قورعاس ەكونوميكالىق اشۋ رايونىنداعى شينجياڭ حىڭتاي توقىماشىلىق شەكتى سەرىكتەستىگىنىڭ سەحىندا 200 گە جۋىق تولىق اۆتوماتتانعان زەردەلى قولعاپ جاساۋ ماشيناسى جوعارى قارقىنمەن جۇمىس جۇرگىزۋدە.      سۋرەتتى لۋ جۇڭ تۇسىرگەن

تىلشىلەرىمىز لۋ جۇڭ، ۋاڭ ليلي حابارلايدى. ماشينالار گۇرىلدەپ، جۇمىسشىلار قاربالاستىققا ٴتۇستى … كوكتەم مەرەكەسى ٴالى اياقتالا قويماسا دا ىلەنىڭ جەر - جەرىندەگى كاسىپورىندار جۇمىستى، ٴوندىرىستى قالپىنا كەلتىرۋدىڭ ”اتوي دابىلىن“ قاقتى، ٴوندىرىس جەلىسى جەدەل اينالىمعا ٴتۇسىپ، تاپسىرىستى ۋاعىندا ٴبىتىرۋ ٴۇشىن ۋاقىتپەن جارىسا جۇمىس ىستەدى، ”جىل باسىندا اتوي سالۋدىڭ“ كۇرەس كارتيناسى دابىرالى باستالدى.

قورعاس ەكونوميكالىق اشۋ رايونى چيڭشۇيحى سايكەستى باقشا رايونىنداعى شينجياڭ فيياڭ شيانفىڭ بيو عىلىم ـ تەحنيكا شەكتى سەرىكتەستىگىنىڭ دايىن ارالاسپا جەم ٴوندىرۋ سەحىندا بۇكىلدەي اۆتوماتتانعان ٴوندىرىس جەلىسى جوعارى قارقىنمەن جۇمىس جۇرگىزۋدە. داعار - داعار وڭدەلگەن جەم ۇلاسپالى جەلىدە جىلدام اينالىمعا ٴتۇسىپ، قاپتاۋ، ارالاستىرۋ، قالتالاردىڭ اۋزىن تىگۋ سياقتى جۇمىس تارتىپتەرىنەن وتكەننەن كەيىن رەت شارتتى تاڭباسى باسىلىپ، تارازىلانىپ جاتتى.

”2 - ايدىڭ 2 - كۇنى كاسىپورىن جۇمىستى جاپپاي قالپىنا كەلتىرىپ، قۇلجا اۋدانىنان كەلگەن 18 توننا تاپسىرىستى ورىندادىق، قازىر ٴبىز تارباعاتاي ايماعىنىڭ ٴدوربىلجىن اۋدانى مەن بۇراتالا موڭعۇل اۆتونوميالى وبلىسىنىڭ 32 توننا جەم تاپسىرىسىن جەدەل ٴوندىرىپ جاتىرمىز، تەز ارادا تاپسىرامىز!“ دەدى باس ديرەكتورى يۇي حاي.

شينجياڭ فيياڭ شيانفىڭ بيو عىلىم - تەحنيكا شەكتى سەرىكتەستىگى ـــ 2021 - جىلى قۇرىلعان، مال دارىلەرىن، جەم جانە دايىن ارالاسپا جەم سياقتىلاردى ارناۋلى زەرتتەپ اشاتىن، وندىرەتىن، ساتاتىن جانە ازىرلەيتىن ٴىرى تۇرپاتتى بيولوگيالىق ٴدارى جاساۋ كاسىپورنى. قازىر بۇل كاسىپورىندا بۇكىلدەي اۆتوماتتانعان 16 ٴوندىرىس جەلىسى بار، مۇنىڭ ىشىندە  مال دارىلەرىن وندىرەتىن 12 جەلى، جەم - ٴشوپ وندىرەتىن 4 جەلى بار. 2024  ـ جىلى 9 ـ ايدا جەم مانەرلەيتىن 4 ٴوندىرىس جەلىسى جاپپاي جۇمىس باستاپ، سول جىلى ٴبىر مىڭ 400 توننادان استام ٴتۇرلى جەم ٴوندىرىپ، 8 ميلليون يۋاننان استام ٴونىم قۇنىن جاراتتى. 

ورايدى الدىمەن يگەرۋ ٴۇشىن، كاسىپورىن مەرەكەدەن بۇرىن شيكىزاتتى تولىق دايىنداپ، مەرەكەدەن كەيىن بارلىق جۇمىسشىلاردى دەرەۋ جۇمىس ورنىنا قايتۋعا ۇيىمداستىرىپ، تاپسىرىستىڭ ۇزدىكسىز جالعاسۋىنا شىنايى كەپىلدىك ەتتى. كاسىپورىن بيىل مال ٴدارىسىنىڭ G M P تەكسەرىپ وتكىزىپ الۋىنان ٴوتىپ، 4 - 6 مال ٴدارىسى ٴوندىرىس جەلىسىنىڭ وندىرىسكە قوسىلۋىن ٴارى وڭىرلىك ابزالدىقتان پايدالانىپ، ورتا ازيا بازارىنا كىرۋدى جوسپارلاعان. ”’ىلەنىڭ جاساۋ كاسىبىن‘ حالىقاراعا بەت الدىرۋ ــ كاسىپورىنداردىڭ بيىلعى قىزمەتىندەگى ەڭ ماڭىزدى ٴتۇيىن!“ دەدى يۇي حايشين تەبىرەنە.

سول كۇنى قورعاس ەكونوميكالىق اشۋ رايونىنداعى شينجياڭ حىڭتاي توقىماشىلىق شەكتى سەرىكتەستىگىنىڭ ٴوندىرىس سەحىندا 200 گە جۋىق تولىق اۆتوماتتى زەردەلى قولعاپ جاساۋ ماشيناسى جوعارى جىلدامدىقپەن جۇمىس جۇرگىزۋدە.

ەڭبەككە پايدالانىلاتىن قولعاپ ٴوندىرۋ سالاسىنداعى ”اتسىز قاھارمان“ رەتىندە، بۇل كاسىپورىن زەردەلى قولعاپ توقۋ ماشيناسىنان 800 ىن، جەلىمگە شىلاۋ ۇلاسپالى جەلىسىنەن ەكەۋىن ورناتىپ، جىلدىق ٴونىم مولشەرىن 300 ميلليون پار قولعاپقا جەتكىزىپ، %80 ٴونىمىن ورتا ازيا، شىعىس ەۆروپا سياقتى جەرلەرگە جەتكىزدى. شەتەلدەگى ورنىقتى تاپسىرىس بويىنشا، كاسىپورىن 2 - ايدىڭ 5 - كۇنى تۇتاس لەنيا بويىنشا جۇمىستى قالپىنا كەلتىرىپ، كۇندىك ورتاشا ٴونىم مولشەرىن 50 مىڭ پار قولعاپقا جەتكىزدى. ”سەرىكتەستىكتىڭ سوڭعى جارتى جىلداعى تاپسىرىسى دا قابىلدانىپ بولدى، ٴسوز جوق، بار كۇشتى جۇمىلدىرا ىستەۋىمىز كەرەك!“ دەدى شينجياڭ حىڭتاي توقىماشىلىق شەكتى سەرىكتەستىگىنىڭ ورىنباسار باستىعى سۋ ي كۇلىپ.