چاڭ ـ ى 6 ـ ٴنومىرلى بارلاۋ اپپاراتى ”عارىشتاعى كۇش جالعاۋدى“ ورىندادى

　　ايدىڭ ارعى بەتىندەگى اسىلدار ”ۇيگە قايتۋ ارناۋلى كولىگىنە“ شىقتى

6 ـ ايدىڭ 6 ـ كۇنى بەيجيڭ عارىشقا ۇشۋدى مەڭگەرۋ ورتالىعىنىڭ ۇلكەن ەكرانىنان تۇسىرىلگەن چاڭ ـ ى 6 ـ ٴنومىرلى بارلاۋ اپپاراتىنىڭ اي شارى وربيتاسىندا كەزدەسىپ ٴتۇيىلىسۋى مەن وربيتادا ۇلگىنى كوشىرۋىنىڭ كارتون ەلىكتەمەلى كورىنىسى.

□ سۋرەتتى شينحۋا اگەنتتىگىنىڭ ٴتىلشىسى جين ليۋاڭ تۇسىرگەن

شينحۋا اگەنتتىگىنىڭ 6 ـ ايدىڭ 6 ـ كۇنى بەيجيڭنەن بەرگەن حابارى (تىلشىلەر سۇڭ چىن، ۋىن جيڭحۋا). 6 ـ ايدىڭ 6 ـ كۇنى ساعات 14تەن 48 مينۋتتا چاڭ ـ ى 6 ـ ٴنومىرلى بارلاۋ اپپاراتىنىڭ كوتەرىلۋشى اسپابى وربيتا اسپابى مەن قايتۋشى اسپاپتىڭ قۇراماسىمەن اي شارى وربيتاسىندا ٴساتتى كەزدەسىپ ٴتۇيىلىستى، سونداي ـ اق ساعات 15تەن 24 مينۋتتا اي بەتىنەن الىنعان ۇلگى سالىنعان ىدىستى قايتۋشى اسپاپقا حاۋىپسىز كوشىردى.

بۇل چاڭ ـ ى 5 ـ ٴنومىرلى بارلاۋ اپپاراتىنان كەيىن ەلىمىزدىڭ عارىش اسپابىنىڭ اي شارى وربيتاسىندا 2 ـ رەت كەزدەسىپ ٴتۇيىلىسۋى.

ايدىڭ ارعى بەتىندەگى اسىلداردى الىپ جەر شارىنا قايتقاندا، الدىمەن ونى ”ۇيگە قايتۋ ارناۋلى كولىگى“ _ قايتۋشى اسپاپقا جەتكىزۋ كەرەك. بۇل بارىس ٴبىر رەتكى توتەنشە حيكىمەتتى ”عارىشتاعى كۇش جالعاۋ“ دەپ اتالادى _

ەڭ اۋەلى، كوتەرىلۋشى اسپاپ وربيتا اسپابى مەن قايتۋشى اسپاپتىڭ قۇراماسىنا قاراي ”زىمىرايدى“. اي شارى توپىراعىن الىپ جۇرگەن چاڭ ـ ى 6 ـ ٴنومىرلى بارلاۋ اپپاراتىنىڭ كوتەرىلۋشى اسپابى 6 ـ ايدىڭ 4 ـ كۇنى تۇستەن بۇرىن ايدىڭ ارعى بەتىنەن ۇشىپ، ىلگەرىندى ـ كەيىندى تىك ورلەۋ، تۇرعىسىن رەتتەۋ جانە وربيتاعا كىرۋ سىندى ٴۇش ساتىنى باستان كەشىرىپ، ايدى اينالىپ ۇشۋ وربيتاسىنا كىرگەن.

ەندىگى كەزەكتە ەكى جاق ”بىرتە ـ بىرتە جاقىنداي ٴتۇستى“. كوتەرىلۋشى اسپاپ وربيتا اسپابى مەن قايتۋشى اسپاپتىڭ قۇراماسىنىڭ الدىڭعى جاعىمەن شامامەن 50 كيلومەتر، ۇستىڭگى جاعىمەن شامامەن 10 كيلومەتر كەلەتىن ورىندا تۇرعان كەزدە، وربيتا اسپابى مەن قايتۋشى اسپاپتىڭ قۇراماسى جاقىن ارالىقتان دەربەس مەڭگەرۋ ارقىلى كوتەرىلۋشى اسپاپقا بىرتىندەپ جاقىنداپ، وربيتادا تۇيىلىسەدى.

ەڭ سوڭعى قادام _ ”تاياقشانى دالمە ـ ٴدال تاپسىرۋ“. كوتەرىلۋشى اسپاپ پەن وربيتا اسپابى ٴبىر ۋاقىتتا وربيتادا جوعارى قارقىنمەن قوزعالادى، وربيتا اسپابى، ٴسوز جوق، ورايدى مىقتى يگەرىپ، كوتەرىلۋشى اسپاپتى دالمە ـ ٴدال ۇستاپ جانە مىقتاپ وراپ، ٴتۇيىلىسۋى كەرەك. كوتەرگىشتىڭ وربيتا قۇشاعىنا ورنىقتى كىرۋىنە مۇمكىندىك جاساۋ ٴۇشىن، زەرتتەپ جاساۋ ۇجىمى قاپسىرا ۇستاۋ تاسىلىمەن ٴتۇيىلىسۋ قۇرىلىمىن جوبالادى _ وربيتا اسپابىنا ورنالاستىرىلعان K فورمالى 3 بىلەك كوتەرىلۋشى اسپاپتىڭ جالعانۋشى بەتىندەگى 3 تاياقشاعا تۋرالانىپ، قاپسىرا ۇستاۋ ارقىلى ەكى اسپاپتىڭ بەرىك جالعانۋىن جۇزەگە اسىرادى. بۇل بارىس سپورتشىلاردىڭ كۇش جالعاۋ تاياقشاسىن قولدان ـ قولعا ۇتىلاپ الۋ ارەكەتىنە ۇقسايدى.

وسىدان كەيىن، اي شارىنىڭ ارعى بەتىندەگى باعالى ۇلگى سالىنعان ىدىس كوتەرىلۋشى اسپاپتان قايتۋشى اسپاپقا حاۋىپسىز كوشىرىلىپ، ايدىڭ ارعى بەتىندەگى اسىلدار ”ۇيگە قايتۋ ارناۋلى كولىگىنە“ ورنىقتى ورنالاستىرىلدى، چاڭ ـ ى 6 ـ ٴنومىرلى بارلاۋ اپپاراتى وسى رەتكى ايدىڭ ارعى بەتىنەن ۇلگى الىپ قايتا ورالۋ مىندەتىنىڭ تاعى ٴبىر شەشۋشى بۋىنىن ورىندادى.

وسى ٴوزارا تىعىز بايلانىسقان، ٴار قادامى ماڭىزدى ”عارىشتاعى كۇش جالعاۋدا“ تاعى ”ٴبىر جۇپ نۇرلى جانار“ _ قوس سپەكترلى باقىلاۋ فوتو اپپاراتى جەر شارىنان 380 مىڭ كيلومەتر قاشىقتىقتاعى رومانتيكالى قول ۇستاسۋدى ەستەلىككە الدى.

الدا چاڭ ـ ى 6 ـ ٴنومىرلى بارلاۋ اپپاراتىنىڭ وربيتا اسپابى مەن قايتۋشى اسپاپتىڭ قۇراماسى كوتەرىلۋشى اسپاپتان ٴبولىنىپ، اي شارىن اينالا كۇتۋ كەزەڭىنە ٴوتىپ، اي شارى مەن جەر شارىنىڭ اۋىسۋ وربيتاسىن مەڭگەرۋگە دايىندالىپ، اي شارى مەن جەر شارى اراسىندا كوشىرۋ، وربيتا اسپابى مەن قايتۋشى اسپاپتىڭ ٴبولىنۋى سياقتى شەشۋشى باسقىشتاردى باستان كەشىرگەننەن كەيىن، قايتۋشى اسپاپ جوسپار بويىنشا اي شارى ۇلگىسىن الىپ ىشكى موڭعۇلدىڭ ٴدوربىت حوشۇنىنداعى قونۋ الاڭىنا قونادى.

ايدىڭ ارعى بەتىندەگى اسىلداردىڭ ۇيگە امان ـ ەسەن ورالۋىن كۇتەيىك!