دۋ لەي (ٴوز ٴتىلشىمىز)، يۇڭ حاي (ەرىكتى ٴتىلشى)

«جۇبايىمنىڭ وسى ۇلكەن سيلىققا يە بولارىن مۇلدە ويلاماعان ەدىم. مۇنى ونىڭ جايشىلىقتاعى قىزىعۋشىلىعىنان، قۇلشىنۋىنان، تاباندىلىعىنان بولە قاراۋعا بولمايدى، مەن جۇبايىمدى ماقتانىش ەتەمىن!». 3 - ايدىڭ 27 - كۇنى بۋ يۇنشيۋدىڭ مۇگەدەكتەردىڭ 10 - كەزەكتى حالىقارالىق كاسىپتىك شەبەرلىك باسەكەسىندە كەستەشىلىك تۇردەن التىن مەدال العان قۋانىشتى حابارىن ەستىگەننەن كەيىن، بۋ يۇنشيۋدىڭ كۇيەۋى چىن تيڭلۋ ەرەكشە اسەرلەندى. 

چىن تيڭلۋ مەن بۋ يۇنشيۋ چاپچال سىبە اۆتونوميالى اۋدانى التىنبۇلاق قالاشىعى تۇرگەن سۇمىن قىستاعىنىڭ تۇرعىنى. ەكەۋى ورتا مەكتەپتەگى ساباقتاستار ەدى، كەيىن ٴبىر - بىرىمەن تابىسىپ، باس قۇراعان بولاتىن. چىن تيڭلۋدىڭ ايتۋىنشا، وقىپ جۇرگەندە بۋ يۇنشيۋ تىگىنشىلىكتى جاقسى كورەدى ەكەن، توي جاساعاننان كەيىن چىن تيڭلۋدىڭ كيىمىن تۇگەلدەي بۋ يۇنشيۋ تىگىپ بەرەتىن بولعان، جايشىلىقتا ول دا قالاشىقتاعى كەستەشىلەردەن سىبە كەستەسىن ۇيرەنگەن. 2009 - جىلى جىلى بۋ يۇنشيۋ التىنبۇلاق قالاشىعىندا اشىلعان كەستەشىلىك كۋرسىنا قاتىناسىپ، تۇڭعىش رەت كەستە تىگۋ تەحنيكاسىن جۇيەلى ۇيرەنەدى ٴارى كەستەشىلىككە دە بولەكشە قىزىعۋشىلىعى ويانادى. 2010  ـ جىلى چاپچال اۋدانى جياڭسۋدىڭ سۋجوۋ قالاسىنان كەستەشى مۇعالىمدى كەستە شەبەرلەرىن تاربيەلەۋگە ۇسىنىس ەتەدى، بۋ يۇنشيۋ وسى جولى ٴبىر ايلىق كۋرسقا قاتىناسادى. سۋجوۋداعى كەستەشى مۇعالىمنىڭ ونەرى ۇستەم بولعاندىقتان، بۋ يۇنشيۋ دا ٴوز قاراجاتىمەن سۋجوۋعا بارىپ كەستەشىلىك تەحنيكاسىن ۇيرەنۋ ويىنا  كەلەدى.

الايدا بۋ يۇنشيۋ وتباسىنىڭ تۇرمىس شارت - جاعدايى كۇيەۋى چىن تيڭلۋدىڭ باسىن قاتىرادى، ”ول كەزدە وتباسىمىزدىڭ ەكونوميكالىق شارت - جاعدايى ناشار ەدى، ۇلىم نە بارى 13 جاستا، قىزىم 5 جاستا بولاتىن، مەن 30 مۋ جەرگە ەگىن ەگەمىن، ونىڭ ۇستىنە باققان 10 نەشە سيىرىم بار، ۇيدەگى جۇمىستاردىڭ قاربالاستىعىنان قول بوسامايتىن، ٴبىراق ايەلىمنىڭ كەستە ۇيرەنۋدەگى وسىنشاما تاباندىلىعىن كورىپ، تاعى دا قولداۋ كورسەتتىم. ويىمدا مەيلى قانداي قيىندىق بولسىن، مەن بار كۇشىممەن وتباسىمدى جاقسى اسىراپ،  ونى ۋايىمنان ارىلتسام دەپ ٴتۇيدىم. ونىڭ باستان - اياق تاباندىلىق كورسەتەرىن، كەستە تىگۋ جونىندە وزگەشە تۇسىنىككە يە بولارىن شىنىمەن دە ويلاماعان ەكەنمىن“ دەدى چىن تيڭلۋ.

سۋجوۋداعى كەستەشى مۇعالىم بۋ يۇنشيۋدىڭ جاعدايىن بىلگەن سوڭ ونىڭ تاربيەلەۋ قاراجاتىن كەشىرىم ەتەدى. سۋجوۋدا وقىعان جىلى بۋ يۇنشيۋ تەرەزەسى جوق، اشەكەيلەنبەگەن ٴبىر ٴۇيدى مايعا الىپ تۇرادى، ٴبىر مەزگىل ونىڭ شاشى دا ۋىس - ۋىسىمەن ٴتۇسىپ سيرەپ قالادى، ويتكەنى، سول كەزدە ونىڭ كەستە تىگۋ تەحنيكاسىن ۇيرەنۋى كەزەڭدىك مەزگىلگە ٴوتىپ، قامال الۋعا شاراسى بولماي، وتە اۋىر قىسىمنان نەرۆ السىزدىگى ناۋقاسىنا شالدىققان ەدى. بۋ يۇنشيۋ  ٴتىسىن تىسىنە باسىپ تاباندىلىق كورسەتىپ، كەشتە دە شام جارىعىندا كەستە تىگۋ شەبەرلىگىن زەرتتەۋىن جالعاستىرا بەرەدى.

تالاپتىعا نۇر جاۋار! ۇزاق ۋاقىت ىزدەنىس جاساۋ ارقىلى بۋ يۇنشيۋدىڭ كەستە تىگۋ شەبەرلىگى زور ىلگەرىلەۋشىلىككە يە بولادى. 2014 - جىلى 8 - ايدا ول اۆتونوميالى رايوندىق 4 - كەزەكتى مۇگەدەكتەردىڭ كاسىپتىك شەبەرلىك باسەكەسىندە كەستەشىلىك كاسىبى بويىنشا 2 - ورىندى يەلەيدى؛ 2015 - جىلى 7 - ايدا ول مەملەكەتتىك 5 - كەزەكتى مۇگەدەكتەردىڭ كاسىپتىك شەبەرلىك باسەكەسىنە قاتىناسىپ، كەستەشىلىك جارىسىنان 3 - دارەجەلى سيلىققا يە بولدى؛ 2017 - جىلى 3 - ايدا ول مەملەكەتتىك 52 - كەزەكتى قولونەر بۇيىمدارى جارىسىنا قاتىناسىپ، ”التىن سامۇرىق“ جاسامپاز تۋىندى جاراتۋ سيلىعىنىڭ مىس مەدالىن الدى؛ 2018 ـ جىلى شينجياڭ ٴساندى بۇيىمدار شەبەرى بولىپ باعالاندى؛ 2020 ـ جىلى ىلە وبلىس دارەجەلى بەيزاتتىق مادەني مۇرالارى سىبە ۇلتى كەستەشىلىك ونەرىنىڭ ۋاكىلدىك مۇراگەرى بولدى؛ 2022 ـ جىلى 7 ـ ايدا ول حالىقارالىق 10 ـ كەزەكتى مۇگەدەكتەردىڭ كاسىپتىك شەبەرلىك باسەكەسىنە قاتىناسىپ، ەل ىشىندەگى تاڭداۋ جارىسىندا كەستەشىلىك تۇرىنەن 2 ـ ورىنعا يە بولدى.

قازىر بۋ يۇنشيۋدىڭ كەستەشىلىك تۋىندىلارى كاسىپتىك قايراتكەرلەردىڭ مويىنداۋىنا يە بولدى، ٴبىراق ول ٴالى دە ۇزدىكسىز ۇيرەنۋدە. ول ادەمى تىگىلگەن كەستەنى كورسە - اق سونى تىككەن ادامدى ۇستاز تۇتىپ رەڭدى قالاي سايكەستىرگەنىن، سۋرەتىن قالاي سىزعانىن سۇراپ ۇيرەنەدى، ۇيرەنگەن تەحنيكاسىن سىبە كەستەسىمەن ۇشتاستىرادى. جايشىلىقتا ۇيدە كەستە تىككەندە، ول 6 - 7 ساعات بويى تاپجىلماي وتىرىپ تىگەدى، ٴتىپتى، تاماق جەۋدى دە ۇمىتىپ كەتەدى.

چىن تيڭلۋ بىلاي دەدى: ”ايەلىم كەستەشىلىكپەن شۇعىلدانعان كەزدە، جەرگىلىكتى پارتكوم، ۇكىمەت تە ەرەكشە كوڭىل ٴبولىپ، قولداۋ كورسەتتى، جارىستاردى بىزگە دەر كەزىندە حابارلاپ، بۋ يۇنشيۋدى جارىسقا قاتىناسۋعا شابىتتاندىردى. بۇدان بىلاي دا ايەلىمنىڭ ويعا العان ماقساتىن ىسكە اسىرۋىن اۋەلگىدەي قولدايمىن“.

التىنبۇلاق قالاشىعىنىڭ ورىنباسار باستىعى گۋان ي - ۋي بىلاي دەدى: ”بۋ يۇنشيۋدىڭ قۇلاعى اۋىرلاۋ بولعانىمەن، ول كەستە تىگۋدى قىزۋ سۇيەدى، قاشاندا قيىنشىلىققا قارسى اتتانىپ، قايتپاس رۋح، تاباندى قۇلشىنىسىنىڭ ارقاسىندا كەستەشىلىك سالاسىندا وزىندىك ٴورىس اشتى. بۇدان بىلاي ٴبىز بۋ يۇنشيۋدىڭ كەستەشىلىك كاسىبىن دامىتۋىن ۇزدىكسىز قولداپ، ۇلتتىق كەستەشىلىك ونىمدەرىنىڭ قۇنىن اسىرىپ، كاسىپ سالاسى تىزبەگىن كەڭەيتىپ، ٴتىپتى دە كوپ ايەلدەردىڭ كىرىسىن ارتتىرىپ، اۋقاتتانۋىن جەبەيمىز“.

3 - ايدىڭ 25 - كۇنى فرانسيانىڭ مەيس قالاسىندا وتكىزىلگەن مۇگەدەكتەردىڭ 10 - كەزەكتى حالىقارالىق كاسىپتىك شەبەرلىك باسەكەسىندە اعا جۇلدەگەر بولعان جۇڭگو شەبەرى بۋ يۇنشيۋدىڭ (وڭدا) كەستە تىگۋ جارىسىنان كورىنىس.          

          سۋرەتتى شينحۋا اگەنتتىگىنىڭ ٴتىلشىسى گاۋ جيڭ تۇسىرگەن