انار بۇلت \ شينجياڭ گازەتىنىڭ ءتىلشىسى دۇڭ لياڭ 10 - ايدىڭ 8 - كۇنى ۇرىمجىدەن حابارلايدى. 10 - ايدىڭ 8 - كۇنى كەشتە 19 - كەزەكتى ازيا سپورت جارىسى حاڭجوۋ وليمپيادا سپورت ورتالىعىنىڭ دەنە تاربيە الاڭىندا تابىسپەن اياقتادى. شينجياڭ دەنە تاربيە ساڭلاقتارىنىڭ بەينەسى كورنەكتى بولىپ، جۇڭگو دەنە تاربيە ۋاكىلدەر ۇيىرمەسىنە 2 التىن، 3 كۇمىس، 3 قولا مەدال الىپ بەرىپ، ازيا سپورت جارىسىنا قاتىناسۋ تاريحىنداعى ەڭ جاقسى ناتيجەنى جاراتتى.

　　وسى كەزەكتى ازيا سپورت جارىسىندا جالپى 8 سپورتشىنى اۆتونوميالى رايوندىق دەنە تاربيە مەكەمەسى ءارقايسى مەملەكەتتىك قۇرامالارعا جىبەرىپ، ءبارى مەدال الدى. ولاردىڭ اراسىندا قايراڭ ۆولەيبول سپورتشىسى شيا شين - ي مەملەكەت كومانداسىنداعى سەرىگى شۋە چىنمەن بىرگە ايەلدەردىڭ قايراڭ ۆولەيبول شەشۋشى جارىسىندا ويداعىداي سايكەسىپ، 0: 2 ۇپايمەن ارىپتەستەرى جاپونيا قۇراماسىن جەڭىپ، ءبىر التىن مەدال الدى، بۇل دا شيا شين - يدىڭ ءۇرتىس 3 كەزەك ازيا سپورت جارىسىندا جۇڭگو دەنە تاربيە ۋاكىلدەر ۇيىرمەسىنە التىن مەدال الىپ بەرۋى بولدى. بوكس سپورتشىسى توقتاربەك تاڭاتقان ەرلەر بوكسىنىڭ 80 كيلوگرامدىق شەشۋشى جارىسىندا 0: 5 ۇپايمەن فيليپپيندىك بوكس شەبەرى يۋمار فريكس ماشياردى جەڭىپ، ەڭ جوعارى سيلىق مىنبەسىنە شىقتى، بۇل − شينجياڭ بوكس شەبەرلەرىنىڭ تۇڭعىش رەت ازيا سپورت جارىسىندا جۇڭگو دەنە تاربيە ۋاكىلدەر ۇيىرمەسىنە التىن مەدال الىپ بەرۋى.

　　ات ونەرى سپورتشىسى لان چاۋ مەملەكەت كومانداسىنداعى سەرىگىمەن بىرگە ات ونەرىنىڭ سالتاناتتى ءبي ءجۇرىسى توپتىق شەشۋشى جارىسىندا كۇمىس مەدال الدى؛ قايراڭ ۆولەيبول سپورتشىسى ابدۇحالىقجان ءمۇتالىپ مەملەكەت كومانداسىنداعى سەرىگى ۋ جياشينمەن بىرگە ەرلەردىڭ قايراڭ ۆولەيبول شەشۋشى جارىسىندا كۇمىس مەدال الدى؛ ساداق اتۋ جاس شەبەرى ان چيشۋان جۇڭگو ايەلدەر ساداق اتۋ كومانداسىنداعى سەرىگىمەن بىرگە ايەلدەردىڭ تەرىس يمەكتى ساداق توپتىق شەشۋشى جارىسىندا كۇمىس مەدال الدى؛ جەڭىل اتلەتيكا سپورتشىسى ابدۇعاني تۇرعۇن ەرلەردىڭ دەسكى تۇرىندە قولا مەدال الدى؛ كۇرەس سپورتشىسى كابيران ءابۋشايمان ەرلەردىڭ ەركىن تۇردەگى كۇرەسى 97 كيلوگرامدىق جارىسىندا قولا مەدال الدى؛ باسكەتبول سپورتشىسى جاۋ رۇي جۇڭگو ەرلەر باسكەتبول كومانداسىنداعى سەرىكتەرىمەن بىرگە ءبىر قولا مەدال الدى.

　　مۇنان سىرت، شينجياڭنان شىققان دەنە تاربيە ساڭلاقتارى دا ءوز ونەرلەرىن ايتارلىقتاي ساۋلەلەندىردى. اقسۋ قالاسىنان كەلگەن ادىلجان سۇلتان ەرلەردىڭ 4 ادامدىق جارىس قايىعىن قوس ەسكەكپەن ەسۋ شەشۋشى جارىسىندا ءبىر التىن مەدال الدى؛ تارباعاتاي ايماعى ءدوربىلجىن اۋدانىنان كەلگەن بايقونىس دانابەك ەرلەر بوكسىنىڭ 92 كيلوگرامنان جوعارىلاردىڭ جارىسىندا قولا مەدال الدى؛ ءۇرىمجى قالاسىنان كەلگەن حۋ ميڭشۋان كورلا قالاسىنان كەلگەن حۋ جينچيۋمەن، جاۋ رۇيمەن بىرگە جۇڭگو ەرلەر باسكەتبول كومانداسى ءۇشىن قولا مەدال الدى؛ قاشقاردان كەلگەن كىشكەنتاي شەبەر ابىلاحان حالىق پەن التايدان كەلگەن كىشكەنتاي شەبەر ەلجان شىنار جۇڭگو ەرلەر فۋتبول كومانداسىمەن بىرگە 8 مىقتى قاتارىنا ءوتتى.

　　”وسى كەزەكتى ازيا سپورت جارىسىندا جۇڭگو كومانداسىنداعى شينجياڭ سپورتشىلارى ۇزدىك ناتيجەگە قول جەتكىزىپ، وتان ءۇشىن داڭق اپەرۋ، شينجياڭنىڭ ابىرويىن اسىرۋ نىساناسىن جۇزەگە اسىردى“، - دەدى اۆتونوميالى رايوندىق دەنە تاربيە مەكەمەسى پارتيا باسشىلىق گرۋپپاسىنىڭ مۇشەسى، ورىنباسار مەكەمە باستىعى شاڭ حۇڭبو. شينجياڭ دەنە تاربيە ساڭلاقتارى حاڭجوۋ ازيا سپورت جارىسى كەزىندە جان قيارلىقپەن شايقاسىپ، تاماشا ناتيجەگە قول جەتكىزدى، بۇل شينجياڭنىڭ سوڭعى جىلداردان بەرى باسەكەلىك دەنە تاربيەنى دامىتۋ بارىسىندا ”وتان داڭقىن بارىنەن جوعارى قويۋعا“ تاباندى بولىپ، باسقارۋدى قاتايتىپ، عىلمي جاتتىعۋ جۇرگىزگەندىگىنىڭ ناتيجەسى. شينجياڭ دەنە تاربيە ساڭلاقتارىنىڭ داندايسىماي، كۇش ۇستىنە كۇش قوسىپ، پاريج وليمپيادا سپورت جارىسىنىڭ دايىندىق قىزمەتتەرىن ۇزدىكسىز ويداعىداي ىستەپ، جۇڭگو كومانداسى ءۇشىن ءتىپتى دە كوپ جاڭا ناتيجەلەردى الىپ بەرۋگە كۇش سالۋىن تىلەيمىز!