— جاڭا جۇڭگو قۇرىلعان 75 جىلدان بەرگى قىزمەت وتەۋ كاسىبىنىڭ دامۋ تابىستارى جونىندە جالپى شولۋ

شينحۋا اگەنتتىگىنىڭ تىلشىلەرى شيە شيياۋ، پان جيە، تاڭ شىنيڭ

”قىزمەت وتەۋ ساۋدا جارمەڭكەسى 10 كەزەك ٴساتتى وتكىزىلدى، ول جۇڭگونىڭ قىزمەت وتەۋ كاسىبى مەن قىزمەت وتەۋ ساۋداسىنىڭ جوعارى ساپالى دامىعاندىعىنىڭ جاندى بەينەسى بولىپ، اشىق تيپتەگى دۇنيە ٴجۇزى ەكونوميكاسىن قۇرۋعا بەلسەندى ۇلەس قوستى“. 9 ـ ايدىڭ 12 ـ كۇنى مەملەكەت ٴتوراعاسى شي جينپيڭ 2024 ـ جىلعى جۇڭگو حالىقارالىق قىزمەت وتەۋ ساۋدا جارمەڭكەسىنە قۇتتىقتاۋ حاتىن جولداپ، دۇنيە جۇزىنە جۇڭگونىڭ قىزمەت وتەۋ كاسىبىنىڭ جوعارى ساپالى دامۋ ارقىلى دۇنيە ٴجۇزىنىڭ گۇلدەنۋىنە، دامۋىنا دەم بەرەتىن بەلسەندى سيگنالىن جەتكىزدى.

شي جينپيڭ جولداستى ۇيتقى ەتكەن پارتيا ورتالىق كوميتەتى قىزمەت وتەۋ كاسىبىنىڭ دامۋىنا ايرىقشا ٴمان بەرىپ، ٴبىر قىدىرۋ رەفورما شارالارىن شىعارىپ، قىزمەت وتەۋ كاسىبىنىڭ دامۋىن، زورايۋىن ىلگەرىلەتتى. قىزمەت وتەۋ كاسىبى بىرتىندەپ جەتىلىپ، حالىق شارۋاشىلىعىنداعى ٴبىرىنشى ۇلكەن كاسىپ سالاسىنا اينالىپ، جاڭا قوزعاۋشى قۋات تۋدىرىپ، جاڭا ومىرشەڭ كۇشتى جارىققا شىعارىپ، جۇڭگو ەكونوميكاسىنىڭ ورنىقتى ارتۋىنداعى ماڭىزدى كۇشكە اينالدى.

كولەمى كۇن سايىن زورايدى

حالىق شارۋاشىلىعىنىڭ ”جارتى الەمىنە“ تىرەك بولدى

جۇڭچيۋ مەرەكەسى، مەملەكەت مەرەكەسى دەمالىسى جاقىنداپ، اس ـ سۋ، قونالقى، شىراق سالتاناتى، كونسەرت، مادەنيەت ـ ساياحات زەرتتەۋ ـ ۇيرەنۋى قاۋىرت مەزگىلگە ٴوتتى؛ پاريج وليمپيادا سپورت جارىسىنىڭ قىزۋى باسىلماي جاتىپ، جالپى حالىقتىق دەنە تاربيە تۇتىنۋى ۇزدىكسىز جانداندى... قازىر ەلىمىز ٴدال قىزمەت وتەۋ تۇتىنۋىنىڭ ٴبىرشاما تەز ارتۋ كەزەڭىندە تۇر.

”ساياحات سياقتى قىزمەت وتەۋ كاسىبىن وڭىرلىك تىرەكتى كاسىپ سالاسى ەتىپ تۇلعالاۋ كەرەك“، ”قىزمەت وتەۋ ساۋداسى _ حالىقارالىق ساۋدانىڭ ماڭىزدى قۇرامداس بولىگى، قىزمەت وتەۋ كاسىبى _ حالىقارالىق ەكونوميكا ـ ساۋدا سەلبەستىگىنىڭ ماڭىزدى سالاسى“ ... باس شۋجي شي جينپيڭ ەكونوميكا دامۋىنىڭ ۇلكەن اۋقىمىن كوزدەپ، قىزمەت وتەۋ كاسىبى دامۋىنىڭ بەتالىسىن ايقىنداپ كورسەتتى.

پارتيا ورتالىق كوميتەتى، مەملەكەتتىك كەڭەس ٴبىر قىدىرۋ ساياسات ـ شارالاردى جاساپ شىعارىپ، قىزمەت وتەۋ كاسىبىنىڭ جوعارى ساپالى دامۋدىڭ جاڭا كەزەڭىنە قادام تاستاۋىن ىلگەرىلەتتى. 2023 ـ جىلى قىزمەت وتەۋ كاسىبىنىڭ ارتقان قۇنى 68 تريلليون 823 ميلليارد 800 ميلليون يۋانعا جەتىپ، 2013 ـ جىلدان 2023 ـ جىلعا دەيىنگى جىلدىق ورتاشا ٴىس جۇزىندىك ارتۋى %6.9 بولىپ، ارتۋ قارقىنى سايكەس مەزگىلدەگى ىشكى ٴوندىرىس جالپى ٴونىم قۇنىنىڭ (GDP) جىلدىق ورتاشا ارتۋ قارقىنىنان 0.8 پايىز جوعارى بولدى. وسى ٴبىر مەزگىلدە قىزمەت وتەۋ كاسىبىنىڭ ارتقان قۇنىنىڭ GDPدا ۇستايتىن ارا سالماعى ونان ارى جوعارىلاپ، 2015 ـ جىلى تۇڭعىش رەت %50تەن اسىپ، 2023 ـ جىلى %54.6كە جەتىپ، ٴۇرتىس 9 جىل حالىق شارۋاشىلىعىنىڭ تەڭ جارتىسىن يەلەدى.

جاڭا جۇڭگو قۇرىلعان العاشقى مەزگىلدە ەلىمىز ونەركاسىپتى، اۋىل شارۋاشىلىعىن زور كۇشپەن دامىتىپ، قىزمەت وتەۋ كاسىبى قوسالقى ورىندا تۇردى؛ رەفورما جاساۋدان، ەسىك اشۋدان كەيىن قىزمەت وتەۋ كاسىبىندە جەر مەن كوكتەي وزگەرىس تۋىلىپ، جاپپاي جىلدام دامىدى؛ ودان پارتيا 18 ـ قۇرىلتايىنان بەرى قىزمەت وتەۋ كاسىبىنىڭ جاڭا كاسىپ سالاسى، جاڭا كاسىپ كۇيى، جاڭا ۇلگىسى زور مولشەردە مولىنان جارىققا شىعىپ، ساپانى جوعارىلاتىپ، ونىمدىلىكتى ارتتىراتىن جاڭا كەزەڭگە قادام تاستادى... جاڭا جۇڭگو قۇرىلعان 75 جىلدان بەرى قىزمەت وتەۋ كاسىبىنىڭ ەكونوميكا، قوعام دامۋىنداعى نەگىزگى قوزعالتقىش ورنى مەن رولى بارعان سايىن بەكەمدەلىپ ورنىقتى.

%28.4 ، % 45.0، % 49.9، % 60.2، بۇل جەكە ـ جەكە 1978 ـ جىلعى، 2012 ـ جىلعى، 2014 ـ جىلعى، 2023 ـ جىلعى قىزمەت وتەۋ كاسىبىنىڭ سول جىلعى GDPداعى ۇلەس مولشەرى.

بىرتىندەپ ارتقان سيفرلار قىزمەت وتەۋ كاسىبىنىڭ ارتۋدى ىلگەرىلەتەتىن ”نەگىزگى قوزعاۋشى كۇش“ رەتىندە كۇن سايىن كۇشەيىپ كەلە جاتقانىن ايگىلەيدى _

رەفورما جاساۋدان، ەسىك اشۋدان بۇرىن ەلىمىزدىڭ قىزمەت وتەۋ كاسىبى دامۋىنىڭ ەكونوميكانىڭ ارتۋىنا ۇلەس مولشەرى ٴبىرشاما تومەن ەدى؛ رەفورما جاساۋدان، ەسىك اشۋدان كەيىن ونەركاسىپتەنۋ مەن قالا ـ قالاشىقتانۋدىڭ جەدەل ىلگەرىلەۋىنە ىلەسە، قوعامنىڭ قىزمەت وتەۋ كاسىبىنە قاجەتى كۇن سايىن ارتىپ، قىزمەت وتەۋ كاسىبىنىڭ ەكونوميكانىڭ ارتۋىنا ۇلەس مولشەرى ۇزدىكسىز جوعارىلادى. سوڭعى جىلدارى قىزمەت وتەۋ كاسىبىنىڭ GDPداعى ۇلەس سالىستىرماسى جەدەل ارتىپ، ەكونوميكا، قوعام دامۋىنىڭ نەگىزگى قوزعالتقىشىنا اينالدى.

تىكە تاراتۋدا زات تانىستىرۋشى، جەدەل جەتكىزۋشى جىگىت، ينتەرنەتتە كەلىسەتىن اۆتوكولىك شوفەرى، ساندى مالىمەتكە تالداۋ جاساۋ شەبەرى... سوڭعى جىلدارى قىزمەت وتەۋ كاسىبىنىڭ ارقاسىندا گۇلدەنگەن جاڭا كاسىپتەر بۇقارانىڭ كۇندەلىكتى تۇرمىسىمەن توعىسىپ كەتتى.

تولاسسىز جارىققا شىققان جاڭا كاسىپ كۇيلەرىنىڭ قىزمەت وتەۋ كاسىبىنىڭ جۇمىسقا قابىلداۋداعى ”نەگىزگى ارناعا“ اينالۋىن ىلگەرىلەتۋدەگى رولى كورنەكتىلەندى _

رەفورما جاساۋدان، ەسىك اشۋدان بۇرىن اۋىل شارۋاشىلىعى مەن ونەركاسىپ جۇمىسقا قابىلداۋداعى نەگىزگى تۇلعا ەدى، 1978 ـ جىلدىڭ سوڭىندا قىزمەت وتەۋ كاسىبىمەن جۇمىستانعانداردىڭ بۇكىل ەلدەگى جۇمىستانعانداردا ۇستايتىن ارا سالماعى نەبارى %12.2 عانا ەدى؛ رەفورما جاساۋدان، ەسىك اشۋدان كەيىن 1994 ـ جىلى قىزمەت وتەۋ كاسىبىمەن جۇمىستانعاندار 2 ـ كاسىپ سالاسىنان استى، 2011 ـ جىلى 1 ـ كاسىپ سالاسىنان استى. پارتيا 18 ـ قۇرىلتايىنان بەرى قىزمەت وتەۋ كاسىبى جۇمىسقا قابىلداۋداعى نەگىزگى كۇشكە اينالدى، 2013 ـ جىلدان 2023 ـ جىلعا دەيىن قىزمەت وتەۋ كاسىبىندەگى جىلىنا ورتا ەسەپپەن جاڭادان ارتقان جۇمىستانعاندار 7 ميلليون 410 مىڭ ادام بولىپ، 2023 ـ جىلدىڭ سوڭىندا قىزمەت وتەۋ كاسىبىمەن جۇمىستانعانداردىڭ بۇكىل ەلدەگى جۇمىستانعانداردا يەلەيتىن ارا سالماعى %48.1 بولدى.

قۇرىلىم ۇزدىكسىز ساپالىلاندى

ساپاعا قاراي ىلگەرىلەۋدىڭ ”جاڭا كۇي تاراۋى“ شارىقتادى

ەلەكتروندى ساۋدا تۇعىرى، سيفرلى فينانس تۇتىنۋشىلاردىڭ ۇيدەن شىقپاي ـ اق ”بۇكىل الەمنەن ساتىپ الۋىنا“ مۇمكىندىك جاساپ، ورتاق يگىلىكتەنەتىن ۆەلوسيپەد، ورتاق يگىلىكتەنەتىن اۆتوكولىك سياقتى ورتاق يگىلىكتەنەتىن قاتىناس ۇلگىسى ٴجۇرىس ـ تۇرىستى قولايلى دا جاسىل ەتتى... بۇگىنگى تاڭدا، ەلەكتروندى ساۋدا، فينانس عىلىم ـ تەحنيكاسى، ورتاق يگىلىكتەنەتىن ەكونوميكا سياقتى وسى زامانعى قىزمەت وتەۋ كاسىبى قارىشتاي دامىپ، ادامداردىڭ ٴوندىرىس، تۇرمىس ٴتاسىلىن تەرەڭ وزگەرتتى، سونداي ـ اق قىزمەت وتەۋ كاسىبى قۇرىلىمىنىڭ ساپالىلانىپ، دارەجەسىنىڭ جوعارىلاعاندىعىن، ساپاسىنىڭ ۇزدىكسىز كوتەرىلگەندىگىن اڭعارتتى.

سالا بويىنشا قاراعاندا، ٴداستۇرلى قىزمەت وتەۋ كاسىبىنىڭ ارا سالماعى زور كولەمدە تومەندەپ، جاڭادان گۇلدەنگەن قىزمەت وتەۋ كاسىبى ورنىقتى قاداممەن ارتتى.

جاڭا جۇڭگو قۇرىلعان العاشقى كەزدەگى 1952 ـ جىلدى ەسكە الساق، تولايىم تاراتۋ جانە بولشەك ساتۋ كاسىبىنىڭ ارتقان قۇنىنىڭ، قاتىناس ـ تاسىمال، قامبادا ساقتاۋ جانە پوچتا كاسىبىنىڭ ارتقان قۇنىنىڭ قىزمەت وتەۋ كاسىبىنىڭ ارتقان قۇنىنان يەلەيتىن ارا سالماعىن قوسقاندا %50تەن اسپايتىن، قىزمەت وتەۋ كاسىبىنىڭ دامۋى سالىستىرمالى تۇردە شوعىرلى ەدى، 2023 ـ جىلى ەكەۋىنىڭ قىزمەت وتەۋ كاسىبىنەن ۇستايتىن ارا سالماعى جەكە ـ جەكە %17.9كە جانە %8.4كە تومەندەدى.

پارتيا 18 ـ قۇرىلتايىنان بەرى جاڭا دامۋ ۇستانىمى جۇرت جۇرەگىنە تەرەڭ ۇيالاپ، جاڭالىق اشۋ ارقىلى دامۋعا دەم بەرۋ ستراتەگياسى ىشكەرىلەي اتقارىلىپ، جاڭادان گۇلدەنگەن قىزمەت وتەۋ كاسىبى دامۋدىڭ التىن مەزگىلىنە ٴوتتى. 2019 ـ جىلدان 2023 ـ جىلعا دەيىن كولەمنەن جوعارى جوعارى تەحنيكالىق قىزمەت وتەۋ كاسىبى، عىلىم ـ تەحنيكالىق قىزمەت وتەۋ كاسىبى، قىزمەت وتەۋ كاسىبى ستراتەگياسىندىق جاڭادان گۇلدەنگەن كاسىپ سالالارى كاسىپورىندارىنىڭ تيجارات كىرىسى جىلىنا ورتا ەسەپپەن جەكە ـ جەكە %12.9 ، %12.3 جانە %12.0 ارتتى.

وڭىرلەر بويىنشا قاراعاندا، قىزمەت وتەۋ كاسىبىنىڭ وڭىرلىك دامۋى اناعۇرلىم سايكەسىمدى بولىپ، سايكەستى دامۋ اۋقىمى بارعان سايىن كورنەكتىلەنە ٴتۇستى.

2023 ـ جىلى بۇكىل ەلدەگى 31 ولكەنىڭ (اۆتونوميالى رايون، توتە قاراستى قالا) ىشىندە 4 وڭىردەگى قىزمەت وتەۋ كاسىبى ارتقان قۇنىنىڭ وڭىرلىك ٴوندىرىس جالپى ٴونىم قۇنىنداعى ۇستايتىن ارا سالماعى %60.0تەن استى. بەيجيڭ، شاڭحاي سياقتى اسا ٴىرى قالالاردىڭ وسى زامانعى قىزمەت وتەۋ كاسىبى زور مولشەردە شوعىرلانىپ، قىزمەت وتەۋ كاسىبى ارتقان قۇنىنىڭ وڭىرلىك جالپى ٴونىم قۇنىنداعى ۇستايتىن ارا سالماعى جەكە ـ جەكە %84.8كە جانە %75.2كە جەتتى؛ بۇكىل ەلدەگى 24 وڭىردەگى قىزمەت وتەۋ كاسىبى ارتقان قۇنىنىڭ يەلەيتىن ارا سالماعى %45 پەن %60 ارالىعىندا بولىپ، 2012 ـ جىلداعىدان 14 ٴوڭىر كوبەيدى.

ەسىك اشۋ بويىنشا قاراعاندا، قىزمەت وتەۋ كاسىبى شەتەل قارجىسىن باۋرايتىن ماڭىزدى سالاعا اينالىپ، جۇڭگونىڭ قىزمەت وتەۋى دۇنيە جۇزىنە جەدەل بەت الدى.

تاياۋدا عانا ەلىمىز ەمدەۋ سالاسىندا ەسىك اشۋدى كەڭەيتۋدى تۇيىندە سىناق ەتۋ قىزمەتىن ورىستەتۋدى ايقىنداپ، بەيجيڭ، تيانجين، شاڭحاي، نانجيڭ، سۋجوۋ، فۋجوۋ، گۋاڭجوۋ، شىنجىن مەن حايناننىڭ بۇكىل ارالىندا شەتەلدىك ساۋداگەرلەر دەربەس قارجى قوسقان شيپاحانا اشۋعا جول بەرمەك بولۋى بىلايعى جۇرتتىڭ نازارىن قاتتى اۋداردى.

ەلىمىز دۇنيە جۇزىلىك ساۋدا ۇيىمىنا كىرگەننەن كەيىن، بانكە كاسىبى، قامسىزداندىرۋ كاسىبى، قاتىناس ـ تاسىمال كاسىبى سياقتى قىزمەت وتەۋ كاسىبىنىڭ 9 ۇلكەن سالاسىنىڭ، 100دەن استام بولىمشە تاراۋىنىڭ شەتەل قارجىسىن كىرگىزۋگە رۇقسات ەتۋ شەكتەمەسى ىركەس ـ تىركەس بوساتىلدى؛ 2001 ـ جىلدان 2023 ـ جىلعا دەيىن ەلىمىزدىڭ قىزمەت وتەۋ ساۋداسىنىڭ يمپورت ـ ەكسپورت جالپى سوماسى 78 ميلليارد 400 ميلليون دوللاردان 933 ميلليارد 100 ميلليون دوللارعا ارتىپ، ساۋدا كولەمىنىڭ دۇنيە جۇزىندەگى ٴارقايسى ەكونوميكا تۇلعالارىنىڭ ىشىندەگى قاتارى 12 ـ ورىننان دۇنيە جۇزىندەگى الدىڭعى قاتارعا ٴبىر ـ اق كوتەرىلدى.

جاڭالىق اشۋ قوزعالىس قۋاتى كۇشەيدى

ەكونوميكا ارتۋىنىڭ ”جاڭا قوزعالتقىشى“ جانداندى

شارۋا وتباسىلارى مەن قىزمەت وتەۋ كاسىپورىندارى بىرلەسىپ، ”شاعىن ٴوندىرىس“ پەن ”ٴىرى بازاردىڭ“ ٴونىمدى ٴتۇيىلىسۋىن جۇزەگە اسىردى؛ فينانس، قامسىزداندىرۋ سياقتى وسى زامانعى قىزمەت وتەۋ كاسىپتەرىنىڭ دامۋى ونەركاسىپ كاسىپورىندارىنىڭ قارجى قۇراۋ وزىندىك قۇنىن اجەپتاۋىر تومەندەتتى؛ ونەركاسىپ كاسىپورىندارى مەن بولشەك ساتۋ كاسىپورىندارى، ينتەرنەت سەرىكتەستىكتەرى سەلبەسىپ، ۇلكەن ساندى مالىمەت بايلىعىنا سۇيەنە وتىرىپ، بازاردىڭ قاجەتىمەن ٴدال ٴتۇيىلىستى...

بۇگىنگى تاڭدا، قىزمەت وتەۋ كاسىبى ۇلكەن ساندى مالىمەت، بۇلتتىق ەسەپتەۋ، زات ينتەرنەتى سياقتى جاڭا ۇرپاق ينفورماتسيا تەحنيكاسى ارقىلى كاسىپ سالاسىنىڭ تيبىن وزگەرتىپ، دارەجەسىن جوعارىلاتۋىن جەبەۋ، حالىقتىڭ قۇت ـ ىرىسىن ارتتىرۋ جاعىندا بارعان سايىن ماڭىزدى رول ساۋلەلەندىرۋدە.

جاڭا داۋىردەن بەرى ەلىمىز وندىرىستىك قىزمەت وتەۋ كاسىبىن زور كۇشپەن دامىتتى، قىزمەت وتەۋ كاسىبىنىڭ جاساۋ كاسىبىنىڭ تيبىن وزگەرتىپ، دارەجەسىن جوعارىلاتۋداعى تىرەكتىك رولى ۇزدىكسىز كۇشەيىپ، وسى زامانعى قىزمەت وتەۋ كاسىبى مەن وزىق جاساۋ كاسىبىنىڭ توعىسا دامۋى العاشقى ادىمدا ونىمدىلىك كورسەتتى. 2023 ـ جىلى ەلىمىزدىڭ كولەمنەن جوعارى وندىرىستىك قىزمەت وتەۋ كاسىپورىندارىنىڭ تيجارات كىرىسى 119 تريلليون يۋان بولىپ، 2020 ـ جىلدان 2023 ـ جىلعا دەيىن جىلىنا ورتا ەسەپپەن %12.1 ارتىپ وتىردى.

سونىمەن بىرگە ەلىمىز ”+ينتەرنەت “ ارەكەتىن ورىستەتىپ، ينتەرنەت پەن جاساۋ كاسىبىنىڭ تەرەڭ توعىسۋىن ىلگەرىلەتىپ، جاڭا، كونە دامۋ قوزعالىس قۋاتى مەن ٴوندىرىس جۇيەسىنىڭ اۋىسۋىن جەدەلدەتتى. 2023 ـ جىلدىڭ سوڭىندا ەلىمىزدە بەلگىلى ىقپال كۇشى بار ونەركاسىپتىك ينتەرنەت تۇعىرىنىڭ سانى 340تان اسىپ، ونەركاسىپتىڭ بارلىق ۇلكەن تۇرلەرىن قامتىپ، ونەركاسىپ ينتەرنەتى وزەكتى كاسىپ سالاسىنىڭ كولەمى ٴبىر تريلليون 350 ميلليارد يۋانعا جەتتى.

سيفرلى ەكونوميكا وزەكتى كاسىپ سالاسى جەدەل دامىپ، جاڭاشا وندىرگىش كۇشتەردى دامىتۋعا قۋاتتى قوزعاۋشى كۇش قوستى. 2023 ـ جىلى سيفرلى ەكونوميكا وزەكتى كاسىپ سالاسىنىڭ تاپقىرلىق پاتەنتى ۇقىعىن الۋ مولشەرى 406 مىڭعا جەتىپ، سايكەس مەزگىلدەگى بۇكىل قوعامداعى تاپقىرلىق پاتەنتى ۇقىعىن الۋ جالپى مولشەرىنىڭ %45ىن يەلەدى، سوڭعى 5 جىلداعى جىلدىق ورتاشا ارتۋ قارقىنى %21.0كە جەتتى.

ەلىمىزدىڭ جاڭاشا قالا ـ قالاشىقتاندىرۋ قۇرىلىسىنىڭ بىرتىندەپ جەدەلدەۋىنە ىلەسە، تۇرعىنداردىڭ كىرىسى ورنىقتى ارتىپ، ادامدار بىرتە ـ بىرتە تاۋار ساتىپ الۋدان سەزىنىپ كورۋ ٴۇشىن اقشا جۇمساۋعا، ماتەريالدىق قاجەتتىلىكتەن رۋحاني تالپىنىسقا ويىسىپ، ساياحات، مادەنيەت، دەنە تاربيە، سالاماتتىق، قارتتاردى كۇتىمدەۋ، وقۋ ـ اعارتۋ سياقتى تۇرمىستىق قىزمەت وتەۋ كاسىپتەرىن جەدەل دامۋعا جەتەلەدى.

مادەنيەت كاسىپ سالاسى گۇلدەنىپ دامىدى. 2022 ـ جىلى مادەنيەت جانە وعان قاتىستى كاسىپ سالالارىنىڭ ارتقان قۇنى 5 تريلليون 378 ميلليارد 200 ميلليون يۋان بولىپ، 2012 ـ جىلداعىدان %197.6 ارتىپ، GDPدا ۇستايتىن ارا سالماعى %3.4تەن %4.5كە جوعارىلادى؛ 2023 ـ جىلدىڭ سوڭىندا بۇكىل ەلدە 3246 الەۋمەتتىك كىتاپحانا، 43 مىڭ 752 مادەنيەت سارايى (پۋنكتى) جانە بۇقارالىق كوركەمونەر سارايى بار بولىپ، جەكە ـ جەكە 1949 ـ جىلداعىنىڭ 59 ەسەسىندەي جانە 49 ەسەسىندەي بولدى.

دەنە تاربيە كاسىپ سالاسى جەدەل دامىدى. 2022 ـ جىلى بۇكىل ەلدىڭ دەنە تاربيە كاسىپ سالاسىنىڭ ارتقان قۇنى ٴبىر تريلليون 309 ميلليارد 200 ميلليون يۋان بولىپ، 2015 ـ جىلداعىدان %138.3 ارتتى؛ 2023 ـ جىلدىڭ سوڭىندا بۇكىل ەلدە 4 ميلليون 590 مىڭ دەنە تاربيە الاڭى بار بولىپ، ادام باسىنا تۋرا كەلەتىن دەنە تاربيە الاڭىنىڭ جەر كولەمى 2.9 شارشى مەترگە، جالپى حالىقتىق دەنە شىنىقتىرۋ جاياۋلار جولىنىڭ ۇزىندىعى 370 مىڭ كيلومەترگە جەتتى.

ساياحات جانە وعان قاتىستى كاسىپ سالالارىنىڭ ومىرشەڭدىگى تاسقىندادى. 2022 ـ جىلى ساياحات جانە وعان قاتىستى كاسىپ سالالارىنىڭ ارتقان قۇنى 4 تريلليون 467 ميلليارد 200 ميلليون يۋان بولىپ، 2014 ـ جىلداعىدان %62.3 ارتتى؛ 2023 ـ جىلى ەل ىشىندەگى ساياحاتقا شىققاندار 4 ميلليارد 890 ميلليون ادام (رەت) بولىپ، بۇكىل الەمدەگى ەڭ ٴىرى ەل ٴىشى ساياحات بازارىنا اينالدى.

بولاشاققا كوز جىبەرسەك، شي جينپيڭ جولداستى ۇيتقى ەتكەن پارتيا ورتالىق كوميتەتىنىڭ پارمەندى باسشىلىعىندا، ەلىمىزدىڭ قىزمەت وتەۋ كاسىبىنىڭ ٴارقايسى سالاسىنداعى رەفورما جاپپاي تەرەڭدەتىلىپ، قىزمەت وتەۋدىڭ اشىق ۇستالۋى تەرەڭ ىلگەرىلەتىلىپ، قىزمەت وتەۋدە جاڭالىق اشۋ ۇزدىكسىز جوعارىلاپ، جوعارى ساپالى دامىعان جۇڭگو قىزمەت وتەۋىنىڭ جۇڭگو ۇلگىسىندەگى وسىزامانداندىرۋ قۇرىلىسىنا پارمەندى تىرەك ازىرلەپ، دۇنيە ٴجۇزى ەكونوميكاسىنىڭ اقاۋسىز دامۋىنا اناعۇرلىم زور ۇلەس قوساتىندىعى داۋسىز.

(شينحۋا اگەنتتىگىنىڭ 9 ـ ايدىڭ 12 ـ كۇنى بەيجيڭنەن بەرگەن حابارى)