سۋرەتتە: جۇمىسشىلار قىزىل بۇرىش مايساسىن وتىرعىزۋدا. ما ليڭيان فوتوسى
ەرىكتى تىلشىلەر ما ليڭيان، گۇلنيگار حابارلايدى. قازىر قىزىل بۇرىشتى كوشىرىپ ەگۋدىڭ ٴتۇيىندى مەزگىلى، قورعاس قالاسى شيڭچىڭ ٴمالى باسقارماسى حىشيە الەۋمەتتىك اۋماعىنداعى ەگىنشى جاڭ گوباۋ مەن جۇمىسشىلار ەگىس ۋاقىتىن مىقتى يگەرىپ، كوشەت كوشىرۋ سياقتى جۇمىستاردى قاربالاس ىستەدى.
ٴىرى ەگىمشىلىك وتباسى بولعان جاڭ گوباۋ ٴتۇرلى ەگىمشىلىك ۇلگىسى جونىندە بەلسەنە سىناق جۇرگىزىپ، ۇلكەن اتىزداعى جۇگەرىدەن، ٴجۇزىم، الحورى، الما سياقتىلاردان مول ٴونىم الۋعا دەيىن قايتا ـ قايتا سايىس جاريالاۋ بارىسىندا كىرىستىڭ ارتۋىن جۇزەگە اسىردى. ”بيىل 10 مۋ جەرگە قىزىل بۇرىش ەكتىم، قىزىل بۇرىش سورتى وڭتۇستىك شينجياڭنان ەنگىزىلگەن چيۋشياڭ 2 ـ ٴنومىر، كىرىسى دە جۇگەرىدەن الدەقايدا جوعارى، كەلەر جىلى ەگىس كولەمىن كەڭەيتۋدى جوسپارلاپ وتىرمىن“، - دەدى جاڭ گوباۋ.
قىزىل بۇرىش ەگۋ ەڭبەك شوعىرلانعان كاسىپ، مايسا جەتىلدىرۋ، جەر تەگىستەۋ، كوشىرۋدەن سوڭعى باپتاۋ، جيناۋ، مانەرلەۋ سياقتى بۋىندارعا دەيىن قىرۋار جۇمىسشى قاجەت ەتەدى، بۇل تۇرعىنداردىڭ جاقىن ماڭدا جۇمىستانۋىنا دا ٴتيىمدى بولدى.
حىشيە الەۋمەتتىك اۋماعىنىڭ تۇرعىنى ياۋ ايجۇن قىزىل بۇرىش مايساسىن ادەمىلەپ ەگە وتىرىپ: ”بۇل ارادا جۇمىس ىستەگەندە وتباسىمداعىلارعا قارايلاسۋعا ىقپال جەتكىزبەيمىن، بىرنەشە ادام وسى ارادا بىرگە جۇمىس ىستەپ، اڭگىمە دۇكەنىن قۇرساق تا ساعاتىنا 20 يۋان، كۇنىنە 160 يۋان تابامىز، قاتتى شارشاپ تا كەتپەيسىز“، - دەدى.
سوڭعى جىلداردان بەرى حىشيە الەۋمەتتىك اۋماعى ەرەكشە كاسىپتەردى دامىتۋدى قىستاقتى الۋەتتەندىرىپ، حالىقتى اۋقاتتاندىرۋدىڭ ماڭىزدى تۇتقاسى ەتىپ، كاسىپ جوباسىن ويداعىداي جاساۋ، كاسىپ ورنالاسۋىن، ەگىمشىلىك قۇرىلىمىن ساپالىلاندىرۋ ارقىلى بۇقارانى ەرەكشە ەگىمشىلىككە قاتىناسۋعا جەتەكتەدى. حىشيە الەۋمەتتىك اۋماعىنىڭ ٴبىرىنشى شۋجيى سۋ چياڭ بىلاي دەدى: ”ٴبىز ماشينالاسقان ەگىنشىلىك تەحنيكاسىن بەلسەنە جالپىلاستىرىپ، ٴوندىرىس ونىمدىلىگىن جوعارىلاتىپ، اۋىل شارۋاشىلىعى ونىمدەرىنىڭ ساپاسى مەن ٴونىم مولشەرىن ارتتىردىق. سونىمەن بىرگە، ’سەلبەستىك كووپەراتيۆى + شارۋا وتباسى‘ ۇلگىسى ارقىلى ەگىمشىلىك وتباسىلارىمەن ساتىپ الۋ كەلىسىمىنە قول قويىپ، كوپشىلىكتىڭ الاڭسىز ەگىن ەگۋىنە، ساتۋدان قينالماۋىنا، كىرىستى ارتتىرىپ، بايۋ جولىنا بىرگە تۇسۋىنە مۇمكىندىك جاسادىق“.