قورعاس ”ٴبىر بەلدەۋ، ٴبىر جول“ دوستار شەڭبەرىنە اناعۇرلىم كوپ پايدا جەتكىزدى

ماقالاسىن جازىپ، سۋرەتتەرىن تۇسىرگەن لاي يۇينيڭ، جاڭ چيڭحۋا (ٴوز تىلشىلەرىمىز)

11 - ايدىڭ 1 - كۇنى جۇڭگو (شينجياڭ) ەركىن ساۋدا سىناق رايونى رەسمي ماڭدايشالىق اشىپ، قورعاس تاعى ٴبىر رەت ەل ٴىشى - سىرتى نازار اۋدارعان ماڭىزدى تۇيىندەردىڭ بىرىنە اينالدى.

شينجياڭ ەركىن ساۋدا سىناق رايونى ٴۇرىمجى، قاشقار، قورعاس سىندى 3 اۋماقتى قامتيدى، مۇندا قورعاس اۋماعى شەكارا اتتاعان سەلبەستىك جانە قۇرلىقتىق شەكارا وتكەلى تيبىندەگى مەملەكەتتىك زات اينالىمى تورابى سياقتى باسىمدىقتارىنا سۇيەنىپ، شەكارا اتتاعان زات اينالىمى، شەكارا اتتاعان ساياحات، فينانستىق قىزمەت وتەۋ، كورمە، كورمەگە قويۋ سياقتى وسى زامانعى قىزمەت وتەۋ كاسىبىن ٴتۇيىندى دامىتىپ، ەرەكشە ٴدارى - دارمەك، ەلەكتروندىق ينفورماتسيا، جاڭا ماتەريال سياقتى كاسىپتەردى الۋەتتەندىرىپ، شەكارا اتتاعان ەكونوميكا - ساۋدا، قارجى قوسۋ سەلبەستىگىنىڭ جاڭا ۇلگىسىن قالىپتاستىردى.

11 - ايدىڭ 3 - كۇنى قازاقستان ورتالىق امانات - قارىز بانكەسىنىڭ بولىمشە بانكەسى جۇڭگو - قازاقستان قورعاس حالىقارالىق شەكارالىق سەلبەستىك ورتالىعىنا (تومەندە قىسقاشا ”سەلبەستىك ورتالىعى“ دەلىنەدى) رەسمي ىرگە تەپتى، بۇل شينجياڭ ەركىن ساۋدا سىناق رايونى ماڭدايشالىق اشىپ قۇرىلعاننان كەيىن سەلبەستىك ورتالىعىنا تۇڭعىش رەت ىرگە تەپكەن شەتەل بانكەسى.

قازىر قورعاس ۋنيۆەرسالدى قورعامالى باجى رايونىندا شەكارا اتتاعان ەلەكتروندىق ساۋدا، قورعامالى باجى ونىمدەرىن مانەرلەۋ، قورعامالى باجى زات اينالىمى جانە زات ساۋداسى سىندى 4 ۇلكەن شوعىرلاندىرۋ اسەرى بار ابزال كاسىپ سالاسى قالىپتاستى، مۇندا ٴار سالادان 497 كاسىپورىن ىرگە تەپتى، قورعامالى باجى ونىمدەرىن مانەرلەۋ، قامبادا ساقتاۋ، زات اينالىمى، شەكارا اتتاعان ەلەكتروندىق ساۋدا، يمپورت - ەكسپورت ساۋداسى، تەكسەرۋ، جوندەۋ سياقتى سالالارعا سايادى.

10 جىلدان بەرى جۇڭگو - ەۆروپا كەزەكشى پويەزدەرىنىڭ ماركا اسەرى ۇزدىكسىز كەڭەيىپ، شەكارادان كىرىپ - شىققان جۇڭگو - ەۆروپا (ورتا ازيا) كەزەكشى پويەزدەرىنىڭ سانى جىل سايىن ارتىپ، قورعاس تەمىر جول شەكارا وتكەلى ارقىلى قاتىناعان جۇڭگو - ەۆروپا (ورتا ازيا) كەزەكشى پويەزدەرىنىڭ جالپى مولشەرى 30 مىڭنان استى، قورعاس وتكەلى جۇڭگو - ەۆروپا كەزەكشى پويەزدەرىنىڭ باتىس ارناسىنىڭ ماڭىزدى تىرەگىنە اينالىپ، كوپتەگەن مەملەكەت پەن رايونعا قولايلىلىق جانە تيىمدىلىك جەتكىزدى.

قازىرگە دەيىن قورعاس تەمىر جول شەكارا وتكەلىندە قاتىنايتىن كەزەكشى پويەز جەلىسىنىڭ جالپى سانى 80 گە جەتىپ، 18 مەملەكەتتى، 45 قالا مەن رايوندى شارپىپ، حالىقارالىق زات اينالىمىنىڭ، قۇرلىق جولى تاسىمالىنىڭ ”التىن ارناسىنا“ اينالدى.

 قورعاس تەمىر جول وتكەلى بەكەتى

 جۇڭگو - قازاقستان قورعاس حالىقارالىق شەكارالىق سەلبەستىك ورتالىعىندا زات ساتىپ العان قازاقستاندىق ساياحاتشىلار

قورعاس جينحى بيوتەحنيكالىق شەكتى سەرىكتەستىگىنىڭ ٴوندىرىس سەحى

 قورعاس ۋنيۆەرسالدى قورعامالى باجى رايونى

 تاسىمال اۆتوموبيلدەرى كەدەننەن وتۋدە

 6 - ۇرپاق مەملەكەت قاقپاسى

 جۇڭگو - قازاقستان قورعاس حالىقارالىق شەكارالىق سەلبەستىك ورتالىعىنىڭ تۇتاسقان جولىنان ٴوتىپ جاتقان ساياحاتشىلار