ىلە وسىمدىك باقشاسىنىڭ 3 - كەزەكتى ”مۋدان گۇلى مەرەكەسى“ باستالدى

ساياحاتشىلار گۇل القابى سالتاناتىنان كوزايىم بولدى

ەرىكتى تىلشىلەر ليۋ نيڭنيڭ،  حو رۇڭ حابارلايدى.  ىلە وسىمدىك باقشاسىنىڭ 3 - كەزەكتى ”مۋدان گۇلى مەرەكەسى“ 5 - ايدىڭ 12 - كۇنى باستالدى.

جاز باسىنداعى وسى سالتاناتتى جينالىس كوپتەگەن ساياحاتشىنى مۋدان گۇلىنىڭ قۇلپىرا اشىلعان كوركىن تاماشالاۋعا باۋرادى. وتكىزۋشى جاقتىڭ تانىسـتىرۋىـنا قاراعاندا، مۋدان گۇلى مەرەكەسى 5 - ايدىڭ سوڭىنا دەيىن جالعاسادى ەكەن.

مامىر ايىندا ٴتۇرلى گۇلدەر قۇلپىرا اشىلادى، مۇنىڭ ىشىندە مۋدان گۇلىنىڭ اشىلۋى وزگەشە بولادى. بۇل كەزدە ىلە وسىمدىك باقشاسىنداعى مۋدان گۇلى جامىراي اشىلىپ، ٴتۇرلى سورتتاعى، ٴتۇرلى تۇستەگى مۋدان گۇلدەرى گۇلدى القاپقا اينالادى. مۇندا ساياحاتشىلار گۇل تاماشالاۋدان سىرت، مول ىقپالداستىق قيمىلدارعا قاتىناسۋ ورايىنا يە بولادى، ايتالىق، مۋدان گۇلىنە قاتىستى بىلىمدەر جونىندە سيلىقتى سۇراۋ ـ جاۋاپتار، وسىمدىك باقشاسى عىلىم ـ تەحنيكا جالپىلاستىرۋ سارايىن تەگىن ەكسكۋرسيالاۋ سياقتى جەلىلەس قيمىلدار ساياحاتشىلاردىڭ ات سالىسۋ ىنتاسىن كۇشەيتىپ قالماستان، مۋدان گۇلىنە قاتىستى مادەنيەتتى دە ونان ارى تاراتادى.

جەرگىلىكتى ساياحاتشى ليۋ دۇڭمەي بىلاي دەدى: ”بۇگىن اپتا سوڭى، دوستارىممەن بىرگە وسىندا كەلىپ كوڭىل كوتەرىپ، كوپتەگەن سۋرەت تۇسىردىك، گۇلدەر شىنىندا قۇلپىرا اشىلعان ەكەن، كوركەم كورىنىستەردى تاماشالادىق، بۇگىن ەرەكشە ٴماندى كۇن بولدى“ دەدى.

ساياحاتشىلاردى ونان ارى باۋراۋ ٴۇشىن وسىمدىك باقشاسى جەرگىلىكتى كوركەمونەر ۇيىرمەلەرىن ۇسىنىس ەتىپ، ۇلتتىق ەرەكشەلىككە يە ٴبي، وسى زامان ٴبيى سياقتىلاردى ورىنداتىپ، ساياحاتشىلارعا مۋدان گۇلىن تاماشالاۋمەن بىرگە، قويۋ جەرگىلىكتى مادەنيەت ورتاسىن سەزىندىردى.

وسى كەزەكتى ”مۋدان گۇلى مەرەكەسىنىڭ“ وتكىزىلۋى ساياحاتشىلاردىڭ مۋدان گۇلىنىڭ باۋراعىشتىعىن جاقىن ارالىقتان سەزىنۋىنە مۇمكىندىك جاساپ قانا قويماي، ىلە وسىمدىك باقشاسىنىڭ كوپ جىلدان بەرگى وسىمدىكتەردى قورعاۋ جانە باۋ - باقشا زەرتتەۋ جاعىنداعى جەتىستىكتەرىن دە شوعىرلى ايگىلەدى.

ىلە وسىمدىك باقشاسىنىڭ سورتتى تۇقىم ەنگىزۋ، جەتىلدىرۋ كاسىبىنىڭ جاۋاپتىسى سۇڭ يۇيحاۋ بىلاي دەدى: ”ىلە وسىمدىك باقشاسى جيناپ باپتاعان وسىمدىك ٴبىر مىڭ 200 تۇردەن اسادى، تاماشالاۋ سيپاتتى گۇلدەن 100 دەن استامى بار، وسى بىرنەشە جىلدا ىشكى ولكەلەردەن ٴتۇرلى نۇسقاداعى، ٴتۇرلى تيپتەگى مۋدان گۇلى تۇقىمىن ەنگىزىپ، دەن قويا جەتىلدىرۋ ارقىلى قازىر وسى گۇلدەر شەشەك اتتى. سوڭعى مەزگىلدە ٴبىز ٴتۇرلى گۇلدەردىڭ گۇل اشۋ ۋاقىتىنىڭ ۇقساماۋىنا نەگىزدەلىپ، مەرزىم بويىنشا گۇل مەرەكەسى جەلىلەس قيمىلدارىن وتكىزىپ، ساياحاتشىلاردىڭ كەلىپ ساياحاتتاۋىن قارسى الامىز“ دەدى.

ىلە وسىمدىك باقشاسى كۇنەس اۋدانى المالى قالاشىعىنا ورنالاسقان، يەلەگەن جەر اۋماعى 3 مىڭ مۋدان اسادى، ورگانيزمدەردىڭ الۋان تۇرلىلىگىن قورعاۋدى باستى ماقسات ەتىپ، قۋاڭ وڭىردەگى ورگانيزمدەردىڭ الۋان تۇرلىلىگىن قورعاۋدى، وسىمدىك بايلىعىن زاپاس ساقتاۋدى جانە باياندى اشۋدى، پايدالانۋدى ارقاۋ ەتىپ، ەكولوگيانى قورعاۋ، تۇرلەردى قورعاپ، جەتىلدىرۋ، عىلمي زەرتتەۋ، اشىپ پايدالانۋ، تاجىريبە ارقىلى ۇلگى كورسەتۋ، عىلىم جالپىلاستىرۋ تاربيەسى جانە ساياحاتتاۋ، تاماشالاۋ ٴبىر تۇلعالانعان امبەباپ وسىمدىك باقشاسى بولىپ تابىلادى.

 سۋرەتتە: ساياحاتشىلار وسىمدىك باقشاسىندا گۇل تاماشالاۋدا.