«ارىز - ارمان قىزمەتى ەرەجەسىنىڭ» اتقارىلعانىنا ٴبىر جىل تولدى

قۇلجا قالاسى شوعىرلى ۇگىت قيمىلىن ورىستەتتى

ٴتىلشىمىز جاڭ ليڭ، ەرىكتى ٴتىلشى يىن شوۋرۇڭ حابارلايدى. جۇڭگو كوممۋنيستىك پارتياسى ورتالىق كوميتەتى، مەملەكەتتىك كەڭەس باسىپ تاراتقان «ارىز - ارمان قىزمەتى ەرەجەسى» (تومەندە قىسقاشا «ەرەجە» دەلىنەدى) 2022 - جىلى 5 - ايدىڭ 1 - كۇنىنەن باستاپ رەسمي اتقارىلدى. «ەرەجەنى» ىشكەرىلەي ۇيرەنۋ، ۇگىتتەۋ جانە دايەكتىلەندىرۋ، تياناقتاندىرۋ، جاڭا داۋىردەگى ارىز - ارمان قىزمەتىن ويداعىداي ىستەۋ، بۇقارانىڭ زاڭ بويىنشا ارىز - ارمان ايتۋ تانىمىن شىنايى كۇشەيتۋ ٴۇشىن 5 - ايدىڭ 13 - كۇنى ىلە وبلىستىق ارىز - ارمان مەكەمەسى قۇلجا قالالىق ارىز - ارمان مەكەمەسى، ٴادىليا مەكەمەسى، قوعام حاۋىپسىزدىگى مەكەمەسى، سوت مەكەمەسى، جاراتىلىستىق بايلىق مەكەمەسى سياقتى 14 ورىنمەن جانە 14 اۋىل - قالاشىقپەن، ٴمالى باسقارماسىمەن بىرلەسىپ، قۇلجا قالاسىنىڭ حانبيڭ باقشاسىندا «ەرەجەنىڭ» اتقارىلعاندىعىنىڭ ٴبىر جىلدىعى بايلانىسىمەن شوعىرلى ۇگىت قيمىلىن ورىستەتتى.

شوعىرلى ۇگىت قيمىلى الاڭىندا قىزمەتكەرلەر اقىل - كەڭەس بەرۋ تەكشەسىن قۇرۋ، كەرمە تۋ ٴىلۋ، ۇگىت ماتەريالدارىن تاراتۋ، كورمە تاقتاسىن قويۋ، ناق مايداندا جاۋاپ بەرۋ سياقتى فورمالار ارقىلى بۇقاراعا «ەرەجەنىڭ» شىعارىلۋ استارىن، ماڭىزىن ۇگىتتەدى ٴارى ارىز - ارمان قىزمەتىنىڭ ەرەكشەلىگىن، سونداي - اق بۇقارا كوڭىل ٴبولىپ وتىرعان قولامتالى ماسەلەلەرمەن ۇشتاستىرىپ، بۇقاراعا «ەرەجەنى» ٴتۇسىندىرىپ، كۇدىك - كۇماننان ارىلتىپ، بۇقارانىڭ «ەرەجە» جونىندەگى تانىمى مەن تۇسىنىگىن تەرەڭدەتتى، بۇقارانى ارىز - ارماندارىن زاڭ بويىنشا اقىلعا سيىمدى ەتىپ جەتكىزۋگە جەتەكتەدى.

ىلە وبلىستىق ارىز - ارمان مەكەمەسى پارتيا باسشىلىق گرۋپپاسىنىڭ مۇشەسى، ورىنباسار مەكەمە باستىعى فان لەي بىلاي دەپ تانىستىردى: بيىل 5 - اي − «ەرەجە» اتقارىلعاندىعىنىڭ ٴبىر جىلدىعىنا ارنالعان نەگىزگى تاقىرىپتىق ۇگىت ايى. ىلە وبلىسىنىڭ ارىز - ارمان جۇيەسى جەلىدە جانە جەلىدەن تىس ۇگىت - لەكسيا جاساۋ، لەكسيا سويلەۋ، زەيىن سىناۋ جارىسىن وتكىزۋ سياقتى كوپ ٴتۇرلى فورمامەن بۇقاراعا ارىز - ارمان بىلىمدەرىن ٴتۇسىندىرىپ، «ەرەجەنىڭ» ناقتى مازمۇنىن ۇگىتتەپ، جالپىلاستىرىپ، ”ٴىس بىتىرۋدە زاڭعا نەگىزدەلۋ، ىسكە جولىققاندا زاڭعا جۇگىنۋ، ماسەلەنى شەشۋدە زاڭنان پايدالانۋ، قايشىلىقتاردى شەشۋدە زاڭعا سۇيەنۋ“ سىندى ەتەنە راي قالىپتاستىرىپ، جاڭا داۋىردەگى ارىز - ارمان قىزمەتىنىڭ جوعارى ساپالى دامۋىن ۇزدىكسىز ىلگەرىلەتەدى.

ۇعىسۋعا قاراعاندا، ٴبىر جىلدان بەرى، ىلە وبلىسىنا توتە قاراستى تاراۋلار، ورىندار «ەرەجەنى» ۇيرەنۋ، ۇگىتتەۋ، دايەكتىلەندىرۋ، تياناقتاندىرۋ ورلەۋىن كوتەرىپ، شوعىرلى ۇيرەنۋ، ارناۋلى كۋرس اشۋ، تالقى جۇرگىزۋ، اۋىس - كۇيىس جاساۋ سياقتى فورمالارمەن نەگىزگى باسشىلار باستاپ ۇيرەنۋ، جاۋاپتى باسشىلار ٴتۇسىندىرۋ، كاسىپتىك تىرەكتىلەر باستاماشىلدىقپەن ۇگىتتەۋ ارقىلى جالپى پارتيالى كادرلاردىڭ «ەرەجەنىڭ» نەگىزگى رۋحىن، باستى مازمۇنىن جانە قىزمەت تالابىن جاپپاي دۇرىس يگەرۋىنە مۇمكىندىك جاساعان ٴارى ”8 - بەسجىلدىق“ زاڭ جالپىلاستىرۋ قيمىلىمەن ۇشتاستىرىپ، ٴتۇرلى فورمادا ۇگىت ورىستەتىپ، «ەرەجەنى» ۇيرەنۋ تاربيەسىن، ۇگىتتەۋ - ٴتۇسىندىرۋدى جانە دايەكتىلەندىرۋ، تياناقتاندىرۋدى جاپپاي ىلگەرىلەتىپ، ارىز - ارمان قىزمەتىنىڭ قابىلەتى مەن دەڭگەيىن ۇزدىكسىز جوعارىلاتىپ، ارىز - ارمان قىزمەتىندە ناقتى ونىمدىلىككە قول جەتكىزۋگە كەپىلدىك ەتكەن.