باستالۋ سالتىنان كورىنىس. شاۋ جياڭتاۋ فوتوسى
تىلشىلەرىمىز دۋ لەي، ياڭ جيڭ - ي، ەرىكتى ٴتىلشى ساۋ شياۋجۋان حابارلايدى. 5 - ايدىڭ 17 - كۇنى 15 - رەتكى جۇڭگو ساياحات كۇنى كەلۋ قارساڭىندا، 2025 - جىلعى ”19 - مامىر جۇڭگو ساياحات كۇنى“ جانە كەلەلى ساياحات نىساندارىنىڭ باستالۋ سالتى نارات كورىنىس وڭىرىندە وتكىزىلدى، ەل ٴىشى - سىرتىنان كەلگەن ۆەلوسيپەد شاباندوزدارى، ساياحاتشىلار وسى ارادا باس قوسىپ، جازعى مادەنيەت - ساياحات سالتاناتىن بىرگە تاماشالادى.
وسى كەزەكتى قيمىلدى ىلە وبلىستىق مادەنيەت، راديو - تەلەۆيزيا جانە ساياحات مەكەمەسى، ىلە وبلىستىق دەنە تاربيە مەكەمەسى، ياڭجوۋ قالاسىنىڭ كۇنەس اۋدانىنا باعىتتامالى كومەكتەسۋ الدىڭعى شەپ قىزمەت گرۋپپاسى، نارات ساياحات كورىنىس رايونىن باسقارۋ كوميتەتى، ىلە مادەنيەت - ساياحات كاسىپ سالاسى توبى شەكتى سەرىكتەستىگى ۇيىمداستىردى. بۇل نەگىزىنەن 7 - كەزەكتى ”سول ادام، سول اۆتوكولىك، سول تاۋلار“ اتىنداعى نارات ساحاراسى دالالىق سپورت سالتاناتى، نارات . ىلە بەيزاتتىق مۇرالاردى سەزىنۋ كورمە سارايىنىڭ ىرگە قالاۋ سالتى، نارات . جانحۋاۋان قايىڭدىساي ۇلتتىق سالت - سانا دەمالىس قىستاعىنىڭ 2 - مەرزىمدىك قۇرىلىسىن الدىن الا باستاۋ قيمىلى سىندى 3 ۇلكەن تاقىرىپتىق قيمىلعا سايادى. قيمىلدىڭ ماقساتى ــ ”جۇڭگو ساياحات كۇنىنىڭ“ مادەنيەت پەن ساياحاتتى توعىستىرا دامىتۋدىڭ كورمە كۇنى جانە ۇگىت كۇنىنە اينالۋىن ونان ارى ىلگەرىلەتىپ، مەرەكە - مەيرامدارمەن كورىنىس وڭىرلەرىندەگى كەلەلى نىسانداردا جۇمىس باستاۋدى، سونداي - اق سپورت كورىنىستەرىمەن دالمە - ٴدال بىرلەستىرۋ ارقىلى ”ساياحات كۇنى + جارىس IP“ ى ارقىلى مەملەكەتتىك سيپات العان ۇگىت باسىمدىعىنان پايدالانىپ، جارىس ماركاسىنىڭ جاريالىلىعىن جەدەل جوعارىلاتىپ، ناراتتىڭ ”دەنە تاربيە ساياحاتىنداعى نىسانالى جەر“ بولۋداي الەۋمەتتىك تانىمالىلىعىن كۇشەيتىپ، ”ەكولوگيالىق سەيىل - سەرۋەن + دالالىق سپورت + مادەنيەت كەشىرمەلەرى“ سىندى امبەباپ ٴونىم جۇيەسىن قالىپتاستىرۋ ارقىلى كورىنىس وڭىرلەرىنىڭ تۇتىنۋ كومەسكى قۋاتىن جانداندىرىپ، قاتىناس، قونالقى، جابدىقتاردى جالعا بەرۋ سياقتى قاتىستى كاسىپ سالاسىنىڭ كىرىسىن ارتتىرۋىنا باستاماشىلىق ەتتى.
نارات كورىنىس رايونى پارتكومىنىڭ مۇشەسى، ساياحاتتى دامىتۋدى باسقارۋ مەكەمەسىنىڭ باستىعى ۋاڭ سۋۋىن بىلاي دەدى: ”بيىل جىل باسىنان بەرى نارات مەملەكەتتىك ساياحات دەمالىس رايونى جالپى 431 مىڭ 600 ادام - رەت ساياحاتشى قابىلدادى، بۇل سايكەس مەزگىلدەگىدەن %19.52 ارتتى، 5 - ايدا كۇندىك ساياحاتشى قابىلداۋ مولشەرى 11 مىڭ 85 ادام - رەتكە جەتتى. وسى رەتكى قيمىل ەكولوگيانى قورعاۋ، سەيىل - سەرۋەن، دالالىق سپورت جانە مادەنيەت كەشىرمەلەرىن نەگىزگى تاقىرىپ ەتىپ، بەيزاتتىق مادەني مۇرالار كورمە سارايىن اشۋ، 7 - كەزەكتى ۆەلوسيپەدپەن سەيىل - سەرۋەن قۇرۋ مەرەكەسى، جاياۋ ٴجۇرۋ جانە قايىڭدىساي دەمالىس قىستاعىنىڭ 2 ـ مەرزىمدىك قۇرىلىسىن الدىن الا باستاۋ سياقتى نىساندار ارقىلى تابيعات پەن وركەنيەتتى توعىستىرۋدىڭ تەرەڭ كەشىرمەلەرىن سەزىندىرەمىز“.
ىلە - شالا وتكىزىلگەن نارات دالالىق سپورت سالتاناتى 7 - كەزەكتى ۆەلوسيپەد مەرەكەسى دە رەسمي باستالدى.
ىسقىرىق ٴۇنى كوتەرىلۋمەن الۋان رەڭدەگى كيىم كيگەن شاباندوزدار كومبەدەن شىعىپ، كۇن شۇعىلاسىنا شومىپ، تاماشا كارتينا قالىپتاستىردى.
ۇعىسۋعا قاراعاندا، نارات كورىنىس ٴوڭىرى التى كەزەك ۆەلوسيپەد ٴمىنىپ تاۋعا شىعۋ جارىسىن ٴساتتى وتكىزگەن، وسى ارالىقتا جارىس تۇزىمىندە ۇزدىكسىز جاڭالىق جاراتىلىپ، تاۋلى ٴوڭىر ۆەلوسيپەد جارىسى سياقتىلاردى ىركەس - تىركەس وتكىزۋمەن بىرگە، باسقادا جارىس تۇرلەرىن تىڭنان قوسىپ، كوپ نەگىزدى باسەكە فورماسى ارقىلى جارىسقا قاتىناسۋشىلاردىڭ قامتۋ كولەمىن ٴونىمدى كەڭەيتىپ، جارىس كولەمى مەن دەڭگەيىن بىردەي جوعارىلاتقان.
ەگەيلەر گرۋپپاسىندا اعا جۇلدەگەر بولعان قازاقستاندىق شەبەر نازاربەك بەكەن بىلاي دەدى: ”وسى رەتكى تاۋلى ٴوڭىر ۆەلوسيپەد جارىسىنىڭ اسەرى جاقسى، جارىس جولىنىڭ جوبالانۋى وزگەشە، بىردە دەلەبەڭدى قوزدىرسا، بىردە جايما - شۋاق كۇي كەشىرەدى. تۇتاس جارىس تاۋ قويناۋىندا جالعاسقاندىقتان اقوزەن ساحاراسىن قىزىقتاۋمەن بىرگە، تەحنيكالىق شەبەرلىگىڭدى سىنايسىڭ“.
قورعاس قالاسىنان كەلگەن ساياحاتشى سۇن جيڭ بىلاي دەدى: ”ناراتقا كەلسەڭىز، بۇل ارانىڭ كورىنىسى ماي بوياۋلى سۋرەتتەي كوركەم ەكەن، تىنباي سۋرەتكە تۇسەسىز. مەنى ٴتىپتى دە تاڭ قالدىرعانى، بۇل ارادا وتكىزىلگەن ساحاراداعى دالالىق سپورت قيمىلدار بولدى. ٴبىز ٴبىر جاعىنان كوركەم كورىنىستى تاماشالاپ، ەندى ٴبىر جاعىنان شاباندوزداردىڭ قايراتتانا العا ۇمتىلعانىن كورىپ، تاماشا كۇيگە بولەندىك“.
ۇزاق ۋاقىتتان بەرى، نارات كورىنىس ٴوڭىرى ”دۇنيە جۇزىلىك دەڭگەيدەگى ساياحات نىسانالى جەرى بولۋ“ سىندى ستراتەگيالىق ورىندى كوزدەپ، ”مادەنيەت - ساياحات + كۇتىنۋ + دەنە تاربيە“ سىندى كوپ نەگىزدى ورنالاستىرۋلار ارقىلى تۇتاس ماۋسىم، تۇتاس جاس مولشەرىن نەگىز ەتكەن ساياحات ونىمدەرىن قالىپتاستىرىپ، ٴبىر توپ جوعارى دارەجەلى، كولەمدى، ەرەكشەلىككە يە، تولىق، ۇستەمە قۇنى جوعارى ساياحات نىساندارىن تياناقتاندىرىپ، ساياحات كاسىبىنىڭ كولەمىن كورنەكتى زورايتىپ، ساياحات ارقىلى حالىقتى بايىتۋ ونىمدىلىگىن اناعۇرلىم كورنەكتىلەندىرىپ، باسقارۋ، قىزمەت وتەۋ قابىلەتى جاعىندا اناعۇرلىم جوعارى ونىمدىلىككە قول جەتكىزىپ، جەبەۋ، جەتەكتەۋ قابىلەتىن كورنەكتى جوعارىلاتتى.
بيىل نارات كورىنىس رايونى ”دۇنيە جۇزىلىك دەڭگەيدەگى ساياحات دەمالىس ورنىن“ قۇرۋدى وراي ەتىپ، ساياحات نەگىزدىك قۇرىلعىلارىن كۇش سالا كەمەلدەندىرىپ، مادەنيەت پەن ساياحاتتى توعىستىرۋدىڭ جاڭا كاسىپ كۇيىندە جاڭالىق اشىپ، ساياحاتقا قىزمەت وتەۋدىڭ ساپاسىن ٴوسىرىپ، ونىمدىلىگىن ارتتىرۋدى ىلگەرىلەتەدى.