ٴوز ٴتىلشىمىز دۋ لەي، ەرىكتى ٴتىلشى لاي شۋەتيڭ

3 - ايدىڭ 6 - كۇنى قورعاس قالالىق اكىمشىلىك قىزمەت وتەۋ زالىنداعى قوعام حاۋىپسىزدىگى شەكارادان كىرىپ - شىعۋ تەرەزەسىنەن شاپالاق ٴۇنى كوتەرىلدى، قورعاس قالالىق قوعام حاۋىپسىزدىگى مەكەمەسىنىڭ ساياسي كوميسسارى جاۋ چياڭ اۆتونوميالى رايوندىق قوعام حاۋىپسىزدىگى مەڭگەرمەسى، اۆتونوميالى رايوندىق ايەلدەر بىرلەستىگى بىرلەسىپ تاراتقان شينجياڭ قوعام حاۋىپسىزدىگى ورگانىنىڭ ”ناتيجەسى كورنەكتى ايەل كومەكشى ساقشى“ داڭق كۋالىگىن شەكارادان كىرىپ - شىعۋدى باسقارۋ ۇلكەن اترەتىنىڭ باستىعى ۋ شيۋحۋانىڭ قولىنا تاپسىردى. بۇل داڭقتىڭ استارىندا ۋ شيۋحۋانىڭ كاسىپكە دەن قويىپ، شوگەلدىكپەن ىستەۋدى قىزمەت سەنىمى ەتىپ، تاڭداۋلى جەلەكتىلەردىڭ قىزمەت بارىسىنداعى اسەرلى ساتتەرى جاتىر.

ۋ شيۋحۋا 16 جىلدان بەرى شەكارادان كىرىپ - شىعۋ تەرەزەلىك ورنىندا قىزمەت ىستەپ كەلەدى، ول باستان - اياق زاڭ - ەرەجە بويىنشا جۇمىس بىتىرۋگە تاباندى بولىپ، باسشىلار مەن قىزمەتتەستەرى مويىنداعان كاسىپتىك تىرەكتى كادرعا اينالدى. ”ٴبىر بەلدەۋ، ٴبىر جولدى“ بىرگە قۇرۋ باستاماسىنىڭ العا قويىلۋىنا، سونداي - اق مەملەكەتتىڭ جەلىلەس ٴتيىمدى ساياساتتارىنىڭ سۇيەمەلدەۋىنە ىلەسە، قورعاس شەكارا وتكەلىندە شەكارادان كىرىپ - شىعاتىن ادامدار بارعان سايىن كوبەيىپ، قىزمەت مولشەرى دە بارعان سايىن ارتتى. 2023 - جىلى قورعاس شەكارا وتكەلى ارقىلى شەكارادان كىرىپ - شىققاندار 730 مىڭ ادام - رەتتەن استى. ۋ شيۋحۋا قىزمەت وتەۋ پوزيتسياسى مەن ساپاسىنىڭ جاقسى - جامان بولۋى قوعام حاۋىپسىزدىگى ورگانىنىڭ جالپى تۇلعالىق وبرازىنا تىكەلەي ىقپال جاسايتىندىعىن ابدەن بىلەدى، ول ٴىس بىتىرەتىن بۇقارانى ىستىق ىقىلاسپەن كۇتىپ الىپ، بارلىق جەردە بۇقارانىڭ ويلاعانىن ويلاپ، بۇقاراعا قىزمەت وتەيتىن ”جاناشىر“ بولىپ، ٴىس بىتىرەتىندەردىڭ جاپپاي مويىنداۋىنا يە بولادى.

بىلتىر 3 - ايدىڭ ورتا شەنىندە قورعاس ياڭگۋاڭ جيتۇڭ سيفرلى ساۋدا شەكتى سەرىكتەستىگى قاتىستى جاۋاپتىلارىن قازاقستانعا جىبەرىپ، قازاقستان كاسىپورىندارىمەن ساۋدا كەڭەسىن وتكىزۋى جانە توقتام جاساسۋى كەرەك بولادى، سەرىكتەستىك جىبەرگەن وسى جاۋاپتى ادام شەكارادان كىرىپ - شىعۋعا قاتىستى رەسمياتتاردى وتەۋى جانە كەمەلدەندىرۋى كەرەك ەدى. ۋاقىت وتە تىعىز بولعاندىقتان، كاسىپورىن جاۋاپتىسى سەلبەستىك ورايىنان ايىرىلىپ قالۋدان الاڭدايدى، ۋ شيۋحۋا جاعدايدى بىلگەننەن كەيىن، زاڭ بويىنشا جاسىل ارنا اشىپ بەردى، 2 كاسىپورىن قىزمەتكەرى ٴبىر اپتادان كەيىن قازاقستانعا ٴساتتى بارىپ، كەڭەس وتكىزۋ جانە توقتامعا قول قويۋ قىزمەتىن ورىندادى.

”سول كەزدە قازاقستاننىڭ كاسىپورىندارىمەن ساۋدا كەڭەسىنە دەر كەزىندە قاتىناسۋ ٴىسى شەكارادان كىرىپ - شىعۋدى باسقارۋ ۇلكەن اترەتىنىڭ كومەگىنەن ايرىلا المايتىن ەدى، ەگەر ۋاعىندا قاتىناسپاساق، ٴبىز سەنىمنەن ايرىلىپ، قارسى جاقتىڭ باسقا كاسىپورىنداردى تاڭداۋى ابدەن مۇمكىن ەدى“. قورعاس ياڭگۋاڭ جيتۇڭ سيفرلى ساۋدا شەكتى سەرىكتەستىگىنىڭ تيجارات جاۋاپتىسى شى حۇي بىلاي دەدى: ”سول كەزدە قازاقستان جاق كاسىپورنىنىڭ ۇسىنىسىن تاپسىرىپ العانىمىز توتەنشە توسىن بولدى، ٴبىز دەرەۋ تەرەزەگە بارىپ كۋالىك بىتىردىك، جاعدايدى ۇعىسقاننان كەيىن، ۋ شيۋحۋا بىزگە ساياساتتى ٴتۇسىندىردى ٴارى دەر كەزىندە جاسىل ارنا اشىپ، ٴبىزدىڭ ساۋدا ىستەرىن ٴساتتى ورىنداۋىمىزعا دەم بەردى“.

كۇندەلىكتى تەرەزەلىك قىزمەت وتەۋدەن، ينفورماتسيانى تەكسەرۋدەن سىرت، كوپ جاعدايدا ۋ شيۋحۋا دا كەزەكشىلىك قىزمەتىنە قاتىناسادى. بىلتىر 4 - ايدىڭ 25 - كۇنى قورعاستا قازاقستاننىڭ ٴبىر جۇك اۆتوموبيل شوفەرىنىڭ كەنەت جوعارى قان قىسىم اۋرۋى قوزعالىپ، اۋىز - مۇرنىنان قان كەتىپ، قاتەرلى جاعدايدا قالادى، ۋ شيۋحۋا جاعدايدى دەرەۋ جوعارىعا مالىمدەيدى ٴارى شۇعىل قۇتقارۋ جوباسىن ىسكە قوسادى، سونىمەن بىرگە، سىرتقى ىستەر كەڭسەسى، شەكارالىق تەكسەرۋ سياقتى تاراۋلاردى سايكەستىرىپ، كەدەننەن تەز ٴوتىپ، وتكەرمەلەپ جوتكەۋ دايىندىعىن الدىن الا جاقسى ىستەپ، شەكارا اتتاپ قۇتقارۋ - كومەك بەرۋدى ٴساتتى ورىنداپ، شوفەرگە قۇتقارۋدىڭ باعالى ۋاقىتىن ۇتىپ بەرەدى. شيپاحانادا ەمدەلگەننەن كەيىن، شوفەردىڭ اۋرۋ جاعدايى ٴونىمدى تىزگىندەلەدى.

ۋ شيۋحۋا بىلاي دەدى: ”حالىق ساقشىسى رەتىندە، قىزمەت ورنىندا شىڭدالۋ جانە جەتىلۋ بارىسىندا، مەن بىرتىندەپ كەيبىر تۇسىنىككە يە بولدىم، ول بولسا − شىن نيەتىممەن بۇقارانىڭ قامىن ويلاۋ، تەك شىن نيەتىممەن بۇقارا ٴۇشىن ٴىس تىندىرىپ، بۇقارانىڭ رازى بولعان بەينەسىن كورسەم بولدى ٴوزىمنىڭ كاسىپتىك قۇنىمدى ايگىلەگەندەي سەزىنەمىن، مۇنداي قاناعاتتانۋ سەزىمى مەن ماقتانىش سەزىمى مەنى اناعۇرلىم تولىمدى حالىق ساقشىسى بولىپ جەتىلۋگە جىگەرلەندىرىپ كەلەدى“.

كۇندەلىكتى قىزمەت بارىسىندا ۋ شيۋحۋا ۇيرەتۋگە، كومەكتەسۋگە، جەتەكتەۋگە ايرىقشا ٴمان بەرىپ، ٴوزىنىڭ قىزمەت تاجىريبەسى مەن قابىلەتىن جاڭا كەلگەن ساقشىلارعا ۇيرەتۋگە قۇلشىندى. قازىرگە دەيىن ول 10 نەشە شاكىرت تاربيەلەدى، شەكارادان كىرىپ ـ شىعۋ كۋالىگىن ٴبىتىرۋ قىزمەتىمەن شۇعىلدانعانىنا ٴبىر جىلعا جەتپەگەن حالىق ساقشىسى حان ۋىنلان سولاردىڭ ٴبىرى ەدى. ”العاش كەلگەندە دەگەندەي ۇيلەسە المادىم، قىزمەتىم وتە اۋىر بولدى، ٴار كۇنى 80 نەن استام ادامنىڭ جۇمىسىن بىتىرەمىن. شەكارادان كىرىپ - شىعۋ جۇمىسى قاراپايىم كورىنگەنىمەن، ٴىس جۇزىندە ٴتۇرلى كۇردەلى جاعدايلارعا تاپ بولاسىڭ. ۋ شيۋحۋا قىزمەت بارىسىندا ماعان تاجىريبەسىن ۇيرەتسە، تۇرمىس جاعىنان اپەكەمدەي جاناشىر بولا ٴبىلدى. ول مەنى كاسىپتى جەتىك يگەرۋگە ۇيرەتتى، شەكارادان كىرىپ - شىعۋدى باسقارۋ ۇلكەن اترەتى سىندى كوللەكتيۆپەن تەز ارادا بىتە قايناسىپ كەتۋگە جەتەلەپ، اۋىر قىزمەت باسىمى مەن ٴتۇرلى كۇردەلى ٴتارتىپ - بەلگىلەمەلەر الدىندا، تاجىريبەسى مول ۇستاز رەتىندە مەنىڭ كۇشتى ارقا تىرەگىمە اينالىپ، ساقشى ىستەرى جاعىنداعى قابىلەتىمدى شىڭداپ قالماستان، ساقشىلاردىڭ كاسىپتىك رۋحىنا دا مۇراگەرلىك ەتىپ، مەنى دۇرىس قۇن كوزقاراسى مەن ٴمورالدىق كوزقاراس ورناتۋعا جەتەكتەدى، مەن حالىق ساقشىسىنىڭ قىزمەت جاۋاپكەرشىلىگىن تەرەڭ تاني ٴتۇستىم“ دەدى حان ۋىنلان.

جاۋ چياڭ بىلاي دەدى: ۋ شيۋحۋا قىزمەت ورنىندا باستان ـ اياق شوگەل دە بيازى، سابىرلى دا قايسار قىزمەت پوزيتسياسىمەن شەكارادان كىرىپ ـ شىعۋدى باسقارۋ قىزمەتىنە ٴۇنسىز ۇلەس قوسىپ كەلەدى. ۋ شيۋحۋانىڭ ۇزدىك بەينەسى بۇقارانىڭ جاپپاي القاۋىنا يە بولىپ قالماستان، قوعام حاۋىپسىزدىگى قوسىنىندا ۇلگىلىك رول اتقارىپ، بارلىق حالىق ساقشىلارىن، كومەكشى ساقشىلاردى وزات تيپتەردى ۇلگى ەتىپ، قوسىن قۇرىلىسىن اناعۇرلىم كۇشەيتىپ، حالىق ساقشىلارىنىڭ، كومەكشى ساقشىلاردىڭ جالپىلىق قابىلەتىن ۇزدىكسىز جوعارىلاتىپ، حالىق ٴۇشىن ٴتىپتى دە جاقسى قىزمەت وتەۋ وبرازىن ايگىلەپ، قورعاستىڭ جوعارى ساپالى دامۋىنا قوعام حاۋىپسىزدىگى ۇلەسىن قوسۋعا شابىتتاندىردى.