”ساياحات − دوستىق قارىم - قاتىناس ورناتۋدىڭ ەڭ جاقسى ٴتاسىلى“

− شاڭحاي سەلبەستىك ۇيىمى ۋاكىلدەر ۇيىرمەسىندەگىلەر ”ىرىستى مەكەننىڭ“ مول جاراتىلىستىق، گۋمانيتارلىق ساياحات بايلىعىن سەزىندى

گازەتىمىزدىڭ حابارى 11 - ايدىڭ 25 - كۇنى ٴۇرىمجى قالاسىندا شاڭحاي سەلبەستىك ۇيىمى 2023 - جىلدىق ساياحات جىلى تالقى مىنبەرىنىڭ نەگىزگى تالقى مىنبەرىنە قاتىناسىپ بولعان يران، تاجىكستان ۋاكىلدەر ۇيىرمەسىندەگىلەر قورعاس شەكارا وتكەلى، چاپچال سىبە اۆتونوميالى اۋدانىنىڭ سىبە بايىرعى قالاشىعى، قۇلجا قالاسى التىشۋار كوشەسى سياقتى جەرلەردى ارالاپ، ”ىرىستى مەكەننىڭ“ مول جاراتىلىستىق، گۋمانيتارلىق ساياحات بايلىعىن سەزىندى.

”بۇل − ەستەن كەتپەس كەشىرمە“. يران ساياحات بازارى مەكەمەسىنىڭ باس مەكەمە باستىعى مۋسليم شاجاري جۇڭگوعا 5 رەت ساپارلاي كەلگەن بولسا دا، شينجياڭعا تۇڭعىش رەت قادام تاستادى، ”مۇندا كەلگەن بويدا جەرگىلىكتى حالىقتىڭ قوناعۋارلىعىنا ٴتانتى بولدىم. ساياحاتتاۋ مەن ساياحات دوستىق قارىم - قاتىناس ورناتۋدىڭ ەڭ جاقسى ٴتاسىلى، ادامدار ەشقانداي اقپارات قۇرالىنسىز ٴبىر - ٴبىرىن تانىپ، سەزىنە الادى“. 

ىلە قازاق اۆتونوميالى وبلىسى ىلە وزەنىنىڭ اتىمەن اتالعان، مۇندا كەڭ بايتاق ساحارا، قالىڭ ورمان، اساۋ وزەندەر مەن كوگىلدىر كولدەر، بيىك قارلى شىڭدار بار، ٴار ۇلت حالقى مول تاريح پەن مادەنيەتتى بىرگە جاراتقان، بۇل شينجياڭنىڭ، ٴتىپتى، جۇڭگونىڭ ساياحات بايلىعى ەڭ مول وڭىرلەرىنىڭ ٴبىرى.

حاتكەرلىك، سۋرەت وقىتۋشىسى لي مەي قورعاس قالالىق جۇڭگو مادەنيەت سارايىنىڭ ەرىكتىسى، ونىڭ قالامىنان تۋىنداعان ادەمى دە ومىرشەڭ جىلانقياق گۇلى يران ساياحات سەرىكتەستىگىنىڭ مەڭگەرۋشىسى ماحشيد زادحراياتتى وزىنە باۋرادى. حانزۋدىڭ ۇلتتىق كيىمىن كيگەن لي مەي يراندىق سيلى قوناقتارعا جىلانقياق گۇلى جۇڭگودا ارداگەرلەردىڭ سيمۆولى، قايسارلىق، اشىقتىق، تالعامپازدىق پەن تاباندىلىقتى بىلدىرەتىنىن ايتتى. زادحراياتتىڭ ونىڭ سۋرەتتەرىن قاتتى ۇناتقانىن بايقاپ، وعان ەستەلىك رەتىندە تارتۋ ەتتى.

”يران مەن جۇڭگو شينجياڭىنىڭ ساياحات بايلىعى مول، حالقى مەيماندوس، ەكى جەردىڭ اۋىس - كۇيىسىن سوناۋ بايىرعى جىبەك جولىنان باستاۋعا بولادى. بۇگىن ٴۇرىمجى مەن تەھران اراسىندا اپتاسىنا 4 كەزەك توتە ۇشاتىن كەزەكشى ۇشاق قاتىناپ، ەكى جەردەگى حالىقتىڭ ٴوزارا بارىس - كەلىسىنە بارىنشا قولايلى بولدى. ەكى جەردىڭ سەلبەستىكتى كۇشەيتىپ، ساياحات بايلىعىنىڭ كومەسكى كۇشىن ىشكەرىلەي اشىپ، ساياحات كاسىبىن زورايتۋىن ٴۇمىت ەتەمىن“ دەدى مۋسليم شاجاري.

قۇلجا قالاسى التىشۋار كوشەسىندەگى الەكساندر گارمون مۇراجايىندا اسقاق ٴان اۋەنى مەن سازدى گارمون ٴۇنى سول جەردەگى سيلى قوناقتاردى اسەرلەندىردى، تاجىكستاننان كەلگەن سايمين بوزوروۆ ەرىكسىز ساحناعا شىعىپ، گارموندى الىپ قوناقتارعا حالىق ٴانىن شىرقاپ بەردى. ”شينجياڭ حالقى ٴان مەن بيگە اۋەس، مەيماندوس، ٴبىر كۇن ۋاقىت تىم قىسقا بولىپ قالدى. جۇڭگو مەن تاجىكستان ەكى ەلدىڭ اناعۇرلىم كوپ گۋمانيتارلىق اۋىس ـ كۇيىس جاساپ، تاجىكستان حالقىنىڭ شينجياڭعا كوبىرەك كەلىپ، شينجياڭدى سەزىنۋىنە مۇمكىندىك جاساۋىن ٴۇمىت ەتەمىن“.

سوڭعى جىلدارى شينجياڭ ىلە دۇنيە جۇزىلىك ساياحات نىسانالى جەرىن قۇرۋدى نىسانا ەتىپ، ساياحات ارقىلى شينجياڭدى گۇلدەندىرۋدى كۇش سالا ىلگەرىلەتىپ، مادەنيەت پەن ساياحاتتىڭ ىشكەرىلەي توعىسۋىن بەلسەنە جەبەپ، جىبەك جولى دەنە تاربيە جارىسى ساياحاتى، تيانشان دۇنيە جۇزىلىك جاراتىلىستىق مۇرا ٴدالىزى ساياحاتى، جۇڭگو - ەۆروپا جەكە كولىكپەن ساياحاتتاۋ سياقتى شەكارا اتتاعان ٴبىر توپ ساياحات سارا جەلىسىن كۇش سالا اشىپ، ٴبىر توپ مەملەكەت دارەجەلى، دۇنيە جۇزىلىك ساياحات ماركاسىن كۇش سالا سومداپ، ساياحات كاسىبىن سىرتقا باعىتتالعان اۋىس - كۇيىستى كەڭەيتەتىن، حالىقتى اۋقاتتاندىرىپ، كىرىستى ارتتىراتىن تاماشا كاسىپ سالاسىنا اينالدىرىپ، ىلەنى شاڭحاي سەلبەستىك ۇيىمىنا مۇشە ەلدەر اراسىنداعى بارىس - كەلىستىڭ، اۋىس - كۇيىستىڭ تيپتىك جەرىنە جانە وبراز تەرەزەسىنە اينالدىرۋ كەرەك.

2023 - جىلى 1 - ايدان 10 - ايعا دەيىن ىلە 67 ميلليون 186 مىڭ ادام - رەت ساياحاتشى قابىلداپ، وتكەن جىلدىڭ ۇقساس مەزگىلىندەگىدەن %84.8 ارتىپ، ساياحات كىرىسى 45 ميلليارد 430 ميلليون يۋانعا جەتىپ، وتكەن جىلدىڭ ۇقساس مەزگىلىندەگىدەن %134.9 ارتقان.

”بۇل مەنىڭ شينجياڭعا تۇڭعىش رەت كەلۋىم، شينجياڭنىڭ وسىنشاما وسىزاماندانعان، دامىعان جەر ەكەنىن ويلاپ كورمەپپىن، مەن تاعى كەلەمىن، تاعى كەلەمىن“ دەدى تاجىكستان دييا ساياحات شەكتى جاۋاپكەرشىلىك سەرىكتەستىگىنىڭ مەڭگەرۋشىسى يبىرايم زوكيروۆ. ول بىلاي دەدى: ”شينجياڭدى ارالاپ، اناعۇرلىم كوپ سەلبەستىك ورايى مەن سەلبەستىك سەرىكتەرىن قاراستىرىپ، ساياحات جەلىسىن بىرگە اشىپ، ساياحات كاسىپ سالاسىنىڭ گۇلدەنۋىن بىرگە جەبەۋدى ٴۇمىت ەتەمىن“.

سۋرەتتە: قورعاس قالالىق جۇڭگو مادەنيەت سارايىندا حاتكەرلىك، سۋرەت وقىتۋشىسى لي مەي ٴوزىنىڭ جىلانقياق گۇلى سۋرەتىن يراندىق سيلى قوناققا تارتۋ ەتتى.      

      سۋرەتتى شينجياڭ گازەتىنىڭ ٴتىلشىسى حوۋ ۋيلي تۇسىرگەن 

انار بۇلتتان الىندى