伊犁新闻网

حابارىن جازىپ، سۋرەتتەرىن تۇسىرگەن تىلشىلەرىمىز ليۋ چىڭگاڭ، حان شاشا

12 - ايدىڭ 16 - كۇنى ىلە وبلىسىنىڭ 18 - كەزەكتى ”اق قارعا ماحاببات“ اتىنداعى قار - مۇز مادەنيەت - ساياحات مەرەكەسى جانە نارات حالىقارالىق قار شاڭعى سەيىل - سەرۋەن رايونىنىڭ ساۋدا باستاۋ سالتى اق قارمەن قىمتانعان اسەم ناراتتا سالتاناتپەن باستالدى.

ٴتىلشى نارات ساياحات كورىنىس وڭىرىنە ات باسىن بۇرىپ، اق قار، كوك مۇز قۇرسانعان وسىناۋ قىسقى اقوزەن جايلاۋىنىڭ تارتىمدىلىعىنان كوزايىم بولدى. اشىلۋ سالتىندا ٴان ـ ٴبي كونسەرتىنەن سىرت، ٴتۇرلى ۇلتتىق سالت ـ سانا مادەنيەتى قار ـ مۇز نەگىزگى تاقىرىبىمەن توعىستىرىلىپ، قار ويما مۇسىندەرىن تاماشالاۋ، قار كورىنىسىنەن ٴلازاتتانۋ، قارلى دالاداعى بالۋان جارىسىن تاماشالاۋ، قارلى دالاداعى ويىن تۇرلەرى بويىنشا كوڭىل اشۋ، كوركەمونەر كونسەرتتەرىن كورۋگە ۇلاستى.

جياڭسۋدان كەلگەن ساياحاتشى لي لۇڭ فوتو اپپاراتىمەن اينالاداعى كورىنىستەردى قاعىس قالدىرماي كەسكىنگە الىپ، سۋرەتكە ٴتۇسىردى. ول بىلاي دەدى: ”ناراتتىڭ قار ـ مۇز كورىنىسى شىنىندا كوز سۇرىندىرەدى ەكەن، بىلتىر جازدا نارات ساحاراسىندا ٴبىر اپتا ەرۋ بولىپ، توتىداي تۇرلەنگەن ناراتتىڭ تاماشا كورىنىسىنە تامسانىپ قايتقان ەدىم“.

سىچۋاندىق ساياحاتشى گوۋ لين تەبىرەنە بىلاي دەدى: ”ٴبىز شوعىردان اشىلۋ سالتىنان حابارلى بولعانبىز، مىنە بۇگىن قار - مۇزداعى سپورتشىلاردىڭ ويىنىن، ات بايگەسىن، قارلى دالاداعى موتوتسيكل جۇرگىزۋدى كوردىك. سپورتشىلار مەملەكەت تۋىن الىپ ەڭىسكە قاراي سىرعاناعاندا، كوڭىلىم تولقىپ، جىگەرىم تاسقىندادى. وسى جولى وزگەشە قىسقى دالانىڭ سۇلۋلىعىن سەزىندىم“.

قيمىل الاڭىنداعى ەرەكشە اۋىل شارۋاشىلىق ونىمدەرى جارمەنكەسى كوزدىڭ جاۋىن الادى. مۇندا قويىلعان جۇپار ٴشوپ، سۇرلەنگەن سيىر ەتى، كۇرىش، بال، تۇيە ٴسۇتى تالقانى سياقتى اۋىل شارۋاشىلىق ەرەكشە ونىمدەرىن تۇتىنۋشىلار ناق مايداندا تاتىپ كورىپ، ساتىپ الدى.

وسى رەتكى قار ـ مۇز ساياحاتىن وراي ەتكەن ىلە وبلىسىنداعى 50 نەشە كاسىپورىن 230 نەشە ٴتۇرلى ٴونىمىن جارمەنكەگە اپاردى. جارمەنكەدەگى اۋىس - كۇيىس تەكشەسى ساياحاتشىلاردىڭ كۇنەس اۋدانىنىڭ ەرەكشە اۋىل شارۋاشىلىق ونىمدەرىن ٴتىپتى دە تىكەلەي، شىنايى تۇسىنۋىنە مۇمكىندىك جاساپ قانا قويماي، جەلىدە، جەلىدەن تىس تاسىلمەن ساتىپ الۋىنا، ىلەنىڭ ايگىلى، ساپالى، ەرەكشە ونىمدەرىن شينجياڭنان شىعارىپ، بۇكىل ەلگە بەت الدىرۋىنا، ىلە وبلىسى ەكونوميكاسىنىڭ جوعارى ساپالى دامۋىنا ۇلەس قوسۋىنا مۇمكىندىك جاسادى.

”ىلە وبلىسى قىسقى ساياحات بارىسىندا 30 نەشە ٴتۇرلى قار ـ مۇز ساياحاتى قيمىلىن وتكىزدى، مۇنىڭ ىشىندە ىلە وزەنى اڭعارىنداعى حالىقارالىق مۇز - شىراق مەرەكەسى، تەكەس شىڭشىحۋاجياڭ . جيۋگۇڭچىڭ ساياحات باقشاسى نىسانى، تۇڭعىش كەزەكتى تۇلپار قار ـ مۇز ساياحات مەرەكەسى سياقتىلارمەن ساياحاتشىلارعا تاماشا قار ـ مۇز ساياحاتى مەن ۇلتتىق سالت ـ سانا مادەنيەتىن سەزىندىرىپ، ولاردىڭ اناعۇرلىم مول قاجەتىن قاناعاتتاندىرىپ، قىسقى مادەنيەت ـ ساياحات كاسىبىنىڭ دامۋ ٴورىسىن ۇزدىكسىز كەڭەيتەدى“ دەدى ىلە وبلىستىق مادەنيەت ـ ساياحات مەكەمەسى ۇگىتتەۋ، جالپىلاستىرۋ جانە جەبەۋ باسقارماسىنىڭ كادرى ۋاڭ ۋي.

اشىلۋ سالتىنداعى مەملەكەت تۋى شارشى توبى

اۆتونوميالى رايوندىق اسقار تاۋ قار شاڭعى جاتتىعۋ بازاسىنىڭ، اۆتونوميالى رايوندىق جاستار مەن ورەندەردىڭ جوعارى ساپالى جاتتىعۋ بازاسىنىڭ (دالالىق شاڭعى) ماڭدايشالىق اشۋ سالتى