ٴتىلشىمىز چىن يىڭ، ەرىكتى تىلشىلەر مايرا، جاڭ بونيان حابارلايدى. چيڭميڭ دەمالىسىنىڭ الدى - ارتىندا ىلە اڭعارىنىڭ اۋا تەمپەراتۋراسى جوعارىلاپ، جاڭبىر مول بولىپ، كوكتەمگى ەگىس ٴوندىرىسىنىڭ شەشۋشى مەزگىلىنە قادام تاستادى. وبلىسقا توتە قاراستى اۋدان، قالالار ەگىس ۋاقىتىن مىقتى يگەرىپ، جارعاق جابۋ، تۇقىم سەبۋ، تىڭايتقىش بەرۋ سياقتى اۋىل شارۋاشىلىق قيمىلدارىن بەلسەنە ورىستەتىپ، اتىز باسىندا قاربالاستىققا ٴتۇستى.

3 - ايدىڭ 27 - كۇنى قورعاس اۋدانى كۇرە قالاشىعى يحۇي كوكونىس ەگۋ كاسىپتىك سەلبەستىك كووپەراتيۆىنىڭ كوكونىس ەگۋ بازاسىندا شارۋالار كارتوپ ەگۋمەن قاربالاستىققا ٴتۇستى. بەيدوۋ جول نۇسقاۋ تەحنولوگياسىنان پايدالاناتىن تۇقىم سەبۋ ماشيناسى اتىزدا ٴبىر قالىپتى ٴجۇرىپ، شونەكتەۋ، تىڭايتقىش بەرۋ، تۇقىم سەبۋ، جارعاق جابۋ، تامشىلاتىپ سۋارۋ تۇتىكشەسىن جاتقىزۋ سياقتى جۇمىس بۋىندارىن ٴبىر جولدا ورىندادى.

اۋىل شارۋاشىلىق ماشينالارىن جۇرگىزۋشى جياڭ شۇنيان تىلشىگە بىلاي دەدى: ماشينامەن تۇقىم ٴسىڭىرۋدىڭ ونىمدىلىگى ادام كۇشىمەن تۇقىم سىڭىرۋدەن 5 تە 6 ەسە جوعارى، ٴار كۇنى شامامەن 30 مۋ جەرگە تۇقىم سىڭىرۋگە بولادى، مۇنىمەن قوسا تەرەڭدىگى مەن ٴتۇپ ارالىعىن دالمە - ٴدال مەڭگەرۋگە بولادى.

ەگىنشى جىڭ جىچياڭ بىلاي دەدى: بيىل 250 مۋ جەرگە كارتوپ ەكتىم، مۋ باسىندىق ٴونىمى 4.5 تونناعا جەتەتىندىگى مەجەلەنۋدە، 7 - ايدىڭ ورتا شەنىندە جيىن - تەرىننەن كەيىن بايساي، لوبى سياقتى داقىلداردى قايتالاي ەگىپ، ٴبىر جىلدا ەكى رەت ٴونىم الۋدى جۇزەگە اسىرماقشىمىن.

قورعاس اۋداندىق اۋىل شارۋاشىلىعى، اۋىل - قىستاق مەكەمەسى تەحنيكتەردى كوكتەمگى ەگىس جۇمىسىنىڭ ٴبىرىنشى شەبىنە بارىپ، شارۋالاردىڭ عىلمي جولمەن ەگىن ەگۋىنە جەتەكشىلىك ەتۋگە ۇيىمداستىردى. وسى اۋداننىڭ ەگىنشىلىك تەحنيكاسىن جالپىلاستىرۋ پۋنكتىنىڭ تەحنيگى بۇايشام تۇرسىن بىلاي دەپ تانىستىردى: چيڭميڭ كەزىندەگى كۇن نۇرىنىڭ ٴتۇسۋ شارت - جاعدايى كارتوپتىڭ كوكتەۋىنە ٴتيىمدى، ماشينامەن تۇقىم ٴسىڭىرۋ جانە عىلمي باسقارۋ ارقىلى مايسا جەتىلدىرۋ مولشەرىن %95 تەن اسىرۋعا بولادى دەپ مەجەلەپ وتىرمىز. چيڭميڭ مەرەكەسىنىڭ الدى - ارتى ٴبيدايدىڭ ٴونىم مولشەرى ورنىعاتىن شەشۋشى كەزەڭ سانالاتىندىقتان، سۋلى تىڭايتقىش بەرۋ مەن دەرت - دەربەزدەن، زياندى جاندىكتەردەن ساقتانۋ جانە ونى جويۋدى جاقسى يگەرۋىمىز كەرەك.

قازىر ىلە اڭعارىندا دۇمبە ٴبيدايدىڭ كوكتەيتىن مەزگىلى. قۇلجا اۋدانى جاڭاتام قالاشىعى بورشى قىستاعىنىڭ دۇمبە ٴبيدايدان جوعارى ٴونىم الۋدان ۇلگى كورسەتۋ اتىزىندا شينجياڭ ٴبيداي كاسىپ سالاسى تەحنولوگيا جۇيەسىنىڭ مامانى حۇڭ شۋەمەي تۇرلىشە مايسا جاعدايىنا مەڭزەس، شارۋالاردىڭ حيميالىق جولمەن مەڭگەرۋ تەحنيكاسىنان عىلمي پايدالانۋىنا جەتەكشىلىك ەتىپ، ”ٴبىر اتىزعا ٴبىر شارا قولدانۋ“ سىندى باپتاۋ جوباسىن جاسادى.

بيىل كوكتەمگى ەگىس كەزىندە وبلىسقا توتە قاراستى اۋدان، قالالار اۋىل شارۋاشىلىق عىلىم - تەحنولوگياسىن جالپىلاستىرۋ تەبىنىن ارتتىرىپ، ماماندار مەن تەحنيكتەردى اتىز باسىنا بارىپ، ديقاندارعا تەحنولوگيالىق جاقتان جەتەكشىلىك ەتىپ جانە قىزمەت وتەۋگە ۇيىمداستىرىپ، كوكتەمگى ەگىس ٴوندىرىسىنىڭ ٴساتتى جۇرگىزىلۋىنە كەپىلدىك ەتتى.