شينحۋا اگەنتتىگىنىڭ 4 - ايدىڭ 25 - كۇنگى حابارى (تىلشىلەر ليۋ گولي، حۋاڭ يچىن، ليۋ ي). 2024 - جىلى 4 - ايدىڭ 25 - كۇنى ساعات 20 دان 59 مينۋت وتكەندە، شىنجوۋ 18 - ٴنومىرلى عارىشكەرلى الەم كەمەسى تيەلگەن ۇزاق جورىق 2 - ٴنومىرلى F ياۋ 18 -ٴنومىرلى تاسىمال راكەتاسى جيۋچۋان جاساندى سەرىك ۇشىرۋ ورتالىعىندا وتالدىرىلىپ، ۇشىرىلىپ، شامامەن 10 مينۋتتان كەيىن، شىنجوۋ 18 -ٴنومىرلى عارىشكەرلى الەم كەمەسى راكەتادان ٴساتتى اجىراپ، مەجەدەگى وربيتاعا ەندى. قازىر عارىشكەرلەر توبىنىڭ جاي - كۇيى جاقسى، ۇشىرۋ تولىق تابىستى بولدى.

جۇڭگو عارىشقا ادام الىپ ۇشۋ ينجەنەرياسى كەڭسەسىنىڭ تانىستىرۋىنا قاراعاندا، الەم كەمەسى وربيتاعا ەنگەننەن كەيىن، الدىن الا بەلگىلەنگەن باعدارلاما بويىنشا كەڭىستىك بەكەتى قۇراما تۇلعاسىمەن وزدىگىنەن، شاپشاڭ توعىسىپ ٴتۇيىلىسىپ، شىنجوۋ 18 - ٴنومىرلى عارىشكەرلەر توبى شىنجوۋ 17 - ٴنومىرلى عارىشكەرلەر توبىمەن وربيتادا كەزەك اۋىستىرادى. كەڭىستىك بەكەتىندە قىزمەت ىستەپ، تۇرمىس كەشىرگەن مەزگىلدە، شىنجوۋ 18 - ٴنومىرلى عارىشكەرلەر توبى كوپ رەت بولمەدەن شىعۋ قيمىلىن جۇرگىزىپ، ميكرو تارتىلىس نەگىزدىك فيزيكاسى، كەڭىستىك ماتەريالدار عىلىمى، كەڭىستىك تىرشىلىك عىلىمى، عارىش دارىگەرلىگى، عارىش تەحنيكاسى سياقتى سالالارعا ساياتىن زور مولشەردەگى كەڭىستىك عىلمي تاجىريبەسىن (سىناق) جاساپ، كەڭىستىك جارقىشاق زاتتارىنان قورعانۋ، بەكەمدەۋ جابدىقتارىن ورناتۋ، بولمە سىرتىنداعى اۋىرلىق كوتەرۋ جانە بولمە سىرتىنداعى تۇعىر جابدىقتارىن ورناتۋ، جيناپ الۋ سياقتى مىندەتتەردى ورىندايدى.

بۇل رەتكى مىندەت − ەلىمىز عارىشقا ادام الىپ ۇشۋ ينجەنەرياسىنىڭ كەڭىستىك بەكەتىن پايدالانۋ جانە دامىتۋ ساتىسىنا قادام تاستاعاننان بەرگى 3 - رەتكى ادام الىپ ۇشۋ مىندەتى، ينجەنەريا جوسپارعا الىنىپ اتقارىلعاننان بەرگى 32 - رەتكى ۇشىرۋ مىندەتى، سونداي - اق ۇزاق جورىق جەلىلەس تاسىمال راكەتاسىنىڭ 518 - رەتكى ۇشىرىلۋى.

قازىر كەڭىستىك بەكەتىنىڭ قۇراما تۇلعاسى ٴتۇيىلىسۋ وربيتاسىنا ەندى، قىزمەت كۇيى جاقسى، شىنجوۋ 18 - ٴنومىرلى عارىشكەرلى الەم كەمەسىمەن توعىسىپ ٴتۇيىلىسۋ جانە عارىشكەرلەردىڭ كىرىپ جايعاسۋ شارتىن ورىنداي الادى.