قوسىننان شەگىنسە دە اۋەلگى ماقساتىنان اينىماعان ساقا جاۋىنگەر
− مەملەكەتتىك ”ەڭ تاڭداۋلى وتباسى“ اتاعىنىڭ يەگەرى الماسبەك ٴسادۋ ۇلى جونىندە
تۇردان جاناقىن ۇلى، قايىربەك قاسيران ۇلى، لۋ جۇڭ (ٴوز تىلشىلەرىمىز)
ۇلىلىق قاراپايىمدىلىقتان كەلەدى، قاراپايىمدىلىق ۇلىلىقتى سومدايدى، بۇگىنگى ٴبىزدىڭ اڭگىمەمىزگە ارقاۋ بولىپ وتىرعان كەيىپكەرىمىز دە انە سونداي قاراپايىمدىلىعىمەن ٴوز ورتاسىنىڭ ۇلگىسى بولعان جان. ونىڭ كوڭىلى قالاپ، قانىنا سىڭىرگەن قاراپايىمدىلىق قاعيداسى − جۇرتقا جاساعان جاقسىلىعىن ەشقاشان جىپكە ٴتىزىپ، كوگەن كوزىنەن وتكىزبەۋ. انىعىراق ايتار بولساق، الماسبەك ٴسادۋ ۇلى ەسىمدى وسى كەيىپكەرىمىز بۇل كۇندەرى مەملەكەتتىك ”ەڭ تاڭداۋلى وتباسى“ ماراپاتىنا يە بولىپ وتىرسا دا، ٴبىراق، وسىنشاما جىلداردان بەرى ول ٴوزىنىڭ، ٴسىرا، قانشاما ادامعا كومەك قولىن سوزعانىن انىق ايتىپ بەرە المايدى. بار بىلەتىنى: ٴار جىلى مەرەكە - مەيرمدا كىمدەردىڭ ۇيىنە بارىپ حال سۇراعانى، قيىنشىلىعى بار وتباسىلارىنا قىستا كومىر ٴتۇسىرىپ بەرگەنى، «1 - ماۋسىم» حالقارالىق بالالار مەرەكەسى قارساڭىندا ٴال - اۋقاتى ناشار وتباسىلارىنىڭ بالالارىنا وقۋ قۇرالدارىن الىپ بەرگەنى عانا...
ماي اقىسى الىنبايتىن تەگىن دۇكەن
”ەر ايناسى − ەڭبەگى“، سوناۋ جىلدارى قوسىنعا قاتىناسىپ جىگەرىن شىڭداعان، قوسىننان شەگىنگەننەن كەيىن دە تىنىمسىز تىرلىگىن جالعاستىرىپ، قوس قولىنا سۇيەنىپ باياشات تۇرمىستىڭ بارابانىن شالعان الماسبەك ٴسادۋ ۇلى شارۋاشىلىقتىڭ تىزگىنىن ەندى ٴبىر قىرىنان ۇستايىن دەگەن ويمەن 2005 - جىلى 150 مىڭ يۋان قارجى شىعارىپ، نىلقى اۋدانى قاراتوبە اۋىلى كوكتوعان قىستاعىنىڭ نەگىزگى كوشە بويىنان 90 شارشى مەترلىك ەكى بولمەلى دۇكەن سالدىرادى. ٴبىراق سودان بەرى 20 جىلعا جۋىق ۋاقىت وتسە دە، ول وسى دۇكەننەن پايدا تاپقانى بىلاي تۇرسىن، اۋەلى قوسقان قارجىسىن دا قايتارىپ الا المايدى، بۇل ونىڭ ساۋداعا ەبىنىڭ جوقتىعىنان ەمەس، قايتا ٴار ىسكە قاناعات ەتە بىلەتىن كوڭىلىنىڭ توقتىعىنان، قىسىلعانعا كومەك بەرىپ، قيسايعانعا سۇيەۋ بولسام دەيتىن پەيىلىنىڭ كەڭدىگىنەن ەدى. قىستاقتىڭ نەگىزگى كوشەسىنە جايعاسقان ۇرىمتال ورىنداعى وسىنداي ەكى بولمەلى دۇكەننىڭ ماي اقىسى قازىرگى باعا بويىنشا ەسەپتەگەندە جىلىنا 5 مىڭ يۋاننان كەم بولمايتىنى بىلايعى جۇرتقا ايدان انىق جاعداي. دۇكەن سالىنىپ بىتكەننەن كەيىن الماسبەك دۇكەندى بىرنەشە جىل سونداعى ٴبىر اۋىلداسىنا مايعا بەرەدى، الايدا مايعا العان ادامنىڭ وتباسى قيىنشىلىعى اۋىر بولعاندىقتان، سونىمەن بىرگە، ونىڭ قوس قولىما سۇيەنىپ تۇرمىس قيىنشىلىعىمدى ٴوزىم شەشىپ، ٴوز ەڭبەگىممەن ەڭسەمدى كوتەرسەم دەگەن ىنتاسىن بايقاعان الماسبەك دۇكەندى وعان نەگىزىنەن تەگىن پايدالانۋعا بەرەدى. ”ٴوز قالتاڭنان قارجى شىعارىپ سالدىرعان دۇكەنىڭدى وزگەلەرگە تەگىن پايدالانۋعا بەرگەنىڭ نە“ دەپ كىنالاعان اعايىن - تۋىستىڭ الدىندا ”جاعدايىن كورە تۇرا قايتىپ اقى الماقپىن“ دەپ اعىنان اقتارىلاتىن ول.
وسىلايشا ارادا بىرنەشە جىل ٴوتتى، دۇكەندى ”مايعا العان“ وتباسىنىڭ دا تۇرمىسى وڭالىپ، شارۋاشىلىعى وڭىنا باستى. سونىمەن دۇكەندى الماسبەكتىڭ ٴوزى قايتا قولىنا الدى. دۇكەندى قولىنا قايتا العان الماسبەك ەندى مۇنى تاعى ٴبىر قىرىنان جۇرت كوزىنە ايگىلەدى. ارادا كوپ وتپەي دۇكەنگە ”مەيىربان اكە ەرەن بازارى“ ماڭدايشالىعى ٴىلىندى. بۇل كەزدە الماسبەك اي سايىن زەينەتاقىسىنان 2000 - 3000 يۋان اقشا شىعارىپ، دۇكەنگە نەگىزىنەن ۇن، كۇرىش، سۋ ماي سياقتى تۇرمىستىق بۇيىمداردى كوبىرەك ەنگىزدى دە، ونى سول جەردەگى قيىنشىلىعى بار بۇقاراعا تەگىن بەرەتىن بولدى.
كىشكەنتايىنان باستاپ اكەسىنىڭ وسىنداعى جۇرتقا جاساعان جاقسىلىعىن كۇندە كورىپ، ”كوپشىل بول“ دەگەن ٴتالىمىن كوكەيىنە ۇيالاتىپ كەلە جاتقان الماسبەكتىڭ ۇلى سەرىك: ”ۇزاق جىلداردان بەرى اكەمنىڭ جۇرتقا جاساعان مۇنداي جاقسىلىقتارى مەن كومەكتەرى شىنىمەن دە از بولعان جوق“ دەدى كوكىرەگىن كەرنەگەن ماقتانىش سەزىممەن.
الماسبەكتىڭ ”بالالارى“
”سۇرىنگەن ادامدى سۇيەسەڭىز، ورنىنان تۇرىپ ەڭسەسىن تىكتەي الادى؛ اداسقان ادامعا جول سىلتەسەڭىز، دۇرىس باعىتىن تابۋى مۇمكىن“. الماسبەكتىڭ بالا تاربيەسىندەگى تاعىلىمى مىنە وسىنداي. وسى سەبەپتى دە ونىڭ ”بالالارى“ ٴومىر جولىندا ٴوز تىرلىكتەرىنىڭ وتىن مازداتىپ جاعىپ كەلەدى.
1984 - جىلى سەرىك الماسبەك ۇلىنىڭ كىشكەنتاي كەزى بولاتىن، ٴبىر كۇنى اكەسى الماسبەك اياق استىنان ۇيىنە ٴبىر جىگىتتى ەرتىپ كەلىپ: ”بۇل جىگىتتىڭ اتى ەركىن، بۇدان كەيىن ٴبىزدىڭ ۇيدە تۇرادى“ دەپ كەسەتە سويلەدى.
قوسىننان شەگىنىپ، اۋىلىنا ورالعان الماسبەك جوعارىنىڭ ورنالاستىرۋى بويىنشا نىلقى اۋدانى قۇجىرتاي اۋىلىندا جاستار وداعى قىزمەتىنە جاۋاپتى بولىپ ىستەيتىن. ٴبىر كۇنى ول وسى ماڭدا قايدان كەلگەنى بەلگىسىز ٴبىر جىگىتتىڭ باس - پاناسىز جۇرگەنىن، قاقاعان قىستا كيىمدەرىنىڭ جۇقا، جاعدايىنىڭ ٴماز ەمەس ەكەندىگىن ەستيدى. سونىمەن ول باسقالاردىڭ ايتۋى بويىنشا الگى جىگىتتى ٴبىر تامنىڭ بۇرىشىندا وتىرعان جەرىنەن تاۋىپ الادى. ەركىن ەسىمدى بۇل ۇيعۇر ازامات ٴۇيىنىڭ اتۇشتا ەكەنىن، ەكى جىلدىڭ الدىندا وسى جاققا كەلىپ ٴبىر اسحانادا ۋاقىتتىق جۇمىس ىستەگەنىن، ٴبىر مەزگىل ىستەگەن سوڭ اسحانا قوجايىنى ەڭبەكاقىسىن بەرمەي ونى قۋىپ جىبەرگەنىن، سودان اۋىلىنا قايتاتىن جول قاراجاتى دا جوق، وسىندا قاڭعىپ قالعانىن ايتادى.
ەركىننىڭ جاعدايىن ٴوز اۋىزىنان ەستىگەن الماسبەك دەرەۋ ونى سول جەردەگى ساقشى بولىمشەسىنە ەرتىپ بارىپ، قاتىستى جاعدايلارىن ىشكەرىلەي انىقتاپ العان سوڭ، اتا - اناسىنا حابارلاسىپ، ولاردى الاڭسىز ەتىپ، جول قاراجاتىن بەرىپ، ونى ۇيىنە قايتارماق بولادى، ٴبىراق ەركىن اۋىلىنا قايتقىسى كەلمەيتىنىن، وسىندا بىرەر جۇمىس ىستەمەك ويىن ايتىپ، قايتۋعا كونبەيدى. سونىمەن الماسبەك ونى ۇيىنە ەرتىپ كەلەدى.
ەركىن الماسبەكتىڭ وتباسىندا 3 جىل تۇرعاننان كەيىن، 1987 - جىلدىڭ ٴبىر كۇنى الماسبەككە ٴوز الدىما اسحانا اشسام دەگەن ويىن ايتادى. جاس جىگىتتىڭ جالىندى بەينەسى مەن تالابىن بىلگەن الماسبەك ”بولامىن دەگەن بالانىڭ بەتىن قاقپا، بەلىن بۋ“ دەگەن حالىق دانالىعى بويىنشا ”بالام، ويىڭ جاقسى ەكەن، ٴىسىڭ ىلگەرى بولسىن“ دەپ تىلەگىن ٴبىلدىرىپ، قالتاسىنان 8 مىڭ يۋان قارجى شىعارىپ وعان اسحانا اشاتىن ٴۇي مايعا الىپ بەرۋمەن بىرگە، اسحاناعا قاجەتتى جابدىقتارىن دا تولىقتاپ بەرەدى. جاس بولسا دا جالىنداپ تۇرعان جىگىت ”اكەسىنىڭ“ كومەگىندە شاعىن اسحانانىڭ ساۋداسىن بىردەن قىزدىرىپ جىبەرەدى. بىرتە - بىرتە دامىتىپ، 1991 - جىلى ۇرىمجىگە بارىپ اسحانا اشادى. ”ساۋدانىڭ ەبىن بىلەتىن جىگىت ەكەن، ساۋداسى دا كەرەمەت جاقسى بولدى“ دەيدى الماسبەك ٴسادۋ ۇلى ريزاشىلىقپەن.
1987 - جىلدىڭ ٴمالىم ٴبىر كۇنى، الماسبەك تاعى ٴبىر قىز بالانى ۇيىنە ەرتىپ كەلەدى. باقاش سىدىق قىزى ەسىمدى بۇل بالا الماسبەكتىڭ ايەلى قىزىرحان كەرىمقازى قىزىنىڭ قولىندا وقىعان وقۋشىسى ەدى. اكەسى قايتىس بولعاننان كەيىن وتباسى جاعدايىمەن وقۋدان قول ۇزگەن ەكەن. الماسبەك ونىڭ كيىم - كەشەك تىگەتىن ونەرىنىڭ بار ەكەنىن بىلگەن سوڭ، ونى اۋىلداعى ٴبىر تىگىنحاناعا شاكىرتتىككە بەرەدى. 1990 - جىلى باقاش ٴوز الدىنا تىگىنحانا اشۋ ويى بار ەكەنىن ايتادى، مۇنى ەستىگەن الماسبەك دەرەۋ 4 مىڭ يۋان قارجى شىعارىپ وعان ٴۇي مايعا الىپ بەرەدى جانە اياق ماشينا سياقتى قاجەتتى جابدىقتارىن تولىقتاپ بەرەدى.
الماسبەكتىڭ الاش ەسىمدى تاعى ٴبىر ”بالاسى“ بار ەدى، الماسبەك وسى ”بالاسىنان“ كوپ قام جەدى، كوبىرەك الاڭدادى. ويتەتىنى، ٴدال سول كەزدە بۇل بالا ىشىمدىككە كوبىرەك بەرىلگەن بولاتىن. اتا - اناسىنان ەرتە ايىرىلعان الاش الماسبەكتىڭ ۇيىنە جاقىن جەردەگى ٴبىر وتباسىندا ۋاقىتتىق جۇمىس ىستەپ جۇرەتىن. الماسبەك ونىمەن وسى ورايدا تانىسقان ەدى. ”جاڭادان تانىسقان كەزىمدە الاشتىڭ كوڭىل كۇيى جاقسى بولماعاندىقتان ىشىمدىككە كوبىرەك سالىنعان ەكەن، ىشىمدىككە سالىنعان ادامدى كىم جاقتىرادى دەيسىز. مەن وعان بۇلاي كەتە بەرسەڭ بولمايدى، جاقسى ادام بولۋىڭ كەرەك دەپ اقىل ايتتىم. 2007 - جىلى ٴشوپ شابىس كەزىندە ونى ۇيگە الىپ كەلىپ، جاقسىلاپ تاربيە بەردىم. ول سودان باستاپ ىشىمدىككە سالىنۋىن قويدى“ دەدى الماسبەك.
2009 - جىلى الماسبەك قالىڭمالىن بەرىپ، بارلىق توي قاراجاتىن ٴوزى شىعارىپ، تاڭبالى جايلاۋىندا دۋماندى تويىن جاساپ، الاشتىڭ باسىنا وتاۋ تىگىپ، باۋىرىنا قازان اسىپ بەرەدى.
ۇلتتار ىنتىماعىنىڭ جارقىن ۇلگىسى
”ۇلتتار ىنتىماعى − ٴار ۇلت حالقىنىڭ جان تامىرى، شينجياڭنىڭ دامۋىنىڭ، العا باسۋىنىڭ ٴتۇبىرلى ىرگە تاسى“. باس شۋجي شي جينپيڭ شينجياڭنىڭ ۇلتتار ىنتىماعى، العاباسارلىعى ىستەرىنە زور ٴۇمىت ارتىپ وسىلاي دەگەن ەدى. ۇلتتار ىنتىماعىن كوز قاراشىعىنداي قورعاپ، ۇلتتار ىنتىماعىن ٴومىرىن قاستەرلەگەندەي قاستەرلەپ، ۇلتتاردىڭ ارالاسۋىنىڭ، ىشتەسۋىنىڭ، توعىسۋىنىڭ سۇيىسپەنشىلىك دانەكەرى بولۋدى ٴوزىنىڭ بۇلتارتپاس ازاماتتىق بورىشى ساناعان الماسبەك ٴىس جۇزىندىك ارەكەتى ارقىلى ۇلتتار ىنتىماعىنىڭ جارقىن ۇلگىسى بولا ٴبىلدى.
قاراتوبە اۋىلىنىڭ قاراوي قىستاعىندا تۇراتىن جالعىز باس كاريا يۇي پيڭيا جاسى ۇلعايا كەلە تۇرمىسىنا قارايلاساتىن ادام بولماعان سوڭ ٴال - دارمەنى ازايىپ، تۇرمىستىق جاقتان قيىنشىلىق كورىپ قالادى، بۇرىننان تانىس كاريانىڭ حال - جاعدايىنان حابار تاپقان الماسبەك يۇي پىڭيا كارياعا: ”ٴسىز ٴبىزدىڭ ۇيگە بارىپ تۇرىڭىز، سىزگە مەن قارايلاسايىن، وتباسىمىزدىڭ ٴبىر مۇشەسى بولاسىز، سيلاسىمدى بولىپ، بىرگە تۇرايىق“ دەپ ۇسىنىس قويادى. الماسبەكتىڭ اق پەيىلىن بىردەن سەزىنگەن يۇي پيڭيا كاريا ىڭعايسىزدانا: ”جارايدى، بالام ايتقانىڭ بولسىن، ٴبىراق وتباسىلارىڭا اۋرەشىلىك تۋدىرىپ قويامىن عوي“ دەيدى.
”اۋرەشىلىك بولاتىن ەشتەڭە جوق، بۇگىننەن باستاپ ٴسىز مەنىڭ ’اكەم‘ بولاسىز“ دەيدى دە، كاريانى ۇيىنە الىپ كەلەدى. سودان باستاپ يۇي پيڭيا كاريا 7 جىل بويى الماسبەكتىڭ ۇيىندە ولارمەن بىرگە تۇرىپ، بىرگە تاماقتانادى، كيىم - كەشەگىن ايەلى جۋىپ بەرەدى. ٴبىراق، كەيىن الماسبەكتىڭ ٴوزى سىرقاتتانىپ قالىپ وپەراتيسا جاساتقان سوڭ كارياعا جالعاستى قارايلاسۋعا جاعدايلارى كەلمەي قالادى، سونىمەن اۋىلدىق پارتكومعا جاعدايدى اڭىس ەتىپ، كاريانى قارتتار ۇيىنە اپارىپ ورنالاستىرادى، بارلىق تولەيتىن قاراجاتتارىن ٴوزى ۇستىنە الادى. الماسبەكتىڭ دارقان پەيىلىنە ٴدان ريزا بولعان اۋىلدىق پارتكومنىڭ شۋجيى: ”ساعان راقىمەت، ۇزاق جىل ٴوز اكەڭدەي قارادىڭ“ دەيدى العىسىن ٴبىلدىرىپ.
وتكەن جىلى 7 - ايدا كوكتوعان قىستاعىنداعى ساقا پارتيا مۇشەسى بولتان دۋكەن ۇلى جول اپاتىنان 9 - دارەجەلى مۇگەدەك بولىپ قالادى، بۇرىن مال ساۋداسىن ىستەپ جاپ - جاقسى تۇرمىس كەشىرىپ كەلە جاتقان ول ەندى ساۋدا ىستەۋگە امالسىز قالادى، ەمدەلۋدىڭ وزىنە 100 مىڭ يۋاننىڭ ۇستىندە اقشا جۇمسايدى، اياق استىنان كەلگەن باقىتسىزدىقتان ەڭسەسى ٴتۇسىپ، قيىنشىلىقتا قالعانىنان حابار تاپقان الماسبەك ونىڭ وتباسىنا دەرەۋ بارىپ ۇن - ماي سياقتى تۇرمىستىق بۇيىمدار جەتكىزىپ بەرەدى، كەيىن دە بولتاننىڭ ۇيىنە ۇنەمى بارىپ جاعدايىن ۇعىسىپ، وعان رۋحاني جاقتان جەبەۋشى، زاتتىق جاقتان دەمەۋشى بولادى.
الماسبەكتىڭ ۇلتتار ىنتىماعى جاعىنداعى مۇنداي اسەرلى اڭگىمەلەرى ايتىپ تاۋىسقىسىز.
امالياتتا ايگىلەنگەن اۋەلگى ماقسات
الماسبەك تىلشىلىگىمىزدى ٴوزىنىڭ ”ۇلتتار ىنتىماعى بويىنشا ارميانى قولداۋشى وتباسى“ دەگەن ماڭدايشالىق اسىلعان شاعىن كورگىزبەسىندە قابىلدادى. شاعىن كورگىزبە بولمەسىنە ٴوزىنىڭ قوسىنداعى كەزىندەگى سۋرەتتەرى، ٴار جولعى تۇرمىسىندا قيىنشىلىعى بارلارعا كومەك بەرگەندەگى سۋرەتتەرى، العان سيلىقتارى رەتىمەن قويىلىپتى. وسى سيلىقتار مەن سۋرەتتەردەن - اق الماسبەكتىڭ ىزگى ىستەرىن ٴبىر كورىپ اڭعارۋعا بولادى ەكەن. ول قوسىنداعى كەزىنەن باستاپ قازىرگە دەيىن قاراپايىم دا ادالدىعىمەن ”ۇلتتار ىنتىماعى بەرەكەلى شاڭىراعىنىڭ“ اسەرلى جىرىن جازىپ كەلەدى ەكەن. 2023 - جىلى وسى شاعىن كورمەسى اۋداندىق ۇرپاقتارعا قامقورلىق جاساۋ كوميتەتى جاعىنان ”الماسبەك قىزمەت كەڭسەسى“ بولىپ قۇرىلىپتى. الماسبەك 2020 - جىلى قىستاق كوميتەتىنىڭ توپتىق ۇگىت - لەكسياسىنا قاتىناسا المايتىن جاسى ۇلعايعان، اۋرۋ - سىرقاۋ، مۇگەدەك تۇرعىندار ٴۇشىن قۇنى 8 مىڭ 500 يۋاندىق 100 دانا راديو قابىلداعىش الىپ بەرىپ، پارتيانىڭ ٴۇنىنىڭ ٴالسىز توپتاعىلاردىڭ وتباسىلارىنا دەر كەزىندە تولىق جەتكىزىلۋىنە مۇمكىندىك جاسايدى.
نانجيڭنەن شينجياڭعا تۋىسشىلاي كەلگەن جاڭ شياۋلۋ ”الماسبەك قىزمەت كەڭسەسىندەگى“ پىكىر جازۋ داپتەرىنە ”اتا - اناما ىلەسىپ نىلقى اۋدانىنىڭ قاراتوبە اۋىلىنا كەلىپ، ۇلتتار ىنتىماعىنىڭ ۇلگىسى الماسبەك اعايدىڭ كورمەسىنە قويىلعان سۋرەتتەر مەن ونىڭ ىزگى ىستەرى جونىندەگى اناعۇرلىم كوپ ماتەريالدان ونىڭ ۇلتتار ىنتىماعى جاعىنداعى اسەرلى اڭگىمەلەرىن ىشكەرىلەي ٴتۇسىندىم، بۇل مەنى قاتتى اسەرلەندىردى، ٴبىزدىڭ ۇرپاقتارىمىز الماسبەكتىڭ وسى اسقاق رۋحىن ساۋلەلەندىرە بەرۋىن جانە جالعاستىرۋىن ٴۇمىت ەتەمىن“ دەپ جازىپتى.
الماسبەك قوسىنداعى كەزىنەن جەرگىلىكتى ورىنعا قىزمەت اۋىستىرعانعا دەيىن، ودان داڭقپەن دەمالىسقا شىققانعا دەيىن پارتيانىڭ ابزال ساياساتىن ۇگىتتەۋ، وقۋعا كومەك اتاۋ، ورتا تازالىعىن وڭاۋ، قيىنشىلىعى بارلار مەن جەتىم - جەسىرلەرگە، قارتتارعا، قاراۋسىز قالعان بالالارعا قامقورلىق جاساۋ، مەيىر باعىشتاۋ سياقتى قيمىلداردى ۇزبەي ورىستەتىپ كەلەدى. الماسبەك تاعى دا جاستار مەن وسپىرىمدەرگە وتانشىلدىق تاربيە جۇرگىزۋدى ٴوزىنىڭ اۋەلگى ماقساتى جانە بورىشى رەتىندە قاراپ، مەكتەپكە، قىستاققا، وتباسىلارىنا دەيىن بارىپ، پارتياعا العىس ايتۋ جونىندە ۇگىت - لەكسيا جاساپ، شينجياڭ حيكاياسىن ۇنەمى بايانداپ، جاستار مەن ورەندەردى پارتياعا قۇلاق اسۋعا، پارتياعا العىس ايتۋعا، پارتياعا ىلەسۋگە تاربيەلەپ، قىزىل رۋحتى بالالاردىڭ ساناسىنا ٴسىڭىرىپ، ”دەمالىسقا شىقسا دا جىگەرىنەن قايتپاي، جاس ۇرپاقتارعا قامقورلىق جاساۋ“ بورىشىن ارقالاپ كەلەدى.
2020 - جىلى الماسبەك نىلقى اۋدانى قاراتوبە اۋىلدىق پارتكوم مەن ۇكىمەتتىڭ قولداۋىندا ”جۇرەكتەستەر مەيىر باعىشتاۋ“ قوعامىن قۇرادى. بۇل كۇندەرى ول قۇرعان ”جۇرەكتەستەر مەيىر باعىشتاۋ“ قوعامىنىڭ مۇشەسى 60 نەشە ادامعا جەتىپ، جىلۋعا اتاعان اقشاسى مەن زاتتارى 28 مىڭ يۋاننان اسقان. ”جۇرەكتەستەر مەيىر باعىشتاۋ “ قوعامى قۇرىلعاننان بەرى، الماسبەك ”مەيىر باعىشتاۋ ەرەن بازارىنىڭ“ قالىپتى اينالىمىن ساقتاپ كەلەدى. ”جۇبايىمىز ەكەۋىمىز ايىنا 10 نەشە مىڭ يۋان زەينەتاقى الامىز، ەكى بالامىزدىڭ ٴوز شارۋالارى وزدەرىندە، ايتارلىقتاي تابىستى جۇمىس ىستەپ كەلەدى، ولار ٴۇشىن ەشقاشان الاڭ بولعان ەمەسپىز. مەن 40 نەشە جىلدىق پارتيا ىستاجىنا يە قوسىننان شەگىنگەن اسكەري اداممىن، تەك ٴوز باسىمدى ويلاسام بولمايدى عوي“ دەدى سالماقتىلىقپەن.
بۇل كۇندەرى الماسبەك بالالارىنىڭ جارقىن ونەگەسىنە اينالىپ وتىر. ”اكەمىز ٴبىزدىڭ ماقتانىشىمىز، ٴبىز دە اكەمىز سياقتى مەيىربان جان بولعىمىز كەلەدى“ دەدى الماسبەكتىڭ ۇلى سەرىك.
”وسى ٴبىر تاماشا قاسيەتتى اسكەري بولىمدە جۇرگەندە ساناما سىڭىرگەن ەدىم، باسىم امان، دەنىم ساۋ كەزىندە قولىمنان كەلگەنىنشە قيىنشىلىعى بارلارعا كومەكتەسە بەرەمىن، وسىنداي كىسىلىك ٴومىر ناعىز ٴماندى ٴومىر بولادى دەپ بىلەمىن“ دەدى اۋەلگى ماقساتىنان اينىماعان الماسبەك اعىنان اقتارىلا.