باي اۋدانىنىڭ مالشىسى جارالانعان ساياحاتشىنى اتپەن 12 ساعاتتا تاۋدان الىپ ءتۇستى

انار بۇلت \ شينجياڭ گازەتىنىڭ ءتىلشىسى جاڭ شياۋمي

2 − 3 كۇندىك جولدى اتپەن سۋىت ءجۇرىپ 12 ساعاتتا باستى؛ 600 يۋاندىق ات جالاقىسىنىڭ ءبىر تيىنىن دا المادى. ات جالداۋعا سۇيەنىپ اقشا تاباتىن ءاحتام سىمايىل جارالانعان ساياحاتشىنى تاۋدان الىپ تۇسكەندە: جاي عانا ”كومەكتەسكەنىم عوي، اقشا المايمىن“، - دەدى. جان جادىراتارلىق بۇل ءىس 7 - ايدىڭ 24 - كۇنى ءۇيسىن بايىرعى جولىنداعى تيانتاڭ كولىندە تۋىلعان ەدى. ءاحتام باي اۋدانى حەيىر اۋىلى ۇكى ءدوۋا قىستاعىنىڭ تۇرعىنى، قىستاقتاعى تيانتاڭ كولى حالىقتىق تۇسەلحاناسى اۋىل - قىستاق دەمالىس ساياحاتى شارۋالار كاسىپتىك سەلبەستىك كووپەراتيۆى اتتىلار اترەتىنىڭ باستىعى.

وتكەن ءتۇنى ءاحتام اتقا ءمىنىپ، 10 ادامدىق ساياحاتشىلار ۇجىمىن باستاپ تيانتاڭ كولىنە بارىپ جايعاسىپ دەمالعالى جاتقان كەزدە، ءبىر دالا اۋەسكەرى كەلىپ ات جالاقىسىنىڭ قانشا بولاتىندىعىن سۇرايدى، ول ءبىر اتتىڭ ءبىر كۇندىك جالاقىسى 300 يۋان ەكەندىگىن بىلگەن سوڭ كەتىپ قالادى. 7 - ايدىڭ 24 - كۇنى تاڭەرتەڭ ءاحتام اتتانعالى جاتقاندا، الگى دالا اۋەسكەرىنىڭ شاتىردا جىلاپ وتىرعاندىعىن كورەدى. سۇراستىرا كەلىپ ونىڭ فاميلياسىنىڭ ياڭ ەكەندىگىن، چۇڭچيڭنەن كەلگەن، داشۋەنىڭ 3 - جىلدىعىندا وقيتىن وقۋشى ەكەندىگىن، شينجياڭدا ساياحاتتاپ جۇرگەلى 2 ايعا تاياعاندىعىن بىلەدى. جالعىز ءوزى جاياۋلاپ ءۇيسىن بايىرعى جولىن كەسىپ وتكەن كەزدە، اياعىنىڭ كونە سىرقاتى قايتالاپ، جول جۇرۋگە امالسىز قالىپتى، قالتاسىنداعى ساياحاتقا العان قاراجاتىنىڭ دا ءتۇبى كورىنە باستاپتى.

ءاحتام مەن وسى ارادان ءوتىپ بارا جاتقان لانتيان قۇتقارۋ - كومەكتەسۋ اترەتى باي اۋدانى شاعىن اترەتىنىڭ مۇشەلەرى جاعدايدى بىلگەننەن كەيىن اقى دامەتپەستەن ونى تاۋدان حاۋىپسىز ءتۇسىرىپ قويۋدى ۇيعارادى.

تيانتاڭ كولى حەيىر اۋىلىنان 50 كيلومەتردەي قاشىقتىقتا، جول بويى جەر جاعدايى قاتەرلى بولاتىن، تەڭىز دەڭگەيىنەن 2000 نەشە مەتردەن 4000 نەشە مەترگە دەيىن بيىك، جايشىلىقتا جاياۋ نەمەسە اتپەن 2 − 3 كۇن جۇرۋگە تۋرا كەلەتىن.

تيانتاڭ كولىنىڭ ماڭىنداعى اقبۇلاق اسۋى تەڭىز دەڭگەيىنەن شامامەن 3800 مەتر بيىك، ءۇيسىن بايىرعى جولىنداعى ەڭ قيىن جول بولىگى، كەيبىر جەرلەرىنىڭ كولبەۋلىگى ەرەكشە ۇلكەن بولىپ، توتەنشە قاتەرلى ەدى. ءاحتام جولدىڭ باسىم كوپ بولىگىندە شياۋياڭمەن ءبىر اتقا مىنگەسىپ ونى قورعاۋمەن بولدى، قيىن جەرلەردە ءوزى جاياۋلاپ، شياۋياڭ مىنگەن اتتى جەتەلەپ الدى.

شياۋياڭنىڭ جاراقاتىن ەرتەرەك ەمدەتۋى ءۇشىن، ولار اتتارىنا قامشى باسىپ سۋىت ءجۇرىپ وتىرىپ، 12 ساعاتتا حەيىر اۋىلىنا جەتىپ كەلدى. اۋىلدا ولار باي اۋدانى مادەنيەت - ساياحات كاسىپ سالاسىن دامىتۋ شەكتى سەرىكتەستىگىنىڭ قىزمەتكەرى جاڭ ۋيجياڭعا جولىعىپ قالدى. سونىمەن جاڭ ۋيجياڭنىڭ كومەگىمەن شياۋياڭ ەڭ قىسقا ۋاقىت ىشىندە كۇشارعا جەتكىزىلدى.

”ءاحتام پارتيا مۇشەسى، توتەنشە باۋىرمال جان. 2019 - جىلى ول نيڭبولىق ءبىر ساياحاتشىنى قۇتقارعان بولاتىن“. وسى شارۋالار كاسىپتىك سەلبەستىك كووپەراتيۆىنىڭ جاۋاپتىسى مامەت ناسىر: اتتىلار اترەتىندە 12 اتقوسشى بار، قاي - قايسىسى دا جارالانعان ادامدارعا جولىعىپ قالسا، كومەكتەسۋگە دايىن، - دەيدى.

ءۇيسىن بايىرعى جولى − ەل ىشىندەگى ايگىلى جاياۋ ساپارلاۋشىلار جول لەنياسى ءارى بيىل اۆتونوميالى رايوندىق مادەنيەت جانە ساياحات مەڭگەرمەسى العا قويعان 10 بايىرعى جول لەنياسىنىڭ ءبىرى. حەيىر اۋىلىنان تەكەس اۋدانى قارا دالا قالاشىعىنىڭ چوڭقۇشتاي قىستاعىنا دەيىن اتتىلى - جاياۋ جۇرگەندە ادەتتە 7 كۇندە ارەڭ ەندەي وتۋگە بولادى، جاياۋ ساپار شەگۋدىڭ ەڭ تاماشا ۋاقىتى ءار جىلى 6 - ايدىڭ باسىنان 10 - ايدىڭ باس شەنىنە دەيىن، قازىر ءدال جاياۋ ساپار شەگۋدىڭ قاۋىرت مەزگىلى. ”كەلەتىن ادامدار كوپ، 50 نەشە اتىمىز دا جەتىسپەي جاتىر“. مامەت 7 - ايدىڭ 24 - كۇنىنەن 25 - كۇنگە دەيىن 2 كۇندە 100دىڭ ۇستىندە ادام قابىلداعاندىقتارىن ايتتى.