عىلىم - تەحنيكالىق اۋىس - كۇيىستى كۇشەيتتى

بيڭتۋان مەن جەرگىلىكتى ورىن بىرلەسىپ جەر جاڭعاعىنان مول  ٴونىم الۋدان  ۇلگى كورسەتەتىن  اتىز قۇردى 

ٴتىلشىمىز دۋ لەي، ەرىكتى ٴتىلشى ياۋ چيڭ حابـارلايـدى. 5 -ايـدىڭ 28 ـ كۇنى بيـڭـتۋان 4 ـ شىسى 63 ـ تۋان 6 ـ ليانىنىڭ جۇمىسشىسى لي جىڭحۋا وتباسىنىڭ 100 مۋلىق جەر جاڭعاعى اتىزىندا اۆتونوميالى رايون، اۆتونوميالى وبلىس، بيڭتۋان 4 ـ شىسىنان كەلگەن قاتىستى ماماندار باس قوسىپ، تەحنيكالىق جاقتان بىرلەسىپ جەتەكشىلىك ەتتى. ىلە وبلىسى مەن بيڭتۋان 4 - شىسى بىرگە قۇرعان جەر جاڭعاعىنان جوعارى ٴونىم الاتىن سىناق اتىزىندا بيىل ٴىرى جەمىستى جەر جاڭعاعىنان مۋ باسىنا ورتا ەسەپپەن 1.5 توننا (جاس جەمىس) جوعارى ٴونىم الۋ نىساناسى بەلگىلەنگەن - دى.

لي جىڭحۋانىڭ جەر جاڭعاعىن ەككەنىنە 15 جىل بولدى، تاجىريبەسى مول، جاڭا تەحنيكانى، جاڭا سورتتى قابىلداۋعا بەلسەندى، سونىمەن بىرگە، ونىڭ ەگىستىك جەرى قۇمايتتاۋ بولعاندىقتان جەر جاڭعاعىنىڭ گۇل اشىپ، جەمىس بەرۋىنە پايدالى، دەرت - دەربەزدىڭ، زياندى جاندىكتەردىڭ زاردابى ازداۋ بولعاندىقتان جەر جاڭعاعىنىڭ قاۋىزى تازا، ساتىلىمى جاقسى ەدى. 2023 - جىلى قۇمايتتانعان قۇنارسىز جەردەن جوعارى ٴونىم الىپ، ونىمدىلىكتى ارتتىرۋ ٴۇشىن ىلە وبلىسى بيڭتۋان 4 - شىسىنىڭ اۋىل شارۋاشىلىعى، اۋىل - قىستاق تاراۋلارىمەن بىرلەسىپ، تۇڭعىش رەت جەر جاڭعاعىنان جوعارى ٴونىم الاتىن سىناق اتىزىن قۇردى. بيڭتۋان مەن جەرگىلىكتى ورىننىڭ عىلمي زەرتتەۋ ورىندارى ارتىقشىلىقتارىن قابىلداپ، جەتەرسىزدىكتەرىن تولىقتاپ، ابزالدىلىقتارىمەن ٴبىرىن - ٴبىرى جەبەپ، جاڭا سورتتاردى، جاڭا تەحنيكالاردى كۇش سالا جالپىلاستىرىپ، قۇمايتتانعان 11 مۋ جەرگە جەر جاڭعاعىن ەكتى. بيڭتۋان مەن جەرگىلىكتى ورىن اۋىل شارۋاشىلىق عىلمي زەرتتەۋ ورنىنداعى تەحنيكتەردىڭ بىرلەسىپ جەتەكشىلىك ەتۋىندە ەگىلگەن ٴىرى جەمىستى جەر جاڭعاعىنىڭ مۋ باسىندىق ٴونىم مولشەرى 150 كيلوگرامعا، ۇساق جەمىستى جەر جاڭعاعىنىڭ مۋ باسىندىق ٴونىم مولشەرى 100 كيلوگرامعا جەتكىزىلىپ، مۋ باسىندىق تازا پايدا 3 مىڭ يۋاننان اسقان.

بيىل ىلە وبلىسى مەن بيڭتۋان 4 ـ شىسىنىڭ اۋىل شارۋاشىلىعى، اۋىل ـ قىستاق تاراۋلارى بيڭتۋان مەن جەرگىلىكتى ورىننىڭ بىرلەسكەن ىقپالداستىعىن مىقتى يگەرىپ، ىلە وزەنى اڭعارىنداعى جەر جاڭعاعى سورتىن ەنگىزۋ، تۇقىم جەتىلدىرۋ، ەگۋ، دەرت ـ دەربەزدەن جان ـ جاقتى ساقتانۋ، ٴتۇسىمىن ارتتىرۋ سياقتى جاقتاردا ىشكەرىلەي پىكىر اۋىستىردى. ىلە وبلىستىق اۋىل شارۋاشىلىق عىلىم - تەحنيكا زەرتتەۋ ورنى اۆتونوميالى رايوندىق اۋىل شارۋاشىلىق عىلىم اكادەمياسىمەن بىرلەسىپ، جوعارى ٴونىمدى سىناق اتىزىن جەر جاڭعاعى تۇقىمىمەن، تىڭايتقىشپەن، ٴدارى - دارمەكپەن تەگىن قامداپ، قۇمايتتانعان جەرلەردە جەر جاڭعاعىنىڭ ۇيلەسىمدىلىگىن سارالاۋ، سۋ مەن تىڭايتقىشتى ٴبىر تۇلعالاندىرۋ، جوعارى ٴونىم الۋ سياقتى تاجىريبەدەن ۇلگى كورسەتەتىن قىزمەتتەردى ورىستەتىپ، مۋ باسىندىق تازا پايدانى 3 مىڭ 500 يۋاننان اسىرۋعا كۇش سالدى.

بيڭتۋان 4 ـ شىسى اۋىل شارۋاشىلىق عىلمي زەرتتەۋ ورنىنىڭ تەتە اعا زەرتتەۋشىسى جاڭ شيچين تىلشىگە بىلاي دەدى: بيڭتۋان مەن جەرگىلىكتى ورىننىڭ سەلبەسە ۇلگى كورسەتۋى − جەتىستىكتەردى كادەگە جاراتۋدىڭ ٴونىمدى ٴتاسىلى، ونان دا ماڭىزدىسى، ىلە وزەنى اڭعارىنداعى شارۋالاردىڭ كىرىسىن ارتتىرۋعا دەم بەرەتىن ناقتى، يگى ٴىس. بيىل بيڭتۋان 4 - شىسى اۋىل شارۋاشىلىق عىلمي زەرتتەۋ ورنىنىڭ جەر جاڭعاعى تاقىرىپتىق گرۋپپاسى جەكە - جەكە جۇڭگو اۋىل شارۋاشىلىق عىلىم اكادەمياسى، سىچۋان ولكەلىك اۋىل شارۋاشىلىق عىلىم اكادەمياسى، اۆتونوميالى رايوندىق اۋىل شارۋاشىلىق عىلىمدار اكادەمياسى، شينجياڭ تىڭ يگەرۋ عىلىم اكادەمياسى، ىلە وبلىستىق اۋىل شارۋاشىلىق عىلمي زەرتتەۋ ورنى سياقتى شينجياڭنىڭ ٴىشى - سىرتىنداعى كوپتەگەن زەرتتەۋ ورىندارىنان 30 دان استام جەر جاڭعاعى سورتىن ەنگىزدى ٴارى 2023 - جىلعى تاجىريبە جەتىستىكتەرىمەن ۇشتاستىرىپ، سورتتى ساراپتاۋ، سالىستىرۋ، ايگىلەۋ تاجىريبەلەرىن ۇزدىكسىز ورىستەتىپ، جەر جاڭعاعىن جەتىلدىرۋ قىزمەتىنە بەرىك نەگىز قالادى.

لي جىڭحۋا بىلاي دەدى: بۇرىن تەحنيكا مەن سورتتىڭ جاڭالانۋى قيىن بولعاندىقتان، جەر جاڭعاعىنىڭ مۋ باسىندىق ٴونىم مولشەرى جوعارىلامادى. بىلتىر جىل باسىنان باستاپ وتباسىمىز ەككەن جەر جاڭعاعىنىڭ ٴونىم مولشەرى تىڭ ورەگە جەتتى، بۇل مەنىڭ جەر جاڭعاعىن ەگۋگە سەنىمىمدى ارتتىردى. بيىل جىل باسىندا مەن 200 مىڭ يۋانعا جەر جاڭعاعىن جيناۋ ماشيناسى، تراكتور، تۇقىم سەبۋ ماشيناسى، اقتاۋ ماشيناسى سياقتى ماشينالاردى ساتىپ الىپ، جەر جاڭعاعىنىڭ ەگىس كولەمىن 100 مۋعا كەڭەيتتىم.

اۆتونوميالى رايوندىق مايلى داقىل كاسىبى تەحنيكا جۇيەسى ىلە ۋنيۆەرسالدى تاجىريبە پۋنكتىنىڭ باستىعى، ىلە وبلىستىق اۋىل شارۋاشىلىق عىلىمىن زەرتتەۋ ورنى جاڭا تەحنيكا كەڭسەسىنىڭ مەڭگەرۋشىسى سۇي حۇڭلياڭ بىلاي دەپ قارادى: جوعارى ٴونىمدى قۇرۋ قىزمەتىن اتقارۋ دەگەنىمىز جاڭا تەحنيكانى، جاڭا سورتتى سىناق ەتىپ، تاجىريبەلەردى ۇزدىكسىز قورىتىندىلاپ، ەڭ سوڭىندا جەرگىلىكتى ورىننىڭ ەگىمشىلىك ۇلگىسى مەن تاجىريبەسىنە ۇيلەسەتىن سورتتى جالپىلاستىرىپ، ىلە وزەنى اڭعارىنداعى جەر جاڭعاعىن ەگۋ اۋماعىنىڭ ٴتۇسىمىن، ونىمدىلىگىن ارتتىرۋ. ٴبىز بيڭتۋان مەن جەرگىلىكتى ورىن «ٴبىر تۇتاس جۇيەسىنە» يدەياسىنا تاباندى بولىپ، اۋىل شارۋاشىلىعى تەحنيكاسى جاعىنداعى اۋىس ـ كۇيىستى كۇشەيتۋ ارقىلى جەر جاڭعاعىنان بىرگە مول ٴونىم الىپ، تۇيىندەر ارقىلى اۋماقتى جەتەكتەپ، دامۋ شاراسىن بىرگە قاراستىرىپ، بيڭتۋان مەن جەرگىلىكتى ورىنداعى بۇقاراعا شىن مانىندە ونىمدىلىكتى ارتتىرىپ، يگىلىك جاراتىپ، ىلە وبلىسىنىڭ اۋىل شارۋاشىلىعىنىڭ، اۋىل ـ قىستاقتارىنىڭ جوعارى ساپالى دامۋىنا ۇلەس قوسامىز.

شينجياڭ جينحىيۋان تۇقىم شارۋاشىلىعىن دامىتۋ شەكتى سەرىكتەستىگى بيڭتۋان مەن جەرگىلىكتى ورىننىڭ جەر جاڭعاعىنان جوعارى ٴونىم الۋدى بىرلەسىپ ىلگەرىلەتۋ قىزمەتىنىڭ يگىلىگىن كورگەن كاسىپورىن، بيىل بيڭتۋان مەن جەرگىلىكتى ورىن بىرلەسىپ كاسىپورىندارعا تەحنيكالىق جاقتان تەگىن جەتەكشىلىك ەتىپ، قىزمەت وتەۋدە.

اتالعان سەرىكتەستىكتىڭ چاپچال سىبە اۆتونوميالى اۋدانىنداعى 300 مۋلىق جەر جاڭعاعى ەگىمشىلىك بازاسىندا جەر جاڭعاعى ٴتۇيىن تاستاۋ مەزگىلىندە تۇر. مەملەكەتتىك جەر جاڭعاعى كاسىبى تەحنيكا جۇيەسى شينجياڭ تاجىريبە پۋنكتىنىڭ باستىعى، اۆتونوميالى رايوندىق اۋىل شارۋاشىلىق عىلىم اكادەمياسى ەكونوميكالىق داقىلداردى زەرتتەۋ ورنىنىڭ زەرتتەۋشىسى لي چياڭ مايسا كەزىندە بايقالعان جاپىراعى سارعايۋ، تامىر ساباعى ٴشىرۋ دەرتى، ٴدارى زيانى سياقتى ۇنەمى كەزدەسەتىن ماسەلەلەر جونىندە باسقارۋ پىكىرىن ورتاعا قويدى ٴارى العاشقى گۇل اشۋ مەزگىلىندە تىڭايتقىش پەن سۋدى باسقارۋ جونىندە سايكەستى جوبا جاسادى.

شينجياڭ جينحىيۋان تۇقىم شارۋاشىلىعىن دامىتۋ شەكتى سەرىكتەستىگىنىڭ باس ديرەكتورى ۋان جيشياڭ بىلاي دەدى: بۇل سەرىكتەستىگىمىزدىڭ جەر جاڭعاعىن ەككەن تۇڭعىش جىلى، اۆتونوميالى رايوننىڭ، ىلە وبلىسىنىڭ، بيڭتۋان 4 - شىسىنىڭ قاتىستى ماماندارىنىڭ تەحنيكالىق جاقتان بىرلەسىپ جەتەكشىلىك ەتۋىنىڭ ارقاسىندا سەنىمىمىز ارتا ٴتۇستى. بولاشاقتا ٴبىز جەر جاڭعاعى كاسىپ تىزبەگىن بىرتىندەپ قۇرىپ، جەرگىلىكتى ورىننىڭ جەر جاڭعاعى كاسىبىنىڭ دامۋىن جەتەكتەپ، شارۋالاردىڭ كىرىسىن ارتتىرىپ، اۋقاتتانۋىن جەبەيمىز.