تىلشىلەرىمىز لۋ جۇڭ، سۇن ي - نان، ساي ليپىڭ نىلقىدان حابارلايدى. 27 ـ شىلدە كەشتە ”كوركەم نىلقى“ اتتى ٴان ـ بيمەن بىرگە، 11 ـ كەزەكتى ”ٴشاربات نىلقى“ بال اراسى مادەنيەت ـ ساياحات مەرەكەسى نىلقى اۋدانىنىڭ تاڭبالى الاڭىندا سالتاناتپەن اشىلدى.
بۇل رەتكى قيمىلدى نىلقى اۋداندىق پارتكوم مەن ۇكىمەت ۇيىمداستىردى،جياڭسۋ ولكەسى چاڭجوۋ قالاسى ۋجين رايونىنان نىلقىعا كومەكتەسۋ قىزمەت گرۋپپاسى، تاڭبالى كورىنىس رايونىن باسقارۋ كوميتەتى، اۋداندىق مادەنيەت، دەنە تاربيە، راديو ـ تەلەۆيزيا جانە ساياحات مەكەمەسى ۇستىنە الىپ وتكىزدى. سول كۇنى نەشە مىڭ قوناق نىلقى اۋدانىنا جينالىپ، وسى ٴشاربات قوناعاسىدان بىرگە ٴلاززاتتاندى. وبلىستىق ۇكىمەت پارتيا باسشىلىق گرۋپپاسىنىڭ مۇشەسى، جياڭسۋ ولكەسىنىڭ ىلەگە كومەك بەرۋ الدىڭعى شەپ قولباسشىلىق شتابى پارتكومىنىڭ ورىنباسار شۋجيى، ورىنباسار باس قولباسشىسى لي جانچاۋ ماجىلىسكە قاتىناستى.
نىلقى اۋدانى بۇكىل ەلگە ايگىلى قارا ارا بالىن وندىرەتىن نەگىزگى رايون، سونداي ـ اق مەملەكەتتىك قارا ارا تۇقىمىن قورعاۋ بازاسى جانە اۆتونوميالى رايوننىڭ قارا ارانى ولشەمدەندىرىپ باعۋدان ۇلگى كورسەتۋ بازاسى. سوڭعى جىلداردان بەرى، نىلقى اۋدانى ارا كاسىبىن سۇرىپتاۋدى، ارا ونىمدەرىنىڭ جوعارى ورەلىلەنۋىن، ارا كاسىبىنىڭ دامۋىن كوپ نەگىزدەندىرۋدى قامال الۋ ٴتۇيىنى ەتۋگە تاباندى بولىپ، مەملەكەت دارەجەلى شينجياڭ قارا اراسىنىڭ تۇقىمىن قورعاۋ فەرماسىن سۇيەنىش ەتىپ، قارا ارا كاسىبىنىڭ ولشەمدەنۋىن، كولەمدەنۋىن، كاسىپ سالالانۋىن زور كۇشپەن ىلگەرىلەتكەندىكتەن، قارا ارا كاسىپ سالاسىنىڭ دامۋ ونىمدىلىگى كورنەكتى بولدى.
اشىلۋ سالتىندا بۇكىل ەلدىڭ جەر - جەرىنەن كەلگەن جۇلدىزدار كەزەك - كەزەك ساحناعا شىعىپ، ٴان - ٴبي، سەرىك ويىنى، وركەستىر ارقىلى ورتانى قىزدىردى. ەرەكشە جاسامپازدىققا يە جانە ادامدارعا ەستەتيكالىق اسەر بەرەتىن ۇشۋ اپاراتتارمەن ونەر كورسەتۋ كورەرمەندەردى تاڭ قالدىردى، ”سىرلى موڭكىتى“، ”تيانشان سالمون بالىعى“، ”قارا ارا“ سياقتى نىلقى ەرەكشەلىگىنە يە كورىنىس سۋرەتتەر ۇزدىكسىز كورسەتىلىپ، كەڭىستىكتە كەرەمەت ونەر كورسەتىپ، ”ٴشاربات نىلقى، قونىستانۋعا قولايلى، كۇتىمدەلۋگە تاماشا قالا“ كەلبەتىن ايگىلەدى.
جەرگىلىكتى ورىنداعى كوپتەگەن تۇرعىندار دا وتباسىنداعىلاردى اتتانىسقا كەلتىرىپ، وسى رەتكى اتا مەكەندى جىرلاعان ساليقالى سالتاناتتى كورۋگە جىبەردى. نىلقى قالاشىعى 6 ـ الەۋمەتتىك اۋماعىنىڭ تۇرعىنى جانقابىل سەيت ۇلى بىلاي دەدى: ”بىرنەشە كەزەك بال اراسى مادەنيەت - ساياحات مەرەكەسىن تاماشالادىم، بىرىنەن - ٴبىرى وتەدى، بۇگىنگى اشىلۋ سالتىن وتباسىمىزداعىلار تۇگەل كەلىپ تاماشالاپ جاتىرمىز، وتە كەرەمەت“.
جياڭسۋدان كەلگەن ساياحاتشى جوۋ حۋا اشىلۋ سالتىن كورگەننەن كەيىن بىلاي دەدى: ”نىلقىعا تۇڭعىش كەلۋىم، ٴشاربات دەسە دەگەندەي ەكەن. بۇگىن باستالۋ سالتىنىڭ نومىرلەرى وتە تارتىمدى بولدى، كورەرمەندەر دە وتە كوپ، بۇل اراداعى بۇقارانىڭ ٴوز مەكەنىن قىزۋ سۇيەتىندىگىن، اتا مەكەنى ٴۇشىن ماقتاناتىندىعىن بايقادىم“.
ۇعىسۋعا قاراعاندا، وسى كەزەكتى بال اراسى مادەنيەت - ساياحات مەرەكەسى كەزىندە تاعى ”بال ەستەمەسى“ ٴدامدى تاعامدارى، عاجايىپ تاستار، تامىر ويما كوركەمونەر كورمەسى، سونداي - اق ”مىڭ جىلدىق بايىرعى جولعا ساپار“ اتىنداعى 100 دالالىق اۆتوموبيلمەن موڭكىتى بايىرعى جولىن كەسىپ ٴوتۋ قيمىلىن ورىستەتەدى ەكەن.
كونسەرتتەن كورىنىس سۇن ي - نان فوتوسى