سۋرەتتە: ساياحاتشىلار ۇگىت قولدانباسىن كورۋدە. ما چىڭلۋ فوتوسى
ٴتىلشىمىز حان شاشا، ما چىڭلۋ، پراكتيكانت ٴتىلشى شىن شياۋمىڭ، ەرىكتى ٴتىلشى لي سانپىڭ حابارلايدى. 2 - ايدىڭ 2 - كۇنى ىلە وبلىستىق ورمان - جايىلىم مەكەمەسى جانە شينجياڭ تيانشان باتىس بولىك مەملەكەت مەنشىگىندەگى ورماندى باسقارۋ مەكەمەسى، ىلە وزەنى الابىنداعى سازدىقتى قورعاۋدى باسقارۋ مەكەمەسى بىرلەسىپ قۇرعان ەرىكتىلەر قوسىنى شينجياڭ ىلە جاماتى مەملەكەتتىك سازدىق باقشاسىندا دۇنيە جۇزىلىك سازدىق كۇنىن ۇگىتتەۋ قيمىلىن ورىستەتىپ، بۇقارا مەن ساياحاتشىلارعا سازدىقتى قورعاۋ بىلىمدەرىن ٴتۇسىندىرىپ، بۇقارانىڭ سازدىقتى قورعاۋ تانىمىن جوعارىلاتتى.
ناق مايداندا ەرىكتىلەر سۇراۋ ـ جاۋاپ فورماسىمەن بۇقارانى دەربەس وي جۇگىرتۋ ارقىلى سازدىق ورتاسىن قورعاۋ اسەرىن تەرەڭدەتۋگە جەتەكتەپ، قيمىلدىڭ تارتىمدىلىعىن ارتتىرىپ، كوپتەگەن بۇقارا مەن ساياحاتشىنى بەلسەنە قاتىناسۋعا باۋرادى.
قيمىل بارىسىندا كورمەگە قويىلعان ۇگىت ماتەريالدارى ساياحاتشىلاردى باۋرادى، ەرىكتىلەر ساياحاتشىلارعا «جۇڭحۋا حالىق رەسپۋبليكاسىنىڭ سازدىقتى قورعاۋ زاڭى» سياقتى ۇگىت قولدانباسىن تاراتىپ، ولاردىڭ سازدىقتى جانە جابايى حايۋاناتتاردى قورعاۋ تانىمىن ونان ارى كۇشەيتتى.
سازدىق باقشاسىنداعى كولدە قيقۋلاي قانات قاققان، سۋ تۇبىنەن ازىق اۋلاعان اققۋلار كوپتەگەن فوتو سۋرەت اۋەسكەرى مەن ساياحاتشىنى باۋرادى.
بەيجيڭنەن كەلگەن ساياحاتشى جاڭ حانىم فوتو سۋرەت اۋەسكەرى. بىرنەشە كۇننەن بەرى ول ارنايى ىلەگە كەلىپ اققۋلاردى تاماشالاپ، سازدىق باقشاسىنىڭ ەكولوگيالىق ورتاسىن اۋىز جاپپاي القادى. ول بىلاي دەدى: بۇل مەنىڭ ىلەگە ٴۇشىنشى رەت كەلىپ اققۋلاردى تاماشالاۋىم، بۇل جەردىڭ تاڭعاجايىپ كورىنىسى مەنى ۇنەمى باۋرايدى. قازىر مۇنداعى اققۋ سانىنىڭ بارعان سايىن كوبەيۋى ىلەنىڭ سازدىقتى قورعاۋ قىزمەتىنىڭ وتە تىڭعىلىقتى ىستەلگەندىگىن دالەلدەيدى.
وبلىستىق ورمان - جايىلىم مەكەمەسىنىڭ ورىنباسار باستىعى سۇن چيڭجياڭ بىلاي دەپ تانىستىردى: جۋىق جىلداردان بەرى ىلە وبلىسى سازدىقتى قورعاۋ، قالپىنا كەلتىرۋ تەبىنىن ارتتىرۋ ارقىلى ىلە وزەنى الابىنداعى سازدىق ەكولوگيالىق جۇيەسىن بارىنشا جاقسارتتى. بۇدان بىلاي وبلىسقا توتە قاراستى ورمان - جايىلىم جۇيەسى وبلىستىق پارتكومنىڭ باسشىلىعىندا پارتيا 20 - قۇرىلتايىنىڭ رۋحىن ىشكەرىلەي ۇيرەنىپ، دايەكتىلەندىرىپ، سازدىقتى قورعاۋ زاڭىن قاتاڭ ويداعىداي تياناقتاندىرىپ، اتقارىپ، ەكولوگيالىق تومەنگى شەكتى باتىل ساقتاپ، ىلە وزەنى الابىنداعى سازدىقتى قورعاۋ، قالپىنا كەلتىرۋ قىزمەتىن ۇزدىكسىز تىڭعىلىقتى يگەرەدى.
جۋىق جىلداردان بەرى ىلە وبلىسىنداعى ٴار دارەجەلى پارتكومدار، ۇكىمەتتەر جانە قاتىستى تاراۋلار ىلە وزەنى الابىنداعى سازدىقتاردى قورعاۋ تەبىنىن ۇزدىكسىز كۇشەيتتى. «14 - بەسجىلدىقتان» بەرى، وبلىسقا توتە قاراستى ورمان - جايىلىم تاراۋلارى ىلە وزەنى الابىنداعى سازدىقتى قورعاۋ، قالپىنا كەلتىرۋ تۇرىندەگى 10 نىسانعا قول جەتكىزىپ، جالپى 62 ميلليون 340 مىڭ يۋان قارجى قوستى، نىسان جاپپاي ورىندالعاننان كەيىن 10 مىڭ مۋدان استام تۇياقكەستى جەر قالپىنا كەلتىرىلىپ، ٴىشىنارا سازدىق اۋماعىنىڭ تارايۋ، ناشارلاۋ ماسەلەسى ٴونىمدى تەجەلىپ، سازدىقتاعى ورگانيزمدەردىڭ الۋان تۇرلىلىگى ٴونىمدى قالپىنا كەلتىرىلدى.