لي پيڭ:

اپەكە - سىڭلىلەرىن باستاپ، وزىنە سەنىمدى ءومىر جولىن ورنەكتەدى

 انار بۇلت \ شينجياڭ گازەتىنىڭ ءتىلشىسى بارشا تەگىس

　　لي پيڭ (وڭدا) كەستەشىلىك كووپەراتيۆىندە كەستەشى اپەكە - سىڭلىلەرىمەن بىرگە ءونىم ۇلگىسىن كەڭەسۋدە.

　　 سۋرەتتى ءوزى قامداعان

ۇيدە جالعىز تۇراتىن تۋ ۋيۋيگە ىستىق كوجە جەتكىزىپ بەردى، كورشىسى ما ايبۋدىڭ وتپەي قالعان كوكونىستەرىن ساتۋ ءۇشىن ساتىپ الۋشى ساۋداگەرمەن بايلانىس جاسادى، كەستەشىلىك سەلبەستىك كووپەراتيۆىندەگى اپەكە - سىڭلىلەرىنە كەستە تىگۋ ونەرىن ۇيرەتتى... شاپشال سىبە اۆتونوميالى اۋدانى ناداچي نيۋلۋ اۋىلى ناداچي نيۋلۋ قىستاعىندا لي پيڭ اۋىزعا الىنسا بولعانى قىستاق تۇرعىندارى اۋىز جاپپاي ماقتاي جونەلەدى.

لي پيڭ ناداچي نيۋلۋ قىستاعىنىڭ تۇرعىنى، سونداي - اق بىرلەسكەن وتباسىلار باستىعى، بيىل ول داڭقپەن پارتيا 20 - قۇرىلتايىنىڭ ۋاكىلى بولىپ سايلاندى. كۇندەلىكتى قىزمەت پەن تۇرمىس بارىسىندا لي پيڭ باستان - اياق ءبىر كوممۋنيستىك پارتيا مۇشەسىنىڭ ولشەمىمەن وزىنە قاتاڭ تالاپ قويىپ، بۇكىل ىنتا - پەيىلىمەن ءار ۇلت بۇقاراسىنا قىزمەت وتەپ، قىستاق تۇرعىندارىن ءوز اعا - باۋىر، اپەكە - سىڭلىسىندەي كورىپ، كومەككە ءزارۋ ءاربىر جانعا بار كۇشىمەن كومەكتەستى. لي پيڭ تاعى دا قايشىلىق پەن داۋ - شاردى جاراستىرۋشى، قىستاق تۇرعىندارى اراسىندا قايىن ەنە مەن كەلىن اراسىنداعى قايشىلىق، كورشىلەر اراسىنداعى داۋ - شار سياقتى ماسەلەلەر تۋىلسا، بارلىعى ونى ىزدەپ كەلىپ شەشىم ەتۋدى قالايدى.

”بۇقارا ماعان سەنسە، مەن شىن نيەتىممەن ولارءۇشىن قىزمەت وتەيمىن“، - دەدى لي پيڭ. وسىنشاما كوپ جىلداردان بەرى، ول قىستاق تۇرعىندارىنىڭ قيىنشىلىعىن شەشۋىنە، تالاپ - تىلەكتەرىن ورىنداۋعا بار كۇشىمەن كومەكتەسىپ، قىستاق تۇرعىندارىنىڭ تىرەگى جانە جان اشىرى بولا ءبىلدى. سونىمەن بىرگە، ول ءوزىنىڭ قۇلشىنىسى ارقىلى ءوز باسىنىڭ جانە قاسىنداعى اپەكە - سىڭلىلەرىنىڭ تاعدىرىن وزگەرتتى.

قىستاق تۇرعىنى تۋ ۋيۋيدىڭ اكە - شەشەسى ەرتە قايتىس بولعان ەدى، جۋىقتا اياعىنا وپەراتسيا جاساتىپ، ءالى قالپىنا كەلە قويماعان ونىڭ تۇرمىسىنا لي پيڭ قارايلاسىپ كەلەدى. ”ول ماعان تاماق جاساپ بەرۋمەن بىرگە، ماعان كيىم الىپ بەردى، بەينە ءوز شەشەمدەي كوڭىل ءبولىپ تۇرادى“. لي پيڭدى تىلگە تيەك ەتكەندە، تۋ ۋيۋي ەرەكشە تەبىرەندى.

لي پيڭ كىشكەنتايىنان كيىم - كەشەك جوبالاۋدى جانە ءداستۇرلى كەستەشىلىكتى ۇناتاتىن، ورتا مەكتەپتى بىتىرگەننەن كەيىن، ءۇرىمجى قالاسىندا كيىم - كەشەك جوبالاۋدى ۇيرەنگەن، اۋىلىنا قايتقاننان كەيىن قولونەر كەستەشىلىك شەبەرحاناسىن اشقان، كەستە تىگۋگە شەبەر، جوبالاۋعا جۇيرىك ونى ماڭىنداعى جۇرتشىلىق تەگىس بىلەتىن. 2009 - جىلى 6 - ايدا شاپشال سىبە اۆتونوميالى اۋدانى ناداچي نيۋلۋ اۋىلى سىبە ۇلتتىق كەستەشىلىك جانە قولونەر جاساۋ كاسىپتىك سەلبەستىك كووپەراتيۆى قۇرىلعاندا، لي پيڭ القا باستىعى بولىپ سايلاندى. ونىڭ باستاۋىندا بارعان سايىن كوپتەگەن وتباسى ايەلدەرى كەستە تىگىپ جۇمىستانۋ ارقىلى كىرىستەرىن ارتتىردى.

گۋان شۋفاڭ ءار كۇنى وت باسى، وشاق قاسىنان شىقپايتىن وتباسى ايەلى بولاتىن، قارتتارعا قارايلاسۋ سەبەبىنەن، سىرتقا شىعىپ جۇمىس ىستەۋگە شاراسىز قالىپ، وتباسىنىڭ ەكونوميكالىق شارت - جاعدايى دا قيىنعا سوققان ەدى. گۋان شۋفاڭنىڭ وتباسى تۇرمىس شارت - جاعدايىن جاقسارتۋىنا كومەكتەسۋ ءۇشىن، لي پيڭ ءوزىنىڭ تاپسىرىسىنىڭ ءبىر بولىگىن وعان ءبولىپ بەرەدى ءارى ونىڭ كەستە ونىمدەرىن كەستەشىلىك كووپەراتيۆىنە اپارىپ ساتادى.

”كەستە تىگۋگە ولاقتاۋ ەدىم، لي پيڭ ورنەك جوبالاۋدان، نوباي سىزۋدان تارتىپ كەستە تىككەنگە دەيىن، ماعان ءوز قولىمەن ۇيرەتتى. قازىر اۋىلدىق پوچتا بولىمشەسىنەن قىزمەت تاپتىم، قىزمەتتەن سىرت ۋاقىتتا كەستە تىگەمىن، ەكى جاقتان دا كىرىس كىرگىزەمىن، وتباسىمنىڭ تۇرمىس شارت - جاعدايى بارعان سايىن جاقسارىپ كەلەدى“، - دەدى گۋان شۋفاڭ.

لي پيڭ كۇندىز اپەكە - سىڭلىلەرىمەن بىرگە قىزمەت ىستەپ، كوپشىلىككە كەستە تىگۋ ونەرىن ۇيرەتسە، كەشتە ول تاعى قاتىستى كىتاپتاردى تاۋىپ، ءوزىنىڭ كەستە تىگۋ ونەرىن جەتىلدىرەدى ءارى ۇنەمى كوپشىلىكتى باستاپ جاڭا ونىمدەردى زەرتتەپ جاسايدى. قازىر كەستەشىلىك كووپەراتيۆىنىڭ ونىمدەرى ەل ءىشى - سىرتىنا ساتىلدى، اپەكە - سىڭلىلەردىڭ ورتاشا ايلىق كىرىسى 2000 يۋاننان استى، كووپەراتيۆتىڭ جىلدىق ءونىم قۇنى ەڭ العاشقى 200 مىڭ يۋاننان ارتىپ 420 مىڭ يۋانعا جەتتى.

”بيىل اۋىلدا ۇلتتىق ەرەكشەلىككە يە قىستاق جانە حالىقتىق تۇسەلحانا قۇرىلادى. مەن ساياحات كاسىبىمەن ۇشتاستىرىپ، اپەكە - سىڭلىلەرىممەن بىرگە اناعۇرلىم جاقسى مادەنيەت جاسامپازدىعى ساياحات ونىمدەرىن جوبالاپ، جاساپ، ءتىپتى دە كوپ اپەكە - سىڭلىلەردىڭ اناعۇرلىم جاقسى تۇرمىس كەشىرۋىنە مۇمكىندىك جاساماقشىمىن“، - دەدى لي پيڭ نىق سەنىممەن.

لي پيڭنىڭ دانەكەرلىگىندە اپەكە - سىڭلىلەر وزدەرىنە سەنىمدى ءومىر جولىن تاپتى ءارى ارمان - تىلەكتەرىن كەستەلەدى.