تىلشىلەرىمىز مىڭ شيا، ليۋ دۇڭيۋە حابارلايدى. 10 ـ ايدىڭ 25 ـ كۇنى ىلە كاسىپتىك ـ تەحنيكالىق شۋەيۋانىنىڭ قۇرىلعىلى اۋىل شارۋاشىلىعى جىلىجايىنا بارعانىمىزدا تۇقىم جەتىلدىرۋ سورەسىندەگى شينجياڭ تۇقىمدىق ساسىر مايساسىنىڭ تەبىندەي وسكەنىن كوردىك. شينجياڭ ساسىرى شاتىرشا گۇلدەر تۇقىمداسىنا جاتاتىن كوپ جىلدا ٴبىر رەت جەمىس بەرەتىن ٴشوپ تەكتەس وسىمدىك، 5 - 8 جىلدا ارەڭ گۇل اشىپ جەمىس بەرەدى، ول شينجياڭدا عانا وسەتىن دارىلىك وسىمدىك، وتە تاماشا دارىلىك قۇنعا يە. ساسىردىڭ جاس ساباعى مەن جاپىراعىن كوكونىس رەتىندە پايدالانۋعا بولادى، ساسىردىڭ تامىرىن نەمەسە تامىر تارامشالارىن كەسىپ العاندا ٴبولىنىپ شىعاتىن سۇيىقتىق ماي بولىپ قاتادى. بۇل زەرتتەۋ ورنىنداعىلاردىڭ 4 جىلعا سوزىلعان زەرتتەۋ سىناعى ارقىلى قازىر ٴبىر جىلدا، 2 جىلدا وسەتىن شينجياڭ ساسىر مايساسىنىڭ قولدا جەتىلدىرىلگەن مولشەرى 50 مىڭ تۇپتەن استى.

”ەلىمىزدە شاتىرشا گۇلدى ساسىر تۇقىمداسى شينجياڭ ساسىر گۇلى، ۇلكەن جەمىستى ساسىر گۇلى سياقتى 26 تۇرگە بولىنەدى، قازىر ٴدارى قولدانباسىنا ەنگىزىلگەن وسىمدىكتىڭ 2 ٴتۇرى بار، شينجياڭ ساسىرى سونىڭ ىشىندە“. ىلە كاسىپتىك تەحنيكالىق شۋەيۋانى اۋىل شارۋاشىلىق ينجەنەرياسى شۋەيۋانىنىڭ ورىنباسار باستىعى ليۋ جۇڭچۋان بىلاي دەپ تانىستىردى: ”شينجياڭ ساسىرى شينجياڭنىڭ ەرەكشە ٴتۇرى، نەگىزىنەن ىلە وبلىسىنىڭ قۇلجا اۋدانى، نىلقى اۋدانى سياقتى جەرلەرگە تارالعان. سوڭعى جىلدارى جابايى شينجياڭ ساسىرى ادامداردىڭ بەتالدى ورۋى سياقتى كوپتەگەن سەبەپتەرگە بايلانىستى تارالۋ كولەمى ۇزدىكسىز تارايدى، بۇل ٴبىزدى جاساندى جولمەن مايسا وسىرۋمەن شۇعىلدانۋعا ماجبۇرلەگەن باستى سەبەپ“.

شينجياڭ ساسىرى جازى ىستىق، قىسى سۋىق، تەمپەراتۋرا وزگەرىسى كۇشتى، كۇن نۇرىنىڭ ٴتۇسۋى ۇزاق، جاۋىن - شاشىنى از قۋاڭ وڭىرلەردە وسەدى، كوپ جىلدار بويىندا ٴبىر رەت گۇل اشىپ، جەمىس بەرەتىن وسىمدىك، گۇل اشىپ، جەمىس بەرگەننەن كەيىن وسىمدىك ٴتۇبى ٴولىپ قالادى. ساسىردىڭ قۇنى جوعارى بولعاندىقتان ادامدار ٴتىپتى دە كوپ ساسىرعا قول جەتكىزۋ ٴۇشىن ىلعي ساسىردىڭ ساباعىن ورىپ الىپ، ساسىردى گۇل اشىپ، جەمىس بەرە المايتىن كۇيگە ٴتۇسىرىپ، ونىڭ تابيعي ٴوسىپ - جەتىلۋىنە نۇقسان جەتكىزدى. ليۋ جۇڭچۋان تىلشىگە بىلاي دەدى: وتكەن عاسىردىڭ 50 ـ جىلدارىنداعى ماتەريالداردا كورسەتىلۋىنشە، ساسىردىڭ وسكەن اۋماعى ەڭ كوپ بولعاندا 50 مىڭ مۋعا جەتكەن ەكەن، قازىر 2000 مۋ اينالاسىندا عانا بولىپ، ساسىر مايساسىن جەتىلدىرۋ كەزەك كۇتتىرمەيتىن جاعدايدا تۇر.

ليۋ جۇڭچۋان 2009 ـ جىلدان باستاپ شينجياڭ ساسىرىنا نازار اۋدارا باستادى، 2020 ـ جىلدان باستاپ شينجياڭ ساسىرىن ٴوسىرۋدى زەرتتەۋمەن شۇعىلداندى، 4 جىل ىشىندە ول شينجياڭ ساسىرىنىڭ تۇرلىشە تەمپەراتۋراداعى بۇرشىكتەۋ جاعدايىن، ٴوسىرۋ تەحنيكاسىن، دارەجەگە ٴبولىپ ٴوسىرۋ ۇلگىسىن زەرتتەپ، ەڭ سوڭىندا قولعا ۇيرەتىپ سۇرىپتاپ جەتىلدىردى، قازىر ٴبىر جىلدا 40 مىڭ تۇپكە جۋىق تۇقىم مايساسىن ٴساتتى جەتىلدىرىپ، ەكى جىلدا 20 مىڭ ٴتۇپ مايسا جەتىلدىردى.

”شينجياڭنىڭ تۇقىمدىق ساسىر مايساسىن جەتىلدىرۋدىڭ قيىندىعى مايسانىڭ كوكتەۋىنىڭ بىركەلكى بولماۋىندا تۇر، زەرتتەۋ، سۇرىپتاپ جەتىلدىرۋ ارقىلى قازىر بىركەلكى ەگۋ، ولشەمدەندىرىپ ەگۋدەن ۇلگى كورسەتۋ تەحنيكاسى ٴساتتى اتقارىلدى“. ليۋ جۇڭچۋان بىلاي دەدى: ”شينجياڭ ساسىرىنىڭ ٴوسىپ تۇرعانداعى ٴتاجىنىڭ كەڭدىگى 1.5 − 2 مەترگە جەتەدى، تۇرقىنىڭ ەڭ ۇزىنى 1.5 مەترگە جەتەدى. ورۋدان بۇرىن قايتكەندە جەردىڭ قۇنىن تولىق ساۋلەلەندىرىپ، شينجياڭ ساسىر ساباعى مەن جاپىراعىن ۇيلەسىمدى اشۋ ٴبىزدىڭ قازىرگى زەرتتەۋىمىزدىڭ ماڭىزدى ٴتۇيىنى، مىسالى، ۇيلەسىمدى ەگۋ ۇلگىسىن قولدانىپ، كىرىستىرىپ ەگۋ، جەر بەتىندەگى ساباعىن، جاپىراقتارىن ەمدىك ازىق ەتۋ سياقتىلار“. 

ليۋ جۇڭچۋان بىلاي دەدى: شينجياڭ ساسىرى ەرەكشە جۇڭگوشا ٴشوپ ٴدارى، دەنساۋلىق ساقتاۋ تۇرىندەگى دارىلىك قۇنى جوعارى. ولار ولشەمدەندىرىپ ەگۋ ارقىلى شينجياڭ ساسىرى شارۋاشىلىعىن كاسىپ سالالاندىرۋدى جۇزەگە اسىرىپ، جەرگىلىكتى بۇقارانىڭ كىرىسىن ارتتىرىپ، اۋقاتتانۋىنا تىڭ ارتۋ ٴتۇيىنىن قوسۋدى ٴۇمىت ەتەدى.