كەرەكسىزدى اسىلعا اينالدىرادى
ىلەدەگى بۇل كاسىپورىن كەرەكتەن شىققان اۆتوموبيلدەردى كەرەككە جاراتتى
ٴتىلشىمىز مىڭ شيا حابارلايدى. كەرەكتەن شىعارۋعا ٴتيىستى اۆتوموبيل نەمەسە اۋىل شارۋاشىلىق ماشينا جۇرگىزبەسەڭىزدە، قوقىر - قوقسىق شىعارىپ، ورتانى لاستايدى. ۋاقىت وتە كەلە، مۇنداي كەرەكتەن شىققان ماشينادا وزدىگىنەن ورتەنۋ سياقتى حاۋىپسىزدىك كومەسكى قاتەرى تۋىلۋى مۇمكىن. بيڭتۋان 4 - شىسى 70 - تۋانىنا ورنالاسقان شينجياڭ جينتيڭ كەرەكتەن شىققان اۆتوموبيلدەردى جيناپ الۋ، بولشەكتەۋ شەكتى جاۋاپكەرشىلىك سەرىكتەستىگى ”بايلىقتى قايتا تۋىنداتىپ، اينالمالى ەكونوميكانى دامىتۋدى“ تياناق ەتىپ، كەرەكتەن شىققان اۆتوموبيلدەردى كەرەككە جاراتۋ جولىن اشتى.
2 - ايدىڭ 13 - كۇنى ٴتىلشى شينجياڭ جينتيڭ كەرەكتەن شىققان اۆتوموبيلدەردى جيناپ الۋ، بولشەكتەۋ شەكتى جاۋاپكەرشىلىك سەرىكتەستىگىنىڭ بولشەكتەۋ سەحىنا بارعاندا، ٴبىر جەڭىل اۆتوموبيلدى سوگۋ ارقىلى ىشكى بولەگىندەگى اۆتول مايى، جانارماي، رول مايى، تورموز مايى سياقتى سۇيىقتىقتاردىڭ شىعارىپ الىنىپ، عىلمي جولمەن ٴبىر جاقتى ەتىلىپ جاتقانىن كوردى. جىنتىكتەي سوگۋ رايونىنا كىرگەننەن كەيىن جەڭىل اۆتوموبيل ۇساق بولشەكتەرگە اينالىپ شىعا كەلدى.
”سوگىلگەن زاپچاستاردى، كەرەكسىز مەتالداردى كەيىنگى مەزگىلدە قايتالاي پايدالانۋعا بولادى؛ حاۋىپسىزدىك قالتقىسى، ىشكى اشەكەيى سياقتى كەرەكسىز سۋلياۋلاردان جاڭا سۋلياۋ تۇيىرشىكتەرىن جاساۋعا بولادى؛ ماشينانىڭ اينەگى، بالونى، شىراقتارىنىڭ بارلىعىن جيىپ الىپ قايتالاي پايدالانۋعا بولادى“. وسى سەرىكتەستىكتىڭ باس ديرەكتورى حى جىنچيان تىلشىگە بىلاي دەدى: ٴبىزدىڭ ٴار رەتكى سوگۋ جۇمىسىمىزدىڭ عىلمي نەگىزى بار، زياندى زاتتاردى دا شوعىرلى تۇرگە ايىرىپ، ونان سوڭ كاسىپتىك قىزمەتكەرلەر كاسىپتىك تۇرعىدان ٴبىر جاقتى ەتەدى، وسىلايشا ٴارى قايتالاي پايدالانۋعا كەپىلدىك ەتۋگە، ٴارى كەرەكتەن شىققان اۆتوموبيلدەردىڭ ورتانى لاستاۋىن ازايتۋعا بولادى.
61 جاستاعى حى جىنچيان بۇرىن اسكەري شيپاگەر بولاتىن، اسكەري بولىمدە 18 جىل مىندەت وتەگەن، 1999 - جىلى اسكەردەن بوساعاننان كەيىن، قۇلجا قالاسى چوڭكورىك ٴمالى باسقارماسى الەۋمەتتىك اۋماق دەنساۋلىق ساقتاۋ قىزمەت وتەۋ ورتالىعىنا بارىپ الەۋمەتتىك دەنساۋلىق ساقتاۋ قىزمەت وتەۋ قىزمەتىمەن شۇعىل−دانعان. 2020 - جىلدىڭ الدى - ارتىندا حى جىنچيان قايتا تۋىندايتىن بايلىق مەملەكەت زور كۇشپەن ىلگەرىلەتكەن، تەبىندەپ كەلە جاتقان كاسىپ سالاسىنا اينالعاندىعىن بايقاپ، ٴبىر مەزگىل بازارعا تەكسەرۋ - زەرتتەۋ جۇرگىزۋ ارقىلى ول كەرەكتەن شىققان اۆتوموبيلدەردى جيناپ الۋ، سوگۋ كاسىبىنە باتىلدىقپەن قادام تاستاپ، قايتادان شارۋاشىلىق قۇردى. 2020 - جىلى ساۋداگەر شاقىرىپ، قارجى ەنگىزۋ ارقىلى بيڭتۋان 4 - شىسىنداعى تۇڭعىش كەرەكتەن شىققان اۆتوموبيلدەردى بولشەكتەۋ سەرىكتەستىگى − شينجياڭ جينتيڭ كەرەكتەن شىققان اۆتوموبيلدەردى جيناپ الۋ، بولشەكتەۋ شەكتى جاۋاپكەرشىلىك سەرىكتەستىگىن قۇردى.
ەلىمىز ەكونوميكاسىنىڭ تەز قارقىنمەن دامۋىنا بايلانىستى كەرەكتەن شىققان اۆتوموبيلدەردىڭ سانى دا جىل سايىن قاۋىرت ارتتى. حى جىنچيان تىلشىگە بىلاي دەدى: كوپتەگەن كەرەكتەن شىققان اۋىل شارۋاشىلىق اۆتوموبيلدەرىنىڭ، جەڭىل اۆتوموبيلدەردىڭ ەگىس اتىزدارىنىڭ جاعاسىندا، جول شەتىندە نەمەسە ۋاقىتتىق اشىق جەردە تۇرعانىن ۇنەمى كورەمىز، قىرۋار جەردى يەلەپ قانا قويماي، مايى اعۋ، ىدىراۋ بارىسىندا ورتانى اۋىر دارەجەدە لاستايدى، ەڭ باستىسى حاۋىپسىزدىك كومەسكى قاتەرى بار، مىسالى، اۆتوكولىكتەردى كەرەكتەن شىعارۋ رەسمياتىن وتەپ ٴبىر جاقتى ەتپەسە، ۇرلانۋى مۇمكىن، الدا - جالدا وسىدان بارىپ كەزدەيسوق ىستەر، شىرعالاڭ سياقتى ماسەلەلەر تۋىلسا، بارلىعى كولىك يەسىنە اۋرەشىلىك تۋدىرىپ، تاعى دا كولىك ساتىپ الۋى قيىنعا سوعادى.
ۇعىسۋعا قاراعاندا، كەرەكتەن شىققان اۆتوموبيلدەردى بولشەكتەۋ، جيناپ الىپ پايدالانۋ جاسىلدىقتىڭ، ورتانى قورعاۋدىڭ جاڭا جولى بولىپ، تاعى ٴبىر جاعىنان ەلىمىزدىڭ اينالمالى ەكونوميكاسىنىڭ دامۋىن زور كۇشپەن ىلگەرىلەتەدى ەكەن.
بىلتىر مەملەكەت كەرەكتەن شىققان اۆتوموبيلدەرگە تولىقتاما بەرۋ جاڭا ساياساتىن ورتاعا قويدى، شارتقا سايكەس كەلەتىن وتباسىلىق اۆتوموبيلدەر كەرەكتەن شىعارىلعاننان كەيىن بارىپ جاڭا ەنەرگيالىق اۆتوموبيلدەردى ساتىپ السا 20 مىڭ يۋان تولىقتاما بەرىلەدى، ماي سارىپ ەتۋ مولشەرى 2.0 دەن تومەن جانارماي اۆتوموبيلدەرىن ساتىپ السا 15 مىڭ يۋان تولىقتاما بەرىلەدى. ”ٴبىز اۋىل - قىستاقتى ارالاپ، اۆتوكولىكتەردى كەرەكتەن شىعارۋ، جيناپ الۋ قىزمەتىن جۇرگىزگەن كەزدە مەملەكەتتىڭ وسى ابزال ساياساتىن زور كۇشپەن ۇگىتتەپ، ساياساتتى ەگجەي - تەگجەيلى، انىق تۇسىندىرەمىز“. حى جىنچيان بىلاي دەدى: ”ٴبىز كەرەكتەن شىققان اۆتوموبيل اينالمالى ەكونوميكا كاسىپ سالاسىنا توتەنشە سەنىمدىمىز، قازىر كەرەكتەن شىققان اۆتوموبيلدىڭ جوعارى - تومەنگى بۋىندارىن كاسىپ سالاسى بويىنشا جايعاستىرۋدامىز، مىسالى، بالون، بولشەكتەردى جيناپ الىپ پايدالانۋ سياقتىلار؛ كاسىپتىك مەكتەپتەرمەن سەلبەستىك جاساپ، پراكتيكا بازاسىن قۇرىپ، قاتىستى كاسىپورىندارعا كاسىپتىك دارىندى تاربيەلەپ بەرەمىز“.
قازىر ىلە وبلىسىنىڭ اۆتوموبيل سوگۋ كاسىبى بولشەكتەۋ بۋىندارىن وزەك ەتىپ، جوعارى اعاردا كەرەكتەن شىققان اۆتوموبيلدەردى جيناپ الۋعا، باسەكەلەستىرىپ ساتۋعا دەيىن كەڭەيىپ، تومەنگى اعاردا ۇساق بولشەكتەردى قايتا قالپىنا كەلتىرۋگە، مەتال مەن بەيمەتال ماتەريالداردى قايتالاي پايدالانۋعا دەيىن جەتىپ، بايلىقتى قايتالاي پايدالانۋ جولى بارعان سايىن كەڭەيدى.