”قار قالاسى“ شار تاراپتان  قوناق باۋرادى

−− التاي حالىقارالىق قار ـ مۇز ”دوستار شەڭبەرىن“ كەڭەيتتى

شينجياڭ گازەتىنىڭ ٴتىلشىسى جاڭ تيڭ، ەرىكتى ٴتىلشى دۇڭ شىجۇي

11 - ايدىڭ 2 - كۇنى تۇستەن بۇرىن، كوكتوعاي حالىقارالىق قار شاڭعى دەمالىس رايونىندا ادامدار قايشالىسىپ، ٴارقايسى شاڭعى جولدارىنا باراتىن اسپالى ارقان جولداردىڭ الدىندا تاۋعا شىعۋدى كۇتىپ تۇرعان شاڭعىشىلار ەرتەمەن قاتارعا تۇردى.

”قار شاڭعى الاڭى تيجارات باستاعان 10 كۇن ىشىندە ساياحاتشىلاردىڭ سانى 3 مىڭ ادام - رەتتەن استى. وسى اپتانىڭ سوڭىندا قار شاڭعى الاڭىنداعى قوناق ۇيلەردىڭ 100 گە تارتا بولمەسىنە تۇگەلدەي تاپسىرىس بەرىلىپ بولدى“ ـ دەدى كوكتوعاي حالىقارالىق قار شاڭعى دەمالىس رايونى تيجارات ـ ساۋدا كاسىپورىن جوسپار ٴبولىمىنىڭ مەڭگەرۋشىسى لي شياڭباۋ.

قازىر تەمپەراتۋرانىڭ تومەندەۋىنە بايلانىستى التاي ايماعىنىڭ قار - مۇز ساياحاتى قىزۋ ورلەۋگە كوتەرىلدى، 10 - ايدىڭ اياق شەنىندە كوكتوعاي حالىقارالىق قار شاڭعى دەمالىس رايونى رەسمي ىسكە قوسىلدى، قازىر باسقا دا ۇلكەن قار شاڭعى الاڭدارى دا ارت - ارتىنان اشىلۋ الدىندا تۇر. ەلىمىزدىڭ جەر - جەرىنەن كەلگەن قار شاڭعى اۋەسكەرلەرىنەن سىرت، بيىل ٴارقايسى ۇلكەن قار شاڭعى الاڭدارىندا ”شەتەلدىك جاتتىقتىرۋشىلاردىڭ“ قاراسى دا مولايىپ كەلەدى. اۆستريا، كانادا، فرانسيا... دۇنيە ٴجۇزىنىڭ جەر ـ جەرىندەگى تىلدەر قار شاڭعى الاڭىندا توعىسىپ، كۇن سايىن جيىلەگەن حالىقارالىق اۋىس ـ كۇيىس ”ادامزاتتىڭ قار شاڭعىسىنىڭ باستالعان جەرى“ بولعان التايدىڭ قار ـ مۇز ەكونوميكاسىنىڭ جوعارى ساپالى دامۋىنا تىڭ ومىرشەڭدىك كۇش ۇستەدى.

جاقىن ماڭدا - اق شەتەلدىك جاتتىقتىرۋشىدان شاڭعى تەبۋدى ۇيرەنۋگە بولادى

”جاتتىقتىرۋشىدا اناعۇرلىم كوپ دەنە يشارات ٴتىلى بولۋى، جاتتىعۋ ارەكەتى ارقىلى ارىپتەسىنىڭ سىرعاناۋ ادەتىن قالىپتاستىرۋىنا كومەكتەسۋى كەرەك، سونىمەن بىرگە، تەرەڭ نازاريالىق بىلىمىمەن سايكەستىرە وتىرىپ ٴاربىر ارەكەتتىڭ نە ٴۇشىن وسىلاي بولاتىنىن انىق ٴتۇسىندىرۋى كەرەك...“ 10 - ايدىڭ 27 - كۇنى گەنەرال تاۋى حالىقارالىق قار شاڭعى دەمالىس رايونىمەن سەلبەسكەن فرانسيا C l u b M e d ۇجىمىنىڭ شەتەلدىك قار شاڭعى جاتتىقتىرۋشىسى وسى دەمالىس رايونىنداعى جاتتىقتىرۋشىلارعا جۇيەلى دە باعىتتامالى تاربيە جۇرگىزدى.

ورال قايرات ۇلى گەنەرال تاۋى حالىقارالىق قار شاڭعى دەمالىس رايونىنىڭ قار شاڭعى جاتتىقتىرۋشىسى، بيىل ونىڭ وسى ارادا قار شاڭعى جاتتىقتىرۋشىسى بولعانىنا 5 جىل بولدى، وسى جىلدارداعى شاڭعى الاڭىنىڭ دامۋىن تىلگە تيەك ەتكەندە، ول بۇكپەسىز بىلاي دەدى:  وزگەرىس وتە زور، تەك قاتتى بولشەك قۇرىلعىلارىنداعى وزگەرىستەر زور بولىپ قانا قالماي، قار شاڭعى جاتتىقتىرۋشى رەتىندە، جاقىن ماڭدا - اق شەتەلدىك جاتتىقتىرۋشىلاردان وزىق شاڭعى تەبۋ ساباعىن ۇيرەنىپ، باقىت سەزىمىنە، تابىس سەزىمىنە بولەندىك.

ورال بىلاي دەپ قارادى: شەتەلدىك جاتتىقتىرۋشىلار حالىقارامەن توعىساتىن جاتتىعۋ ۇلگىسىن الا كەلدى، ”بۇرىن ٴبىز باس الماي جاتتىعا بەرەتىنبىز، شەتەلدىك جاتتىقتىرۋشىلارمەن بايلانىس جاساۋ، ۇيرەنۋ ارقىلى ٴبىز شاڭعى تەبۋ ونەرى جونىندە اناعۇرلىم تەرەڭ تۇسىنىككە يە بولدىق، كوڭىل كۇيىمىزدە دە بەلسەندى وزگەرىستەر تۋىلدى“. 

بيىل گەنەرال تاۋى حالىقارالىق شاڭعى دەمالىس رايونى مەن فرانسيا Club Med ۇجىمى سەلبەسىپ ”گەنەرال تاۋى − Club Med شاڭعى شۋەيۋانىن“ قۇرىپ، شاڭعى تەبۋدەگى حاۋىپسىزدىككە جەتەكشىلىك ەتۋ، شاڭعى تەبۋ شەبەرلىگىن ۇيرەتۋ، سونداي - اق جاتتىقتىرۋشىلاردى باسقارۋ سياقتى جاقتاردا باۋلۋ مازمۇنىن دەن قويا جوبالاپ، شاڭعى الاڭىنداعى جاتتىقتىرۋشىلاردىڭ وقىتۋ ٴتۇيىنى مەن قيىن تۇيىندەرىن اناعۇرلىم جاقسى يگەرۋىنە كومەكتەستى.

”ٴبىز فرانسيا Club Med ۇجىمىنىڭ كەمەلدى قار شاڭعى وقىتۋ جۇيەسىن جانە باسقارۋ تاجىريبەسىن ەنگىزىپ جان - جاقتى، كوپ ساتىلى سەلبەستىك ورىستەتىپ، كاسىپتىك جاتتىقتىرۋشىلار توبىن مولايتىپ، وقىتۋ، باۋلۋ ورەسىن جوعارىلاتىپ، قار شاڭعى اۋەسكەرلەرىن اناعۇرلىم حاۋىپسىز، ماماندانعان قار شاڭعى تاجىريبەسىمەن قامدايمىز. بۇل رەتكىسى سەلبەستىك قىزمەت وتەۋ دەڭگەيىنىڭ قاراپايىم جوعارىلاۋى عانا ەمەس، ونان دا ماڭىزدىسى، ٴبىزدىڭ حالىقارالىق قار شاڭعى دەمالىس رايونىن جوعارى ولشەمدەندىرۋگە تالپىنۋىمىزدىڭ امالياتى“ دەدى گەنەرال تاۋى حالىقارالىق قار شاڭعى دەمالىس رايونىنىڭ بازار باس باقىلاۋشىسى چىن ياڭ.

قار - مۇز سپورتىنىڭ جۇمساق - قاتتى بولشەك دەڭگەيى جوعارىلاتىلدى

اۆستريادان كەلگەن بەرنحارد لاتحيل قار شاڭعى وقىتۋ - باۋلۋ تۇرىندەگى ەمتيحان تورەشىسى. 2019 - جىلى بەرنحارد لاتحيل تۇڭعىش رەت جۇڭگوعا كەلگەن. كەمەلدى قار شاڭعى قۇرىلعىلارى مەن باۋىرمال، قوناعۋار جۇڭگولىقتار ونىڭ وسى ارانى ۇناتىپ قالۋىنا سەبەپ بولدى. وسىدان كەيىن ول ٴار جىلى قىستا جۇڭگوعا كەلىپ قار شاڭعى وقىتۋىمەن شۇعىلداناتىن بولدى. بيىل 10 - ايدىڭ اياعىندا ول كوكتوعاي اۋدانىنداعى كوكتوعاي حالىقارالىق شاڭعى دەمالىس رايونىنا كەلىپ، شاڭعى تەبۋ كۋرسى مەن كاسىپتىك وقىتۋ دارەجەسىن باعالاۋ قىزمەتىنە قاتىناستى.  

”وسىندا كەلگەن سوڭ بۇل ارانىڭ توتەنشە اشىق ەكەندىگىن بايقادىم، ٴبىز كوكتوعاي قار شاڭعى الاڭىمەن سەلبەسىپ، جەرگىلىكتى ورىننىڭ حالىقارالىق قار شاڭعى سياقتى دارەجە كۋالاندىرۋ بويىنشا باۋلۋ كاسىبىنىڭ حالىقارامەن توعىسۋىن بەلسەنە ىلگەرىلەتىپ، شاڭعى تەۋىپ دەمالۋ ۇلگىسىنە ۇزدىكسىز جاڭالىق اشۋعا جەتەكتەيمىز، بۇل ارا بۇكىل دۇنيە جۇزىندەگى قار شاڭعى اۋەسكەرلەرىنىڭ كەلىپ شاڭعى تەبۋىنە تاتيدى“، ـ دەدى بەرنحارد لاتحيل.

10 - ايدىڭ ورتا شەنىنەن 12 - ايعا دەيىن بيىلعى تۇڭعىش كەزەكتى اۆستريا ۆەنا قار شاڭعى جاتتىقتىرۋشىلارىن كۋالاندىرۋ، تاربيەلەۋ قىزمەتى كوكتوعاي حالىقارالىق قار شاڭعى دەمالىس رايونىندا وتكىزىلەدى. ۇعىسۋعا قاراعاندا، بۇل شىحۇي (شىنياڭ) دەنە تاربيە - مادەنيەت دامىتۋ شەكتى سەرىكتەستىگى اۆستريانىڭ ۆەنا شاڭعى قوعامىمەن بىرلەسىپ وتكىزگەن تۇڭعىش رەت ەل ىشىندە قار شاڭعى جاتتىقتىرۋشىلارىن كۋالاندىرۋ كۋرسى (حالىقارالىق 2 - دارەجەلى جاتتىقتىرۋشىنىڭ تولىمدىلىق كۋالاندىرۋىمەن بارابار) ەكەن.

كوكتوعاي حالىقارالىق قار شاڭعى دەمالىس رايونىنىڭ ۇنەمىلىك ىستەرگە جاۋاپتى ورىنباسار باس ديرەكتورى فىڭ كاي بىلاي دەپ تانىستىردى: شاڭعى تەبۋ دەمالىس رايونى كوكتوعاي مەملەكەتتىك 5A دارەجەلى كورىنىس رايونىنا ورنالاسقان، قازىر ازيا بويىنشا ەڭ ەرتە جۇمىس باستايتىن، شاڭعى تەبۋ مەزگىلى ەڭ ۇزاق قار شاڭعى الاڭى. اۆستريانىڭ ۆەنا قار شاڭعى جاتتىقتىرۋشىلارىن كۋالاندىرۋ، تاربيەلەۋ ۇجىمى وسى ارانىڭ ساپالى قار بايلىعى مەن الۋان ٴتۇرلى سىرعاناۋ جولى بايلىعىنا كوزدەرى تۇسكەن سوڭ كۋالاندىرۋ، تاربيەلەۋ ورنىن وسى جەر ەتىپ تاڭدادى.

اۆستريانىڭ ۆەنا قار شاڭعى قوعامىمەن سەلبەسۋدەن سىرت، بيىل قىسقى شاڭعى تەبۋ ماۋسىمىندا كوكتوعاي حالىقارالىق قار شاڭعى دەمالىس رايونى كانادانىڭ شاڭعى تەبۋدى وقىتۋ جۇيەسىمەن سەلبەستىك جاساپ، قار شاڭعى الاڭىنداعى وسى مەكتەپتە كاسىپتىك جاقتان جەتەكشىلىك ەتۋ ٴارى دارەجە ەمتيحانى كۋرسىن اشادى.

فىڭ كاي بىلاي دەپ تانىستىردى: كاسىپتىك تەحنيكالىق كۋرس اشۋدان تىس، بۇل قار شاڭعى الاڭى 2024 -، 2025 - جىلدىڭ قىس ماۋسىمىندا كاسىپتىك ۇجىمدارمەن سەلبەسىپ، مەملەكەتتىك جارىس وتكىزۋگە بولاتىن ولشەمدى U فورمالى سىرعاناۋ جولى، جاتتىقتىرۋ اترەتىنىڭ جاتتىعۋ قاجەتىنەن شىعاتىن باقشا الاڭى، بۇقارالىق قار شاڭعىشىلارعا قىزمەت وتەيتىن باستاۋىش، ورتا دارەجەلى باقشا الاڭدارىن سالىپ، شاڭعى تەبۋ اۋەسكەرلەرىن قار - مۇز سپورتىنىڭ قىزىعىنان لاززاتتاندىرۋمەن بىرگە، باسەكەلىك جاتتىعۋعا قاتىناستىرىپ، قار - مۇز سپورتىنىڭ دەڭگەيىن جوعارىلاتۋىنا دا بولادى.

حالىقارالىق قار ـ مۇز ساياحاتى دەمالىس ورنىن سالدى

ٴار جىلى 10 - ايدىڭ ورتا شەنىنەن 11 - ايدىڭ باسىنا دەيىن، جىكبەلەڭ حالىقارالىق قار شاڭعى دەمالىس رايونىنىڭ جۇمىس باستاۋ دايىندىق مەزگىلى، قازىر وسى قار شاڭعى الاڭىنىڭ قىزمەتكەرلەرى اسپا كۇيمە سياقتى جابدىقتاردى تەكسەرىپ جوندەپ، قىسقى تيجارات ٴۇشىن ازىرلەنۋدە.

”جۇڭگوداعى اق ۇلپا قار جاساۋشى“، ”كوڭىلدەگىدەي قار شاڭعى الاڭى“ اتالعان جىكبەلەڭ حالىقارالىق قار - مۇز ساياحاتى دەمالىس رايونى ۇنتاق قاردى ۇلپا قارعا اينالدىرا الاتىندىقتان، قار تۇيىرشىكتەرى تولىق تا سەرپىندى بولىپ شاڭعى تەبۋگە، قار ويىنىن ويناۋعا، قار تاماشالاۋعا ەرەكشە باپ كەلەدى.

ٴتىلشىنىڭ ۇعىسۋىنشا، وسى قار شاڭعى، دەمالىس رايونى 2024 ـ جىلدان 2025 ـ جىلعا دەيىنگى جاڭا قار شاڭعى ماۋسىمىندا اۆستريانىڭ قار شاڭعى جۇيەسىمەن ستراتەگيالىق سەلبەستىك كەلىسىمىن جاساسىپ، ەكى جاق قار شاڭعى كاسىبى دارىندىلارىن تاربيەلەۋ جانە اۆستريامەن قار شاڭعى جاتتىقتىرۋشىلارىنىڭ تولىمدىلىعىن كۋالاندىرۋ، قار شاڭعى الاڭىن جوبالاۋ سياقتى كوپ جاقتاردا اۋىس ـ كۇيىس، سەلبەستىك جاسايدى ەكەن. جىكبەلەڭ حالىقارالىق قار شاڭعى، دەمالىس رايونىنداعى شاڭعى مەكتەبى دە وزىق وقىتۋ جۇيەسىنەن ۇيرەنۋمەن بىرگە، جۇڭگونىڭ مەملەكەت جاعدايىنا ۇيلەسەتىن وزگەشە وقىتۋ جۇيەسىن اشىپ، جەدەل دامۋ جاعدايىن قالىپتاستىرماقشى ەكەن.

”بۇرىن ٴبىزدىڭ شاڭعىعا باۋلۋ بازارىمىز ٴالى پىسىپ ـ جەتىلمەگەندىكتەن، ولشەمدى قار شاڭعى جۇيەسى كەمشىل بولاتىن. سوڭعى جىلداردان بەرى قار اۋەسكەرلەرىنىڭ ساپالى قار شاڭعى ساباعى مەن قار شاڭعى جاتتىقتىرۋشىلارىنا بولعان قاجەتى جوعارىلادى، بيىل ٴبىز شەتەلدىڭ پىسىپ - جەتىلگەن قار شاڭعى وقىتۋى مەن تاربيەلەۋ جۇيەسىن ەنگىزىپ، قار شاڭعىعا جاتتىقتىرۋ، قار كوشكىنىنەن قۇتقارۋ، قار جاعدايىنا تالداۋ جاساۋ سياقتى جاقتاردا كۋرس اشامىز. مۇنان سىرت، ەكى جاق قار شاڭعى جولىن دايىنداۋ، قار شاڭعى باقشاسى قۇرىلىسى جاقتارىندا سەلبەستىك جاساسامىز“ دەدى جىكبەلەڭ حالىقارالىق قار شاڭعى، دەمالىس رايونىنىڭ ورىنباسار باس ديرەكتورى جاڭ جيارۇي.

سوڭعى جىلدارى التاي ايماعى جيىنى 7 ميلليارد يۋاننان استام قارجى قوسىپ، اسقار تاۋ جانە دالالىق قار شاڭعى الاڭىنان 9 ىن قۇردى، مۇنىڭ ىشىندە 5S دارەجەلى قار شاڭعى الاڭىنان ۇشەۋى بار. 2024 -، 2025 - جىلعى قار شاڭعى ماۋسىمى كەزىندە التاي ايماعىنداعى 3 ۇلكەن قار شاڭعى دەمالىس رايونى حالىقارالانعان ولشەمدى قار شاڭعى وقىتۋ جۇيەسىن ەنگىزىپ، قار - مۇز ساياحاتىنىڭ حالىقارالىق ”دوستار شەڭبەرىن“ كەڭەيتۋگە كۇش سالىپ، حالىقارالىق قار - مۇز ساياحاتى دەمالىس ورنىن قۇرۋعا كۇش سالادى.

”’ادامزاتتىڭ قار شاڭعىسىنىڭ باستالعان جەرى‘، ’جۇڭگوداعى قار مەكەنى − التاي‘ سىندى تاماشا ماداق سوزدەر العاشقى ادىمدا قالىپتاستى، كەلەسى قادامدا ٴبىز حالىقارادا، ەل ىشىندە ٴتىپتى دە كوپ جوعارى دەڭگەيلى قار ـ مۇز جارىستارىن وتكىزىپ، قار ـ مۇز كاسىپ كۇيىن ۇزدىكسىز بايىتىپ، التايدى حالىقارالىق قار ٴۇستى ويىن تۇرلەرىندەگى جاتتىعۋ بازاسىنا، دۇنيە جۇزىلىك دەڭگەيدەگى قار ـ مۇز سپورتى جانە قار ـ مۇز ساياحاتىنداعى نىسانالى جەرگە اينالدىرامىز“- دەدى التاي ايماقتىق مادەنيەت - دەنە تاربيە، راديو - تەلەۆيزيا جانە ساياحات مەكەمەسىنىڭ باستىعى ٴدىلدا ٴنابي قىزى.

سۋرەتتە: اۆستريانىڭ ۆەنا شاڭعى جاتتىقتىرۋشىلارىن كۋالاندىرۋ، تاربيەلەۋ قىزمەتى كوكتوعاي حالىقارالىق قار شاڭعى دەمالىس رايونىندا وتكىزىلدى (10 - ايدىڭ 24 - كۇنى تۇسىرىلگەن). 

سۋرەتتى شىحۇي (شىنياڭ) دەنە تاربيە - مادەنيەت دامىتۋ شەكتى سەرىكتەستىگى قامداعان.

سۋرەتتە: جىكبەلەڭ حالىقارالىق قار شاڭعى دەمالىس رايونىنىڭ قىزمەتكەرلەرى سوعىلۋدان ساقتانۋ توسەنىشىن تاڭۋدا. (10 - ايدىڭ 22 - كۇنى تۇسىرگەن).

سۋرەتتى جىكبەلەڭ حالىقارالىق شاڭعى تەبۋ دەمالىس رايونى قامداعان.