تىكە تارالىمدا زات ساتۋ، مانتيورلىققا تاربيەلەۋ، بولكا پىسىرۋ...

حانبين اۋىلىنىڭ ونەرگە باۋلۋ كۋرسىسىنىڭ جەمىسى مول

ٴتىلشىمىز جاڭ جينفىڭ حابارلايدى. 3 ـ ايدىڭ 15 ـ كۇنى كۋرسانتتار قۇلجا قالاسى حۋاجىجيا كاسىپتىك شەبەرلىككە تاربيەلەۋ مەكتەبىنىڭ وقىتۋشىسى لي ۋيدىڭ جەتەكشىلىگىندە ەلەكتر سىمدارىن جالعاپ جاتتى، ولار 3 ـ 5 ادام ٴبىر گرۋپپا بولىپ، ٴبىر جاعىنان جۇمىس جۇرگىزىپ، ٴبىر جاعىنان تالقى وتكىزدى. كۋرس مازمۇنى ەلەكتر سىم جولى كارتاسى، ەلەكترون تەحنيكاسى نەگىزدەرى، ەلەكتردەن حاۋىپسىز پايدالانۋ، ٴبىر فازالى اينىمالى توك جولى، ايىرىپ - قوسقىشتى ۇياشىققا قالاي جالعاۋ، ەلەكتر ساعاتىنا قالاي جالعاۋ ٴادىسى سياقتىلاردى قامتىپ، كۋرسانتتار 3 - ايدىڭ 4 - كۇنىنەن باستاپ، 35 كۇن كۋرسقا قاتىناسادى، كۋرس اياقتاعاننان كەيىن نازاريالىق جانە ناقتى امالياتتىق ەمتيحانعا قاتىناستىرىلىپ، ناتيجەسى تولىمدى بولعاندارعا ەڭبەك تاراۋلارى ٴبىر تۇتاس تاراتقان باستاۋىش دارەجەلى مانتيورلىق كۋالىگى بەرىلەدى ەكەن.

ٴدوڭمالى قىستاعىنان كەلگەن كۋرسانت جاڭ ۋي بىلاي دەدى: ”قىسقا كەسكىندى قالاي قيۋدى، اقشا تابۋدىڭ 12 ۇلكەن ۇلگىسىن جانە تىكە تارالىمدا زاتتى قالاي ساتۋدى ۇيرەنىپ الدىم. مەن جاڭادان تىركەلگەن ەسەپ ٴنومىرى ارقىلى ىستەتكەنىمدە، 30 مينۋتقا جەتپەيتىن ۋاقىتتا قولداۋشىلارىم 1000 ادامعا، جاڭا جانكۇيەرىم 20 عا جەتتى. بۇل كاسىپتى ۇناتىپ قالدىم“.

قۇلجا قالاسى حانبين اۋىلدىق حالىق ۇكىمەتى ەڭبەك قامتاماسىزداندىرۋ ورنىنىڭ باستىعى نۇرشان نۇسىپبەك قىزى بىلاي دەدى: ”بىلتىر 12 ـ ايدان باستاپ، ىلگەرىندى - كەيىندى تىكە تارالىمدا زات ساتۋ، مانتيورلىق كۋرسى، بولكا پىسىرۋ سياقتى 7 كەزەك كۋرس اشىپ، جيىنى 330 دان استام كۋرسانت تاربيەلەدىك. كۋرستان بۇرىن، كۋرس اشاتىن قۇرىلىمدارمەن جانە كاسىپورىندارمەن جۇمىستاندىرۋ توقتامىنا قول قويىستىق ٴارى قىزمەتكەر قابىلداۋ جينالىسى فورماسىمەن قاراستى اۋماقتاعى كاسىپورىندارمەن بىرگە جۇمىستاندىرۋ ورىندارىن ازىرلەپ، كۋرسانتتاردىڭ جۇمىستانۋىن بەلسەنە قامتاماسىز ەتتىك“.

سۋرەتتە: مانتيورلىققا تاربيەلەۋ كۋرسى.

سۋرەتتى جاڭ جينفىڭ تۇسىرگەن