2023 - جىلى 1 - ايدىڭ 6 - كۇنى ىلە قازاق اۆتونوميالى وبلىستىق 15 - كەزەكتى حالىق قۇرىلتايى 2 - ٴماجىلىسى ٴتوراعالار القاسىنىڭ 3 - جيىنىندا جاسالدى

اۆتونوميالى وبلىستىق 15 - كەزەكتى حالىق قۇرىلتايى زاڭ - ٴتۇزىم كوميتەتىنىڭ مەڭگەرۋشى مۇشەسى جاڭارسىن نۇراش ۇلى

قۇرىلتاي ٴتوراعالار القاسى:

اۆتونوميالى وبلىستىق 15 - كەزەكتى حالىق قۇرىلتايى زاڭ - ٴتۇزىم كوميتەتىنىڭ تاپسىرۋىمەن «<ىلە وزەنى الابىندا جەر اشۋدى باسقارۋ ەرەجەسىن> كۇشىنەن قالدىرۋ جونىندەگى قاۋلىنى (جوبا)» قاراۋ احۋالى جونىندە مىناداي مالىمەت بەرەمىز:

 1 - ايدىڭ 5 - كۇنى تۇستەن كەيىن وسى رەتكى ماجىلىستە «<ىلە وزەنى الابىندا جەر اشۋدى باسقارۋ ەرەجەسىن> كۇشىنەن قالدىرۋ جونىندەگى قاۋلى (جوبا)» گرۋپپالارعا ٴبولىنىپ قارالدى. ۋاكىلدەر جاپپاي بىلاي دەپ قارادى: ىلە وزەنى الابىندا جەر اشۋدى باسقارۋ ەرەجەسى (تومەندە قىسقاشا «ەرەجە» دەلىنەدى) اتقارىلعان 16 جىلدا ىلە وزەنى الابىنان جەر بايلىعىن باسقارۋدى كۇشەيتۋ، جەردى ۇيلەسىمدى اشىپ پايدالانۋ جونىنەن بەلسەندى جەبەۋ جانە قامتاماسىزداندىرۋ رولىن اتقاردى. ٴبىراق مەملەكەتتىڭ قاتىستى زاڭدارى مەن اكىمشىلىك زاڭ - ەرەجەلەرىنە وزگەرىس ەنگىزىلۋىنە بايلانىستى، «ەرەجەنىڭ» كوپتەگەن تارماقتارى جوعارىنىڭ زاڭدارىمەن بىردەي بولمادى، ونىڭ ۇستىنە رەتتەلگەن مازمۇندار «جۇڭحۋا حالىق رەسپۋبليكاسىنىڭ جەر باسقارۋ زاڭى جونىندەگى اتقارۋ ەرەجەسىندە» قامتىلعاندىقتان، «ەرەجە» اۆتونوميالى وبلىستىڭ قازىرگى ەكونوميكالىق، قوعامدىق دامۋ جاعدايىنىڭ تالابىنا ۇيلەسپەي قالدى، «ەرەجەنى» كۇشىنەن قالدىرۋ قاجەتتى. ۋاكىلدەر ەرەجەنى كۇشىنەن قالدىرۋ جونىندەگى قاۋلى جوبانى قۇپتايتىندىقتارىن ٴبىلدىردى، باسقاشا پىكىر بولمادى. 

1 - ايدىڭ 5 - كۇنى كەشتە زاڭ - ٴتۇزىم كوميتەتى ٴماجىلىس اشىپ، ۋاكىلدەردىڭ قاراپ شىققانداعى پىكىرىن اقىلداسىپ، وسى رەتكى ٴماجىلىستىڭ «<ىلە وزەنى الابىندا جەر اشۋدى باسقارۋ ەرەجەسىن> كۇشىنەن قالدىرۋ جونىندەگى قاۋلىنى (جوبا)» ماقۇلداۋىنا تاپسىرۋدى ۇسىنىس ەتتى. جوعارىداعى مالىمەتتى قاراپ شىعىڭىزدار.