شي جينپيڭ حۋنان ولكەسى يۋەياڭ قالاسى حۋارۇڭ اۋدانى تۋانجوۋيۋان دۇڭتيڭحۋ كولىنىڭ ٴبىرىنشى شەپ توسپاسىنىڭ جىرىلىپ كەتۋى جونىندە ماڭىزدى نۇسقاۋ بەرىپ

　　قاتەردەن اراشالاۋ، قۇتقارۋ، كومەكتەسۋ قىزمەتىن بار كۇشپەن ورىستەتىپ، حالىق بۇقاراسىنىڭ ٴومىرى مەن مال ـ مۇلكىنىڭ حاۋىپسىزدىگىن شىن مانىندە ويداعىداي قورعاۋدى تالاپ ەتتى

شينحۋا اگەنتتىگىنىڭ 7 ـ ايدىڭ 5 ـ كۇنى بەيجيڭنەن بەرگەن حابارى. 7 ـ ايدىڭ 5 ـ كۇنى تۇستەن كەيىن حۋنان ولكەسى يۋەياڭ قالاسى حۋارۇڭ اۋدانى تۋانجوۋ اۋىلى تۋانبەي قىستاعى تۋانجوۋيۋان دۇڭتيڭحۋ كولىنىڭ ٴبىرىنشى شەپ توسپاسى جىرىلىپ، بوگەۋىل اۋماعىن سۋ باسىپ كەتتى، سول جەردەگى اپاتقا ۇشىراعان بۇقارا تۇگەلدەي حاۋىپسىز ورىنعا كوشىرىلىپ بولدى.

قاتەرلى جاعداي تۋىلعاننان كەيىن، شەتەلدە ساپاردا جۇرگەن جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ٴتوراعاسى، ورتالىق اسكەري ىستەر كوميتەتىنىڭ ٴتوراعاسى شي جينپيڭ ايرىقشا ٴمان بەردى ٴارى ماڭىزدى نۇسقاۋ بەردى: حۋنان ولكەسى يۋەياڭ قالاسى حۋارۇڭ اۋدانى تۋانجوۋيۋان دۇڭتيڭحۋ كولىنىڭ ٴبىرىنشى شەپ توسپاسى جىرىلىپ كەتتى، قاتەرگە ۇشىراعان وڭىردەگى بۇقارانى دەر كەزىندە كوشىرىپ جانە ۇيلەسىمدى ورنالاستىرىپ، قاتەردەن اراشالاۋ، قۇتقارۋ، كومەكتەسۋ قىزمەتىن بار كۇشپەن ورىستەتىپ، حالىق بۇقاراسىنىڭ ٴومىرى مەن مال ـ مۇلكىنىڭ حاۋىپسىزدىگىن شىنايى قورعاۋ كەرەك، مەملەكەتتىك تاسقىننان ساقتانۋ، قۋاڭشىلىققا قارسى اتتانۋ باس قولباسشىلىق شتابى قىزمەت گرۋپپاسىن جىبەرىپ، جەتەكشىلىكتى كۇشەيتۋى كەرەك. شي جينپيڭ بىلاي دەپ باسا دارىپتەدى: ەلىمىز نەگىزگى تاسقىن مەزگىلىنە جاپپاي وتكەننەن بەرى، كەيبىر جەرلەردە جاۋىن ـ شاشىن مولشەرى مول، جاۋىن ـ شاشىن ۋاقىتى ۇزاق، تاسقىننان ساقتانۋ جاعدايى اۋىر بولدى، اسىرەسە، توسپا سۋدىڭ جەمىرۋىنە ۇزاق ۋاقىت ۇشىراعان سايىن، تەسىلۋ، ارناسىنان اسۋ سياقتى حاۋىپ ـ قاتەرلەر وڭاي تۋىلىپ، حاۋىپ ـ قاتەر كومەسكى قاتەرى ٴبىرشاما زور بولادى. قاتىستى جەرگىلىكتى پارتكومدار، ۇكىمەتتەر جانە قاتىستى تاراۋلار دەرەۋ اتتانىسقا كەلىپ، كۇش ۇيىمداستىرىپ، تاسقىننان ساقتانۋ، اپاتتان قۇتقارۋ، حاۋىپتەن اراشالاۋ قىزمەتىن ورىستەتىپ، توسپانى شارلاۋدى، حاۋىپ ـ قاتەردى تەكسەرۋدى كۇشەيتىپ، حاۋىپ ـ قاتەردى دەر كەزىندە بايقاپ جانە سول مەزەتتە ٴبىر جاقتى ەتىپ، تاسقىننان ساقتانۋ حاۋىپسىزدىگىنە شىنايى كەپىلدىك ەتۋى كەرەك.

جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ تۇراقتى مۇشەسى، مەملەكەتتىك كەڭەستىڭ زۇڭليى لي چياڭ بىلاي دەپ بەكىتۋ جازدى: قاتەردەن اراشالاۋ، ٴبىر جاقتى ەتۋ قىزمەتىن بار كۇشپەن ويداعىداي ىستەپ، قاتەرلى جاعدايدىڭ اسقىنۋىن تىزگىندەپ، اپاتقا ۇشىراعان بۇقارانى ۇيلەسىمدى ورنالاستىرۋدى، سونىمەن بىرگە سۋ قويما توسپاسىن شارلاپ تەكسەرۋدى، قورعانۋدى كۇشەيتىپ، ٴتۇرلى حاۋىپسىزدىك كومەسكى كىناراتتارىن اشالاي تەكسەرىپ، حالىق بۇقاراسىنىڭ ٴومىرى مەن مال ـ مۇلكىنىڭ حاۋىپسىزدىگىن شىنايى قامتاماسىز ەتۋ كەرەك، مەملەكەتتىك تاسقىننان ساقتانۋ، قۋاڭشىلىققا قارسى اتتانۋ باس قولباسشىلىق شتابى الدىن الا مالىمەت بەرۋدى، ساقتاندىرۋدى جانە اقىلداسىپ تۇجىرىم جاساۋدى كۇشەيتىپ، جەر ـ جەردىڭ، تاراۋلاردىڭ تاسقىننان ساقتانۋ، قاتەردەن اراشالاۋ، اپاتتان قۇتقارۋ قىزمەتىن تيتتەي دە بوساڭسىماي ويداعىداي ىستەۋىنە جەتەكشىلىك ىستەپ، قۋزاۋ سالىپ، تاسقىننان امان وتۋگە بار كۇشپەن شىنايى كەپىلدىك ەتۋى كەرەك.

شي جينپيڭنىڭ نۇسقاۋى مەن لي چياڭنىڭ تالابىنا ساي، مەملەكەتتىك تاسقىننان ساقتانۋ، قۋاڭشىلىققا قارسى اتتانۋ باس قولباسشىلىق شتابى، سۋ يگىلىگى مينيسترلىگى، شۇعىل جاعدايعا توتەپ بەرۋدى باسقارۋ مينيسترلىگى قىزمەت گرۋپپاسىن سول جەرگە بارىپ جەتەكشىلىك ىستەۋگە جىبەردى. حۋنان ولكەسىنىڭ، يۋەياڭ قالاسىنىڭ پارتيا، ۇكىمەت ورىندارىنداعى جاۋاپتى جولداستار سول جەردىڭ وزىندە قاتەردەن اراشالاۋعا، اپاتتان قۇتقارۋعا، كومەكتەسۋگە قولباسشىلىق ىستەدى. قازىر قاتىستى قىزمەتتەر جۇرگىزىلۋدە.