قيمىل ٴتۇرى مول بولىپ، ساياحاتشىلار قايشالىستى

”1 - مامىر“ دەمالىسى كەزىندە ىلە وبلىسىنىڭ مادەنيەت - ساياحات بازارى قىزا ٴتۇستى

ەرىكتى ٴتىلشى ۋاڭ ۋي حابارلايدى. ”1 ـ مامىر“ دەمالىسىندا ىلە وبلىسىنىڭ ساياحات بازارى قىزا ٴتۇسىپ، ساياحاتشىلار قايشالىستى. ٴىرى كورىنىس رايوندارى مەن كورىنىس تۇيىندەرىندە ادام سەڭدەي سوعىلىسىپ، ساياحاتشىلارعا لىق تولدى. 3 - جاقتىڭ ساناعىنا قاراعاندا، 4 - ايدىڭ 29 - كۇنىنەن 5 - ايدىڭ 1 - كۇنىنە دەيىن، ىلە وبلىسىنا توتە قاراستى ورىندار ەل ىشىنەن ٴبىر ميلليون 55 مىڭ 300 ادام - رەت ساياحاتشى قابىلداپ، 2022 - جىلداعىمەن سالىستىرعاندا %98.82، 2019 - جىلداعىمەن سالىستىرعاندا %115.99؛ 605 ميلليون يۋاندىق ساياحات كىرىسىن ورىنداپ، 2022 - جىلداعىمەن سالىستىرعاندا %120.66، 2019 - جىلداعىمەن سالىستىرعاندا %75.66 ارتقان.

شاشى مەملەكەتتىك ورمان باقشاسى ۇلى تابيعاتپەن ەتەنە بولعاندىقتان، ودان شىنايى ٴلاززات الۋعا بولادى، سوندىقتان دا بۇل ارا جەكە كولىكپەن ساياحاتتاۋ اۋەسكەرلەرىن وزىنە باۋرادى، ”1 - مامىر“ دەمالىسىندا شاشى كورىنىس رايونى كۇندىك ساياحاتشى قابىلداۋ مولشەرى 10 مىڭنان اسقان تاريحتاعى ەڭ بيىك بەلەستى قارسى الدى. كورىنىس رايونىندا ادامدار قايشالىسىپ، اۆتوكولىكتەر توقتاۋسىز اعىلىپ، شاشى ساحاراسىنىڭ كوركىنە كورىك قوسىپ ونان ارى قۇلپىرا ٴتۇستى، حالىقتىق تۇسەلحانا، مالشىلاردىڭ كيىز ٴۇيى دۋمانعا بولەنىپ، شاتتىق ٴۇنى تولاستامادى. ٴار جەردەن كەلگەن ساياحاتشىلاردىڭ ىركەس ـ تىركەس ات باسىن بۇرۋىمەن، كورىنىس رايونى ٴىرى جاڭا مەديالاردا، توراپ تەكشەلەرىندە قىزا ٴتۇستى. سىرت جەرلەردەن كەلگەن ساياحاتشىلارعا ٴتىپتى دە تاماشا ساياحات اسەرىن قالدىرۋ ٴۇشىن، توعىزتاراۋ اۋدانى مادەنيەت - ساياحات، قوعام حاۋىپسىزدىگى، قاتىناس، بازاردى باقىلاۋ - باسقارۋ سياقتى قاتىستى تاراۋلاردى كورىنىس رايونىنا بارىپ، ساياحاتشىلارعا قىزمەت وتەۋگە جۇمىلدىردى.

چاپچال سىبە اۆتونوميالى اۋدانى تۇڭعىش كەزەكتى ”ٴدامدى تاعامدار مادەنيەت - ساياحات مەرەكەسىن جانە بوكس جۇلدەسىنە تالاسۋ جارىسىن“ مۇقيات دايىندالىپ وتكىزدى، 4 - ايدىڭ 29 - كۇنىنەن 5 - ايدىڭ 5 - كۇنىنە دەيىن، ساياحاتشىلارعا كۇندىز - ٴتۇنى ەرەكشە ادەبيەت - كوركەمونەر ويىنى، ساداق اتىپ كورۋ، بەيزاتتىق  مادەني مۇرالاردى قوزعالىستى جانە تىنىش كۇيدەگى كورمەلەۋ، سىچۋان تەاترى، بالالار ويىنى، اۋىل شارۋاشىلىق ەرەكشە ونىمدەرىن كورمەگە قويىپ ساتۋ، ەرەكشە ٴدامدى تاعامدار كوشەسى، بايىرعى قالانىڭ شام سالتاناتى، سونداي - اق بوكس جۇلدەسىنە تالاسۋ جارىسى، شولپاندار كونسەرتى سياقتى ٴتۇرلى مادەنيەت - ساياحات قيمىلدارىن ازىرلەپ قويۋ ارقىلى اۋداندىق قوناق ۇيلەرگە، حالىقتىق تۇسەلحانالارعا كۇندىك قونۋ مولشەرىن %90 تەن اسىردى. شارۋالار ساياجايلارى مەن  ەرەكشە اس - سۋ دۇكەندەرىندە وتىرارعا ورىن قالمادى. ساناققا قاراعاندا، 5 - ايدىڭ 1 ـ كۇنى سىبە بايىرعى قالا كورىنىس رايونى قابىلداعان ساياحاتشى 50 مىڭ 400 ادام ـ رەتكە جەتىپ، بايىرعى قالا كورىنىس رايونىنداعىلار مەن ونىڭ توڭىرەگىندەگىلەردىڭ 6 ميلليون 70 مىڭ يۋان كىرىس كىرگىزۋىنە جەبەۋشى بولعان.

قۇلجا قالاسى التىشۋار كورىنىس رايونىندا وتكىزىلگەن ”ىلە شاتتىعى“ مۋزىكا فەستيۆالى، ”تارتىمدى شينجياڭ“ ارناۋلى كونسەرتى، ىلە وبلىستىق ٴان - ٴبي تەاترحاناسىنىڭ ارناۋلى كونسەرتى، لاڭگى جەكە مۋزىكا ساۋىعى، MC ٴبيى جانە ارنايى ٴان ايتۋ، بالالار ٴبيى ارناۋلى كونسەرتى سياقتى قيمىلدار قالا تۇرعىندارى مەن ساياحاتشىلارعا مۋزىكا شاعىن قالاشىعى التىشۋار كوشەسىنىڭ وزگەشە تارتىمدىلىعىن تولىق سەزىندىردى. مۋزىكا فەستيۆالىنا كەلگەن ساياحاتشىلار كوبەيىپ، التىشۋار كوشەسىندەگى بولكا، قاقتاما، ماروجني جارمەنكەسى مەن بەيزاتتىق مادەنيەت جاسامپازدىعى جارمەنكەسىنە رەت سانى بويىنشا 50 مىڭنان استام ساياحاتشى باۋراپ، ٴبىر ميلليون 600 مىڭ يۋاننان استام ساۋدا جۇرگىزدى.

قورعاس قالاسى مادەنيەت - ساياحاتتىڭ جاڭا نىسانىن بەلسەنە اشىپ، ”قورعاستا كەزىگەيىك“ مەملەكەتتىك ۇلگىدەگى كيىم - كەشەك ونەرى، اشەكەيلى اۆتوكولىكپەن ارالاپ ساياحاتتاۋ، 2023 - جىلعى كوكتەمگى مۋزىكا فەستيۆالى سياقتى جەلىلەس قيمىلداردى وتكىزىپ، جۇڭگو - قازاقستان قورعاس حالىقارالىق شەكارالىق سەلبەستىك ورتالىعىنىڭ قازاقستان جاق ٴوڭىرى جاپپاي قالپىنا كەلتىرىلدى، باجىسى كەشىرىم ەتىلەتىن دۇكەندەر ساياحات ماۋسىمىنداعى تۇتىنۋ ورلەۋىن كوتەردى، مەملەكەت قاقپاسىندا سەيىل - سەرۋەن، شەكارا اتتاپ زات ساتىپ الۋ ساياحاتى ٴۇرتىس قىزا ٴتۇستى. قالا ىشىندەگى ٴارقايسى كورىنىس تۇيىندەرى مەن مەيمانحانالاردىڭ  الدىن الا تاپسىرىس مولشەرىن قاۋىرت ارتتىردى. ساناققا قاراعاندا، قورعاس قالاسى ”1 - مامىردىڭ“  الدىڭعى 3 كۇنىندە جالپى 63 مىڭ ادام - رەت ساياحاتشى قابىلداپ، ساياحات كىرىسىن 53 ميلليون 763 مىڭ يۋانعا جەتكىزگەن.