انار بۇلت \ شينجياڭ گازەتىنىڭ ءتىلشىسى دۋ جيانحۇي

تاياۋدا باعراش اۋدانى شەكىننۇر اۋىلى شەكىننۇر قىستاعىنىڭ تۇرعىنى روشانگۇل ماحمەتتىڭ 30 نەشە جاستاعى ۇلى شيە جۇن 2 بالاسىن ەرتىپ كورلا قالاسىنان ۇيىنە قايتىپ، اكە - شەشەسىنە امانداسا كەلدى. روشانگۇل وتاعاسىمەن بىرگە ۇستەلدى ءدامدى تاعامعا تولتىرىپ، ءبىر وتباسىنىڭ ادامدارى بىرگە ءازىل - قالجىڭ ايتىسا وتىرىپ شاتتىققا شومدى.

”شەشە سىزگە وڭاي ەمەس، ءبىز ءۇشىن كوپ جاپا شەكتىڭىز، قازىر بارلىعىمىز ەسەيدىك، ەندى ءبىز اكە - شەشەمىزگە قارايلاسۋىمىز كەرەك“، - دەدى شيە جۇن.

روشانگۇلدىڭ وتباسى ”ۇلتتار ىنتىماعىنىڭ بەرەكەلى شاڭىراعى“. 1983 - جىلدان باستاپ روشانگۇل مەن كۇيەۋى تۇرسۇن قاسىم ىلگەرىندى - كەيىندى ۇقساماعان ۇلتتان 5 بالا باعىپ الىپ، 4 جالعىز باستى قارتقا قارايلاسىپ، باعراش اۋدانىندا ۇلگىلى ىسكە اينالدى.

1997 - جىلى شەكىننۇر اۋىلى موعاتى قىستاعىندا تۇراتىن شيە جۇن 12 جاستا بولاتىن. قىستىڭ ءبىر كۇنى مەكتەپتەن تاراعان سوڭ، شيە جۇن روشانگۇلدىڭ ءۇيىنىڭ ارتىنا بۇعىنىپ الىپ، قاتقان ناندى كەمىرىپ وتىرعان - دى. روشانگۇلدىڭ ۇلى، شيە جۇننىڭ ساباقتاسى ءامدوللا تۇرسۇن ونى بايقاپ قالىپ، ۇيىنە ەرتىپ اپارادى. روشانگۇل شيە جۇنگە پالاۋ باسىپ بەرەدى، ول شيە جۇننىڭ ەسىندە قالعان ەڭ ءدامدى تاماق بولاتىن.

”كىشكەنە كەزىمىزدە ءۇيىمىز كەدەي بولاتىن، ۇنەمى اش جۇرەتىنبىز، روشانگۇل شەشەم مەنىڭ اكە - شەشەممەن اقىلداسقان سوڭ، مەن روشانگۇل شەشەمنىڭ ۇيىنە جاتتىم“، - دەدى شيە جۇن.

روشانگۇل مەن كۇيەۋىنىڭ باعىپ العان بالالارعا ءوز بالالارىنان ارتىق قاراعانى شيە جۇنگە ايرىقشا اسەر قالدىردى، شيە جۇندەر ءبىرشاما جاڭا ۇيدە جاتاتىن، ءوز بالالارى اكە - شەشەسىمەن بىرگە جاڭبىر ءوتىپ كەتەتىن ەكى بولمەلى ۇيدە تۇراتىن.

شيە جۇن وسى وتباسىندا 7 جىل تۇردى، تويىپ تاماق جەپ قانا قالماستان، جىل سايىن جاڭا كيىم كيەتىن، كەرىسىنشە روشانگۇل مەن كۇيەۋىنىڭ ءوز بالالارى ۇنەمى ەسكى - قۇسقى كيىم كيەتىن. ”اكە - شەشەمىز ۇنەمى تۇلكى قۇرساق جۇرەتىن، ۇنەمدەپ قالعان تاماقتى بىزگە بەرەتىن، بۇل ءبىزدىڭ ەسىمىزدەن كەتپەيدى، ولارعا قاتتى جانىمىز اشيتىن، كەيدە سىرتقا شىعىپ ۇساق - تۇيەك جۇمىس ىستەپ، تاپقان اقشامىزدى شەشەمىزگە بەرسەك، مۇلدەم المايتىن، ساقتاپ قويىپ وزدەرىڭ ىستەتىڭدەر دەيتىن“، - دەدى شيە جۇن ەسكە الىپ.

ءاسىلى روشانگۇل العاش توي جاساعان كەزدە وتباسىندا 16 مۋ جەر، نەشە ون تۇياق قوي بار بولاتىن، تاعى تراكتور، موتوتسيكل، تەلەۆيزور سياقتىلار بار بولىپ، تۇرمىستارى جاقسى بولاتىن. الايدا توي جاساعان 3 - جىلى ءبىرىنشى رەت 3 جاستاعى قىز بالا مۇناۋار وشۇردى باعىپ الىپ، تاعى ارت - ارتىنان 4 جالعىز باستى قارتقا قارايلاسقان سوڭ، وتباسى ەكونوميكا جاعدايى اناعان تارتسا مىناعان جەتپەي قالادى. سوندىقتان ەرلى - زايىپتى ەكەۋى جان - جاققا سابىلىپ ۇساق - تۇيەك جۇمىس ىستەپ اقشا تابادى، تاعى وتباسىنداعى قوي، سيىر جانە اقشاعا جارايتىن زاتتارىن دا ساتا باستايدى.

شەكىننۇر اۋىلى لاحەننۇر قىستاعىنداعى 90 نەشە جاستاعى اقات وسمان جالعىز باستى قارت بولاتىن، روشانگۇل وعان 5 جىل قارايلاسادى، كەيىن قىستاق قارتتى قارتتار ۇيىنە اپارادى. بيىل 3 - ايدا اقاتتىڭ ناۋقاسى اۋىرلاي تۇسەدى، روشانگۇل ونى قارتتار ۇيىنەن وتباسىنا اكەلىپ، ءوز قولىمەن جونەلتەدى.

بالالار مەن جالعىز باستى قارتتارعا قارايلاسۋ ءۇشىن، ءاسىلى باردام روشانگۇل جاپالى تۇرمىس كەشىرەدى، الايدا ول ەشقاشان وكىنىپ كورمەدى.

”نەسىنە وكىنەمىن، بالالاردىڭ بارلىعى ەسەيدى، نەمەرەلى بولدىم، قاراۋسىز قارتتار مەنى كورسە جايراڭ قاعادى، مەندە كوڭىلدەنە تۇسەمىن“. روشانگۇل بىلاي دەدى: ”اكەم ساقا پارتيا مۇشەسى، كىشكەنتاي كەزىمدە اكەمنىڭ قيىنشىلىعى بارلارعا كومەكتەسكەنىن كورگەنمىن، اكەمنىڭ ىقپال جاساۋىندا مەن دە پارتيا مۇشەسى بولدىم، قاراۋسىز - يەسىز جۇرگەن بالالار مەن قارتتاردى كورسەم جۇرەگىم اۋىراتىن، بارلىعىنا مۇمكىندىكتىڭ بارىنشا كومەكتەسەمىن“.

ءوز بالالارى الدىندا روشانگۇلدىڭ قىنجىلاتىن كەزدەردى دە بولاتىن. ونىڭ كەنجە قىزى داشۋەگە قابىلدانۋ شاقىرتۋىن تاپسىرىپ العان سوڭ، وتباسى ەكونوميكالىق قيىنشىلىعى سەبەبىنەن ءوزىنىڭ ارمانداعان داشۋەسىنە بارا الماي قالادى. ءار رەت وسى جايلى ءسوز بولسا، روشانگۇل مۇڭايعان كوڭىل كۇيىن جاسىرا المايدى.

كەزىندە روشانگۇلمەن 30 جىلدان ارتىق كورشى بولعان گاۋ شيۋجىن جانعا تولى وتباسىن كورىپ، ۇنەمى بارىپ بالا - شاعاسىنا قارايلاساتىن، ۇيىندە ءدامدى تاعام جاساسا بولدى روشانگۇل وتباسىنا دا جەتكىزىپ بەرەتىن، بالالار وقۋ باستاعان كەزدە ول ۇنەمى امالداپ اقشا جيناپ بەرەتىن.

روشانگۇل تىلشىگە ءوزىنىڭ ءىنىسىنىڭ دە ءبىر جالعىز باستى قارتقا قارايلاسىپ جاتقانىن، بيىل تاعى اۋىل جاعىنان ۇلتتار ىنتىماعىنىڭ ۇلگىسى بولىپ باعالانعانىن ايتتى.