− رايونىمىزداعى قالىڭ كادرلار مەن جۇمىسشى - قىزمەتكەرلەر جۇپ قۇراعان تۋىستارىمەن بىرگە جۇڭچيۋدى تويلادى

انار بۇلت \ شينجياڭ گازەتىنىڭ تىلشىلەرى

9 - ايدىڭ 29 - كۇنى حوتان قالاسى گۇلباق ءمالىسى شيداچياۋ الەۋمەتتىك اۋماعى قىزۋ دۋمانعا بولەندى، الەۋمەتتىك اۋماق قاراستى رايونداعى تۇرعىنداردى جۇڭچيۋ مەرەكەسىن، مەملەكەت مەرەكەسىن بىرگە قۇتتىقتاۋ قيمىلىن وتكىزۋگە ۇيىمداستىردى.

　　□ سۋرەتتى دۇڭ رۇيچياڭ تۇسىرگەن

جۇڭچيۋ شادىمان مەرەكەسى قارساڭىندا، رايونىمىزداعى قالىڭ كادرلار، جۇمىسشى - قىزمەتكەرلەر تيانشان الابىن ىشكەرىلەي ارالاپ، ءار ۇلت تۋىستارىمەن ءبىر ارادا باس قوسىپ، سۇيىسپەنشىلىكتى بايانداپ، پارتيانىڭ مەيىرىن جىرلاپ، ىنتىماقتى تىلگە تيەك ەتىپ، دامۋدى كوزدەپ، باس قوسۋ ساتىنەن بىرگە ءلاززاتتاندى. كوڭىلدى، اسەرلى، مەيىرلى كورىنىستەر جەر - جەردە تولاسسىز جارىققا شىقتى.

”مەن جانە مەنىڭ وتانىم، ءبىر ءسات تە بولىنبەيمىز، مەيلى قايدا بارسام دا، ماداق جىرىم تاۋسىلمايدى“... جۇڭچيۋ مەرەكەسى قارساڭىندا قابا اۋدانى اقشي قالاشىعى اقشي قىستاعىنداعى جۇڭچيۋ بىرلەسكەن ساۋىعىندا ياڭ باۋحۋا مەن ياڭ شيڭحۋا قىستاقتاعى اۋىلداستارىمەن بىرگە «مەن جانە مەنىڭ وتانىم» دەگەن حوردى شىرقادى.

ياڭ باۋحۋا قابا اۋداندىق پارتكوم ۇيىمداستىرۋ ءبولىمىنىڭ ورىنباسار باستىعى، ياڭ شيڭحۋا مەن جۇپ قۇراپ تۋىس بولعانىنا 8 جىل بولدى، اپتا سوڭىندا جانە مەرەكە - دەمالىستارىندا ياڭ باۋحۋا ۇنەمى ياڭ شيڭحۋانىڭ ۇيىنە امانداسا كەلىپ، تۇرمىستا قانداي قيىنشىلىعى بار ەكەنىن، مال ءوسىمىن، ەگىس جۇمىستارىنا كومەك قاجەت ەتەتىن - ەتپەيتىندىگىن ۇعىسادى... ءار جولى كەلگەن سايىن ياڭ باۋحۋا ياڭ شيڭحۋانىڭ وتباسىنداعى ءىس جۇزىندىك قيىنشىلىعىن شەشىپ بەرەدى.

”ءار رەتكى مەرەكە - مەيرامدا ءبىز ەكى وتباسىنداعى تۋىستار ءبىر اراعا باس قوسىپ، باس قوسۋ داستارقانىنان ءدام تاتىپ، اڭگىمەلەسىپ تۇرامىز، مەنىڭشە، بۇل ەڭ باقىتتى ءسات“! - دەدى ياڭ شيڭحۋا.

”ءبىزدىڭ جاسىمىز ەگدەلەگەن سوڭ باسقالاردىڭ بىزبەن اڭگىمەلەسىپ، سويلەسكەنىن قالايمىز. جۇڭچيۋ مەرەكەسىندە سىزدەر كەلىپ بىزگە سەرىك بولىپ، ايكۇلشە اكەلىپ بەردىڭىزدەر، بۇعان ءبىز قاتتى قۋاندىق“! - دەدى 9 - ايدىڭ 29 - كۇنى يانجي حۇيزۋ اۆتونوميالى اۋدانى بەيداچۇي اۋىلى ليۋشىحۋ قىستاعىنىڭ تۇرعىنى تۇردى مامەت ما چاۋدىڭ قولىن ۇستاپ تۇرىپ.

ما چاۋ يانجي حۇيزۋ اۆتونوميالى اۋدانى بەيداچۇي اۋىلدىق ۇكىمەتتىڭ كادرى، بيىل 67 جاستاعى تۇردى ونىڭ جۇپ قۇراعان تۋىسى، ەرلى - زايىپتى ەكى قارت قىستاقتان ءبىر دۇكەن اشىپ، ىشەر اس، كيەر كيىمنەن تارىقپاعانىمەن، بالالارى سىرتتا قاربالاس جۇمىس ىستەپ، ۇيىنە كوپ قايتا المايدى. ما چاۋ ۇنەمى ۋاقىت شىعارىپ تۇردىمەن اڭگىمەلەسەدى، تۇردى دا ونى ءوز بالاسىنداي كورەدى. تەلەفونىندا ماسەلە شىقسا، قول تەلەفونى توراپقا جالعانباي قالسا، ول بارلىعىندا ما چاۋدى كومەككە شاقىرادى، ما چاۋ دا قاشاندا دەر كەزىندە شەشىپ بەرەدى.

”وسىنشاما جىلداردان بەرى ءبىز ءبىر ءۇيلى جاندارداي تاتۋ - ءتاتتى ءوتىپ كەلەمىز. وسىنداي باس قوساتىن كۇندەردە مەن، ارينە، سىزدەرمەن بىرگە مەرەكە وتكىزەمىن“، - دەدى ما چاۋ.

”تاڭ ءتوراعا، ۇيگە كىرىڭىز، ءبىزدىڭ اتۇشتىڭ ءدامدى تاعامىنان ءدام تاتىڭىز“، - دەدى 9 - ايدىڭ 27 - كۇنى اتۇش قالاسى اعۋ اۋىلى توعراق قىستاعىنىڭ تۇرعىنى ايتاحۇن ءومار اۆتونوميالى رايوندىق باس جۇمىسشى ۇيىمى پارتيا باسشىلىق گرۋپپاسىنىڭ مۇشەسى، ورىنباسار ءتوراعا تاڭ حۇڭۋيدىڭ قولىن ۇستاپ، ىستىق ىقىلاسپەن ۇيگە كىرۋگە باستاپ.

قوناق بولمەگە كىرگەندە ايتاحۇننىڭ ۇيىندەگىلەر الدەقاشان پىسىرىلعان قوي ەتى، ءۇي لاعمانى سياقتى ءدامدى تاعامداردى ۇستەلگە ءتىزىپ قويىپتى. تاڭ حۇڭۋي مەملەكەتتىك باس جۇمىسشى ۇيىمىنان شينجياڭعا كومەككە كەلگەن كادر، بيىل 7 - ايدا شينجياڭعا قىزمەتكە كەلە سالىسىمەن ، قىستاققا بارىپ جۇپ قۇراپ تۋىس بولۋدى ىرىقتىلىقپەن تالاپ ەتتى، بۇل ونىڭ ايتاحۇننىڭ وتباسىنا تۇڭعىش رەت كەلۋى ەدى.

ايتاحۇن تاڭ حۇڭۋيعا پارتيانىڭ ابزال ساياساتىنىڭ ارقاسىندا، ۇلكەن ۇلى جانە ۇلكەن قىزى ەكەۋى دە قىزمەت ىستەپ جانە تۇراقتى كىرىس كىرگىزگەندىگىن، وتباسىندا تاعى 20 قوي جانە 15 كەپتەر باققاندىعىن، بىلتىر ءبىر ءۇيلى جاننىڭ كىرىسى 80 مىڭ يۋاننان اسىپ، تۇرمىستارى بارعان سايىن جاقسارعاندىعىن ايتتى.

”سالدەن سوڭ ءبىز قىستاقتىڭ’قوس مەرەكە‘ ساۋىق كەشىنە بىرگە قاتىناسايىق، قىستاق تاعى ناندى ەڭ ءدامدى پىسىراتىن ’نان پاتشاسىن‘، قويدى ەڭ جاقسى باعاتىن ’قوي پاتشاسىن‘ باعالايدى“! - دەپ ايتاحۇن تاڭ حۇڭۋيگە ۇسىنىس قويدى. ايتاحۇننىڭ كەنجە ۇلىنىڭ ەندى عانا ورتا مەكتەپكە تۇسكەنىن ەستىگەن تاڭ حۇڭۋي ايتاحۇنعا بالانىڭ تاربيەسىنە، ءسوز جوق، ءمان بەرۋدى قاداعالادى.

”ءار ۇلت اعا - باۋىر، اپەكە - سىڭلىلەردىڭ ءبىر نيەتپەن ىنتىماقتاسۋى − شينجياڭنىڭ دامۋىنىڭ ىرگە تاسى. بۇدان بىلايعى شينجياڭعا كومەكتەسۋ قىزمەتىندە مەن تۋىسىممەن قول ۇستاسىپ، تىلەكتەس بولىپ، ولاردىڭ بايۋ جولىنا تۇسۋىنە كومەكتەسىپ، ولاردىڭ تۇرمىسىن بارعان سايىن جاقسارتۋىنا مۇمكىندىك جاسايمىن“، - دەدى تاڭ حۇڭۋي.

9 - ايدىڭ 29 - كۇنى جۇڭگو مۇناي حيمياسى شينجياڭ حوتان مۇناي بولىمشە سەرىكتەستىگىنەن لوپ اۋدانى بۇيا اۋىلى تاشقىرقى چاھارباق قىستاعىندا تۇراتىن ءبىرىنشى شۋجيى لي حۇي كۇرىش، ماي سياقتى حال سۇراۋ بۇيىمدارىن قىستاق تۇرعىنى نۇرمامەت ماقسۇتتىڭ ۇيىنە جەتكىزدى، ”وتباسىڭىزدا قانداي قيىنشىلىق بولسا، قاشان بولسا دا مەنى ىزدەڭىز“.

”تۋىسىم مەرەكەنى بىزبەن بىرگە وتكىزدى ءارى بىزگە حال سۇراۋ بۇيىمدارىن الا كەلىپتى، مەن ەرەكشە اسەرلەندىم“، - دەدى نۇرمامەت.

9 - ايدىڭ 29 - كۇنى سۇن جين - ي مەن قىزمەتتەستەرى ايكۇلشە جانە كامپيت سياقتى سالەم - ساۋقىتتارىن الىپ، ەرفانجان تۇرعۇننىڭ ۇيىنە كەلدى، بۇل ولاردىڭ 2 - رەت بىرگە وتكىزگەن جۇڭچيۋ مەرەكەسى ەدى.

سۇن جين - ي گۇما اۋدانى انحۇي تاجىريبە مەكتەبىنىڭ باستىعى. 2021 - جىلى ول انحۇيدان شينجياڭعا كومەككە كەلگەن وقىتۋشى رەتىندە گۇما اۋدانىنداعى انحۇي تاجىريبە مەكتەبىنە كەلىپ وقىتۋشى بولىپ، مەكتەپ ۇيىمداستىرعان جۇپ قۇراپ تۋىس بولۋ قيمىلىندا ەرفانجانمەن جۇپ قۇراپ، تۋىس بولدى. ەرفانجاننىڭ ءۇيى گۇما اۋدانى چودا اۋىلى مەملەكەت يەلىگىندەگى مال فەرماسى باشلاق قىستاعىندا تۇرادى. سۇن جين - ي تاريح ساباعىن وتەدى، ۇيرەنۋ جاعىندا وعان كومەكتەسۋدەن سىرت، تۇرمىستا دا اكەسى سياقتى وعان قالتقىسىز قامقورلىق جاسادى.

سول كۇنى كوپشىلىك اۋلادا قورالانا وتىرىپ، سۇن جين - يدىڭ جۇڭچيۋ مەرەكەسىنىڭ كەلۋ تاريحى مەن قاتىستى ءداستۇرلى مادەنيەت اڭگىمەلەرىن تىڭدادى. سۇن جين - ي جاندى دا وبرازدى اڭگىمەلەپ، ەرفانجان مۇقيات تىڭداپ، شەشەسىنە دە سول جەردە اۋدارىپ بەرەدى. ەرفانجان مەن شەشەسى سۇن جين - ي مەن قىزمەتتەستەرىنە ءدامدى تاعامدار ازىرلەپ بەردى.

سۇن جين - ي فوتو اپپاراتىن الىپ، وسى ءبىر تاماشا ءساتتى سۋرەتكە ءتۇسىردى، كامەراداعى كۇلىمسىرەگەن جۇزدەرگە قاراپ، سۇن جين - ي وسى جولعى جۇڭچيۋ مەرەكەسىنىڭ باقىتتى وتكەندىگىن سەزىندى.

(ءتىلشى سۇڭ ۋيگو، قاتىناسقان ءتىلشى باي سۋجۇن، ەرىكتى تىلشىلەر ما يۇي، جاڭ يانچاۋ)