ٴتىلشىمىز جاڭ جينفىڭ حابارلايدى. 1 - ايدىڭ 12 - كۇنى ىلە وبلىسىنىڭ 4 - رەتكى ادۆوكاتتار قۇرىلتايى قۇلجا قالاسىندا اشىلدى.

قۇرىلتايدا، قۇرىلتايعا قاتىناسقاندار باس شۋجي شي جينپيڭنىڭ ادۆوكاتتار قىزمەتى جونىندەگى ماڭىزدى نۇسقاۋىنىڭ، بەكىتۋىنىڭ رۋحىن ۇيرەندى؛ «ىلە وبلىستىق ادۆوكاتتار قوعامىنىڭ كەزەك اۋىستىرۋ سايلاۋىن ماقۇلداۋ جونىندەگى بەكىتۋى» وقىلدى؛ ۇزدىك ادۆوكاتتىق ىستەر باسقارماسى مەن تاڭداۋلى ادۆوكاتتار حابارلاندىرىلىپ ماداقتالدى.

شينجياڭ ادۆوكاتتار كاسىپتىك قوعامى پارتكومىنىڭ ورىنباسار شۋجيى ليۋ جيانجۇڭ ىلە وبلىسىنىڭ 4 ـ رەتكى ادۆوكاتتار قۇرىلتايىنىڭ اشىلعاندىعىن قۇتتىقتادى، بارلىق ۋاكىلدەردىڭ اۋەلگى ماقساتتى ۇمىتپاي، بورىشتى ەستە بەرىك ساقتاپ، قىزمەت جاۋاپكەرشىلىگىن اتقارىپ، ٴۇمىت پەن ماڭىزدى تاپسىرمانى ورىنداپ، ساپالى، جوعارى ٴونىمدى زاڭدىق قىزمەت وتەۋ ارقىلى حالىق بۇقاراسىنىڭ سەنىمىنە يە بولۋىن ٴۇمىت ەتتى.

سوڭعى جىلداردان بەرى شي جينپيڭنىڭ زاڭمەن باسقارۋ يدەياسىنىڭ جەتەكشىلىگىندە جانە ىلە وبلىستىق پارتكومنىڭ پارمەندى باسشىلىعىندا، ىلە وبلىسىنداعى قالىڭ ادۆوكاتتار تاڭداۋلى داستۇرگە مۇراگەرلىك ەتىپ، دامۋ ۇستانىمىندا جاڭالىق اشىپ، وبلىستى زاڭمەن باسقارۋ جاندى امالياتىنا بەلسەنە ات سالىسىپ، زاڭ شىعارۋ، زاڭ اتقارۋ، ٴادىليا، زاڭعا بويسۇنۋ، زاڭدى جالپىلاستىرۋ سياقتى سالالاردا ٴونىمدى رول اتقارىپ، قاراستى رايوننىڭ قوعام ورنىقتىلىعىن قورعاپ، بۇقارانىڭ زاڭدى ۇقىق - مۇددەسىن قامتاماسىزداندىرىپ، قوعامدىق ادىلدىك پەن ادىلەتتىلىكتى جەبەپ، ىلەنى زاڭمەن باسقارۋ قۇرىلىسىن ىلگەرىلەتۋدە ماڭىزدى رول اتقاردى.

ىلە وبلىستىق پارتكومنىڭ تۇراقتى مۇشەسى، ساياسي - زاڭ كوميتەتىنىڭ شۋجيى ياڭ شينپيڭ بىلاي دەدى: ”قالىڭ ادۆوكاتتاردىڭ تۋى ايقىن تۇردە ساياسيدى دارىپتەپ، جۇڭگوشا سوتسياليستىك زاڭمەن باسقارۋ قىزمەتكەرلەرىنىڭ ساياسي تۇرعىسىندا باستان - اياق تاباندى بولۋىن، مىندەتىن ادالدىقپەن وتەپ، باتىلدىقپەن جاۋاپكەرشىلىك ارقالاپ، ىلە وبلىسىنىڭ ەكونوميكاسىنىڭ، قوعامىنىڭ جوعارى ساپالى دامۋ جالپى جاعدايىنا كۇش سالا قىزمەت وتەۋىن؛ باسقارۋدى ارناعا ٴتۇسىرۋدى كۇشەيتىپ، ادۆوكاتتار ىستەرىنىڭ اقاۋسىز دامۋىن ۇزدىكسىز ىلگەرىلەتىپ، ىلە وبلىسىنىڭ ەكونوميكاسىنىڭ، قوعامىنىڭ جوعارى ساپالى دامۋىن ىلگەرىلەتۋدى زاڭمەن پارمەندى قامتاماسىز ەتۋىن ٴۇمىت ەتەمىن“.