ساياحاتشىلار اتقا ٴمىنىپ ورىك گۇلىن تاماشالاۋدا.     حان شاشا فوتوسى

ٴتىلشىمىز حان شاشا، ەرىكتى ٴتىلشى حۋاي جيچاۋ، فىڭ مىڭياۋ حابارلايدى. 4 ـ ايدىڭ 13 ـ كۇنى ٴتىلشى كۇنەس اۋدانى نارات ورىك گۇلى اڭعارى كورىنىس رايونىنان شينجياڭنىڭ ٴىشى ـ سىرتىنان كەلگەن ساياحاتشلاردىڭ وسى ارادا جينالىپ، كاسىپتىك ات اترەتىندەگىلەردىڭ ٴبىر ـ بىرلەپ قىزمەت وتەۋىندە اتقا ٴمىنىپ كورىنىس تاماشالاپ، وزگەشە ساياحات كەشىرمەلەرىن سەزىنگەنىن كوردى. 

نارات ورىك گۇلى اڭعارىنداعى بايىرعى جابايى ورىك ورمانىندا ورىك گۇلى جايقالا اشىلىپ، تاۋ بوكتەرىن تۇمان باسقان، بيىكتە تۇرىپ الىسقا كوز سالساڭىز، اق، قىزعىلت، كۇلگىن تۇستەگى ورىك گۇلدەرى تاۋ بوكتەرىن كومكەرىپ، جوتا - جوندارعا جالعاسىپ، بىرنەشە ون كيلومەترگە سوزىلىپ، تاۋ اڭعارىن بەينە قاس تاسىمەن اشەكەيلەنگەن بالالار ەرتەگىلەرىندەگى دۇنيەگە اينالدىرىپ جىبەرگەندەي كورىنەدى.

”بۇنداعى بايىرعى جابايى ورىك ورمانىنىڭ يەلەگەن جەر اۋماعى 30 مىڭ مۋدان استام بولىپ، تاۋ بوكتەرىنەن ساي تاعانىنا دەيىن جابايى ورىك اعاشى قاۋلاي وسكەن، قازىر مەملەكەت بويىنشا AAA دارەجەلى كورىنىس ٴوڭىرى ەسەپتەلىنەدى“. نارات ورىك گۇلى اڭعارى ات اترەتىنىڭ جاۋاپتىسى جانات نۇرگىميڭ ۇلى ساياحاتشىلارعا: ”اتقا ٴمىنىپ ساياحاتتاتۋدان تىس، ات اترەتىندەگىلەر ساياحاتشىلارعا جول باستاۋ قىزمەتىن وتەيدى، ساياحاتشىلارعا ورىك گۇلى اڭعارىنىڭ كوركەم كورىنىسىن تاماشالاتىپ، ساحارانىڭ تاريحى مەن مادەنيەت حيكاياسىن ايتىپ بەرەدى. ساياحاتشىلار تابيعاتپەن تىعىز جاناسىپ، نارات ورىك گۇلى اڭعارىنىڭ ٴتىلسىم سىرىن تەرەڭ سەزىنە الادى“ دەپ تانىستىردى.

”ىلەگە تۇڭعىش رەت كەلىپ، سايىن ساحارانىڭ كەڭ بايتاق كەلبەتىن سەزىندىم، تۇڭعىش رەت اتقا ٴمىنىپ تاۋعا شىققاندىقتان، ٴبىراز ۇيىرلەسە المادىم. كەلەسى جولى كەلگەندە اتقا ٴوزىم ٴمىنىپ، قامشى باسىپ كەڭ ساحارادا قۇيعىتامىن“ دەدى جياڭسۋلىق ساياحاتشى ۋاڭ تيانچىن. 

كورىنىس رايونىندا اتقا ٴمىنىپ سەيىل - سەرۋەن قۇرۋ ادامدى جەلپىندىرەتىن تاڭسىق ارەكەت بولىپ قالماستان، قازاق ۇلتىنىڭ كوشپەندى تۇرمىسىن دا شىنايى سەزىنۋگە بولادى، سوندىقتان، نارات ورىك گۇلى اڭعارىندا اتقا ٴمىنۋ نىسانى سىرت جەرلەردەن كەلگەن ساياحاتشىلاردىڭ قارسى الۋىنا يە بولۋدا، سونىمەن بىرگە، ات اترەتى دە جەرگىلىكتى ساياحات كاسىبىنىڭ قىزمەت وتەۋ ساپاسى مەن دەڭگەيىن بارىنشا جوعارىلاتۋدا.

”اتقا ٴمىنۋ، اعاشتان جاسالعان شارباق جولىمەن ٴجۇرۋ ادامعا ۇقساماعان سەزىم سيلايدى. اتقا مىنسەڭ سالقىن سامال مەن ەركىندىكتى سەزىنىپ كوڭىلدەنىپ قالاسىڭ، مىنە بۇل ساياحاتتىڭ ٴمانى، بۇل ساپاردى بوسقا وتكىزبەۋ كەرەك“ دەدى ۇرىمجىلىك ساياحاتشى لي حۋانحۋان.

نارات ورىك گۇلى كورىنىس رايونىنىڭ ات اترەتى جەرگىلىكتى قىستاق تۇرعىندارىن مول پايداعا كەنەلتتى، قىستاق تۇرعىندارى اتقا مىنۋگە كەلگەندە تاجىريبەلى، ولار ابدەن جۋاسىتىلعان اتتارىن ەرتتەپ ٴمىنىپ، كورىنىس رايونىنا بارىپ اتقا مىنەتىن ساياحاتشىلارعا قىزمەت وتەيدى، مۇنىڭ وزىندىك قۇنى تومەن، كىرىسى دە جاقسى.

”بيىل ورىك گۇلى اڭعارىندا ساياحات ماۋسىمى باستالعاندا كورىنىس رايونىندا اتىمدى جەتەلەپ الىپ، ساياحاتشىلاردى ات مىنۋگە باۋراپ، كۇنىنە مولشەرمەن 600 يۋان اينالاسىندا كىرىس تاپتىم“ دەدى كۇنەس اۋدانى تۇرگەن اۋىلى قارا وي قىستاعىنىڭ تۇرعىنى باتىل ايبار ۇلى قۋانا.

جانات نۇرگىميڭ ۇلى بىلاي دەپ تانىستىردى: ”قازىر ات اترەتىندە 70 ات، 70 ادام بار، بارلىعى جەرگىلىكتى قىستاق تۇرعىنى، ٴبىز ٴبىر تۇتاس تاربيەلەۋ ارقىلى ساياحاتشىلارعا ٴبىر - بىردەن قىزمەت وتەپ، ساياحاتشىلاردىڭ حاۋىپسىزدىگىنە كەپىلدىك ەتىپ، ولاردىڭ كوڭىلدى كەلىپ، كوڭىلدى قايتۋىنا مۇمكىندىك جاسايمىز. ساياحاتتىڭ قاۋىرت مەزگىلىندە ٴبىر اتپەن 15 مىڭ يۋاننان جوعارى كىرىس كىرگىزۋگە بولادى“.