گۋ رۇڭ (ٴوز ٴتىلشىمىز)
”جەتىلدىرگەن كۇرىشىمىزدىڭ ٴونىم مولشەرى جوعارى بولۋى نەگىزىندە، ساپالى، ٴدامدى، قورەكتىـك قـۇنى اناعۇرلىم جوعارى بولسا ەكەن دەيمىز“. 4 ـ ايدىڭ 28 ـ كۇنى ىلە وبلىستىق اۋىل شارۋاشىلىق عىلمي زەرتتەۋ ورنى كۇرىش زەرتتەۋ كەڭسەسىنىڭ زەردەلى جىلىجايىندا، اتالعان زەرتتەۋ ورنى پارتكومىنىڭ مۇشەسى، ورىنباسار باستىعى رىن لەي گرۋپپا باستاپ، كۇرىش مايساسىنىڭ جاعدايىن تەكسەرگەندە تىلشىگە وسىلاي دەدى.
رىن لەي 18 جىلدىق جاستىق كوكتەمى مەن اقىل ـ پاراساتىن قىرۋار ساپالى كۇرىش تۇقىمىن دەن قويا جەتىلدىرۋگە ارناپ، جەرگىلىكتى ورىنداعى شارۋالار ٴۇشـىن مول ٴونىم الۋدىڭ تۇقىمىن سەپتى.
2005 - جىلى رىن لەي ىلە وبلىستىق اۋىل شارۋاشىلىق عىلمي زەرتتەۋ ورنىنا كەلىپ، كۇرىش تۇقىمىن جەتىلدىرۋ جانە ەگۋ تەحنيكاسىن زەرتتەۋ جولىنا تۇسەدى. سول كەزدەردى ەسىنە العاندا، رىن لەي تەبىرەنە بىلاي دەدى: ”ول كەزدە شارت - جاعداي وتە جاپالى بولاتىن، ٴبىراق مەنىڭ ەگىن شارۋاشىلىعىن زەرتتەۋگە قىزعىندىلىعىم ەشقاشان سۋىعان ەمەس. عىلىم ـ تەحنيكا ارقىلى جاڭالىق اشقاندا عانا اۋىل شارۋاشىلىعى ٴوندىرىسىنىڭ ونىمدىلىگىن جوعارىلاتىپ، شارۋالاردىڭ اناعۇرلىم جاقسى تۇرمىس كەشىرۋىنە مۇمكىندىك جاساۋعا بولاتىنىن قانىق بىلەمىن“.
تاباندىلىعى مەن قۇلشىنىسى ارقاسىندا رىن لەي ىلگەرىندى ـ كەيىندى ”شينجياڭ كۇرىشى - 43“، ”شينجياڭ كۇرىشى - 46“ سياقتى ساپالى كۇرىش سورتتارىن جەتىلدىرىپ، شارۋالاردى اناعۇرلىم مول سورتتى تۇقىممەن قامدادى. ول كەندىر جارعاقپەن مايسا جەتىلدىرۋ، قاعىر جەردە قۇنتتاپ ەگۋ سياقتى وزىق تەحنيكالاردى بەلسەنە ەنگىزىپ، كۇرىش مايساسىن جەتىلدىرۋ بارىسىنداعى جەلىلەس قيىن ماسەلەلەردى شەشتى. بۇل تەحنيكالاردىڭ جالپىلاستىرىلۋى مەن قولدانىلۋى كۇرىشـتىڭ ٴونىم مولشەرى مەن ساپاسىن جوعارىلاتىپ قالماي، شارۋالاردىڭ كىرىسىن ارتتىرىپ، جەرگىلىكتى ەكونوميكانىڭ دامۋىن ىلگەرىلەتتى.
كوپ جىلدىق ۇلگى كورسەتىپ جالپىلاستىرۋ بارىسىندا رىن لەي جەتىلدىرگەن كۇرىش سورتىنىڭ ىلە اڭعارىندا جالپىلاستىرىلعان جالپى جەر كولەمى ٴبىر ميلليون مۋدان اسىپ، مۋ باسىنان ارتقان تابىس 90 يۋان اينالاسىندا بولىپ، جالپى تابىس 180 ميلليون يۋان ارتقان.
رىن لەي عىلىم - تەحنيكالىق قىزمەت وتەۋ قيمىلىنا بەلسەنە ات سالىسىپ، اۋىل شارۋاشىلىعى، اۋىل - قىستاق، شارۋالار ىستەرىنە جۇرەك قانىن سارقا جۇمسادى. ول ٴار جىلعى جۇمىس باسىندا كوزدەن كەشىرۋ ٴماجىلىسىن ۇزبەي اشىپ، شارۋالاردى، تەحنيكتەردى تاربيەلەپ، ولاردىڭ وزىق اۋىل شارۋاشىلىق ەگىمشىلىك تەحنيكاسى مەن باسقارۋ ٴادىسىن يگەرۋىنە كومەكتەستى. ول ۇزاق ۋاقىت شاعىن، ۇساق كاسىپورىندار مەن سەلبەستىك كووپەراتيۆتەرىنە قىزمەت وتەپ، عىلىم ـ تەحنيكادا ۇلگى كورسەتەتىن وتباسىلارى مەن كۇرىش تۇقىمىن وندىرەتىن وتباسىلارىن جەتىلدىرىپ، جەرگىلىكتى ورىنداعى شارۋالارعا جان ـ جاقتى تەحنيكالىق قولداۋ كورسەتتى جانە جەتەكشىلىك ەتتى.
رىن لەيدىڭ قاجىرلى ەڭبەگى قوعامنىڭ جاپپاي مويىنداۋىنا يە بولدى. ول جازعان ىلە وبلىسىنىڭ اۋىل شارۋاشىلىق جەرگىلىكتى ولشەمى سياقتى عىلىم - تەحنيكالىق ديسسەرتاتسيالارى، ول يە بولعان قولدانىلمالى جاڭا تيپ پاتەنتى جانە كومپيۋتەر جۇمساق بولشەگى سياقتى كوپتەگەن جەتىستىكتەرى، اۆتونوميالى رايوننىـڭ عىـلىم - تەحنيكا العاباسـارلىعى بويىنشا 3 - دارەجەلى سيلىققا يە بولۋمەن بىرگە، ”5 شاعىن“ بۇقارالىق جاڭالىق جاراتۋ جەتىستىكتەرىنىڭ باستاماشىسى جانە اۆتونوميالى رايوننىڭ شينجياڭدى گۇلدەندىرۋ مەدالى سياقتى داڭقتارعا يە بولدى. وسى داڭقتاردىڭ استارىندا رىن لەيدىڭ ەگىن شارۋاشىلىق ىستەرىنە دەگەن تالپىنىسى مەن قاجىماي - تالماي ىستەگەن ەڭبەگى جاتىر.
رىن لەي: ”جەرگە تامعان تەر تامشىسى تەگىن كەتپەيدى“. بۇل رىن لەيدىڭ اۋزىنان تاستامايتىن جالعىز اۋىز ٴسوزى ەدى. قازىر ول باستاعان جاڭالىق اشۋ قىزمەت كەڭسەسى جاڭا ساتىعا قادام تاستاۋدا. ”مەن ٴوز تاجىريبەمدى كوپ ادامدارعا ۇيرەتىپ، اۋىل ـ قىستاقتى گۇلدەندىرۋگە اقىل ـ پاراساتىم مەن كۇش ـ قۋاتىمدى ارنايمىن“ دەدى رىن لەي باتىل تۇردە.