فۋتبول دارىندىلارىن كادەگە جاراتىپ، جاستار جاتتىعۋ لاگەرىنىڭ ساپاسىن جوعارىلاتپاق

ىلە وبلىسى باتىس بولەكتەگى جاس فۋتبولشىلاردى جاتتىقتىرۋ سىناق ٴتۇيىنى نىسانىن باستاماقشى

ٴتىلشىمىز ليۋ چۇنشيڭ حابارلايدى. 2023 - جىلى 12 - ايدىڭ 28 - كۇنى باتىس بولەكتەگى رايونداردىڭ دەنە تاربيە مەن وقىتۋ توعىسقان فۋتبولشى جاستاردى جاتتىقتىرۋ جۇيە قۇرىلىسى سىناق ٴتۇيىنى كەلىسىمىنە قول قويۋ سالتى بەيجيڭدە وتكىزىلدى. ىلە بۇكىل ەل بويىنشا تۇڭعىش توپتا وسى كەلىسىمگە قول قويىسقان ايماق - وبلىستاردىڭ ٴبىرى بولىپ، باتىس بولەكتەگى رايونداردىڭ دەنە تاربيە مەن وقىتۋ توعىسقان فۋتبولشى جاستاردى جاتتىقتىرۋ جۇيە قۇرىلىسى سىناق ٴتۇيىنى نىسانىن (تومەندە قىسقارتىلىپ باتىس بولەكتەگى جاس فۋتبولشىلاردى جاتتىقتىرۋ سىناق ٴتۇيىنى نىسانى دەلىنەدى) باستاماقشى.

قول قويۋ سالتىندا مەملەكەتتىك دەنە تاربيە باس مەكەمەسىنىڭ ورىنباسار باستىعى ليۋ گويۇڭ بىلاي دەدى: فۋتبولدى قامتىعان ٴۇش ۇلكەن دوپ كاسىبىن وركەندەتۋ − دەنە تاربيەدە قۇدىرەتتى ەل قۇرۋدىڭ ٴتۇيىندى مىندەتى، دەنە تاربيە باس مەكەمەسىنىڭ باتىس بولەكتەگى جاستار جاتتىعۋىن تۇيىندە سىناق ەتۋ نىسانىن باستاۋى − فۋتبول رەفورماسىنىڭ دامۋىنا نازار اۋدارۋداعى جانە دەنە تاربيە مەن وقىتۋدىڭ توعىسۋىن تەرەڭدەتۋدەگى ماڭىزدى شارا. تۇيىندە سىناق ەتۋگە قاتىناسقان قاتىستى ورىنداردىڭ ساياسي دەڭگەيدى ونان ارى جوعارىلاتىپ، يدەيانى، تانىمدى جانە ارەكەتتى بىرلىككە كەلتىرىپ، بالا كەزدەن، نەگىزگى ساتىدان، بۇقارالىق ات سالىسۋدان باستاپ تياناقتاندىرىپ، بۇقارالىق نەگىزدى ويداعىداي قالاپ، دارىندىلار نەگىزىن بەكەمدەۋىن ٴۇمىت ەتەمىن.

جۇڭگو فۋتبولدى دامىتۋ قور قوعامى سىناق ٴتۇيىنى ورىندارى تۇرعان ولكە دارەجەلى دەنە تاربيە اكىمشىلىك تاراۋلارىمەن، قالالىق ۇكىمەتتەرمەن ٴبىر - بىرلەپ سەلبەستىك كەلىسىمىنە قول قويدى. بۇعان العاشقى توپتا تاڭدالعان قاشقار، ىلە، جىدان، بيجيە، لياڭشان، يانبيان، مەيجوۋ، گانجوۋ سىندى 8 رايون جەرگىلىكتى جاعدايعا قاراي ىستەپ، ٴبىر قالادا ٴبىر شارا قولدانىپ، سىناق ٴتۇيىنى قىزمەتىنىڭ باياندى، اقاۋسىز دامۋىن كۇش بىرىكتىرە ىلگەرىلەتەدى.

ىلە وبلىستىق فۋتبول قوعامىنىڭ باس حاتشىسى جارقىن مۇقامەتكەرىم ۇلىنىڭ تانىستىرۋىنا قاراعاندا، باتىس بولەكتەگى جاستار جاتتىعۋىن تۇيىندە سىناق ەتۋ نىسانى جاڭا داۋىردەگى دەنە تاربيە مەن وقىتۋدىڭ توعىسۋىن تەرەڭدەتۋدەگى ماڭىزدى سىناق، ”جۇڭگو فۋتبول رەفورماسىنىڭ، دامۋىنىڭ جالپى تۇلعالىق جوباسىنىڭ“ تەرەڭدەۋىن، ناقتىلانۋىن ونان ارى ىلگەرىلەتۋدەگى ناقتى شاراسى، باتىس بولەكتەگى فۋتبول دارىندىلارىنىڭ ابزالدىلىعىن ونان ارى اشىپ، ەلىمىزدە فۋتبولشى جاستاردىڭ جاتتىعۋ كولەمىن كەڭەيتىپ، فۋتبولشى جاستاردىڭ جاتتىعۋ ساپاسىن جوعارىلاتىپ، فۋتبول زاپاس دارىندىلارىن جەتىلدىرۋدىڭ تاماشا ورتاسىن ازىرلەمەك. باتىس بولەكتەگى جاستار جاتتىعۋىن تۇيىندە سىناق ەتۋ نىسانىن اتقارۋ ارقىلى ٴتۇرلى فۋتبولشى جاستاردىڭ جاتتىعۋ ورتالىعىن باستاماشى ەتىپ، دەنە تاربيە مەن وقىتۋ توعىسقان فۋتبولشى جاستار جاتتىعۋىنىڭ جاڭا جۇيەسىن قۇرىپ، كوپ جاقتىڭ قولداۋىندا فۋتبول جەتكىنشەكتەرىن «بىرلەسىپ سول جەردىڭ وزىندە تاربيەلەۋدى» جۇزەگە اسىرادى. فۋتبول زاپاس دارىندىلارىن سول جەردىڭ وزىندە تاربيەلەۋ، قولداۋ تەبىنىن ارتتىرىپ ٴارى توڭىرەكتەگى رايوندارعا بىرتىندەپ ىقپال جاساپ، وڭىرلىك دارىندىلاردى تاڭداۋ، تاربيەلەۋ، جەتكىزۋ ورتالىعىن قۇرىپ، باتىس بولەكتەگى جاستار مەن ورەندەردىڭ فۋتبول دارىندىلارى بيىگىن قالىپتاستىرىپ، مەملەكەتتىك كوماندالارعا ٴتىپتى دە كوپ ٴارقايسى جاس شاماسىنداعى تاڭداۋلى دارىندىلاردى جەتىلدىرىپ بەرۋدە كورنەكتى ونىمدىلىككە قول جەتكىزۋگە كەپىلدىك ەتۋ كەرەك.