ٴتىلشىمىز مىڭ شيا، ەرىكتى ٴتىلشى ۋي جيامين حابارلايدى. قالىڭ ايەلدەردىڭ زاڭمەن باسقارۋ تانىمى مەن ۇقىق قورعاۋ تانىمىن كۇشەيتىپ، قالىڭ ايەلدەردى وزدەرىنىڭ ورىندى ۇقىق - مۇددەسىن زاڭ قارۋى ارقىلى قورعاۋعا تاربيەلەۋ جانە جەتەكتەۋ ٴۇشىن، 3 - ايدىڭ 29 - كۇنى اۆتونوميالى رايوندىق جوعارى دارەجەلى حالىق سوتى مەكەمەسىنىڭ ىلە وبلىستىق بولىمشەسى وبلىستىق ايەلدەر بىرلەستىگىمەن بىرلەسىپ زاڭمەن باسقارۋ ۇگىت قيمىلىن ورىستەتتى.

2023 - جىلى 1 - ايدىڭ 1 - كۇنى جاڭادان وزگەرىس ەنگىزىلگەن «جۇڭحۋا حالىق رەسپۋبليكاسىنىڭ ايەلدەردىڭ ۇقىق - مۇددەسىن قامتاماسىزداندىرۋ زاڭى» رەسمي اتقارىلدى، مۇندا جاڭادان قوسىلعان مازمۇندار، كورنەۋ تۇيىندەر كوپ بولدى.

”بىلەسىز بە؟ قازىر زاڭدا جۇكتىلىك، تۋىت دەمالىسى جانە بالا ەمىزۋ سياقتى جاعدايلار سەبەبىنەن ايەل جۇمىسشى - قىزمەتكەرلەردىڭ ٴمانسابىن ٴوسىرۋ، دارەجەسىن جوعارىلاتۋ سياقتىلارعا شەك قويۋعا تيىم سالىنادى“. ”ەمدەۋ قۇرىلىمدارى قاتىستى ەمدەۋ قيمىلدارىن جۇرگىزگەندە ايەلدەردىڭ ٴوز ەركىنە تولىق قۇرمەت ەتۋى كەرەك...“، ”ەرلى - زايىپتىلار اجىراسۋ جونىندە ارىز - شاعىم بەرگەن كەزدە مال - مۇلىكتى ىرىقتىلىقپەن مالىمدەۋ كەرەك...“، سول كۇنى قۇلجا قالاسىنداعى ادامدار شوعىرى مول حايتاڭ جولىندا وبلىستىق سوت مەكەمەسى مەن وبلىستىق ايەلدەر بىرلەستىگىنىڭ قىزمەتكەرلەرى «جۇڭحۋا حالىق رەسپۋبليكاسىنىڭ ايەلدەردىڭ ۇقىق - مۇددەسىن قامتاماسىزداندىرۋ زاڭىنا» جاڭادان قوسىلعان مازمۇندار جونىندە قالىڭ ايەلدەرگە ەگجەي - تەگجەيلى، كاسىبيلەنگەن تۇسىنىك جاساپ، ولارعا زاڭ بىلىمدەرىن جەتكىزدى.

سول كۇنى حايتاڭ جولىندا جايما اشقان ساۋداگەرلەردىڭ ايعايلاعان داۋىسى قۇلاق تۇندىرادى، گۇل تاماشالاۋعا كەلگەن ساياحاتشىلاردىڭ قاراسى دا مول. وبلىستىق سوت مەكەمەسىنىڭ وبلىستىق ايەلدەر بىرلەستىگىمەن بىرلەسىپ قۇرعان زاڭدىق كەڭەس بەرۋ تەكشەسى جۇرت اراسىندا ايرىقشا كوزگە تۇسەدى. قىزمەتكەرلەر كوشەدەگى جۇرگىنشىلەرگە ۇگىت ماتەريالدارىن تاراتىپ، كومەك سۇراي كەلگەن ايەلدەردىڭ كۇدىكتى سۇراۋلارىنا جاۋاپ بەردى.

وبلىستىق سوت مەكەمەسى ازاماتتىق ىستەر 1 - كوللەگياسىنىڭ سۋدياسى ۋاڭ ۋيجيا بىلاي دەدى: سول جەردە ادامدار اجىراسۋ ارىز - شاعىمىندا ەرلى - زايىپتىلارعا ورتاق مال - مۇلىكتى قاز - قالپىندا مالىمدەمەسە، قانداي جاۋاپكەرشىلىك ارقالايدى؟ ۇيلەنۋدەن بۇرىن اكە - شەشەسى الدىمەن تولەپ ٴبىر جاعىنا ٴۇي ساتىپ الىپ بەرسە، ۇيلەنگەننەن كەيىن ەرلى - زايىپتى قارىز اقشانى بىرگە قايتارعان جاعدايدا، اجىراسقان كەزدە ٴۇي ەرلى - زايىپتىلارعا ورتاق مال - مۇلىك بولا ما؟ اكە - شەشەسىنىڭ سەنىمسىزدىك ارەكەتى بالانىڭ وقۋعا تۇسۋىنە، قىزمەتىنە ىقپال جاساي ما دەگەن ماسەلەلەر جونىندە كەڭەس سۇرادى.

سول كۇنى سۋديالار سوت جۇرگىزۋ امالياتىنداعى دەلو مىسالدارىمەن ۇشتاستىرىپ، قالىڭ ايەلدەرگە ٴتۇيىندى تۇردە زاڭدىق بىلىمدەردى جالپىلاستىرىپ، ولاردىڭ قويعان ۇيلەنۋ، وتباسى، مۇراگەرلىك، باعىپ - قاعۋ سياقتىلارعا قاتىستى زاڭدىق ماسەلەلەرىنە سابىرلىلىقپەن، ەگجەي - تەگجەيلى جاۋاپ بەردى.

وبلىستىق ايەلدەر بىرلەستىگى ۇقىق - مۇددە ٴبولىمىنىڭ باستىعى حان يەحۇڭ بىلاي دەدى: وسى رەتكى قيمىلدان پايدالانىپ، «وتباسى ىستەرى سوتى» سىندى ايەلدەر مەن بالالاردىڭ ۇقىعىن قورعاۋعا قىزمەت وتەۋ كەڭسەسىنىڭ رولىن ونان ارى ساۋلەلەندىرىپ، جاڭادان وزگەرىس ەنگىزىلگەن «جۇڭحۋا حالىق رەسپۋبليكاسىنىڭ ايەلدەردىڭ ۇقىق - مۇددەسىن قامتاماسىزداندىرۋ زاڭىن» بارلىق وتباسىنا جەتكىزىپ، جۇرت جۇرەگىنە ۇيالاتامىز.

سۋرەتتە: زاڭمەن باسقارۋ ۇگىت قيمىلى.