ٴتىلشىمىز ياڭ جيڭ ـ ي حابارلايدى. 7 ـ ايدىڭ 20 ـ كۇنى، اسپان شايداي اشىق، كۇن كۇلىمدەپ شۋاعىن شاشىپ تۇر، موڭعۇلكۇرە اۋدانىنىڭ تۇلپار ساياحات ـ مادەنيەت باقشاسى ادامدى تاڭ قالدىراتىن سالتاناتتى مۇراسىمدى قارسى الدى − 2024، شينجياڭ ىلە تۇلپار مادەنيەت ـ ساياحات مەرەكەسى سالتاناتپەن باستالدى.
مەملەكەتتىك 13 - كەزەكتى حالىق قۇرىلتايى تۇراقتى كوميتەتىنىڭ مۇشەسى، ۇلت كوميتەتىنىڭ ورىنباسار مەڭگەرۋشى مۇشەسى، جۇڭگو جىلقى شارۋاشىلىعى قوعامىنىڭ قۇرمەتتى باستىعى عانيبات سابىكەي ۇلى، ىلە وبلىستىق پارتكومنىڭ شۋجيى ياڭ شيۋلي، ىلە وبلىستىق پارتكومنىڭ ورىنباسار شۋجيى، وبلىس باستىعى ەلشات تۇرسىنباي ۇلى، اۆتونوميالى رايوننىڭ، اۆتونوميالى وبلىستىڭ ٴبىر ٴبولىم دەمالىسقا، زەينەتكە شىققان كادرلارى، قاتىستى تاراۋلاردىڭ باسشىلارى، حاينان ولكەلىك ۇلت ىستەرى كوميتەتى، جۇڭگو جىلقى شارۋاشىلىعى قوعامى، شياڭگاڭ ات بايگەسى قوعامى، اۆتونوميالى رايوندىق جىلقى شارۋاشىلىعى قوعامى، تارباعاتاي ايماعى، التاي ايماعى، بيڭتۋان 4 - شىسى سياقتى ورىنداردان كەلگەن باسشى سيلى قوناقتار اشىلۋ سالتىنا قاتىناستى.
ياڭ شيۋلي 2024، شينجياڭ ىلە تۇلپار مادەنيەت ـ ساياحات مەرەكەسىنىڭ باستالعاندىعىن جاريالادى، ەلشات تۇرسىنباي ۇلى ارناۋ ٴسوز سويلەدى.
ەلشات تۇرسىنباي ۇلى ارناۋ سوزىندە بىلاي دەدى: ”تۇلپار مەرەكەسى“ بۇكىل ەلدەگى ەڭ ىقپالدى مەرەكەلىك قيمىلداردىڭ بىرىنە اينالدى. ٴبىز ىلەنىڭ مول ساياحات بايلىعى باسىمدىعىن ۇزدىكسىز تياناق ەتىپ، ”وبلىستى ساياحات ارقىلى گۇلدەندىرۋ“ ستراتەگياسىن ىشكەرىلەي اتقارىپ، ”الەمدىك دەڭگەيدەگى ساياحات نىسانالى جەرىن قۇرىپ، 100 ميلليارد يۋان دارەجەلى ساياحات كاسىبىن تۇلعالاۋ“ نىساناسىن كوزدەپ، ساياحات نەگىزدىك قۇرىلعىلارى مەن كورىنىس رايوندارى، كورىنىس تۇيىندەرى قۇرىلىسىن كۇشەيتىپ، ”تاماق، جاتىن ورىن، ٴجۇرىس - تۇرىس، ساياحات، زات ساتىپ الۋ، كوڭىل اشۋ“ جالپى فاكتورىمەن قامداۋ دەڭگەيىن بارىنشا جوعارىلاتىپ، ٴتۇرلى مادەنيەت - ساياحات مەرەكەسىن قۇتتىقتاۋ قيمىلدارىن ويداعىداي وتكىزىپ، جاڭا كاسىپ كۇيىن، جاڭا ٴونىمدى، جاڭا جارىس جولىن بەلسەنە جەتىلدىرىپ، ”تۇتاس ماۋسىم + جالپى ۋاقىت + جالپى جاس قۇرامىنداعىلار + جالپى كاسىپ سالاسى“ فورماسىنداعى ساياحات ۇلگىسىن كۇش سالا ورناتىپ، ىلە مادەنيەت ـ ساياحات كاسىبى قۋاتىنىڭ زورايۋىن، دەڭگەيىنىڭ، ساپاسىنىڭ جوعارىلاۋىن ىلگەرىلەتەمىز.
بيىلعى تۇلپار مادەنيەت - ساياحات مەرەكەسى ”شىلدە ايىندا قيالداعى تۇلپارمەن موڭعۇلكۇرەدە جۇزدەسىپ، اڭىزدارعا بويلاپ، حيكايالاردى ۇزدىكسىز جالعاستىرايىق“ دەگەندى نەگىزگى تاقىرىپ ەتتى. باستالۋ سالتىنداعى ادەبيەت - كوركەمونەر كونسەرتىندە وزگەشە ونەر كورسەتىلدى، كونسەرت ”ارعىماق ارىنى بايتاق جۇڭگوعا شۇعىلا شاشتى“، ”ىرىستى مەكەندە قاس قاعىمدا ۇلى وزگەرىستەر بولدى“، ”جىلدام ٴارى ورنىقتى قاداممەن بولاشاقتى بەتكە الامىز“ سىندى 3 ۇلكەن تاراۋعا ٴبولىندى. كونسەرت مازمۇنى الۋان ٴتۇرلى، فورماسى باي بولىپ، جىلقى ەلەمەنتى بەينە جارقىراعان مەرۋەرت ىسپەتتى كونسەرتتىڭ تۇتاس بارىسىنا ٴسىڭىرىلدى.
ات ونەرى سەرىك ويىنى «تۇلپار ٴبيى»، ٴان مەن سەرىك ويىنى توعىسقان «قىستا موڭعۇلكۇرەگە كەلىپ قار تاماشالاۋ»، اسەرلى اسپاپتىق مۋزيكا «تۇلپارلار ٴدۇبىرى» سياقتى 17 تارتىمدى كونسەرت ارت ـ ارتىنان كەرەمەت ٴوتتى.
وسى كەزەكتى تۇلپار مادەنيەت ـ ساياحات مەرەكەسىنىڭ اشىلۋ سالتىندا ”اتا مەكەندى تانىستىرۋ“، ”تۇرمىستى تانىستىرۋ“، ”مادەنيەتتى تانىستىرۋ“، سونداي ـ اق ”تۇلپار تانىستىرۋ“ سياقتى بۋىندار دەن قويا جوبالانىپ، ۋ جيڭ، تۇڭ لييا، يۇي شى، دوۋ شياۋ سياقتى تانىمال ارتيستەر ىركەس ـ تىركەس اشىلۋ سالتىنىڭ الاڭىندا جارقىراي بوي كورسەتتى.
باستالۋ سالتىنىڭ سوڭىندا بارلىق ارتيستەر «وتاندى جىرلايمىز» ٴانىن اسقاقتاتا شىرقاپ، تۇتاس كونسەرتتى تاعى دا شارىقتاۋ شەگىنە كوتەردى. تۇلپارلار ٴدۇبىرى كونسەرتىندە نايزاعايداي جارق ەتىپ، قۇيىنداي قۇيعىتقان تۇلپارلار تۇياعىنىڭ ٴدۇبىرى دالانى جاڭعىرتىپ، كورەرمەننىڭ شاتىرلاعان شاپالاق ٴۇنى مەن سالتانات ۇنىنە بولەندى.
اشىلۋ سالتىندا جۇڭگو جىلقى شارۋاشىلىعى قوعامىنىڭ شۋجيى، باس حاتشىسى يۋە گاۋفىڭ جانە جۇڭگو جىلقى شارۋاشىلىعى قوعامىنىڭ جوعارى دارەجەلى كوركەمونەر اقىلشىسى، سۋرەتشى ياۋ ديشيۇڭ «كەكىلىنەن جەل ەسىپ جەر تانابىن قۋىرعان تۇلپارلار» اتتى حاتكەرلىك - سۋرەت تۋىندىسىن موڭعۇلكۇرە اۋداندىق حالىق ۇكىمەتىنە تارتۋ ەتتى. ياۋ ديشيۇڭ مىرزا موڭعۇلكۇرە اۋداندىق حالىق ۇكىمەتى بەرگەن «شينجياڭ ىلە تۇلپار مادەنيەتىن جالپىلاستىرۋ ەلشىسى» كۋالىگىن قابىلدادى.
ۇعىسۋعا قاراعاندا، تۇلپار مادەنيەت - ساياحات مەرەكەسىنىڭ جەلىلەس قيمىلدارى 4 - ايدىڭ اياق شەنىنەن 12 - ايدىڭ باس شەنىنە دەيىن جالعاسادى ەكەن، وندا ”كۇنى بۇرىنعى دايىندىق قيمىلى“، ”تۇلپار ساياحات - مادەنيەت باقشاسى مادەنيەت - ساياحات قيمىلى“، ”جەلىلەس ات بايگەسى قيمىلى“ جانە ”جالپى وڭىرلىك ساياحات ويىندارىن موڭعۇلكۇرەدە وتكىزۋ“ سىندى 4 ۇلكەن بولىك قامتىلىپ، ”ٴدامىڭ تارتىپ كەلدىم“ − ٴدامدى تاعام داستارقانىندا جۇزدەسەيىك، ”تيانشاندا ارىنداعان ارعىماق“ ـــــ ات بايگەسى قيمىلى، ”ات ۇستىندە تامىلجىتا ٴان سالىپ، ۇيىرىلە بيگە باسۋ“ ـــــ ات ويىنى كونسەرتى، ”ارمان القابى“ ـــــ ولەڭ - جىر، مادەنيەت - كوركەمونەر مەرەكەسى قيمىلى، ”دۋماندى موڭعۇلكۇرە“ ــــــ تۇلپار مۋزيكا مەرەكەسى سياقتى 21 ٴتۇرلى تارتىمدى قيمىل شار تاراپتان كەلگەن قوناقتار مەن دوستارعا جان - جاقتى ەلدەن ەرەك اسەر سيلايتىن بولادى.
7 - ايدىڭ 20 - كۇنى 2024، شينجياڭ ىلە تۇلپار مادەنيەت - ساياحات مەرەكەسىنىڭ اشىلۋ سالتى ”موڭعۇلكۇرە ٴسىزدى قارسى الادى“ بيىمەن باستالدى. ياڭ جيڭ - ي فوتوسى