شينحۋا اگەنتتىگىنىڭ 3 ـ ايدىڭ 22 ـ كۇنى بەيجيڭنەن بەرگەن حابارى. 3 ـ ايدىڭ 22 ـ كۇنى جۇڭگو كوممۋنيستىك پارتياسى ورتالىق كوميتەتى لاوس حالىق توڭكەرىستىك پارتياسى ورتالىق كوميتەتىنە تەلەگرامما جولداپ، لاوس حالىق توڭكەرىستىك پارتياسى قۇرىلعاندىعىنىڭ 70 جىلدىعىن قۇتتىقتادى. قۇتتىقتاۋ تەلەگرامماسىندا بىلاي دەلىندى:

70 جىلدان بەرى، لاوس حالىق توڭكەرىستىك پارتياسى لاوس حالقىن ىنتىماقتاستىرىپ، باستاپ، ۇلت ازاتتىعىن جانە مەملەكەتتىڭ تۇتاستىعىن جۇزەگە اسىرىپ، سوتسياليستىك قۇرىلىس پەن جاڭارتۋ ىستەرىندە شۇعىلالى تابىستارعا قول جەتكىزدى، اسىرەسە، لاوس حالىق توڭكەرىستىك پارتياسىنىڭ 11 ـ قۇرىلتايىنان بەرى، لاوس پارتياسى ورتالىق كوميتەتى پارتيا باسشىلىعىن كۇش سالا بەكەمدەدى جانە كەمەلدەندىردى، ساياسيى، قوعامى ورنىقتى بولدى، ەكونوميكاسى ٴۇرتىس دامىدى، حالىق تۇرمىسى كۇن سايىن جاقساردى، حالىقارالىق ىقپالى ۇزدىكسىز جوعارىلادى، جۇڭگو پارتياسى مەن حالقى بۇعان شىن جۇرەكتەن قۋانادى. باس شۋجي تۇڭلۇننىڭ جەتەكشىلىگىندەگى لاوس پارتياسى ورتالىق كوميتەتىنىڭ پارمەندى باسشىلىعىندا، لاوس پارتياسى مەن حالقى، ٴسوز جوق، سوتسياليستىك قۇرىلىستى جانە جاڭارتۋ ىستەرىن پارمەندى ىلگەرىلەتىپ، لاوس پارتياسى 12 ـ قۇرىلتايىنىڭ تابىستى اشىلۋىن ۇزدىك ناتيجەمەن قارسى الاتىندىعىنا سەنەدى.

سوتسياليزم جولىنداعى جولداس جانە باۋىرلاس رەتىندە، جۇڭگو پارتياسى، ۇكىمەتى، حالقى باستان ـ اياق لاوس پارتياسىن، ۇكىمەتىن، حالقىن سەنىمدى دوسى جانە سەرىگى ساناپ، ستراتەگيالىق بيىكتەن جانە ۇزاق بولاشاقتىق تۇرعىدان جۇڭگو _ لاوس قارىم ـ قاتىناسىنىڭ دامۋىنا ايرىقشا ٴمان بەردى. 2023 ـ جىلى 10 ـ ايدا باس شۋجي، مەملەكەت ٴتوراعاسى شي جينپيڭ باس شۋجي، مەملەكەت ٴتوراعاسى تۇڭلۇنمەن بىرگە جۇڭگو _ لاوس تاعدىرلاس ورتاق تۇلعاسىن قۇرۋدىڭ جاڭا 5 جىلدىق ارەكەت جوسپارىنا بىرگە قول قويىسىپ، جاڭا داۋىردە جۇڭگو _ لاوس قارىم ـ قاتىناسى دامۋىنىڭ جانە تاعدىرلاس ورتاق تۇلعا قۇرىلىسىنىڭ تاماشا جوباسىن كەسكىندەدى. ەكى پارتيا، ەكى ەل ەڭ جوعارى باسشىلارىنىڭ ستراتەگيالىق جەتەكشىلىگىندە، جۇڭگو _ لاوس تاعدىرلاس ورتاق تۇلعا قۇرىلىسى ۇزدىكسىز تەرەڭدەپ، ناقتىلانىپ، ٴبىر قىدىرۋ جاڭا تابىستارعا، جاڭا ىلگەرىلەۋشىلىكتەرگە قول جەتكىزىپ، ەكى ەل حالقىنا ناقتى ىرىس ـ قۇت اكەلدى.

كەزەكتە جۇڭگو جۇڭگو ۇلگىسىندەگى وسىزامانداندىرۋدى جاپپاي ىلگەرىلەتۋدە، لاوس تا مەملەكەتتى دامىتۋدىڭ، گۇلدەندىرۋدىڭ ماڭىزدى كەزەڭىندە تۇر، جۇڭگو كوممۋنيستىك پارتياسى لاوس حالىق توڭكەرىستىك پارتياسىمەن بىرگە ەكى پارتيا، ەكى ەل ەڭ جوعارى باسشىلارى كەلىسكەن ورتاق تانىمدى ويداعىداي تياناقتاندىرىپ، جوعارى جىكتەگىلەردىڭ قارىم ـ قاتىناسىن جيىلەتىپ، ستراتەگيالىق بايلانىستى كۇشەيتىپ، ساياسي ٴوزارا سەنىمدىلىكتى نىعايتىپ، ٴار سالاداعى ناقتى ىستەر سەلبەستىگىن كەڭەيتىپ، پارتيانى باسقارۋ، ەل باسقارۋ نازارياسى مەن تاجىريبەسى جونىندەگى اۋىس ـ كۇيىستى، ٴوزارا ۇلگى الۋدى تەرەڭدەتىپ، ٴوز ەلىنىڭ مەملەكەت جاعدايىنا ۇيلەسەتىن سوتسياليستىك دامۋ جولى جونىندە بىرگە ىزدەنىس جاساپ، جۇڭگو _ لاوس تاعدىرلاس ورتاق تۇلعا قۇرىلىسىنىڭ جوعارى ولشەم، جوعارى ساپا، جوعارى دەڭگەي بەتالىسىنا قاراي ۇزدىكسىز العا باسۋىن ىلگەرىلەتۋدى قالايدى.