نارات كورىنىس ءوڭىرى:

قىزمەت وتەۋ قۇرىلعىلارىن جاقسارتىپ، ساياحاتشىلاردىڭ سەزىنۋىن جوعارىلاتتى

□ انار بۇلت \ شينجياڭ گازەتىنىڭ ءتىلشىسى رىن جياڭ، ەرىكتى ءتىلشى ما دىجۇن

وتكەن اپتانىڭ سوڭىندا نارات كورىنىس وڭىرىندە كۇن بۇلتتاپ، جاۋىن جاۋىپ، اۋا رايى تىم جاقسى بولماسا دا، الايدا شينجياڭنىڭ ءىشى - سىرتىنان كورىنىس وڭىرىنە كەلگەن ساياحاتشىلاردىڭ اياعى ۇزىلمەدى. 7 - اي كىرە بۇل اراعا كەلەتىن ساياحاتشىلار دا كوبەيدى، ادام اعىنى، اۆتوكولىك اعىنى ورنىقتى ارتتى. 7 - ايدىڭ 1 - كۇنىنەن 9 - كۇنىنە دەيىن كورىنىس ءوڭىرى جالپى 153 مىڭ 449 ساياحاتشى (رەت) قابىلداپ، سايكەس مەزگىلدەگىدەن ％12. 17 ارتتى.

بيىل وسى كورىنىس ءوڭىرى جاڭادان سالىنعان ساياحاتشىلارعا قىزمەت وتەۋ ورتالىعىن ىسكە قوسىپ، 2283 كولىك توقتاتۋ ورنىن كوبەيتىپ، كورىنىس ءوڭىرىنىڭ قىزمەت وتەۋ قۇرىلعىلارىن زور دارەجەدە جاقسارتىپ، ساياحاتشىلاردى بەلەت ساتۋ، بەلەت تەكسەرۋ، كولىك توقتاتۋعا قىزمەت وتەۋ، ارالىققا تاسۋ، ارىز قابىلداۋ - ءبىر جاقتى ەتۋ، ەمدەۋ - قۇتقارۋ، تىنىعۋ جانە زات ساتىپ الۋ سياقتى قىزمەت وتەۋلەرمەن قامدادى. تاياۋدا كورىنىس ءوڭىرى جوعارى جىلدامدىقتى كورىنىس اسپالى جولىن ىسكە قوسىپ، ساياحات قاتىناۋ شارت - جاعدايىن ءونىمدى جاقسارتتى.

ساياحاتشىلاردىڭ قىزمەت وتەۋگە بولعان ءتىپتى دە جوعارى تالاپتارىن قاناعاتتاندىرۋ ءۇشىن، نارات كورىنىس ءوڭىرى كاسىپپەن شۇعىلدانۋشىلارعا باۋلۋدى كۇشەيتىپ، ساياحاتقا قىزمەت وتەۋ ”ۇلكەن ساباقحاناسىن“ اشىپ، كورىنىس ءوڭىرىن ءتۇسىندىرۋ، جول - جوسىنمەن كۇتىپ الۋ، قۇتقارۋ - كۇتىمدەۋ بىلىمدەرى، حاۋىپسىزدىك ساۋاتتارى سياقتى كاسىپتىك باۋلۋ جانە جارىستار ورىستەتىپ، قىزمەت وتەۋ ساپاسىن جوعارىلاتتى. مۇنان تىس، كورىنىس ءوڭىرى ”تاماقتانۋ، جاتىن ورىن، قاتىناۋ، ساياحاتتاۋ، زات ساتىپ الۋ، كوڭىل اشۋ“ ءبىر تۇلعالانعان ”ناراتتى زەردەلى ساياحاتتاۋ“ قىزمەت وتەۋ تۇعىرىن شىعارىپ، ساياحاتشىلارعا ينتەرنەت جەلىسىندە بەلەت ساتىپ الۋ، ينتەرنەت جەلىسىندە ساياحاتتاۋعا جەتەكشىلىك ەتۋ، دىبىستىق ءتۇسىندىرۋ، ارىز ايتۋ، قوناق ءۇي، مەيمانحانا، ءدامدى تاعام، ەرەكشە ونىمدەردى تاپسىرىسپەن ساتىپ الۋ سياقتى زەردەلى قىزمەت وتەۋلەرمەن قامداپ، ساياحاتشىلاردىڭ ساياحاتتىق سەزىنۋىن جوعارىلاتتى.

نارات كورىنىس ءوڭىرىن باسقارۋ كوميتەتى ساياحاتتى دامىتۋ، باسقارۋ مەكەمەسىنىڭ باستىعى ۋاڭ سۋ - ۋىن تانىستىرىپ بىلاي دەدى: كورىنىس ءوڭىرى ساياحاتشىلاردىڭ تالابىنا اناعۇرلىم تىعىز نازار اۋدارىپ، ارىز ايتۋ ارناسىن ىركىلىسسىزدەندىرىپ، قايشىلىقتار مەن ماسەلەلەردى دەر كەزىندە شەشەدى. قازىر ساياحات تۇتىنۋ بازارىن ارناعا ءتۇسىرىپ، كورىنىس ءوڭىرىنىڭ تاماشا وبرازىن ايگىلەۋ ءۇشىن، كورىنىس ءوڭىرى ىشىندەگى ساياحاتتىق قىزمەت وتەۋ كاسىپ سالالارىنا، قالا - قالاشىقتاردىڭ ورتاسىنا، جول قاتىناسقا، ازىق - تۇلىك حاۋىپسىزدىگىنە جاپپاي تەكسەرۋ، رەتتەۋ، وڭاۋ جۇرگىزىپ جاتىرمىز.