ٴتىلشىمىز ليۋ چۇنشيڭ، ەرىكتى ٴتىلشى لاي شيڭرۇڭ حابارلايدى. 8 - ايدىڭ 1 - كۇنى ساعات 12 مولشەرىندە 80 گە جۋىق جولاۋشى وتىرعان، دۋلات وتكەلىنەن قازاقستاننىڭ الماتى قالاسىنا باراتىن ۇزاق جولدى اۆتوبۋزدىڭ جولعا شىعۋىمەن دۋلات حالىقارالىق اۆتوموبيل بەكەتى رەسمي ىسكە قوسىلدى، بۇل جۇڭگو - قازاقستان جولاۋشىلارى مەن ساۋدا بارىس - كەلىسىن ونان ارى جەبەيدى.

سول كۇنى تۇستەن بۇرىن ٴتىلشى دۋلات حالىقارالىق اۆتوموبيل بەكەتىنىڭ زالىنان جولاۋشىلاردىڭ كەزەككە تۇرىپ، قىزمەتكەرلەردىڭ جەتەكشىلىگىندە بەلەت ساتىپ الىپ، بەلەت تەكسەرتىپ، حاۋىپسىزدىك تەكسەرۋىنەن ٴوتىپ، اۆتوبۋزدى كۇتىپ تۇرعانىن كوردى.

حىناننىڭ جىڭجوۋىنان كەلگەن جولاۋشى گو يىڭيىڭ بىلاي دەدى: ”دۋلات حالىقارالىق اۆتوموبيل بەكەتى ىسكە قوسىلعانىن ەستىپ، وتباسىمىزداعى 3 جان قۇلجا قالاسىنان وسى ۇزاق جولدى اۆتوبۋزعا وتىردىق، دۋلات وتكەلى ارقىلى الماتىعا ساياحاتتاپ بارماقپىز. قۇلجا - دۋلات - الماتى اۆتوبۋزىنىڭ بەلەت باعاسى ادام باسىنا 200 يۋان، دۋلات وتكەلىنەن الماتىعا بارۋ وتە قولايلى“.

”دۋلات حالىقارالىق اۆتوموبيل بەكەتى ىسكە قوسىلعاننان كەيىن، جولاۋشىلاردىڭ بەلەت ساتىپ الۋى، بەلەت تەكسەرتۋى وتە قولايلى بولدى. ٴبىز ٴۇشىن ايتقاندا بۇل جەردەن ازداپ جولاۋشى الا كەتەتىن بولدىق“ دەدى اۆتوبۋز قوجايىنى داناگۇل ٴالي قىزى تىلشىگە، ونىڭ 2 ۇزاق جولدى اۆتوبۋزى بار ەكەن، 2012 - جىلدان باستاپ قۇلجا - دۋلات - الماتى حالىقارالىق ۇزاق جولدى جولاۋشى تاسىمال كاسىبىمەن اينالىسىپ، جولاۋشىلاردىڭ قارسى الۋىنا يە بولعان ەكەن.

ۇعىسۋعا قاراعاندا، دۋلات وتكەلى حالىقارالىق اۆتوموبيل بەكەتىنىڭ يەلەگەن جەر كولەمى 20 مىڭ شارشى مەتر بولىپ، ىشىنە اۆتوبۋز كۇتۋ زالى، بەلەت ساتۋ زالى، تازالىق بولمەسى، ەمدەۋ ٴبولىمى سياقتىلار ورنالاستىرىلعان. ىسكە قوسىلعاننان كەيىن، قازاقستانعا باراتىن حالىقارالىق جولاۋشى تاسىمال لەنياسى ەكەۋ بولادى، جەكە - جەكە: قۇلجادان شىعىپ دۋلات وتكەلىنەن ٴوتىپ، الماتىعا بارادى، دۇيسەنبى، سارسەنبى، جۇما كۇندەرى جولعا شىعادى؛ ەندى ٴبىرى، دۋلات وتكەلىنەن قالجات وتكەلىنە باراتىن كەزەكشى لەنيا، ٴار كۇنى اينالمالى اۆتوموبيل قاتىنايدى.

دۋلات وتكەلىنەن قازاقستاننىڭ قالجات وتكەلىنە دەيىن 2.8 كيلومەتر، الماتى قالاسىنا دەيىن 247 كيلومەتر، قۇلجا قالاسىنا دەيىن 68 كيلومەتر، چاپچال سىبە اۆتونوميالى اۋدانىنىڭ اۋدان ورتالىعىنا دەيىن 50 كيلومەتر، سولتۇستىكتە قورعاس قالاسىنا دەيىن 80 كيلومەتر، قاتىناسى توتەنشە قولايلى.

”قورعاستان الماتىعا دەيىنگى 378 كيلومەترلىك جولمەن سالىستىرعاندا، دۋلات وتكەلىنىڭ ارالىعى تىم جاقىن، ٴتىپتى دە كوپ ۋاقىت ۇتۋعا بولادى“. قورعاس حۋاشين قاتىناسقا قىزمەت وتەۋ شەكتى جاۋاپكەرشىلىك سەرىكتەستىگىنىڭ ورىنباسار ديرەكتورى باي كۇن بىلاي دەدى: ”سەرىكتەستىگىمىز نەگىزىنەن قورعاس، دۋلات شەكارا وتكەلى تاس جول جولاۋشى تاسىمال كاسىبىنە جاۋاپتى، وسى رەت قۇلجا - دۋلات - الماتى ارالىعىنا 7 ۇزاق جولدى اۆتوبۋز سالىندى، جولاۋشىلاردىڭ ىلە وبلىستىق جولاۋشى تاسىمال ورتالىعىنان، دۋلات حالىقارالىق اۆتوبۋز بەكەتىنەن بەلەت ساتىپ الىپ وتىرۋىنا بولادى“.

دۋلات شەكارا وتكەلى پارتكومىنىڭ ورىنباسار شۋجيى، باسقارۋ كوميتەتىنىڭ مەڭگەرۋشىسى لي چۇنشان بىلاي دەدى: دۋلات حالىقارالىق اۆتوكولىك بەكەتىنىڭ ىسكە قوسىلۋى شەكارا وتكەلىنىڭ قاتىناس ورتاسىن، قارجى قوسۋ دەڭگەيىن بارىنشا جاقسارتىپ، شەكارا اتتاعان ساياحات، شەكارانىڭ بازار ساۋداسى سياقتىلاردى جەبەيدى؛ شەكارادان كىرىپ - شىعاتىن تاس جولدىڭ ونىمدىلىگىن ساۋلەلەندىرۋ ارقىلى ىشكى - سىرتقى بارىس - كەلىستى ٴتىپتى دە ىشكەرىلەي كەڭەيتىپ، شەكارا وتكەلىنىڭ سىرتقا ەسىك اشۋ ۇلكەن ارناسى قۇرىلىسىن جەدەل ىلگەرىلەتىپ، سىرتقا باعىتتالعان ەكونوميكانىڭ دامۋىن پارمەندى جەبەيدى؛ دۋلات شەكارا وتكەلىنىڭ جوعارى دەڭگەيدە سىرتقا ەسىك اشۋىن ىلگەرىلەتىپ، شەكارا وتكەلدەرىنىڭ ”ازيا - ەۆروپا وزەگى پورتى“ رەتىندەگى قاتىناس تاسىمال قۋاتىن اناعۇرلىم جوعارىلاتىپ، دۋلات شەكارا وتكەلى ەكونوميكاسىنىڭ جوعارى ساپالى دامۋىنا دەم بەردى.

دۋلات حالىقارالىق اۆتوموبيل بەكەتىندەگى كولىك قاتىناۋ سالتىنان كورىنىس  ليۋ چۇنشيڭ فوتوسى