伊犁新闻网

− قۇلجا، كۇنەس اۋداندارىنىڭ ورىك گۇلى مادەنيەت - ساياحات مەرەكەسىن قۇتتىقتاۋ قيمىلى تارتىمدى بولدى

ٴوز تىلشىلەرىمىز لاي يۇينيڭ، جاڭ چيڭحۋا، حان شاشا

ٴار جىلى 4 - ايدا ىلە وزەنى اڭعارىنداعى قۇلجا، كۇنەس، قورعاس اۋداندارىندا ورىك گۇلى جاپپاي اشىلىپ، قىزىل، كۇلگىن، اق ٴتۇستى گۇلدەرمەن بايتاق ىلە اسەم تۇسكە ەنەدى. جايناعان گۇلدەر ٴوز ورتاسىنا كوركەمدىك سيلاۋمەن بىرگە، ادامدارعا كوڭىلدىلىك الا كەلەدى.

4 ـ ايدىڭ 3 ـ كۇنى كەشتە قۇلجا اۋدانىنىڭ 13 ـ كەزەكتى شينجياڭ. ىلە ورىك گۇلى مادەنيەت ـ ساياحات مەرەكەسى جانە ”عالامات قۇلجا، جاراسىمدى دا كورىكتى ورىك مەكەنى“ اتىنداعى كوكتەمگى مادەنيەت - ساياحات مەرەكەسى قيمىلى چيڭحۋا ورىك باقشاسىندا رەسمي باستالدى، بيىلعى ورىك گۇلى مەرەكەسى كەزىندە باي مازمۇندى جەلىلەس قيمىلدار 6 ـ ايعا دەيىن جالعاسادى.

4 ـ ايدىڭ 5 ـ كۇنى 15 ـ كەزەكتى جۇڭگو كۇنەس . نارات ورىك گۇلى مادەنيەت - ساياحات ماۋسىمى جەلىلەس قيمىلىنىڭ اشىلۋ سالتىندا، ”كوكتوعايداعى شوپان جىرى“، ”الما ٴيىسى“ اندەرى مەن ”ورىك گۇلى جاڭبىرى“ سياقتى ٴبي نومىرلەرى كورەرمەندەر مەن جەر ـ جەردەن كەلگەن ساياحاتشىلارعا نارات ورىك گۇلى اڭعارىنىڭ وزگەشە تارتىمدىلىعىن بارىنشا سەزىندىردى.

گۇل دە، ٴبي دە، قيمىل دا بار

وسى رەتكى ورىك گۇلى مەرەكەسى كەزىندە، قۇلجا اۋدانى مۋزيكا ساۋىعى، قولونەر بۇيىمدارى جانە بەيزاتتىق مادەنيەت مۇرا ونىمدەرى كورمەسى، ايگىلى، ەرەكشە اۋىل شارۋاشىلىق قوسىمشا ونىمدەرىن تىكە تاراتىلىمدا ساتۋ جارمەنكەسى، مىڭ وقۋشىنىڭ جۇڭحۋانىڭ ٴداستۇرلى جول ـ جوسىنىن الۋان ٴتۇرلى تاسىلمەن ورىنداۋ قيمىلى؛ قوراز تالاستىرۋ، قوشقار ٴسۇزىستىرۋ، كەپتەر ويناتۋ سياقتى ٴبىرقىدىرۋ قىزىقتى ۇلتتىق سالت ـ سانا ويىندارى؛ گۇلدى القاپتاعى اينالمالى ۆەلوسيپەد جارىسى سياقتى دەنە تاربيە جارىستارى وتكىزىلۋمەن بىرگە، ورىك گۇلىن دانەكەر ەتىپ، وسى اۋداننىڭ مول مادەنيەت - ساياحات بايلىعىن زور كۇشپەن ۇگىتتەپ، تۇتاس اۋداننىڭ مادەنيەت ساياحاتىنىڭ داڭقىن اسىرادى.

نارات ورىك گۇلى اڭعارى كورىنىس ٴوڭىرىنىڭ تومەن كەڭىستىكتە تىكۇشاقپان ساياحاتتاۋ نىسانى ىسكە قوسىلعاندىقتان، بۇل جەردى كورۋگە كەلگەن ساياحاتشىلاردىڭ مولايۋىنا ىلەسە، وسى ورىك گۇلى اڭعارىندا تاۋار كورمەسى، مەملەكەتتىك فوتوسۋرەت باسەكەسى سياقتى 15 كە تارتا قيمىل وتكىزىلىپ، ساياحاتشىلارعا گۇل تاماشالاۋ، ساياحاتتاۋ، اس ـ سۋ، زات ساتىپ الۋ، قوناق ٴۇي، دالا سەرۋەنى جاقتارىندا ويداعىداي مۇمكىندىكتەر ازىرلەيدى.

ساياحاتشىلار گۇل تاماشالاپ، سەيىل ـ سەرۋەن قۇرادى

ٴار جىلى 3 ـ ايدىڭ سوڭىنان باستاپ، شاڭحاي، گۋاڭدۇڭ، جىجياڭ سياقتى جەرلەردىڭ ساياحاتشىلارى ات باسىن ىلەگە بۇرىپ، نارات ورىك گۇلى اڭعارىندا ورىك گۇلىنىڭ كوركەم كورىنىسىن تاماشالاپ، ادەمى ورىك گۇلىنەن تاماشا فوتو سۋرەتتەر تۇسىرەدى.

شاڭحايلىق ساياحاتشى لي نا بىلاي دەدى: ”ورىك گۇلى اڭعارىنا تۇڭعىش كەلۋىم، ۇلتتىق كيىم ـ كەشەكتەر ەرەكشە ادەمى ەكەن، ماعان بۇل ارانىڭ ۇلتتىق ەرەكشەلىگى ەرەسەن ۇنادى“.

قىستاق تۇرعىندارى ساياحات جەتەكشىسىنە اينالدى

نارات ورىك گۇلى اڭعارى بۇكىل ەلدىڭ جەر ـ جەرىندەگى ساياحاتشىلاردى باۋراۋمەن بىرگە، جەرگىلىكتى ورىنداعى ەگىنشى ـ مالشىلاردىڭ كىرىسىن ارتتىرىپ، اۋقاتتانۋىنداعى ”ساياحات ماركاسىنا“ اينالدى. قازىرگىدەي ورىك گۇلى قۇلپىرا اشىلعان كەزدە، تۇرگەن اۋىلى قاراوي قىستاعىنداعى باسىم كوپ ساندى قىستاق تۇرعىنى اسپاز، ساياحات جەتەكشىسى، قىزمەت وتەۋشى سياقتى جۇمىستاردى ىستەپ، قاربالاس كۇيگە ٴتۇستى. قىستاق تۇرعىنى ازات نۇرسۇلتان ۇلى ٴوز ۇيىندە ”شارۋالار شاتتىعى ساياجايىن“ اشىپ، ساياحاتشىلاردى قابىلداپ، ٴار جىلعى كىرىسىن 10 دا 20 مىڭ يۋان ارتتىرادى.

كۇنەس اۋدانى ”ساياحات ارقىلى اۋداندى گۇلدەندىرۋ“ ستراتەگياسىن كۇش سالا اتقارىپ، باي مازمۇندى، الۋان ٴتۇرلى ساياحات بايلىعىنا، توڭىرەكتىڭ ٴتورت بۇرىشىنا تۇتاسىپ جاتقان وڭىرلىك ورىن ابزالدىعىنا، قاراپايىم دا مازمۇندى مادەنيەت مايەگىنە جانە جانعا جايلى كليمات شارت ـ جاعدايىنا سۇيەنىپ، ساياحاتتىڭ جالپىلىق قۋاتىن ۇزدىكسىز جوعارىلاتتى. جالپى وڭىرلىك، جالپى حالىقتىق، جالپى ۋاقىت تانىمىندىق ساياحاتتى دامىتۋدى باعدار ەتىپ، الەۋمەتتىك قىزمەت وتەۋ جۇيەسىن ۇزدىكسىز اقاۋسىزداندىرىپ، ساياحات كاسىبىنىڭ دامۋ دەڭگەيىن جوعارىلاتىپ، كۇنەس ٴوڭىرىنىڭ وبرازىن جاپپاي جوعارىلاتىپ، ’شينجياڭ جاقسى جەر . ىلە كوركەم جەر‘ ساياحات تانىسقىسىن اسقاقتاتامىز“ - دەدى كۇنەس اۋداندىق پارتكومنىڭ ورىنباسار شۋجيى، اۋدان اكىمى راحىم امىرە ۇلى.

骑马的游客在那拉提杏花谷观赏杏花_2.jpg