ەرىكتى ٴتىلشى بايتا حابارلايدى. 4 - ايدىڭ 18 - كۇنى ىلە وبلىستىق كىتاپحانانىڭ پارتيا ياچەيكاسى، شينجياڭ يۋانجىڭ شىڭيە (قۇلجا) ادۆوكاتتار باسقارماسىنىڭ پارتيا ياچەيكاسى جانە قۇلجا قالالىق 19 - ورتا مەكتەپ وبلىستىق كىتاپحانادا ”شۋاقتى كوكتەم − كىتاپ وقۋدىڭ تاماشا ٴساتى“ اتىنداعى كىتاپ وقۋ قيمىلىن بىرلەسىپ وتكىزدى.

وبلىستىق كىتاپحانانىڭ قىزمەتكەرلەرى ”كىتاپ وقۋ ٴتاسىلى، كىتاپ وقۋدىڭ ماڭىزدىلىعى“ دەگەن نەگىزگى تاقىرىپتى ارقاۋ ەتىپ، كىتاپ وقۋدىڭ قۇندىلىعى، كىتاپ وقۋ تابيعاتىن قالاي قالىپتاستىرۋ سياقتى جاقتاردان وسىنداعى جاس ادۆوكاتتار مەن وقۋشىلارعا كىتاپ وقۋ بىلىمدەرى جونىندە لەكسيا جاسادى. شينجياڭ يۋانجىڭ شىڭيە (قۇلجا) ادۆوكاتتار باسقارماسىنىڭ ادۆوكاتتارى ”كىتاپ وقۋ مەن زاڭمەن باسقارۋ بىرگە“ دەگەن تاقىرىپتا زاڭمەن باسقارۋ ۇگىت لەكسياسىن جاساپ، وقۋشىلاردى كىشكەنتايىنان زاڭ ۇيرەنەتىن، زاڭدى تۇسىنەتىن، زاڭعا بويسۇناتىن جاقسى ادەت قالىپتاستىرۋعا، زاڭ قارۋى ارقىلى ٴوزىن قورعاۋدى بىلۋگە تاربيەلەدى، جەتەكتەدى.

وقۋشى مو جياچي بىلاي دەدى: ”مۇعالىمنىڭ ايتقاندارىنان كىتاپ وقۋ ٴۇشىن دە دۇرىس ٴادىس قاجەت ەكەنىن ٴبىلدىم. بۇدان كەيىن مەن كىتاپتى كوپ وقىپ، كىتاپ وقۋ قابىلەتىم مەن ٴتۇسىنۋ قابىلەتىمدى جوعارىلاتامىن“.

تانىستىرۋعا قاراعاندا، قازىر وبلىستىق كىتاپحانادا 240 مىڭ دانا كىتاپ ساقتالعان، بازالىق قىزمەت وتەۋدى ويداعىداي ىستەۋمەن بىرگە، مەكتەپكە، نەگىزگى ساتىعا، اسكەري كازارماعا، كاسىپورىندارعا بارۋ سياقتى تاسىلدەر ارقىلى جالپى حالىقتىق كىتاپ وقۋدى جالپىلاستىرىپ، ٴتىپتى دە كوپ ادامدى كىتاپحاناعا بارىپ كىتاپ وقۋعا باۋرايدى ەكەن.

”وبلىستىق كىتاپحانا نازاردى جاڭا مادەنيەت بورىشىنا شوعىرلاندىرىپ، قوعامدىق كۇشتەرمەن سەلبەستىكتى ۇزدىكسىز كۇشەيتىپ، ٴتىپتى دە كوپ ادامنىڭ جالپى حالىقتىق كىتاپ وقۋعا ات سالىسۋىنا مۇمكىندىك جاساپ، كىتاپ قۇمار بولاتىن، جاقسى كىتاپ وقيتىن، كىتاپ وقۋعا شەبەر بولاتىن قويۋ اۋانىن قالىپتاستىردى“ دەدى وبلىستىق كىتاپحانانىڭ باستىعى ما جيڭ.

وسى رەتكى قيمىلدا شينجياڭ يۋانجىڭ شىڭيە (قۇلجا) ادۆوكاتتار باسقارماسى جەكە ـ جەكە وبلىستىق كىتاپحانا مەن 19 ـ ورتا مەكتەپكە 100 دانا كىتاپ تارتۋ ەتتى ٴارى گۋگۇڭ مۇراجايىنان 10 پار مادەنيەت جاسامپازدىعى بۇيىمدارىن ساتىپ الىپ، 19 ـ ورتا مەكتەپ وقۋشىلارىنا سيلىققا بەرىپ، جاستار مەن ورەندەردى كىتاپ وقۋعا، قۇلشىنا كىتاپ وقۋعا، جاقسى كىتاپ وقۋعا، كىتاپ وقۋعا شەبەر بولۋعا شابىتتاندىردى.