كەڭىستىگىنە كىرگەننەن كەيىن، رەسەي اۋە ارمياسىنىڭ سوعىس ۇشاعى اۋە كەڭىستىگىنە كوتەرىلىپ قورعادى.
شي جينپيڭ ماسكەۋ ۆنۋكوۆو ارناۋلى ۇشاق اۋەجايىنا جەتكەندە، رەسەيدىڭ ورىنباسار زۇڭليى گوليكوۆا قاتارلى ۇكىمەتتىڭ جوعارى دارەجەلى ٴمانساپتىلارى قىزۋ قارسى الدى.
رەسەي جاق اۋەجايدا سالتاناتتى قارسى الۋ سالتىن وتكىزدى. اسكەري وركەستر جۇڭگو _ رەسەي ەكى ەلدىڭ مەملەكەت ٴانىن ورىندادى. شي جينپيڭ قۇرمەت قاراۋىلى اترەتىن كوزدەن كەشىردى ٴارى سالتانات قاتارىن تاماشالادى.
شي جينپيڭ جازباشا ٴسوز سويلەپ، جۇڭگو ۇكىمەتى مەن جۇڭگو حالقى اتىنان رەسەي ۇكىمەتىنە جانە رەسەي حالقىنا ىقىلاستى سالەم جولدادى جانە ىزگى تىلەك تىلەدى.
شي جينپيڭ بىلاي دەپ اتاپ كورسەتتى: جۇڭگو مەن رەسەي _ ەتەنە جاقىن جاقسى كورشىلەر، بەينەت پەن زەينەتتى بىرگە كورەتىن ناعىز دوستار، ٴبىرىن ـ ٴبىرى تابىسقا جەتكىزەتىن جاقسى سەرىكتەر. ەكى جاق ىرگەلەس ٴىرى ەلدەردىڭ دۇرىس قارىم ـ قاتىناس جولىن ٴساتتى قاراستىرىپ تاۋىپ، جاڭا داۋىردەگى جۇڭگو _ رەسەي ستراتەگيالىق ىستەستىك رۋحىن قالىپتاستىردى. دەربەس، ٴوز ـ وزىنە قوجايىن بولعان، تولىسقان، بەكەم جۇڭگو _ رەسەي قارىم ـ قاتىناسى ەكى ەل حالقىنا وراسان زور قۇت ـ ىرىس اكەلۋمەن بىرگە، بۇكىل الەمنىڭ ستراتەگيالىق ورنىقتىلىعىن قورعاۋعا، تەپە ـ تەڭ، ٴتارتىپتى دۇنيە ٴجۇزىنىڭ كوپ ۇيەكتەنۋىن ىلگەرىلەتۋگە دە ماڭىزدى ۇلەس قوستى. بيىل _ دۇنيە جۇزىلىك فاشيزمگە قارسى سوعىس جەڭىسىنىڭ 80 جىلدىعى جانە بىرلەسكەن مەملەكەتتەر ۇيىمى قۇرىلعاندىعىنىڭ 80 جىلدىعى. جۇڭگو مەن رەسەي دۇنيە جۇزىندەگى نەگىزگى ٴىرى ەلدەر جانە بىرلەسكەن مەملەكەتتەر ۇيىمى حاۋىپسىزدىك القالار كەڭەسىنىڭ تۇراقتى القا ەلى رەتىندە، دۇنيە جۇزىلىك 2 ـ سوعىستىڭ جەڭىس جەتىستىكتەرىن قول ۇستاسا قورعاپ، زورەكەرلىك پەن وكتەمدىك ساياسيعا باتىل قارسى تۇرىپ، ناعىز كوپ جاقتىلىقتى امالياتتا ايگىلەپ، اناعۇرلىم ٴادىل، ۇيلەسىمدى الەمدىك باسقارۋ جۇيەسىن ورناتۋدى ىلگەرىلەتەدى. مەن پۋتين زۇڭتۇڭمەن بىرگە ەكى جاقتى قارىم ـ قاتىناس، ناقتى ىستەر سەلبەستىگى، سونداي ـ اق بىرگە كوڭىل ٴبولىپ وتىرعان حالىقارالىق جانە وڭىرلىك ماسەلەلەر جونىندە ىشكەرىلەي پىكىرلەسىپ، جۇڭگو مەن رەسەيدىڭ جاڭا داۋىردەگى جالپى بەتتىك ستراتەگيالىق ىستەستىك سەرىكتەستىك قارىم ـ قاتىناسىنىڭ دامۋىن ىلگەرىلەتۋگە كۇشتى قوزعاۋشى كۇش ۇستەۋدى ٴۇمىت ەتەمىن؛ كوپ ەلدىڭ باسشىلارىمەن جانە رەسەي حالقىمەن بىرگە دۇنيە جۇزىلىك فاشيزمگە قارسى سوعىس جەڭىسى ٴۇشىن ەرلىكپەن ٴوزىن ارناعان ارداگەرلەردى ساعىنا ەسكە الىپ، حالىقارالىق ادىلدىك پەن تۋراشىلدىقتى قورعاۋدىڭ داۋىرلىك اسقاق ٴۇنىن بىرگە اسقاقتاتۋدى ٴۇمىت ەتەمىن.
ساي چي، ۋاڭ ي قاتارلى ساپارلاستارى سول ۇشاقپەن بىرگە باردى.
جۇڭگونىڭ رەسەيدە تۇراتىن باس ەلشىسى جاڭ حانحۇي دا اۋەجايعا بارىپ قارسى الدى.
شي جينپيڭ اۆتوكولىكپەن اۋەجايدان ٴوزى تۇسەتىن قوناقجايعا بارا جاتقان جولىندا جەرگىلىكتى بۇقارا، سونداي ـ اق جۇڭگو قارجىلاندىرعان كاسىپورىندار مەن سول جەردە وقىپ جاتقان وقۋشىلار ۋاكىلدەرى جولدىڭ ەكى جاعىنا جينالىپ، ”ٴتوراعا شي جينپيڭنىڭ رەسەيگە ساپارلاي كەلگەندىگىن قىزۋ قارسى الامىز“ دەگەن جازۋى بار قىزىل كەرمە تۋ ۇستاپ، جۇڭگو _ رەسەي ەكى ەلدىڭ مەملەكەت تۋلارىن بۇلعاپ، شي جينپيڭنىڭ ساپارلاي كەلگەندىگىن قىزۋ قارسى الدى.
شينحۋا اگەنتتىگىنىڭ 5 ـ ايدىڭ 7 ـ كۇنى بەيجيڭنەن بەرگەن حابارى. مەملەكەت ٴتوراعاسى شي جينپيڭ رەسەي زۇڭتۇڭى پۋتيننىڭ ۇسىنىسىمەن ماسكەۋگە بارىپ، رەسەيدە مەملەكەتتىك ساپاردا بولۋ ٴارى سوۆەت وداعىنىڭ ۇلى وتان قورعاۋ سوعىسى جەڭىسىنىڭ 80 جىلدىعىن ەسكە ٴتۇسىرۋ سالتىنا قاتىناسۋ ٴۇشىن، 5 ـ ايدىڭ 7 ـ كۇنى تۇستەن كەيىن ارناۋلى ۇشاقپەن بەيجيڭنەن اتتاندى.
شي جينپيڭگە سەرىك بولىپ ساپارعا اتتانعانداردان جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ تۇراقتى مۇشەسى، ورتالىق كوميتەت كەڭسەسىنىڭ مەڭگەرۋشىسى ساي چي، جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ مۇشەسى، سىرتقى ىستەر مينيسترلىگىنىڭ مينيسترى ۋاڭ ي قاتارلىلار بار.